#sheʼr *
Уйғонади чўчиб кекса тут,
Ён-атрофга аланглар шошқин.
“Вой-бў, келиб қолибди кўклам!”
Чўнг танида туйғулар тошқин
Гувранади севинчи сиғмай,
Шохларини осмонга чўзар.
Вужудида бодраб ўшал он
Куртакчалар қувноқ саф тузар...

Сўнг энгашар дарчага секин,
Ичкарида жим-житлик ҳоким.

Ҳайрат билан шохларин чайқаб,
Қад ростлайди баҳайбат дарахт.
Шўх елларга бериб измини
Энтикади сархуш ва карахт.
Югуради илдизларидан
Тана бўйлаб ҳаётбахш қувват.
“Яшамоқ шарт, яшнамоқ керак,
Кузга қадар, ахир, оз фурсат!”

Боқиб қўяр дарчага аҳён,
Ичкарида сокинлик ҳамон.

Тушунолмас кекса тут хомуш:
“Ахир, баҳор келди-ку, нега?”
Очилмайди дераза, эшик,
Бунда фақат сукунат эга.
Мўралайди ноумид дарахт,
Бир чеҳрани кўрмоққа интиқ.
Унсиз жавоб айтади унга
Деразанинг бир кўзи синиқ...

Ташқарида баҳор ғанимат,
Хона ичра уйқуда ғафлат...

2010 йил 10 апрель
©Хуршида Абдуллаева
        "Иккинчи дафтар"дан.**@suyunbeka

#rangtasvir **Михаил Клодт, "Николай Гоголь "Ўлик жонлар"нинг иккинчи томини ёқмоқда". 1860 йил.

1852 йилнинг 24 февраль кечаси Гоголь ўзининг машҳур "Ўлик жонлар" асарининг иккинчи томини ёқиб юборган. Роман тез орада битирилиши керак эди. Лекин ўша кечаси Гоголь хизматкори Семёнга асар ёзилган дафтарлар солинган портфелни келтиришни буюрган ва хизматкорнинг ёлворишига қарамай, қўлёзмаларни каминга ташлаб, шам тутиб ёндириб юборган.
Ёзувчи асарни қайта ёзиш фикрига келади, аммо улгурмайди, 1852 йилнинг 4 мартида оламдан ўтади. Шу тариқа, дунё адабиёти битта етук асардан мосуво бўлди...**@suyunbeka

#sheʼr *
Момо!
Умид даласига орзу эккандим,
Армон униб чиқди.
Уруғи ўхшашмикин, билмабман ҳатто...
Энди нима қилай?
Армондан мен қандай ҳосилни кутай?
Айтинг...
Момо,
Анча бўлди,
Эскириб кетди
Сиз тикиб берган қаноаткўйлагим...
Янгисини олсам бўлмасми?
Ҳозирда урф бўлган янгироғини?..
Масалан, ёлғонҳарирдан тикилганини?
Осон бўлармиди, нархи-да арзон...
Сиз нима дейсиз?
Рози бўласизми?
Оғринмайсизми,
“Менинг кўйлагимни ташлади”, дебон?..
Моможон!
Ким билсин, қай ғаддор тошга урилди,
Сабримнинг косаси дарзларга тўлди,
Бобомга айтинг,
Чегалаб берсинлар тоқатсим билан.
Қайтиб бўлинмасин
Сабр идишим.
Ахир, ҳали билмайман-ку олдинда яна
Керак нималарга
Чидаб ўтишим?
Моможоним,
Айтинг, сиз биласиз-ку,
Нега дунё бундай?
Одамлар шундай
Очкўзу очофат –
Кимдир диёнатни,
Ким инсофини еб қўяр ўйламай,
Сўнг яна тўймай,
Ёлғонни ҳам паққос туширар?
Лафзини ейди-да анави одам,
Еганим йўқ, дейди кўзин лўқ қилиб!
Мени эса, ўй еб битирса керак...
Сиз бўлсангиз, менинг ғамимни ейсиз:
“Болагинам, қийналдинг-да катта шаҳарда,
Бошинг тошдан бўлсин,
Ризқинг бут бўлсин...”
Момо!
Соғиниб кетяпман эртакларингиз!
Бор эди-ку бири,
Гулиқаҳқаҳ пари
Бўларди унда.
Айтиб беринг! Яна чақириб беринг,
Кулишни ўргатсин қаҳқаҳа уриб.
Йиғласа кўзидан марварид тўккан
Дурнисор парига тақлид қилибман...
Дурларим сотишди,
Мен йиғлайвердим.
Аччиқ ёшларимдан кўзим қаварди.
Энди бир кулай-чи,
Бўлармикин ҳеч?
Момо!
Туш кўрибман, тушимда ҳам Сиз...
Кафтларимни очиб бир сиқим тупроқ
Қуйдингиз.
Сўнг бир пиёла сувни аралаштириб,
Хўрсиниб қўйдингиз:
“Биз асли шу-да...”
Гарди рўмолингиз бир силкиб, аста
Ўгирилиб, йўлга жўнайвердингиз.
Қаерга кетдингиз?
Ўзингиз айтган Борсакелмасгами?
Айтардингиз-ку:
“Бир кетсам, кетаман киши билмасга,
Борган қайтолмаган Борсакелмасга...”
Кетиб қолдингиз-а?
Моможоним!
Хотиримнинг китобида – Сиз!
Қорачиққа чиздим сувратингизни:
Оқ сочингиз, сочпопугингиз,
Узун кўйлагингиз ва гарди рўмол
Остидаги култапишак ҳам...
Энди кўз ўнгимда юргандайинсиз...
Энди сал хотиржам тортаман чоғи.
Ахир, топиб олдим сиз тақиб юрган
Қаҳрабо мунчоқни...
Ва қалбимда янграб кетди ногаҳон
Доим сиз хиргойи қилган бир қўшиқ:
“Дунё ўзи бевафо,
Дунёсига учмагил,
Қучсанг, ерни қучгину
Вафосизни қучмагил...”
Момо...

©️Хуршида Абдуллаева**@suyunbeka

#xayrlioqshom
**Об-ҳавони койиманг, агар у ўзгармай турганида, ўнта одамдан тўққизтаси суҳбатни бошлай олмасди.

©Фрэнк Хаббард**@suyunbeka

#qayd **…Мен бу сатрларни ўтаётган баджаҳл йилнинг сўнгги соатларида ёзяпман.
Янгиси эшик олдида турибди. Майли, у бунисидан қаҳри қаттиқроқ бўлмасин!
Тентакларга озгина ақл тилайман, ақллиларга эса — озгина шеърият.
Аёлларга энг кўркам кўйлакларни тилайман, эркакларга — мўл-кўл  тоқатни.
Бойларга қалб, бечораларга бир бурда нон.
Энг кўп шуни тилайманки, янги йилда бир-биримизга иложи борича камроқ бўҳтон қилайлик.

©Хенрих Хейне, 1843 йил арафаси.**@suyunbeka

#xayrlioqshom#rangtasvir **Пабло Пикассо, "Қорбобо". 1959 йил.

"Ёш болага ўхшаб расм чизишни ўрганишим учун менга бутун бир умр керак бўлди".

Пабло Пикассо.

P.S. Янги 2025 йил муборак бўлсин!**@suyunbeka

#rangtasvir#xayrlikun Густав Климт, "Қайинзор". 1902 йил.@suyunbeka

#kuzatuv

**"Хўп"нинг отаси ўлгани йўқ. Бугун шу гапни эшитдим. Мақол ёки ибора, илгари дуч келмаган эканман. Маъноси: ўзингдан каттага хўп, деявер, кам бўлмайсан.
Халқ донолиги маҳсули. Ажойиб!

P/S. Суратда Тароз шаҳри яқинида жойлашган Ойшабиби мақбараси.**@suyunbeka

#satroralab

**Буюк рассом Пабло Пикассонинг тўлиқ исми-шарифи 23 та сўздан иборат:
Пабло Диего Хосе Франсиско де Паула Хуан Непомусено Мария де лос Ремедиос Сиприано де ла Сантисима Тринидад Мартир Патрисио Руис Пикассо.

Малагада одат шундай эди - болага кўп исм берилган. Яна бир жиҳат: Пикассо фамилиясини икки хил талаффуз қилиш мумкин. Испанча талаффузда урғу иккинчи бўғинга тушса, французчада учинчи бўғинга тушади.**@suyunbeka

#xulosa
**Дон янчилаётган мавсумда каламушнинг ҳам хотини бешта.

Тамил мақоли**@suyunbeka