كالعادة شنو عدكم دزوا هنا ونجاوبكم سواء سؤال او مشكلة🤍🤍

@EdalalAghati_6thgrade_bot

كالعادة شنو عدكم دزوا هنا ونجاوبكم سواء سؤال او مشكلة🤍🤍

@EdalalAghati_6thgrade_bot

شلونكم اغاتي ان شاء الله تكونون بخير 🤍

بما ان قربت نص السنه ف اليوم راح احجيلكم على امتحانات نص السنه وهل تحدد مستوايه واذا مقارين كل الفصول الي داخله شنسوي
اكيد الاغلبيه منكم مثلاً المدرسه مدخله 4 فصول هو قاري بس 3 جداً طبيعي انو تروحون معتمدين بس الماده الي انتوا قاريها ويه الخصوصي او اليوتيوب بس اهم شي تكدرون تطلعون بيها درجه النجاح + تضبطوها كلش زين حتى تجاوبون الاسئله الي تجي عليها صح
او مثلاً انت قاري الفصل الثاني من الاحياء وهي مدخله الاول والثالث (هو اكيد محد هيج بس دانطي مثال) ف هنا لازم تطلع عليهم لان صحيح متحدد مستواك نص السنه بس النجاح مطلوب لان يدخلكم وزاري

نجي هل تحدد المستوى؟ جواب هذا السؤال يعتمد على نوع الاسئله ف الي قاري وزاريات ويعرف يحل وزاريات انت وضعك تمام وراح تعرف اذا جان نمط الاسئله وزاري لو لا اني بالكيمياء بنص السنه ٧٩ وبالوزاري ٩٩ وجنت بوكتها قاريه الماده كلها يعني متاركه فصول ف يعني متحدد المستوى لان هوايه اكو اسباب طريقه التصحيح اكو يريدون الا طريقتهم حتى إذا جنت تحل بطريقه وزاريه ينقصون او نمط الاسئله او عدد الفصول الي داخله هوايه

وهم نص السنه شي إيجابي يخليكم تراجعون المواد الي قريتوها من شهر ال6 يعني راح تضبطون
اخير شي اتمنى تستغلون هايه الفتره مال امتحانات وتضبطون المواد شكد متكدرون ولينكسر واهسكم اذا جانت الاسئله صعبه او مجاوبتوا خلص طلعت من الامتحان فكر بالامتحان الي وراه

وبس بالتوفيق اغاتي✨🧡
سـاره احمد نصيف

كالعادة شنو عدكم دزوا هنا ونجاوبكم سواء سؤال او مشكلة🤍🤍

@EdalalAghati_6thgrade_bot

هلوو اغاتي شونكم
راح احچيلكم عن تأثير الاصدقاء عليكم

شوفوا ..لحد يكول صديقي ميأثر عليه او شعليه بي او الخ
انتَ جزء من محيطك
يعني خلي نكول انت مستواك زين وعاشرت طلاب سختچية
راح يكلولك دتعال نطلع مكان وراها روح اقره .. تعال نصعد مكالمه وراها روح اقره
والخ ..شويه شويه لحدما تصير مثلهم
احنه كلنه نعرف مجتمع السادس شكد يأثر .. يمكن البنيه تتأثر بالشله وتكوم تلجأ لاشياء مو مهمه ك لبس وكشخه وطلعات والخ
وهالشي كله نتيجته هو الفشل ..

اكتفوا ب اصدقاء شطار وكلش زينين بالماده ..تقرون سويه وتشجعون بعض سويه
اني جنت اشوف طلاب من وحده تاخذ درجه مو زينه اللخ ترزلها وتشجعها تقره
وبالنهايه طلعوا معدلات ما شاء الله زينه
دائماً اختاروا المحيط زين حتى تكونون مثل المحيط ..

نجي للصديق بصورة عامة ..تأثير الصديق كلش جبير كلش فوق ما اي بشر يتصور
ممكن هالانسان يرفعكم فوك ..وممكن ينزلكم جوه
بس تحسون انه اصدقائكم والحواليكم دياخذون من وقتكم وجهدكم ونفسيتكم ويأثرون عليكم سلباً
هنا ابتعدوا

انتوا هسه سادس وقتكم كلش ثمين
وحرج .. واني بعيني شفت العام طلاب مستواها بالنازل بسبب اصدقائهم
وعادوا سنه !!

وبس هيج اذا عدكم اي سؤال دزولنه بالبوت 💜💜💜

كالعادة شنو عدكم دزوا هنا ونجاوبكم سواء سؤال او مشكلة🤍🤍

@EdalalAghati_6thgrade_bot

هلوو اغاتي ?
شلوونكم؟؟
بالبداية مبرووك للي كملو هاهية خلصت مسيرة دراسة ١٢ سنة ويارب تكون النهاية والنتيجة بعدين مثل ممتوقعين واكثر وكلكم بالمكان الي جنتو تحلمون بيه والي اجلو دور ثاني همم عادي مو نهاية العالم وحتعوضوها ان شاء الله?

اكو شغلة خل اذكركم بيها بما انو كملتو ومحتحتاجون ملازمكم بعد ف لتذبوها احتفظو بيها راح نفتح حملة ورة ميكملون الدور الثاني علمود تتبرعون بالملازم وتفيدون غيركم اكيد لانو اكو طلاب محتاجين الملازم وهم صدقة جارية الكم?

واذا عدكم اي سؤال او استفسار دزولنة ع البوت

@EdalalAghati_6thgrade_bot

مُبارك الكم انتهاء الامتحانات ?
شون جاوبتوا بيهم ؟ كتبولنه

@EdalalAghati_6thgrade_bot

حبايب باجر رياضيات يعني شنو؟
يعني تجمعون تركيزكم مال سنه ليكدام وتحطو بلورقه باجر حتى الجمع والضرب اريدكم تعاملو مثل ما جنتو ب الابتدائيه
مبدئيا اسئله الرياضيات اني من حليت نسخ شفتهه جدا منهجيه ووزاريه وان اجه شي بي لوفه ف ينترك
نبدي بطريقه الحل
اول شي اريدكم شويه تخفون ايدكم مو تصفنولي ب المسأله ولازم لازم ب الرياضيات تحددون شنو حتركون من البدايه لان الوقت ميسمح
اما اذا معرفتو شتتركون ف السؤال الوكفتو بي عالنص كبل تركوا وروحو عل ورا لان كتلكم الوقت حرج
بنفس الوقت خلو ببالكم يمكن جمع لو طرح او ضرب يخربلكم الحل كله ف التركيز باجر واجب وغصبا عليكم?
لتنسون تسوون طريقه مجهول ب معلوم العلمتكم عليهه ب المسائل الي تسمح يعني تتاكدون من الحل بيهه حتى تتطمنون ان حلكم صح
التكامل خصوصا راجعولي وزارياته قبل لتروحون
وبالطريق الفصل الخامس لان هذا يتبخررررر
ولتسوون الحركه مال تكملة السؤال في الصفحه الفلانيه تره يعني مندري المدرس حيشوففهه او لا ف قسمو الورقه ونعمو الخط وتكفييي
القوانين مال تكامل كتبوهه بنهايه الورقه من تجي الاسئله مو قبل متجي تره يرزلوكم حتى خاف ترتبكون بنص الحل رجعولهه وقبل متطلعون مسحوهه مو تنسونن
والناتج الغريب لا عيب ولا حرام
والوحدات
ومقدار النقصان من تشيلون السالب وتكتبون جمله بدون السالب.
الله يوفقكم ان شاء الله وحتشوفون شكد سهله باجر والله ينطي كل شخص على تعبة
رب اشرح لي صدري ويسر لي أمري واحلل عقدة من لساني الله الفتاح، اللهم لا سهل إلا ما جعلته سهلاً يفقهوا قولي، بسم وأنت تجعل الحزن إذا شئت سهلاً يا أرحم الراحمين.
رب أدخلني مدخل صدق وأخرجني مخرج صدق، واجعل لي من لدنك سلطانا نصيرا

بالتوفيق ?

_زهراء كريم نعمه?

مرحبا
المفروض اغلبكم مخلص هسه
باجر شويه الامتحان مو مثل ما احنه متعودين كله وزاريات وتكرار وشي بديهي
لا طبيعي تجي امثله منهم بس ان شاء الله ماكو اي شي خارج عن المنهج والقاعده الي انتوا درستوهه وتدربتو وحليتو وزاريات بيهه
هو العربي هيج معضلة كل طلاب العراق تقريبا فطبيعي الخوف منه والتوتر وطبيعي تطلعلكم بلقليل غلطتين بلقواعد فماريد احد يخاف ويرتبك من يوكف بنقطه
هسه نجي على طريقه الحل:
اول شي نبدي ب الادب ليش؟
لان الادب شي كلش بسرعه ينسي ولان اذا وكفتو بنقطه بلقواعد حترتبكون وتنسون الادب من الخوف والتوتر
اهم نقطه هنا هي تسلسل الاسئله يعني حسبو الادب من يا سؤال يبده؟ واتركي الاوراق مال قواعد للقواعد حسب تسلسل الاسئله الادب ماده يرادلهه تركيز من ناحيه اسماء الشعراء واسماء قصائدهم وحياتهم
لان اكو سؤال كل سنه يجي شاعر فلاني عاش بفلان مكان وهيج وهيج
منو هو وشنو قصيدته؟
فهسه اريد اي احد مكمل ياخذ فره سريعه على حياه شاعر شاعر ويركز على اسم القصيده رجااااءا لان ادري كلكم حافظين القصيده وناسين اسمهه
وسالفه هات المعاني الاتيه وردهه الى ابياتهه مو تنطو بس المعنى وهاهيه؟؟؟؟ تردون الكلمه البيتهه هم هاي هم هواي يغلطون بيهه والجواب الي حايرين تكتبون بي بعد او هاهيه اكتبوا احسن يعني مثلا متعرفون ليوين ينتهي الجواب كتبو احسن بدال متحطون جواب قليل
هسه كملنه الادب نجي قواعد
القواعد الاسئله محشكه كلش وكل سؤال بي اكثر من مطلب اترجاكم تقرون السؤال زين وتنطو كل اليريده
مثلا النوع والحكم والسبب وغيرها كلمه كلمه تقرون السؤال وتنطو كل اليريده ! رجاءا ومن اول مره مو من تراجعون لان العربي الاغلبيه ميلحكون يراجعون اجوبتهم بي لان ماده مطوله وبيهه انشاء ؟
شغله لخ سالفه السؤال المتعرفو راسا تعوفو وتاشرون بشخطه علاسئله انو تره هذا معرفتله فدشويه ارجع اركز بي حتى ميضيع وقتي!
وطبيعي والله طبيعي نقطه او نقطتين متعرفوهن وتحسوهن غريبات
اني هم نقطه معرفتهه وجان عليهه بس درجه
من تكملون مسحو شكو شخابيط على اسئله
هسه نجي انشاء
الانشاء اتمنى تشيلون من بالكم فكره خل اكتب ٥ صفحات حتى ينطوني درجه كامله
تره المصحح مو غشيم؟
وتره كله يقرو هو اصلا حاطين مصحح خاص للانشاء ف ٣ صفحات حلوه مرتبه بخط جبير ووياهه مقدمه وخاتمه مرتبات وكم حديث وايه من الاسلاميه مالتكم كلش تمام

واخر شي الله يوفقكم باجر وهم اريدكم تبشروني من ترجعون وماتوقع نسيت اي شي بعد?
دعاء الامتحان?✨

اللهم اني توكلت عليك وسلمت أمري إليك لا ملجأ ولا منجي منك إلا إليك اللهم لاسهل الا ما قد جعلته سهلا اللهم أجعل الصعب لي سهلا اللهم ذكرني منه ما نسيت ولا حول ولا قوة الا بالله
اللهم اني اسألك فهم النبيين وحفظ المرسلين والملائكة المقربين اللهم اجعل ألسنتنا عامرة بذكرك وقلوبنا بخشيتك انك على كل شيء قدير

_زهراء كريم نعمة ?✨