عضم الله اجورنا واجوركم بمصاب ابا عبدالله الحسين ?

راسي شيب من دفنته
ولسه تجري دموعه
تلمسيته وايدي ترجف
كاسرين ضلوعه
راسي شيب... راسي شيب

غسليته وبيدي شلته.  وشفت ناقص جسمه
بيدي گوه وجمعيته..   وصعبه ايدي تلمه
وذره وذره مطشرينه..   ونهر صاير دمه
وتالي كلهن جمعتهن..  فقط ناقص حلمه

ظهره مايل من گلبته
وصدره صار بضهره
صعبه والله منين الزمه
وجسمه صاير حفره

راسي شيب... راسي شيب

بويه اغسلنه بديه..     هواي كلش صعبه
كون اموتن يمه انه..  ويدفنوني بگربه
گطره مي ماضاگ أبويه.. وحيل يابس گلبه
هذا ماي وگمت اغسله. . وصعبه جان يشربه

والعطش يبس لهاته
مبينه شفته الزرگه
اللسانه بس تراب صاير
والتراب يشهگه

راسي شيب.. راسي شيب

راسه ماكو وضاع خنصر..وصله ضاعت منه
ودمه ينزف صار بيدي.. بدمه جسمي اتحنه
هوه ساكت بس اسمعه. صوت اخ ونه
َخنگه احسن بين صدره.. يريد زينب چنه

عمتي ماموجوده يمه
وماتجيك الليلة
ادري هاي الليله صعبه
وحيل بويه اثگيله

راسي شيب.. راسي شيب

راح أدفنه اليله أبويه.. َوتاه كلش فكري
مو نهر عيني عليمن.. ليش گامت تجري
هاي اول مره احسن.. هيچ ضايع عمري
كون مو نحرك اشوفه.. كون ذبحو نحري
كلشي مات وهوه عايش
لسه عاش بالي
جانت امنيتي اموتن
قبل دفن الغالي

راسي شيب... راسي شيب

الشاعر حسين المميز

#ليلة_العاشر

لمنه احسين واخر ليله
لم أخوانه َوكل العيله
هوه يسولف چنها وداع
باچر تشرب دمي الگاع
آخر ليله
............................. ......................

اول مره احسين انشوفه بهاي الحاله
وگلبه يلوب
وجهه تغير من يسولف بين وجهه
شگد متعوب
كتله احجيلي وزينب انه حچيك هذا
يعور گلوب
زينب خويه باچر اموتن ويذبحوني
أمن المگلوب

تنزل بس بلسكته ادموعه
باچر ويسحگون ضلوعه
ريت ولا شفته بهل منظر
ومثل الجامه گلبي اتكسر

متغيرات هواي اطباع
هوه يسولف چنها وداع
آخر ليلة
............................. ......................

گمت اتخيل هاي الحاله وحسيني
گبالي ومذبوح
گمت اتخيل جسمه يرافس لا رأس
الباقي ولا روح
وأسمع صوت بداخل جسمه صيح
زينب چنه ينوَح
وأنه بهاي الحاله شسوي وگدامي
ومتروس جروح..

گمت اتخايل كلشي بالي
غالي يموت وينزف غالي
لو طاح وياهوه يلمه
بس لا گاع التشرب دمه

وينباگ الخنصر ينباع
هوه يسولف چنها وداع
............................. ......................

شلون اتخيل هذا المنظر وابقا واصفن
بلكت جاي
وأنه انتظره وهلبت يرجع كون بأايده
يجيب الماي
اول مره وهيج اتحير تعكس كلها
الليله وياي
يعني ايتامي كلها كبالي تركض عطشانه
وحفاي

ماعيشن لو شفت الحاله
وطاح حسين وعاف عياله
لو يرفس شفته وگدامي
وطايح بس ماشارب ضامي

كون الماي هنا ينباع
هوه يسولف چنها وداع
............................. ......................

الله يساعد گلبي شلونه لو شاف حسين
بلا راس
صعبه شلون اتحمل هيجي لو جسمه گبالي
وينداس
لو راح حسين يذبحونه وشمات تصيرلنه
الناس
زينب راح اتضل بموقف لا اكو حسين
ولا عباس

بلطف كلشي يموت هنانه
وزينب تبقا وبس عطشانه
باجر يعله أصوات اصياح
ويفتر يم راسي الذباح

يسحگون اگبالي الاسباع
هوه يسولف چنها وداع
............................. ......................

خويه واخر ليله هنانه ياخويه وباچر
مبيوگ
لو ماشوفك المن اعيشن لو شفتك يمي
ومسحوگ
آخر دمعه البيني وبينك واخر آخ واخر
شوگ
باچر حفاي ومن نمشي بين الوادم وبنص
سوگ

امشي وكلشي يموت البيه
گبالي وتنباع التر چيه
حفاي ونتعنه الشام
محد بينه ولحضه تنام

باچر نتعذب بأنواع
هوه يسولف چنها وداع

الشاعر حسين المميز

#زينب عليها السلام

امشي گوه
خويه مسبيه وادورلي أعلى تچوه
امشي گوه
حافيه بين الغرب وبلايه خوه
...............................................

راح اروحن خويه بس موش برضاتي
راح اعوفن روحي هيه وذكرياتي
وشبقالك خويه مني شلون ذكره
خيام محترگه واهات وصوت حسره
وحمره صارت خويه من الدم عباتي

والله بلوه
خويه من شفتك طحت چهبتني بلوه
والله گوه
حافيه بين الغرب وبلايه خوه

رايحه وبس الدمع باقيلي وحده
كلها عاگول الخذوني وأنه ورده
مستقر بيه الوجع مخلوع ضلعي
خويه مو بس الضلع محروگ اصبعي
والجرح فوگ الجرح ياخويه أشده.

هاي قسوه
انه جنت مدلله وماشفت قسوه
امشي گوه
حافيه بين الغرب وبلايه خوه

خويه ع لناگة وطحت وانكسرت ايدي
بس اريد ارفعها واصرخ ياعضيدي
ايدي من احبالهم محزوزه كلها
چانت امنيتي تجيني انته تحلها
خويه لو تدري الوجع حته بوريدي

حيل يقوه
من احرك ايدي خويه الوجع يقوه
امشي گوه
حافيه بين الغرب وبلايه خوه

ياوطن گلبي مشيت وانسه كلشي
هاي آخر كلمه خويه ورايحه امشي
صعبه والله من اعوفك تبجي عيني
لاكن ادريك انته طايح ماتجيني
مثل ماشابت لحيتك شاب رمشي

والله جوه
كله مضموم الوجع وبگلبي جوه
امشي گوه
حافيه بين الغرب وبلايه خوه

الشاعر حسين المميز

قصيده... (الرقيه بنت الإمام الحسين عليه السلام)?
(كامله)

شو عفتني... ماشفتني
بنتك انه.. بنتك انه
بويه اخاف من الظلام
فدوا گلي وين انام
بنتك انه.. بنتك انه.        
                                           (المستهل)

................................

الشاعر حسين عباس ✍️

................................

بويه  بعدك  مااريدنها..حياتي
جانت وياك انذبح هاي.. امنياتي
بويه من چنه سوه چنت..شحلاتي
هسه  وجهي  تغير  وچنه.. عباتي

دمعي طايح.. وانته رايح.
بنتك انه .. بنتك انه
شگد اصيحن ماكو صوت
بويه  ترجع  لو  اموت
بويه وينك.. بويه وينك   

(بيت ١)

..................................................
انه بنتك بويه يحسين.. تعرفني
راسك ع الرمح ماچنك.. شفتني
ليش وحدك بويه رايح.. ماخذتني
گبالك انه وبلچذب شو.. ماصحتني

خذني يمك... خل اشمك
بنتك انه بنتك انه 
ماگلتلي  وياك  اروح
كافي بس ابجي وانوح
بويه وينك بويه وينك
                                            (بيت٢)

انته لو ماميت بسرعه..  اجيتك
جا قبل لا تنذبح بويه ..  رويتك
جيتك اركض جبت دمعي. واعتنيتك
من  وصلتك  خضر  الدم..  بلحيتك

جا گلتلي... ماتردلي
بنتك انه..بنتك انه
بويه  مابيها  مجال
انه  اريدنك  تعال
بويه وينك..بويه وينك
                                            (بيت٣)

............................................

بويه هينه دموعي والسوط.. ع متني
وهينه كل دمي الوگع هم... مايهمني
والظرب والااخ والخيمه.. الچوتني
كلها هينه حسين. بس من.. فارگتني
ذني سهله... انته اغله
بنتك انه.. بنتك انه
الجرح باجر يطيب
بس واليفارگ حبيب
بويه وينك.. بويه وينك      
                                       (بيت٤)