#قصيده #گعدية
#الدوله #الحسينية

ياخادم حسين استعد
اوصفي النيه
باجر تشاهد مجلسك
دوله حسينيه
وي صاحب الزمان
كل الارض امان
دوله حسينيه
.

.
دولة العـدل الالهـي
لابـد يبـيـن ظـواهـه
تنتشر بالدنيا كلها
عالي ويـرفرف لواهه
والامام المهدي بيها
منصبه حامي حماهه
صوت المآذن يعتلي
بمولدها كل هم ينجلي
ماي الشرب من چف علي
………… وفاطمه الزهره هواهه
.
خادم ابو الاكبر يمر
والكل يعرفونه
تحفر على خده اثر
كل دمعه بعيونه
هذا الدمع وسام
علامة السلام
دوله حسينيه
.
.
.
هـيه دوله بلا رواتـب
الـرواتـب مـو مـهـمه
تريد بيت من الحكومه
اجري دمعه لابو اليمه
حسين ينطيك التريده
بس تدگ بابه وتشمه
من ياكتر برض الفلا
بالنيه صد الكربله
عابس يگلك ياهلا…
……………… . كل امر همك نلمه
.
دولة علي بكـل الارض
مابيـها ابـد فقـره
روح استلم قوت السنه
بتسبيحة الزهره
وتشاهد العين .. خدام الحسين
دوله حسينيه
.

.
الوظيفه البيها خدمه
والامر هذا بيانه
خادم حسين الموظف
يفتخر بيها بزمانه
الملف بيد الزچيه
والتوفق عالي شانه
بالك تزعل ام الحسن
ماتنشري الخدمه بثمن
والخادم ابكل الزمن .
……………… .. يلزم ابسنه مكانه
.
لتظم ذنـوبك فاطـمه
مـن كلـمه تتـأثر
شيرجع اسمك لو وگع
من اسطر الدفتر
للخدمه نيشان
دمعتها عنوان
دوله حسينيه
.

.
خل نسـولف عالمـدارس
والعلم الكل تنوله
زينب اتخـط المـناهج
للعـفاف وللبـطوله
طالبه التفهم درسها
تدخل الطب بسهوله
الها المـواقـف تنـذكر
درس الأبا ودرس الستر
هاي العقيله ام الخدر .
………… بدولة حسين الها صوله
.
اعظم وزارة تـربيه
عالتـله تبنـيها
وشتطلع البنت التي
زينب تربيها
من كل كتر نشوف
كل طالبه طفوف
دوله حسينيه
.

.
عن طبـيبك لا تدور
للـمرض ماكـو مباني
العليـل ابداره يبـقى
وبعـلاجي ما يعاني
يذكر الحره الابيه
ويلفظ السبعه المثاني
لام البنــين الطـاهره
هيه الجروحه مناطره
تجيب الدوه وتحظره ..
……… ويستلذ بيه ابثواني
.
من تهدي الها الفاتحه
اتنولك الفرحه
تگصدلك البابك تجي
وزارة الصحه
تتـنفـس الـروح
وطيب الجروح
دوله حسينيه
.

.
منهج الناس التواضع
لاكو غيبه ولاكو حاقد
دوله حاكمها ابو فاضل
كل مواطن بيها قائد
كل طفل لو ناغه امه
يلفظ حروف القصائد
مهر العـروس الكل أبي
تطلب صلاة اعله النبي
وي الحجاب الزينبي
تمشي وتزور المراقد
.
هاي الـترافه بهالـوطن
لا ما تغــيرنه
يبقى النشيد الوطني
حسين بضمايرنه
كل رافضي يثور
ايعجل الظهور
دوله حسينيه
.

حسن الموالي الفاطمي

#افراح #شعبان

يحياك  ياصـاحب  الـزمان
علي وياك ياصاحب الزمان

.ـــــــــــــــــ ❁ ❁ ❁ ـــــــــــــــــ

ياآخـر  انـوار   الـولايـه  
                         وخـاتـم  العــتره
يالمنــتظر تحـمل  لـواء
                     المصـطفى ونصره
جدك همـس بذن الزچيه
                        الطاهره  الحره
وتبسمت من سمعت اسمك
                         فاطمه الزهره
.
لوجـهك تنتظر .. يا اجـمل بـدر
يلي بثـورتك .. دومك منتصر
.
نظرناك  ياصاحب  الزمان
علي وياك ياصاحب الزمان

.ـــــــــــــــــ ❁ ❁ ❁ ـــــــــــــــــ

ياجـوهـرة  جـنة  عـدن
                   مـن  العرش  نازل
لمعـت  فـقـار  بنظـرتك
                   لارض المجد راجل
حامل  شمايل  حيدره
                حامي الحمه الباسل
نور  الحسـين  بوجـهك
                 وخزرات ابو فاضل
.
امك بالمهد .. كتبتلك عهد
انت المدخر .. لايام الشدد
.
نطرناك  ياصاحب  الزمان
علي وياك ياصاحب الزمان

ـــــــــــــــــ ❁ ❁ ❁ ـــــــــــــــــ

كلما لفـظت اسـمك احسّـن
                      تطـهر اذنوبي
ابقى ارتقي بديني وشاهد
                    تختفي عيوبي
يالمهدي أنصر ثورتك
                 لو موتي بدروبي
حبواً على الثلج انطلق
                  لجلك يمـحبوبي
.
يوم الزلزله .. جيشك بالفلا
وبركبك نحج .. كلنه الكربله
.
نخيناك  ياصاحب الزمان
علي وياك ياصاحب الزمان

.
ــــــــــــــــ ❁ ❁ ❁ ـــــــــــــــــ
.
أنت امامي الحي تعيش
                  بروحي واحساسي
ريحك  اشمه   بالهوه
               بكل شهگه بنفـاسي
شما انخذل طول الزمن
                    من اهلي وناسي
بلساني دوم اسمك حرز
                   وحروفه حراسي
.
اسمك بالنبض .. تسبيحة فرض
لو بيه انتخي .. تهتز الأرض
.
دمه فداك ياصاحب الزمان
علي وياك ياصاحب الزمان

ـــــــــــــــــ ❁ ❁ ❁ ـــــــــــــــــ

يل أسمك الماء المعين
                   القائم الناصر
المـنتـقم والمـرتجى
                 والـناطق الثائر
بقيـةالله المنـتصر
             والمصـلح الجابر
الداعي انت والسبيل
              الحـجه والصابر

بأسمائك صفه .. رقه وعاطفه
منك نرتوي  ..    يابحر الوفه

وجدناك ياصاحب الزمان
علي وياك ياصاحب الزمان

ـــــــــــــــــــــــــــــــــــــــ

حسن الموالي الفاطمي

11
#ختمة #عزاء......
يارقيه.. يارقيه.. يارقيه..
.
ـــــــــــــ ❁ ❁ ❁ ــــــــــــ
.
زغيرونه..
ماتحتمل لو طال ابوها غيابه
زغيرونه..
تنظر عليه من هجمت السلابه
زغيرونه..
من يمها مرو شايلين اثيابه
.
واحد يسلب يمها ظل بصايته
واحد عمد عالگاع طيح رايته
واحد حچه وهضمت رقيه احچايته
بذبح الحسين ايزيد حقق غايته
.
يارقيه.. يارقيه.. يارقيه..
.
ـــــــــــ ❁ ❁ ❁ ـــــــــــــ
.
مذهوله..
نار المخيم تفتل بدخانها
مذهوله..
حلوگ التراب تفرهد بوليانها
مذهوله..
ولي تشوفه يوجر بنيرانها

عمتها تشگف عنها الله يعينها
منا سكينه يمها لطمه بعينها
ومنا حميده تمشي ومچتفينها
واعله الهزيله بلا وطى مصعدينها
.
يارقيه.. يارقيه.. يارقيه
.
ــــــــــــــ ❁ ❁ ❁ ــــــــــــ
.
عطشانه..
ظالم يبدي الجربه كلما شافها
عطشانه..
ينطيها ماي ومايفك اچتافها
عطشانه..
منّ الشموس امفطرات اشفافها
.
نادى زجر راس الحسين ويانه
خله يشاهد ترتوي وليانه
لكن رقيه خل تظل عطشانه
وردة حياته من الظمى ذبلانه
.
يارقيه.. يارقيه.. يارقيه
.
ـــــــــــــ ❁ ❁ ❁ ـــــــــــــ
.
برجليها..
جمرات من نار الخيم تجويها
برجليها..
طول الدرب من تسحگ تأذيها
برجليها..
گيد اليسر كلش ثگيل اعليها
.
رمده وتحس جويت جمر بعيونها
على الحجر والشوك يمشونها
طول الدرب لو عثرت يضربونها
جندي الشمر بالسوط هد امتونها
.
يارقيه.. يارقيه.. يارقيه..
.
ـــــــــــــ ❁ ❁ ❁ ـــــــــــــ
.
لاگاها ..
حرمله گلها ياليتيمه. وينچ
لاگاها..
طفيت عين الگمر شوفي بعينچ
لاگاها..
وبنبلتي گطّعت گلب حسينچ
.
آخر سهم اطلقته يوم الحومه
صوبت بي عبدالله يالمظيومه
تفرهد اخيچ گومي لمي اهدومه
خلصو هلچ هاليوم يالمصدومه
.
يارقيه.. يارقيه.. يارقيه..

ــــــــــــــ ❁ ❁ ❁ ـــــــــــــــــ
.
تعبانه..
صار النهار أظلم ويشبه ليلها
تعبانه..
من تمشي تتعثر وبايد حيلها
تعبانه.
راح الحضن ذاك الي چان يشيلها
.
لحظه غفت بدرب المشتاگه
حلمت ببوها وطاحت من الناگه
اتگله يالغايب متى نتلاگه
هجرك يغالي ماني حمل افراگه
.
يارقيه.. يارقيه.. يارقيه
.
. ـــــــــــ ❁ ❁ ❁ ـــــــــــــ
.
مسبيه..
بيها الهزيله تطوي درب البيده
مسبيه..
طول الدرب ينزف ابوها اوريده
مسبيه .
ياناس والشامات ارض ابعيده
.
دخلن واهل الشام طلبو ثارهم
لمو  احجار  وجردو  بتارهم
مطرو على روس السبايا بنارهم
صابت رقيه وحده من احجارهم
.
يارقيه .. يارقيه.. يارقيه

ـــــــــــــــــ ❁ ❁ ❁ ـــــــــــــــــ
.
مانامت..
ليل الخرابه خله عبره بروحها
مانامت..
هاجت عليها الليله كل اجروحها
مانامت..
جابو طشت بلكي تبطل نوحها
.
عالطشت المظلومه صدت عينها
كشفته وشافت بيه راس احسينها
ونت لحد ما خلص كل اونينها
يم راس ابوها انتهن خمس اسنينها
.
يارقيه.. يارقيه.. يارقيه
.
حسن الموالي الفاطمي

.

**.
الزهراء ..ومجالس العزاء.....تجليبه....

أنشــــد وادور كــل ارض
عــن دمــعة العـين
وين الگه مجلس بالحزن
يندب على حسين
.
مـا أبطـــل عـبــرتــي
لبــني اذرف دمـعتي
...... آنه الزچـــيه .....
.
..ـــــــــــــــــ ❁ ❁ ❁ ـــــــــــــــــ
.
آنـه أم الغــريب الـمـحد أينـصــره
آنـه أم الشــــهيد  الهـشمو  صدره
آنـه أم التـــريب الـمـنــذبح نـحره
ظـامي ولاتروه مـن العـذب قطره
.
أنشـد على دمـوع الحزن
صــبـح ومســيه
وين الگه مهــظـــوم ويون
للـــغـاضــريــه
.
آنــه بلسم  علـــتي
لبــني اذرف دمـعتي
...... آنه الزچـــيه .....
.
..ـــــــــــــــــ ❁ ❁ ❁ ـــــــــــــــــ
.
تون أجــروحــي لـو راد العــزه يلتـم
أدخــل واجلـس آنــه بــآخـر الـمـأتـم
أون لحسيني واذرف  دمعتي من دم
والطــم عالــضـــلع  ياريـته يتهــشـم
.
ابني أنذبح فوگ التـرب
ظل صدره مخسوف
الف وســـبع مـية جرح
صلـن  بـالطــفــوف
.
من يطـــفي جمرتي
لبــني اذرف دمـعتي
...... آنه الزچـــيه .....
.
..ـــــــــــــــــ ❁ ❁ ❁ ـــــــــــــــــ
.
وي همس الدموع يظل خـيالي أيطوف
انـظــر چـــن خيــام وقــافله وطفوف
واشوفن چـن نحـور مـوذره وچـفوف
يويلي وچــن علـيـلي بالحبل مچتوف
.
انظر يتــامه بكـــل كتر
تتـلــفــت ادور
مرعـوبه موتــها الهظم
تعثـــر بالنحور
.
جرحي يـدوي بحسرتي
لبــني اذرف دمـعتي
...... آنه الزچـــيه .....
.
ـــــــــــــــــ ❁ ❁ ❁ ـــــــــــــــــ
.
صــوت النـاعي يتــرك بيه چم لـوعه
من يوصـف رقــيه ويـنـزف ادمــوعه
ابـــوها يـالحـزينه هشـــمو أضْــلوعه
مثلچ الها سطــره بخـــدها مطبـوعه
.
أربــع أصــابـع من زجر
شوفي اعله خدها
يالـزهره طاحت عالوجه
لـمــن جلـــــدهـــا
.
وي رقــيه غــربــتي   
لبــني اذرف دمـعتي
...... آنه الزچـــيه .....
.
.ـــــــــــــــــ ❁ ❁ ❁ ـــــــــــــــــ
.
أموت من البچي لو بالقصــــيده أسمع
شــمر ثنى اعله صدر اوليـدي يتــــربع
يويلي بســيفه بوداج الـوصي يگــطــع
أهيس روحي وي روح ابـني هم تطلع
.
للنـاعي اصـــيح آنه أعد
وأنـتــم تعيـــدون
لو عيني ذرفـت بالدمـع
لدموعي تبچــون
.
للأبــد يــاشيــعــتي
لبــني اذرف دمـعتي
...... آنه الزچـــيه .....
.
..ـــــــــــــــــ ❁ ❁ ❁ ـــــــــــــــــ
.
أطيح من البــواچي وأگطع الأنفاس
لو نـادى الـمنادي ذبحــــو العبــاس
اتـخيل مصابه وأخـــته بــين الناس
غريبه وتحدي بيــها زمرة الانجاس
.
عباس اظمه بدمـــعتي
وأنــدب يشيعه
ياريته نحري الـي انذبح
يم الشـــــريعه
.
للقـــيـامه ونـتـي
لبــني اذرف دمـعتي
...... آنه الزچـــيه .....
.
.
............

حسن الموالي الفاطمي**

إن تكلمت كل الجروح ..فأن للزهراءِ جرحٌ لم يتكلم
((الفائزي))
.

جرح ونطق بسم الدمه
يروي مصيــــبة فاطمه
من يشـــتكي الرب السمه
.
.
.
هـا يا جـرح يـا لشـاهدت يـوم المـنيه
احلـفك بكســـر الضــــلع اتـــرد عليه
ارويـلي كـل مصـيبة الــزهره الزچيه
احچيلي جرحك يالشـفت يوم الرزيه
.
منك نزف بس دم شفت
المن يجــــرح اتحـجـــبت
بين اللـــــيالي المظـــلــمه
.
.
.
جاوبني جرح الفـاطمه واول جــوابـه
دمعة هظم منه جــرت من دم خضابه
للعتره آنــه اول جـرح يكـــتب مصابه
اول جــرح واول نـــزف لهل النجـــابه
.
جمرة دمه مني الدمع
للسطره وي كسر الضلع
دامي وضلوعي مهشمه
.
.
.
ياجرحي گالت فاطمه ظل من الاسـرار
زينب زغـيره عالهـظم ومصـيبة الـدار
هالشاهدت محسن نزف وبعتـبتي الـنـار
تلحگ تشـوف اخـوتـها مـن تتوذر وذار
.
تسـهر تون حد الصبح
لمن تشــوفك يـاجــرح
عالونه ما هي معلمه
.
.
.
ياجرحـي احبس دمعـــتك وي المـصـيـبه
يالشــوفتك ماتنــحمل وآنـــه خضــيـبه
لو شــافك يموت الحــسن من ون نحيبه
وحســيــني ما يحمل جــرح امه الحبـيبه
.
يالصدري من دمك سبح
لا تلبس اثـــياب الـذبح
كف المصـــاب ولملمه
.
.
.
ياجرحي ظم امصيبتي عن داحــي البــاب
حيدر إمامــي وما اريــد ايشـوف الصواب
من عاين الدم وجنتي ظــل دمعـــه سچــاب
حبل الـوصـيه چتــفه ومنــه الگـلب ذاب
.
چف الردي بخدي انطبع
وحامي الحمه گلبه انصدع
للباري جرحه يكظمه
.
.
.
لو عايــنوا جرحك يجـرحي مــو بعيده
تشمت فلول اهـل الـرده بولد الصـميده
وحسيـــني يـوم المــوزمـه يفگـد عضيده
وبجــرحي يشمت بي بعد شـمر ويزيــده
.
ويگـله مثـل ام الحـــسن
الا اطحن ظــلوعـك طحن
وي الهظم وي الظمى
.
.
.
غسلني حيـدر لـن اثــر وي چفه ينــدار
عــاين عليه وبالحــزن لـن دمعه مـدرار
ناداني انطق ياجـــرح شنهي الجره وصار
جاوبته فــاطم ياعلـي صـــوبها بســــمــار
.
موبس وجن منها انسطر
حتى الضـلع منها انكسر
چفك يحــيدر بلسمه
.

حسن الموالي الفاطمي

**.

(٣) روايات..
مايطفن جمره من شهگة دموعي
(٣)  روايات..
بيهن الطم ما احس كسر بضلوعي
مايكفن اشرح ابعاد الرزيه
ريته عمري كله مجلس للزچیه

ـــــــــــــــــ ❁ ❁ ❁ ــــــــــــــــ
.
هذا یاگلب انهظم
هذا یاخد انلطم
یاضلع هذا الفتح درب المنایه
.
ضجت املاك السمه
ويه دمعت فاطمه
بعصرة الباب انولد جرح الولايه
.
هذا مو دمها الجره
هايه سوره ميسره
تناثرت بالسطره عالخد آيه آيه
.
لو قلمنه من الشجر
والحبر ماي البحر
ما نوفي چویه من خیط العبایه
.
الهه دمعات
درسن وحفظن الم كل المواجع
إلهه دمعات
للبچو من الفگد صارن مراجع
منها شوصف يا مصاب ويارزيه
ريته عمري كله مجلس للزچیه
.
.ـــــــــــــــــ ❁ ❁ ❁ ــــــــــــــــ
.
فاطمه روح النبي
من يرتلها الوحي
يفتتح بالبسمله ويلفظ اسمها
.
سر الدموع الجرن
ويه وجنتها اشحچن
لیا سبب منعوها ماتذرف المها
.
عدها كل جرة نفس
سحگه من حافر فرس
يعني هاي الشهگه عد الله شعظمها
.
ثلث روايات الجرح
مایوفن بالشرح
   فاطمه وسرها وکرامتها وهظمها
.
هالروایات...
حتی نجري الدمعه ونداوي جرحنه
هالروایات..
بيها نفهم كل مناهجنه وشرعنه
حتی نفهم کل جروح الغاضریه
ريته عمري كله مجلس للزچیه
.
. ـــــــــــــــــ ❁ ❁ ❁ ــــــــــــــــ
.
فاطمه نور وعِلم
من أفك سر الاسم 
بالحروف الخمسه أشعر جرح المصاب
.
بالرزيه آني اعتقد
واستدل واستند
خمسه اصحاب الكسا يعصرهم الباب
.
سر اسمها والعصر
ترجم اسباب الكسر
يعني هيه أول ضلع من طه ينعاب
.
يعني سورة كوثره
دمعه طاحت عالثره
دمعه انظر بيها عصره ورفسه وصواب
.
اعظم اسرار...
ياكلام اترتله دموع النواظر
اعظم اسرار..
الصدر شنهي شحچه بدوس الحوافر
من یفسر شهگة البضعه الرضيه
ريته عمري كله مجلس للزچیه

.ـــــــــــــــــ ❁ ❁ ❁ ــــــــــــــــ
.
فاطمه سر كربله
لمن حسين انوله
من مصيبتها اشاهد آنه وضعه
.
سر ضلعها الي انكسر
رادته يواسي النحر
يعتلي بالعصره بسمار ويگطعه
.
شنهي سر كلمة وإن
المت ام الحزن
الشمر يشتم علي وزينب تسمعه
.
فاطمه ليش انولت
بلطمه والعين انعمت
بعين ابو فاضل سهم محد يطلعه
.
مثل ابنها..
ينذبح محسنها بالرفسه الفضيعه
مثل ابنها...
يعني نبلة حرمله تذبح رضيعه
هذا سر مامستتر من القضيه
ريته عمري كله مجلس للزچیه
.
.ـــــــــــــــــ ❁ ❁ ❁ ــــــــــــــــ

عنها لو سائل سأل
يركض اعلام الجهل
يسفّه اللي بدمّـعته ينشد عليها
.
عالطهر من كل كتر
هجمت اقلام الكفر
تمحي آثار  الذبح بضعة أبيها
.
الروايه الواحده
ماتفهمنه شسده
عالوديعه وعن سبب عبرة بچيها
.
العمرها 18 ..
توسدت لوح النعش
والزراگ من الضلع واصل لديها
.
هايشعيه:
كل زمان العابده تنادي الظليمه
هايشيعه:
والمجالس تكشف خيوط الجريمه
والروايات الشريفه بكل مسيه
نحيي بيهن الليالي الفاطميه

.ـــــــــــــــــ ❁ ❁ ❁ ـــــــــــــــــ
.
ربي ما عنده هَزَل
(٣)روايات الأجل
الله ثبتهن لجل عمق المصيبه

رايد يثبّت أثر
كرر بهذا القدر
ربط رقم (٣) بالزهره الغريبه
.
أكد بهذا العدد
لان راد الي أجتهد
يعرف اسم الي كتل أمنا الحبيبه
.
اسمه لابد ينفضح 
(٣) حروفه تتضح
ذاكه أللي بعصرته طاحت سليبه
.
والنتيجه
اخذ رقم (٣) ودخل للسقيفة

والنتيجة
أسم قاتل فاطمة ثاني خليفة
.
والأدله تظمنت سر القضيه
ريته عمري كله مجلس للزچیه
.
.
تمت بفضل ربي وعطاء اهل البيت عليهم السلام.....
.
حسن الموالي الفاطمي
.**

..... #نزله#سريعه...#هجري**....
.
.
غصبن عليهم ردت گبتك
غصبن عليهم رفت رايتك

ـــــــــــــــــ ❁ ❁ ❁ ـــــــــــــ

ياعلي الهادي مزارك
         غصبن اعليهم رجع
بفتوه من المرجعيه
        شعبك الشيعي فزع
كل بطل طر المنايه
      بصدره للموت وطلع
اعلن ونادى المنادي
       السبي حبله انگطع
.
یوم انتصارك تفرح شيعتك
غصبن عليهم رفت رايتك

ـــــــــــــــــ ❁ ❁ ❁ ـــــــــــــ

سيدي عِرگ البطوله
          من یکضه من یطگ
واحنه خالطنه دماکم
        تربه وملوحه وعشگ
طگة الچف چن رصاصه
            عالصدر لمن ندگ
بالحرب عشنه وربینه
           مایخوفنه الرشگ
.
ننطر حفیدك يعلن ثورتك
غصبن عليهم رفت رايتك

ـــــــــــــــــ ❁ ❁ ❁ ـــــــــــــ

احسب انفاسي واعدهن
             وانتظر سر فاطمه
لو نهض يوسف زماني
            هذا يوم الحاطمه
بالقحط أگضيها صایم
       آنه معشوگي الظمى
واليمر يم السواتر 
         يغرگ بروج الدمه
.
مشهوده مولاي ضربة يمنتك
غصبن عليهم رفت رايتك

ـــــــــــــــــ ❁ ❁ ❁ ـــــــــــــ

المهدي من يعلنها ثوره
           آنه اسل سيف الصبر
ارد احد زنجاره بيدي
          واگطع السان الشمر
اركض الصحن العقيله
          اگطع اگیود الیسر
احتضن نار المخيم
    واطفي چویات الجمر
.
وهالیوم اجیتك امسح دمعتك
غصبن عليهم رفت رايتك

ـــــــــــــــــ ❁ ❁ ❁ ـــــــــــــ

افتخر آنه المقاتل
             بالسواتر حوزتي
يفرح المصحف اشوفه
                من ارتل آيتي
گصتي اسمع سمرها
            من تغازل تربتي
دمعتي چن ناعي ینعی
         والي تلطم تفگتي
.
هاي الکرامه سرها بحضرتك
غصبن عليهم رفت رايتك

ـــــــــــــــــ ❁ ❁ ❁ ـــــــــــــ

اقسم بدمع السبايه
         واقسم برب المجيد
والله مايشتم عطورك
               لاشمر ولا يزيد
مایرد یوم الزچیه
           لا ولا ذبح الشهید
الا تلگاني اعله بابك
          سابح بدم الوريد
.
كل شيعي بينه يعشگ جنتك
غصبن عليهم رفت رايتك

ـــــــــــــــــ ❁ ❁ ❁ ـــــــــــــ

لاتنسوني ووالدي من فضل دعائكم المبارك
.
حسن الموالي الفاطمي
.

.**

وصية الامام الحسن العسكري للامام المهدي........
.............وزن الفجري................
.
.
الك مني وصيه
           گبل یوم المنیه
مواریثك والاسرار
         اخذهن هالمسيه
......يموعود.......يموعود
.
.
امنه الزهره يوليدي
         وأنه عاشر ضواهه
يبني وانته يوسفها
         ويرف بيدك لواهه
عصرها الطاغي بالباب
     وسطر خدها ورماهه
يبني هاذي شيلتها
         عليها انظر دماها
.
اخذها وشم عطرها
        تخبرك عن سترها
منها اخذ الاخبار
        عن ضلع الزچیه
...یموعود.........یموعود
.
.
.
عصة موسى هاي
       وهذا يبني ذو لفقارك
عمامة جدك الهادي
           شكثر بيها انتبارك
الك بالطف چبد ظامي
              ينادي بنتصارك
جدم كافر واثر حافر
      سحگ یالمهدي دارك
.
مواريثك بالضلوع.
        جروح وعبره ودموع
سكينه خدها مصفوع
              وي زينب سبيه
.......یموعود.....یموعود
.
.
.
شلتها بگلبي بنفاسي
                 مواريث النبوه
هاي الجربه الها
         چم طفل گلبه تلوه
أشم من عدها يابويه
             اثر عطر الأخوه
واذكر بيها عباس
         شكثر چیده تچوّه
.
بارز و حمل الجود
          واسگي منه الجنود
شجاعه ارویهم وزود
         وارهب جیش امیه
......یموعود......یموعود
.
.
.
الك سيف والك رايه
           على جروف الشريعه
الك هم يبني انصار
            والك يوليدي شيعه
تنادي يال ثار الظامي
                والامرك مطيعه
اعلن ثوره لحسين
         ونزف منحر رضيعه
.
اطلب ثار الجروح
       تدري بنحره مذبوح
تلگه دمه مسفوح
        على تراب الوطيه
.....یموعود......یموعود
.
.
.
ترك عمك الك درعه
       وبعد هم ريشة الطاس
البسهن ينشمي يبني
             من تبرز ينوماس
خل الدنيا كلها
      اتنادي رد للدنيا عباس
وخل عدونك ابكل ساعه
        بالچف تلمس الراس
.
ترك بالطف الچفوف
         الهن حظر اسیوف
راح بعینك اتشوف
           شجاعه حيدريه
.....یموعود....یموعود
.
.
.
عمرك خمسه يوليدي
           وعشت اعظم رزيه
عشت غربة وفاتي
         يبني وانفاس المنيه
لچن ما جربت
      يابويه هظم الغاضريه
مثل عمرك تعيش
     اهمومه ودموعه رقيه
.
يمك اشهگ انفاس.
          ابوها يمها بس راس
بحوافر صدره ينداس
            على الغبره ورميه
......یموعود.......یموعود
.
.
.
مو بس بالحوافر يبني
                صدر انه ايتوذر
من هدم البقيع
          ومن علاماته تحظر
راح اتشاهد ابعينك
                مراقدنه اتفجر
هجوم الناصبيه
    وطفنه هم يبني ايتكرر
.
الك يوليدي شبان
         مثل خاتم سليمان
بيهم تطوي الاحزان
             بأمر رب البريه.
.
.
ثواب القصيدة الى ارواح
.
#شهداء
#الحشد
#الشعبي
#المقدس
.

.
حسن الموالي الفاطمي
.
ا

فتحة عزاء لشهادة الامام الحسن العسكري عليه السلام
...............تجليبه................
.
.
نرثاك........يالعسكري
بدماك......يالعسكري
.
.
اجينه هالمسيه كلنه يم بابك
نواسيك اونخضب دمنه بخضابك
بواچینه تطّفي جمرة اصوابك
نواسي حيدر احنه وفاطمه الزهره
.
.
نواسيك ابهظم وبحسره وابلوعه
على امصابك يواسي الشيعي بدموعه
يلطم عالصدر ويكسر اضلوعه
يذرف دمعته بالحسره والعبره
.
.
ربيع اول هل وهلت الأحزان
عليك وتذكر ادموعك دمه الوليان
من كلمة (وأن)  يتسلب القرآن
من عدها جرت كل دمعه للعتره
.
.
ربيع ابلا ربيع ايمر على الأبرار
تذكر وانت ماظن تنسه يوم الدار
هجمت عالزجيه زمرة الكفار
طبع چفه الخلیفه ابخدهه بالسطره
.
.
ولکن سیدي هالهجمه مدروسه
الوصيه عد علي وبگلبه محروسه
شیطان السقیفه بنته جاسوسه
توصله خبرها وهو ینتظره
.
.
جنود المعتمد من حاوطو دارك
مهمتهم تحيط السلطه بخبارك
عند الباري چنت أمأمن اسرارك
خفه المولد عليهم ربي بالقدره
.
.
عين احزاني تنظر دمعتك تدي
على ابنك من تگله یبني سر عندي
غيب ولا تريد يم داري يالمهدي
الك ثار وزمان وشيعه متحظره
.
.
احلفك بالسحگ حافر علی صدره
احلفك بالحفر سن الرمح ظهره
احلفك بالذبح سيف الشمر نحره
نريد القائم ابهاي السنه انظره
.

.
.
.
حسن الموالي الفاطمي

قصيدة لشهادة رسول الله
(ص و آله)..........قصيدة متعددة الأوزان
.
.
13 عام . يانبينه ..
       چان بالكعبه اختبارك
10 عندك .. بالمدينه...
     واعلن الباري انتصارك
.
نذكر اعوام الولايه
بـ هالبدايه للنهايه
........... يارسول الله الأمين
.
...................
.
تبدي قصة تضحياتك
يالرسول وذكرياتك
بالمغاره ... نزل جبريل الأمين

گلك اقرأ يامحمد
يارسول اللّه المسدد
هالعباره ....بسم رب العالمين

أنت مرسل للبرايه
رتل آيات الولايه
والبشاره ..الك من حق اليقين
.
ماتنولي .. لا يالولي
               دومك تظل غالب
ذاخر الك .. حمزه وعلي
                وعمك ابو طالب
.
يفتدونك ..كل عمرهم
منهجك عدهم هويه
همه منك .. وانت منهم
خدمتك حد المنيه
.
دخلوا  ابحور المنايه
بـ هالبدايه للنهايه
................يارسول الله الأمين
.
...............................................
.
عشت لوعات ومصايب .
عبره وآلآم ونوايب
أنت ثائر ...... بيدك اكتاب المجيد

نادى بالكعبه الاسيره
الوليد ابن المغيره
گال ساحر ..... كاهن ودينك جديد

يسمع احروف الهدايه
رتلتهن آيه آيه
نادى شاعر ....هالامر ثابت اكيد
.
ابو لهب ... وام الحطب
تمشي ويضربونك
هند وصخر... وابو جهل
همهم يذبحونك
.
وانت صابر .. عالرزيه
تنظر الأول شهيده
هذا ياسر ...وي سميه
دمهم ايرتل عقيده
.
تحملوا اهل  الغوايه
بـ هالبدايه للنهايه
................يارسول الله الأمين
.
............................................
.
شاهدوا موتت بنينك
ماتزلزلت ويقينك
ماتأثر ...... ولا بالاحزان ارتمه

يستغل هاي المسائل
عنك العاص ابن وائل
نادى ابتر .. وانت صبرك يلجمه

العلي نادى يطه
سورتك هاي وتباهى
عندي كوثر ...أم ابوها فاطمه
.
أم الحسن .. جنة عدن
هم طاهره وحره
نِعم النسب .. اول سبب
للعصمه والعتره
.
يلوعوها... يعذبوها
من بعد عينك يطه
كلها صاحت ... مات ابوها
بعدك وتنزفت دماهه
.
وينفتح باب السبايه
بـ هالبدايه للنهايه
.................. يارسول اللّه الأمين
.
.........................................
.
عن ديارك يبعدونك
قرروا ويحاصرونك
جند الاوثان ...... ياصبر احمل صبر

عمك الچنت ابثنيته
تنظر اعيونك منيته
يلبس اكفان .... مابعد عندك ذخر

ذبلت البسمه البهيجه
يالنبي ماتت خديجه
عامك احزان ... شباقي عندك تنتظر
.
يعني استعد .. حان السفر
من فاطمه تنعى
لا تنخسف ... ارض ابسمه
لو شهگت الدمعه
.
حل يتمها .. ماتت امها
والزمن عالخد صفعها
من زغرها .. ينتظرها
يخلي بسمار ابضلعها
.
عاشت آهات الرزايه
بـ هالبدايه للنهايه
................ يارسول اللّه الأمين
.
........................................
.
قررت ها يانبينه
تهاجر الارض المدينه
بالسلامه ... حيدره دونك يموت

يفتدي عمره الحياتك
هو أول معجزاتك
لاحمامه ...... ولاخيوط العنكبوت

الي وياك ابمغارك
تمنى بدماك ايتشارك
بنتقامه .... بس خنس ماعنده صوت
.
بهاي الأرض ... احيي الفرض
يالنورت دارك
حانت بدر ... گوم انتصر
رد واخذ ثارك
.
لا تأمّن .. من غدرهم
تآمرو بعض الصحابه
لو وريدك .. لو عضيدك
لو نحر حمزه وخضابه
.
من أُحُد تبدي الضحايه
بـ هالبدايه للنهايه
.................. يارسول اللّه الأمين
.
..............................................
.
خلصت البعثه الشريفه
دگو اوتاد السقيفه
للرزيه ...... يمك اصحاب البلاء

يالرسول ابهالمسيه
أنت بفراش المنيه
والزچيه ........ استعدت للدماء

من ينادي.. مات ابوها
يالله فاطم طلعوها
بهالبليه ..... ينفتح طف كربلاء
.
يذبح دمع .. يكسر ضلع
ذاك الرفس بابك
يسطر بعد .. خد الطهر
من يسحگ اعتابك
.
عظم الله .. بيك اجرنه
اليوم يالهادي بغيابك
يانبينه ... يا ولينه
يا عظم ندبة مصابك
.
يل قريتك آنه آيه
بـ هالبدايه للنهايه
يارسول اللّه الأمين
.
.
انتهت نسألكم الدعاء
لا تنسوني ووالدي من فضل دعائكم المبارك
.
حسن الموالي الفاطمي
.
الاوزان: شيعتي تام + وزن موشح منفصل
+وزن المنسجم
.