شخصي الذي أحُب جداً تبادل الاشياء والحديث معه، رُزق بأحد هِبات الله، أنا سعيدة جداً لأجله، وادعوا الله أن يُلهمه الحِكمة والصبر والقوة والمرونة والتحمل ولين القلب وسعة الصدر، ويُسعده ويشرح صدره لما وهبه، وأن يبارك فيما وهب.

آمين❤️

"يقِل بالتدريج ما يُبهجك، ودون أن يلفت الأمرُ انتباهك... تكبُر"

اها أنا جاية اقول ليكم كل عام وإنتو بخير،
ربنا يكتب ليكم الخير وين ما كان ويرضيكم،
وعيونكم تكون مليانة وما تعاينو لحاجة في يد زول،
اتمنو للناس الخير عادي ما حيشيلو رزقكم،
ولو شفتوا حاجة حلوة قولوا ما شاء الله ووروا الناس انهم جميلين ويستاهلو،
الكلمة الطيبة زيها مافي وجبر الخاطر مكانتو في القلب كبيرة،
اشتغلوا على نفسكم وأهدافكم وأعرفوا اولوياتكم،
ما تزعلوا على حاجة ما عندكم فيها يد، الجاية من الله تستحملها الواطا،
فما تجوا على نفسكم شديد،
وبما اننا بنتكلم عن النفس فأدبوها زييين وما تدلعوها،
جهاد النفس زيو مافي واجرو عند الله عظيم،
التزمو قدر ما تقدروا بالخير البسيط الفيكم وربنا يعظم خوفكم منو في قلوبكم،
مافي زول بيستاهل انو يتغذى على فرحك او يدخلك في حالة نفسية صعبة أو حسابات صعبة مع نفسك وربك واهدافك،
اخدوا قرارات وخليكم مسئوولين، اتخلوا عن الماضي بخيرو وبشرو
وعيشوا سنكم الإنتو فيهو بكل ما فيهو،
وأهم حاجتين، كلنا عارفين إنو اهلنا ربونا على الحاجة الهم شايفنها صاح،
بس اسي نحن كبار ومهما كان الحاجات العملوها واثرت على شخصياتنا سلبا
ف الأن مسئوليتنا الكاملة إنو نعدلها وما نعيش دور الضحية ونحملهم اعباء زمان واسي،
والحاجة التانية أعرف إنو انت برااااك مهما كان في ناس حواليك،
ودي حاجة كويسة ما كعبة، استشير واستخير واتوكل على الله،
وفي ناس بيجبروك انو تحترمهم، وفي ناس بيجبروك تحترمهم وتحبهم،
وفي ناس بيجبروك تنزل من مستواك،
وهو الموضوع صعب انك ما تنزل لمستواهم لكن حاول
عشان ما بعد الموضوع يخلص تستغرب في التصرف الطلع منك وتستهجنو،
وتاني وعاشر كل عام وكل شهر وكل اسبوع وكل ساعة ودقيقة وثانية
ابقوا عشرة على رويحتكم عشان أنتو لو ما بتحبوها م ح تحبو زول وخليكم تماااااام التمام.

اللهم اشفى السودان والسودانين?

01/01/2025
#وداد_فيصل_محمد

" إليه مرجعكم جميعا "

استحضار هذا المعنى، يمد عند الفتنة بالثبات، ويطّهر عند الذنب بالتوبة، ويفضح حقيقة الدنيا وزينتها بالزهد.

ويدل القلب على قطع مسافات الشوق للقاء الحق بالصبر والحب.

ما دمت راجعاً إليه، فلأرجعن بما يحب .. هذه خلاصة الأمر كله.

" وَاتَّقُوا يَوْمًا تُرْجَعُونَ فِيهِ إِلَى اللَّهِ ثُمَّ تُوَفَّى كُلُّ نَفْسٍ مَا كَسَبَتْ وَهُمْ لا يُظْلَمُونَ "

والله إنها لمخيفة عندما يتفكر الإنسان في ماذا فعل وعما هو مقبل عليه فى سبيل هوى نفسه، أن يرجع من طريق هو يعلم تماماً أنه لا يشبه خططه في شيء ويستقيم آملاً في التوبة والقبول.

يا رب .. عيشة هنية، وميتة سوية، ومرداً غير مخز ولا فاضح .. اللهم لا نرجع إليك إلا وأنت راض عنا .. محبين للقائك، محب للقائنا.

"ومن تأمل في ضخامة العلم، وقصر العمر، وكثرة متطلبات الحياة؛ أدرك حقًا أن عبارة الإمام يحيٰى بن كثير هذه: "لا يستطاع العلم براحة الجسم" إنها: لم تخرج من طرف الذهن.. ولم تكتب بحبر الأدب.. وإنما حُفرت حروفها بإزميل التجارب"

----

مسلكيات | إبراهيم السكران

وطرٌ ما فيه من عيب سوى، أنه مرّ كلمحِ البصرِ

#مرة_واحدة_ولِلأبد

حاولت مِراراً فهم الخوف، حاولت التفريق بينه وبين القِيم والمبادئ، متى يكون مانعك من أن تفعل أي شيء هو الخوف ومتى يكون مانعك قِيمك ومبادئك؟.
فتيقنت أن شعور الخوف يتنامي كلما أقترب الموعد، ثم تكتشف بعدها كم أن هذا التضخم كان فقط داخل عقلك، وأنه لم يكن إلا سراب في الربع الخالي من مُخيلتك، ستكتشف أنه كان سهلاً رغم الألم وحِدة الشعور حينها.

ثم تأتي القِيم والمبادئ على النقيض تماماً، حيث أن الشعور لا يتلاشي، يستمر التفكير في الأمر ما حييت، تحزن على كسر رابطك مع نفسك، وتحزن على حزنك، وتحزن أنك تحاول أن تجعل الأمر يبدوا هادئاً وعادياً، ولكنه ليس كذلك. ( الحلقة الجحيمية).

لكل منا قِيم يحاول الحفاظ عليها، وقد تتشابه القِيم، ولكنها المقاييس التي تختلف من شخص لأخر، فالصداقة مثلاً هي قيمة جداً سامية و كُنت لأقيسها أنا كوِداد بالمواقف والدعم، وربما يقيسها شخص أخر بالتواصل اليومي وتبادل أطراف الحديث، ربما يقيسها أخر بتذّكُر المناسبات التى تجمع بينهما.

ويبدو أن أفضل طريق للسلام الداخلي هو أن تعرف قِيم الأشخاص في دائرتك وطريقة مقياسهم لهذه القِيم، ربما يناسبك الوضع حينها، أحياناً يصل الناس لنتائج جيدة من حديث مُثمر.

ربّما يستطيع الإنسان التغلب على الخوف بداخله لفعل شيء ما، أما تخّطيك و تغلبّك على قِيمك ومبادئك فهو هدف رائع ولكن في مرماك.

#وداد_فيصل_محمد

عارفين يعني شنو الحلقة الجحيمية؟

اتخيل إنك تكون بتعاني من مشكلة معينة، مثلاً فوبيا المرتفعات، بتخاف السفر بالطائرات، والموضوع دا كل مرة بسببو حياتك بتتوقف حرفياً لأنك بتلغي السفر جواً، وبتفّضل إنك تسافر لأياااام بحراً أو براً عشان تقضي غرض معين، اتخيل ي عزيزي إنك بتحب السفر جداً، بس بتعاني من فوبيا الطائرات دا، فتجيك فترة كدا و تبدا تفكر في خوفك من الطيران والحاجات الإنت بتتخيلها لما تفكر في الموضوع، إنك تموت في الجو، ما تقدر تتنفس، تحصل حاجة في الطيارة وإنت أصلاً خايف فتخاف زيادة وتدخل في نوبة هلع قد تكون نهايتها موتك برضو، فتبدا تخاف من خوفك من الطيران، وتخاف تاني لأنك خايف من خوفك من الطيران وتدخل في دوااامة وحلقة متماسكة الأطراف.

رغم إنو الحاجة دي ي عزيزي من أسوأ الحاجات البتحصل في حياتنا إلا إنها من الحاجات البنتميز بيها نحن كبشر ألا وهي التفكير في أفكارنا، عشان كدا فعلاً فعلاً جودة أفكارك هي البتحدد جودة حياتك، فكلما كانت أفكارك جيدة أنت ح تفكر فيها أكتر وتحللها أكتر وتطلع بأفكار أحسن وأحسن، قد تكون متطرفة في بعض الأحيان لما يكون الموضوع سلبي أو حتى إيجابي، لكنها هي الحاجة البتميزنا كبشر.

الحلقة الجحيمية هي ما دائمة في حياة معظم الناس وبتجي حسب شدة الموقف على الشخص ولكنها بتكون فترة صعبة جداً في حياة الشخص دا، لغاية م يعرف كيف يتغلب عليها.

جودة حياتك من جودة أفكارك عزيزي القاريء?

#وداد_فيصل_محمد

أنا تؤذيني مشاعري