Бүгүн Саха Өрөспүүбүлүкэтин үөрэҕириитин бэтэрээннэригэр, Төҥүлү нэһилиэгин ытык олохтоохторугар
Дмитрий Филиппович уонна Розалия Трофимовна Поповтарга ыалдьыттаатым.

Ытык дьоммут үйэлэрин тухары учууталлаан үгүс көлүөнэ ыччаты иитэн-үөрэтэн таһаарбыттара. Онон иккиэннэрин бүгүҥҥү үөрүүлээх Учуутал күнүнэн бар дьоммут ааттарыттан эҕэрдэлээн туран
Дмитрий Филипповичка «Мэҥэ аат» улууспут бочуот кинигэтигэр киирбит бэлиэтин туттардым.

Дмитрий Филиппович 1936 сыл сэтинньи 10 күнүгэр Төҥүлү нэһилиэгэр күн сирин көрбүтэ, оҕо сааһа сэрии сут-кураан кэмнэригэр ааһан кыра эрдэҕиттэн үлэҕэ миккиллэн улааппыта.

1961 сыллаахха Дьокуускайдааҕы судаарыстыбаннай университет история уонна тыл үөрэҕин институтун бүтэрэн Бүлүү улууһун Хампа орто оскуолатыгар үлэтин саҕалаабыта. Ол кэнниттэн төрөөбүт дойдутугар Төҥүлүгэ кэлэн бочуоттаах сынньалаҥҥа тахсыар диэри таһаарыылаахтык нуучча тылын уонна литературатын учууталынан үлэлээн улууспут үөрэҕириитин сайдыытыгар сүҥкэн кылаатын киллэрсибитэ.

Учууталлыырын таһынан байыаннай кылаас тэрийэн оҕолорго алын байыаннай бэлэм буолуу билиитин биэрбитэ, оскуола, нэһилиэк олоҕор көхтөөх кыттыыны ылара.
Уопсай педагогическай ыстааһа 35 сыл. Билигин үөрэппит-такайбыт үөрэнээччилэрэ кини үтүө холобуругар олоҕуран өрөспүүбүлүкэбит араас оскуолаларыгар учуутал идэтин баһылаан үлэлии-хамсыы сылдьаллар.

Ытык дьоммутугар улууспутугар үөрэҕирии эйгэтэ сайдарыгар киллэрбит сүҥкэн кылааттарын иһин махтанан туран чэгиэн туругу, этэҥҥэ буолууну баҕарабын.
Оҕолоргут, сиэннэргит, чугас дьоҥҥут тапталларыгар угуттанан үөрүү, дьол аргыстаах өссө да уһун үйэлэнин диэн алгыс тылбын аныыбын.

@dmitriytikhon0v

Бүгүн 1-кы Баатара нэһилиэгэр педагогическай билим дуоктара, профессор
Николай Дмитриевич Неустроев аатын сүгэр Бэдьимэ орто оскуолата төрүттэммитэ 75 сылын бэлиэтиир үөрүүлээх күнүгэр кыттыыны ыллым.

Бэдьимэҕэ маҥнайгы оскуола Сыырдаахха 1949 сыллаахха тэриллибитэ.
Алын сүһүөх оскуолатыттан үүнэн-сайдан, кэҥээн билигин орто оскуолаҕа күннэтэ 59 үөрэнээччи билиини сомсор, 52 үлэһит сыраларын ууран таһаарыылаахтык үлэлии-хамсыы сылдьаллар.

Оскуола биһиги улууспутугар биир бастыҥ үлэлээҕинэн биллэр, ол туоһутунан ааспыт үөрэх дьыл түмүгүнэн бэйэтин бөлөҕөр кыайыылааҕынан тахсыбыта буолар.
Үлэ сүрүн уратытынан "Оҕо иитиитигэр бары бүттүүн"-диэн ис хоһоонноох «Дьөһүөл» иитэр-үөрэтэр эйгэ буолар.
Бу үлэҕэ дьиэ кэргэн, уһуйаан, оскуола, уопсастыба, түөлбэ дьоно, дьаһалта бука бары түмсэн,
кэлэр көлүөнэ ыччаты үөрэтиигэ-иитиигэ, сатабыллары иҥэриигэ биир сыаллаах-соруктаах үлэни тэрийиилэрэ буолар.

Маннык үтүө күҥҥэ
Арассыыйа Федерациятын үөрэҕириитин туйгуна,
Саха Өрөспүүбүлүкэтин учууталларын учуутала, ытык кырдьаҕаһа, улуус бочуоттаах олохтооҕо 94-с хаарыгар сылдьар
Октябрина Максимовна Яковлева аатынан нуучча тылын уонна литературатын кылааһа арыллыбыта бэлиэ түгэнинэн буолла.

Бэдьимэ оскуолатын кэлэктиибигэр, үөрэнээччилэригэр, педагогическай үлэ бэтэрээннэригэр үөрүүлээх үбүлүөйдээх күҥҥүтүнэн эҕэрдэлээн туран
тус бэйэҕитигэр уонна чугас дьоҥҥутугар чэгиэн-чэбдик туругу, ситиһиилэри, этэҥҥэ буолууну баҕарабын.
Инникитин даҕаны үөрэхпит кыһатыттан куорсун анньынан, төрөөбүт дойдубут сайдыытыгар үлэлиир-хамсыыр, дьоһун олох олорор, аат ааттатар бастыҥ ыччаттар тахса турдуннар!

@dmitriytikhon0v