НҰРЫМБЕТ САҚТАҒАНОВ. Оны Қызылордадан Астана қаласына қызмет бабымен ауысқан кезінен танимын. Ол кезде орда бұзатын отызда еді. Одан бері де жиырма жыл зымырап өте шығыпты. Нұрымбет жақында ердің жасы елуге толды. Өзің жақсы көретін адамды құттықтауға қашанда асығып тұрасың. Бірден телефонға жармастым: «Нұреке, мен сізге өте бір маңызды шаруамен хабарласып тұрмын». Мен оның жылы жымиятын сәтін сағынған едім. Соны көз алдыма елестету үшін әңгімемді дәл осы сөйлемнен бастадым. Әдейі! Телефонның арғы жағынан осы ойымның жүзеге асқанын бірден аңғардым: «Ай, Шәке, (жымиғанын сезіп тұрмын) «айта беріңіз» деп айтуға ыңғайсызданып тұрмын. Құттықтауыңыздың өзі ерекше басталатынын баяғыдан білемін ғой».
Ұзақ сөйлестік. Өткен-кеткенді еске алдық. Нұрымбеттің жаны таза жігіт екенін бірінші кездескенімізде байқадым. Жігіт болса да көзі күлімдеп тұрады. Жаны ақық екенін бірден байқайсың. Мемлекеттік басқару органдарында көп жылдардан бері қызмет етіп келеді. Астанада министрліктерде еңбек етті. Президент Әкімшілігінде инспектор болды. Қазір Шығыс Қазақстан облысындағы Ұлан ауданының әкімі.
Дәл осы Нұрымбеттей таза жігіттердің ұзақ жыл бойы билікте абыроймен келе жатқанына қуанамын. Ел басқару ісіне жегілудің жақсы жақтарымен қоса жаман жақтары да жетерлік. Абыройсыздыққа қалу оп-оңай. Содан қорқасың. Әйтпесе, мемлекетшілдік қасиеті бар ұлтжанды осындай жігіттердің билік басында болғанына не жетсін?! Біз үшін!
Он жылдан астам уақыт Шығыста жүр. Былтыр елордаға жұмыс бабымен келген сапарында кабинетіме іздеп келіпті. Қатты қуандым: «Әкімдер де қаратабан журналистерді іздеп келеді екен-ау!». Ол да әңгімеден аянбай-ақ жатыр: «Шәке, әкімдер де адам баласы. Ағаларымызды сағынамыз!».
Дәл осындай сәттерде оның жанының гравитациялық күшін ерекше байқаймын. Ол кез келген адамды өзіне тартып тұрады. Жылы жүзімен. Парасатымен. Имандылығымен. Әділетті әдебімен. Өзі туып өскен топырақтың киелігімен. Сондықтан да болар, онымен әр кездесуді сағынып жүремін. Жолыққан сайын қоштасарда әзілдеп айтатын бір сөзім бар: «Нұреке, мен осы сенің әкім болғаныңнан қорқамын, мені ұятқа қалдырмай, абыройлы жүр». Ол бұл сөздің астарын әбден түсініп алған.
Елуге толып жатқан әкімді құттықтап болған соң осы сөзімді тағы қайталадым әңгіме соңында. Ол аса ризашылықпен тағы да тіл қатты: «Шәке, сіз – нағыз журналиссіз! Осы сөзіңізді күн сайын таңертеңсін жұмыс басталғанда ылғи есіме алудан жаңылған емеспін. Әкімнің әнұранындай сөзіңізді ұмыту мүмкін емес!».
Риза болдым. Иә, Нұрымбеттей әкімдеріміз көп болса, біз жаман ел болмаймыз!

https://qazaqadebieti.kz/51645/l-misa-i-ant-a-adaldy

https://qazaqadebieti.kz/51389/art-t-keris-albatrosy

Сүйінші, ағайын! "Күлпет" романы Стамбулда түрік тілінде басылып шығыпты! https://www.instagram.com/reel/DBlR6xZtmjU/?igsh=aWZ6eHByejJlYW9o

https://youtu.be/wqUJq3aU1gg?si=0ztEqNa_RrLZN0Kd

Биыл - жазушы Жақсылық Түменбаевтың 80 жылдығы. Осыған орай Қызылордада жазушыны еске алу кешіне қатысып қайттым https://youtu.be/gQmFAD4yE4Y?si=zeWtZFI8I4RQ4Czo

Талантты жазушы Жақсылық Түменбаев туралы эссемді оқи отырыңыздар, достар! https://aikyn.kz/273541/sanadag-y-sarytap-sag-ynysh