السلام على النازحـين عن الأوطان

عاف المدينه ورحـل مـن ديـرته مجـبور
مكسور خاطر مشه وعايف گلب مكسور

ابليل اظلم امن الكحل شد رحله للغربه
مـحـد طـلع ودعـه ولـحـد لــزم دربــــه
صـد اعلـه داره وبـجه وبيـن هظم گلبه

بعده ابمدينة هله وبين علي عاشور

نـازح طلـع للاسـف مـن ديـرة اجـداده
ماجـنه ابن بت نـبي وسيد وابن ساده
مثل الغـريب ومشه اعليه ماكو نشاده

سكته المدينه شعجب موديره جنهه اگبور

راح الگبر فاطمه وصاح بدمع هظمه
الانسان مهما كبر يحـتاج حضن امه
وحسين حن واجه لحـضانج اتضمه

شميني يافاطمه بنحري اليضل منحور

شخلف وراه بس بجي واگلوب مفجوعه
مـن الـعليله البـقت بجـفـوفـهـه ادمـوعه
وام البـنـيـن ابـحــزن تــتأمل ارجــوعـه

صاحت يماخذ گمر ظلت مظلمه الدور

جـان الضـعن مطمـئن رغـم المشي بالبر
وساقي العطاشى يرف بالبيرغ الاخضر
مـا زال عـبـاس اكــو .. خـاتـأمـن الخّدر

تغفه وتنام برغد دام العلم منشور

وام الطفل عالطفل لولت ومتامله
يكبر ابنـهه الـولد وعالخـيل يتعله
ماتدري باجـر يـرد وبرگبـته النبله

مادار عمره سنه وسهم اعلنحره ايدور

بضعنه عفاف الـنبي المـاكو اعـف منه
واللي مشت وي اهل خطوتهه متأمنه
بـس بـاجـر بـكـربـلـه جـم حره تـتمنه

اتموتهه نار الخيم ولانظره من ناطور

اويـاهـم خيم تنـصب مامونه كـل مـغـرب
تالي اعله روس الحرم هاي الخيام اتشب
ويطـلعـن امـن الخـدر حـالـتـهن اتـعـجب

شيطفي عين الشمس شيغير المقدور

**ابو حميدة الشويلي

اللهم عجل لوليك المنتقم الفرج**

شهادة مولاتنا ام المصائب زينب عليها السلام

انه بـعاشر الـهم صـرت كــلي حسره
وگع حامي خدري الذي دگلي صدره
واخـوي الـغريب الهظم حاني ظهره
غـريـب ايتـلفت لـحــد هـسه اذكـره

گــدامــي صـارت هــاي
ابــن امــي يطــلب ماي
ومــات بضـماه مـذبـوح
وضل خصمه رايح جاي

ذبحووو گدام اعيوني
لارحـموه لارحـمونــي
بنت الزهره وهظموني .. ياحُسين

شـافـتـني ابـهـيمـه الــوادم
وهــاشــم مافـزعو هـاشــم
وضل ضعني اخلافك هايم .. ياحُسين

................

عشت عمري غربه ومصايب عجيبه
انــه اول مــره هــاشميه و غــريـبه
جــرح گلـبي ينزف و ابد ماله طيبه
انه الـشافت اعـيوني اعظم مصيبه

شـفت الخــيام ارماد
وعنـي اخـوتي ابعاد
نحـت وبجيت اهواي
بــس البـجي مـافـاد

انه الشـافتهن كــلهن
والمـحد يــتحـملهـن
والاصعب والاكلفهن .. ياحُسين

يــحسين انــه ام الـعـفــه
يم غربه ابجي شگد كلفه
ويـن الــعــبـاس وجـفـــه .. ياحُسين

..................

انه من هظمتي الدمـع دم بجيته
لخوي اشكي رحت وينازع لگيته
نخيـته وكـسر گلبـي لـمن نخيته
عذرته ورجعـت لخيامي وبجيته

انه الشفت بــالعــيــن
سلبوا قميص احسين
وعالتل صعدت انخاه
گام ووگــع مــرتــيـن

شفته وعذبني الشفته
مايگدر ينهظ لاخــتــه
وانه بــكلهن عــاذرتـه .. ياحُسين

يعاين ليه ويـتـحسـر
جارحني بـهذا المـنظر
من هالضيم شبعد اكثر .. ياحُسين

.................

انه بـت مــضايف گـعـدت بـخـرايـب
مصـايـب تفكـني واطيـح بمـصايـب
العجـايب شفـتهن جـميع العـجـايب
عگب ذاكه خدري اسيره وي اجانب

ماكو اقسه من هالحال
زينـب بــديـهـه احــبال
و بــت حــيدر اسرناج
كل سـاعه شــامت گال

المكفوله ابشارب كافل
مـاتـحمل جــلمه عاذل
واللسان الغربه الطايل .. ياحُسين

التنهي جانت والتامر
ايمشيهه ابرايه الكافر
اشسوه بزينب يالعاشر .. ياحُسين

**ابو حميدة الشويلي

اللهم عجل لوليك المنتقم الفرج**

شهادة مولاتنا ام المصائب زينب عليها السلام

عله افراش الموت هاي الليله روحي
وانه اناطر جيت اخواني
الليله اخيره وينتهي بهالدنيه نوحي
كافي ياگلبي شنو اتاني

مــوت يــاگلبي بعــد مامنـهم جيه
سنه ونص وماكو واحد ناشد بيه
مو عتب عالخوه لكن عندي امنيه
اشتاگ گلبي اعله الاشلونج علويه

راح تــموت اختــكم راح اتمــوت
وين احسين يجي يشيل التابوت
مـمـقصـرين يخـوتي وكلـكم زود
بــس اليــوم ردت مـنكم زاتــوت

ويـن الـيطر مهره الفيافي
ولو حشميته ايگوم حافي
خل يفزع بخضر الجفافي
عمة الساده اليوم شالت

...................

مـن اغــروب الـعـاشر الـهـالمـغربيه
امعصبه و انعى عله ازلامي
مـن هـذاك اليوم وانـه اسمي سبيه
وصرت جلمه يگولني الشامي

الــصار بـيه ماجــره بأي واحد ثاني
انه عالهزله وعفت بالحومه اخواني
والحده بنوگي يخوتي اشگد بجاني
ايگلي سكتي وجهل كل گدري وشاني

بت الخير جنت وانه ام الخير
وفوگ اخيام دلالي يحط الطير
تالي ارماد صفن ماضل صيوان
الصـار اويـاي ابـد ماصار بغير

حـرگو خـيامي وانـه جــوه
وماني اطلعت طلعوني گوه
عــگب اهلي نيشان المروه
مالت الدنيه اوياي مالت

.....................

الدنيه بس اوياي گضتهه مصايب
ارتاح مافد مره خلتني
من دلال اخيامي انزل بالخرايب
والله هاي الهظمه ذبحتني

گلبي مهظوم بعد حگه امن اينادي
يهلي لحـگو علـي تعـبني الـحـادي
لابقـت ديـره مامـرنــي اولا وادي
وجني لابت علي ولاجدي الهادي

بگلبي اهواي سوالف من العام
الحــد الان بـديه ارمـاد اخيام
اهواي اجروح عليه وگلت اتهون
بس الشام كتلني بس الشام

كون الحجي ينگال كله
جا مابــقت بالگلب عله
شله بحياته المسبي شله
ياغربتي المامنها صارت

................

راح اموت وانه هاي الليــله وحدي
وماكو حس وليان عد بابي
لا اخواني الي اجوني ولامن ولدي
يعني اموت ابگلبي اصوابي

اليــوم گــلبي يحــن ويــريــد اعزازه
عله وجـه الحُــسين الــليــله اتـــوازه
راح اموت وگلبي ضلت بي بس عازه
اخو منگب يجي ويبجي اعله الاجنازه

وحرمه تنوح عليه وحرمه تنوح
يم عباس تعاي وشوفي الروح
حس وليان اريد وحس نسوان
وبيرغ كون عله التابوت يلوح

وين اليروح الليله وينه
لبـيوت اهــلنه بالمدينه
ولام البنين يــبث ونينه
ويگلها اخت عباس ماتت

**ابو حميدة الشويلي

اللهم عجل لوليك المنتقم الفرج**

شهادة الامام علي الهادي عليه السلام

ابـعــث دمـعـي ..السـامـره وعـاشر معصوم
و اللطم ضلعي .. بسم ابن الزهره المسموم

لـلـهـادي اللـيله الـدمـعات
وتتعاله بگلبي الصرخات .. بسم ابن الزهره المسموم

------------------------------

الليله انعى .. وشكو دمعه
ابعيني ابجيها اله

ادگ گلبي .. وادعي ربي
بالدموع اتوسله

الليله نوحي .. وكل جروحي
على الهادي وكربله

انعين الزهره .. التفگد هاي الليله اوليد
ريت الحسره .. عالمسموم بگلبي اتزيد

كون اتهد حيلي الحـسرات
وتتـعاله بگلبي الصــرخــات .. بسم ابن الزهره المسموم

------------------------------

بخان وسفه .. والله كلفه
ايبات ابن سيد البشر

وسجن حفره .. كسر ظهره
وشبع شوغات وقهر

طلع منه .. وكثر حزنه
بغربه واحزان الدهر

ضـيگ سجنه .. واظلم مـايـوصــلـه الـنـور
اه ياحزنه. .. و اه اعله الـدنيه مــن اتــدور

تـخنگ وحشـه الـزنزانات
وتتعاله بگلبي الصرخات .. بسم ابن الزهره المسموم

------------------------------

ابن ساده .. وصار زاده
سم. من جفوف الغرب

ياعجيبه .. هالمصيبه
كون دم عيني تصب

الولي العاشر .. النسله طاهر
ضل طريح اعله الترب

خلص عمره .. مسجون الهادي ومطلوب
ابــن الــزهره .. لــو يتـسمم لـو مسلــوب

لازم كــون ابهظمه ايـبات
وتتعاله بگلبي الصـرخات .. بسم ابن الزهره المسموم

------------------------------

ويلي مامي .. مات ضامي
والسم بجبده گطع

انمرد جبده .. مثل جده
وهم اله محد فزع

بديره غربه .. ذاب گلبه
امن الهظم وامن الوجع

اتفت جبده .. شعنــده السم وي اهل البيت ؟
ومات الوحده .. وانا الهاي ابـجي اتعــنيــت

ضـل يـتلوه ويــم شمـات
وتتعاله بگلبي الصرخات .. بسم ابن الزهره المسموم

------------------------------

والله حيره .. ابلايه ديره
يبقه ابن سابع سمه

طبگ جفنه .. وعاش حزنه
وحيل لطمت فاطمه

العسكري انوب .. گام شگ ثوب
جزع واعليه انغمه

جــد المهـدي .. بگاع الغربه امـغمض العين
اللطم خدي .. الحزن الهادي وحزن احسين

كــون اليـوم اشبع لوعات
وتتعاله بگلبي الصرخات .. بسم ابن الزهره المسموم

----------------------------

ابو حميدة الشويلي

اللهم عجل لوليك المنتقم الفرج

شهادة مولاتنا ام البنين عليها السلام

( عزاء الفواطم )

ياهي الجايه ومنتظره عالباب
اظن هاي الوفيه وام الاطياب
تعالي ياشـريجـتـنه بالامصاب
الج حگ البجي ولازم تنـوحين

تعالي وجابـليـني وخـل نـون حيل
انمـنعـت امن البواجي ابهدوة الليل
وشيسكت لاخـوها داسـته الــخـيل
گلبي امن الهظم مجسوم نصين

و اجت ام البنين وحــسها مبحــوح
و خدها امن اللطم عالوالي مـجروح
صاحـت صـدگ عود احسين مذبوح
وضل مطروح جسمه بالميادين

ولـدي اهناك خوما قـصرو اوياج
انه مــربـيـتهـم يـمـوتون جــواج
من رحتي اعله هزله ياهو ماشاج
وياهو الصاح زينب وين ماوين

زينـب گالت الها . اهناك عــبــاس
وگف وگفه لخواته تــرفع الـراس
بس من طاح هدت عالخيم ناس
واخيالي انلمح يايمه بالعين

اجروح اتگابلن يبجن عله الصار
ثكله بثكله لطــمن واللـطم حـار
مــافـتّــر لطـمــهن بــالــگلب نار
لطم الفاجدات الفگدن ابنين

وام عــباس شـهگت رادت اتمـــوت
ولاجـت من وجعها وصاحت بصوت
صدگ جسمه بحصيره وماكو تابوت
صدگ مسلوب ضل بالهيمه لحسين

**ابو حميدة الشويلي

اللهم عجل لوليك المنتقم الفرج**

شهادة مولاتنا ام البنين عليها السلام

ام الـبنـيـن اتـحـرك المـشــاعر
الحُب الـغريب الـمابقاله ناصر
تكــسر گلـبنه عالسبي وعذابه
ووقت الحوائج تجبر الخواطر

مـولاتـي
هيه بـجـتـنـه لــلـضـامـي وغـربـــتـه واولاده
هـيـه بـــاب الـحـاجـه خـالـي مـايـرد وفــاده
هيه ساس الخــدمه صارت والوفه وامجاده

هيه الـعـالـمـه
واعظم خادمه
هيه ام الگـمـر
معـناها السمه

ادخيل ام البنين

.....................

كــل الســوالـف ماتصل فضلهه
العـدنـه كـله مـن اديـها والــهــه
الشاعر الـمـلا الخادم المـواسي
كــل الاسـامـي اتـجـلب بحبلهه

مولاتي
انه عبدج وابن عبدج حاضـــري والمـاضي
بكــلشي التـقسمـينه اليـه قانع وبي راضي
انتي محـكمة الخـدامه و ابو فاضل قاضي

خـلـتـنــي احب
وللخدمه انجذب
عبــد ام البنـين
يـاريـت انحسب

ادخيل ام البنين

......................

ام البنين .. وتــوگــف الـسـوالـــف
شيـكتب قلمنه شتـنطق الشفايف
عـن مـره بـو فاضــل يـحب اديها
ســـيـدةُ الايــــثــار والـمـواقــف

مولاتي
عـدهــا ابــن بالغاضــريه عــجـزو يلاگونه
رضع من درتـها غيره وصار حامي اضعونه
هــوه ممنـون الحُـسين وهـيه اله مـمنونه

ماكو بـهالوفه
بس هيه وكفه
عباس الكفيل
ربــت مـوقفه

ادخيل ام البنين

........................

كلشي انتهى .. وباقي ذكرها خالد
وام الگـمـر خـيـر الـلي عـدها زايد
عــنـدي المهم ترضـى عـلـيه خادم
لو اعمري اخلصه ابابها ابقه ساجد

مولاتي
مـثل قـطمير ارد اصـير ابابج وماعوفه
عـبـد متـذلـل ورافـع لـلكريمـه اجفوفه
وانتي مارديتي واحد من قبل معروفه

رافع يمنــتـي
ويمج حاجتي
رايد عالحُسين
احرگ مهجتي

ادخيل ام البنين

......................

كل مجلس ايصير بفضلها هيه
والــراد يـوصـل گـلبه لـلزجيه
ينخه ام گمر عدنان تاخذ ايده
ويگـلها يـامـولاتي اخذي اديه

مولاتي
مــاكـو واحد گـدر يـخدم وحـّده وبـزوده
ابـزود مـولاتي خدمنه وجف ابنها وجوده
مستحيل يصير مجلس واهي ماموجوده

ابكل مجلس عزاء
تلــگه ام الــوفاء
تلطم عالـسليب
الضامي ابكربلاء

...........................

**ابو حميدة الشويلي

اللهم عجل لوليك المنتقم الفرج**

السلام على عش آل محمد عليهم السلام#فاطمة_المعصومة

معصومة .. اسمها تـارسـنـي فضل
معصومة .. لزمتـني ماخلــتني ازل
معصومة .. مشتـني بدروب العدل

ممنون الها كل عمري وحياتي
وممنون الفضلها
عاصي. واعرف ابحبها نجاتي
ومشكوره اگلها

حاشه اترد عبـد نادم
يـا قوتـة بني هـاشم
فضلها تـارس الوادم .. جنها امها الزجيه

مــاردت بـشـر خالي
حبها غـيـر احــوالي
قيمه ورفعه سوالي .. وانطاني هويه

بنت الكاظم اطلب بس رضاها
نـعمه وخـادم سوانــي هــواها

--------------------

معصومة .. كــريـمـة ال الـمـرتـضى
معصومة .. هيبه وجلاله امن الرضا
معصومة .. هنـيـالـه البـحبها حضه

هنياله الــذي طــاف بصحهنا
وبمرقدها گــاعـد
نـور الجنه كله انـصـاغ مـنها
وخير العدها زايد

هــنـيـالـه الــذي زارج
واصبح گلبه خـطارج
يـالماتـنطـفي انـوارج .. يــا عــش المحّنه

شوگج ماطفه بروحي
يمته اتزورج اجروحي
واگـعـد يـمـج ابنوحي .. والونه اعله ونه

بنت الكاظم مـاعندي سواها
نعمه وخـادم سـواني هواها

--------------------

معصومة .. عـش المـحـنه والـعطـف
معصومة .. رحـمتـها ابـد مـاتنوصف
معصومة .. ســرها صـعب ما ينعرف

شحجي ابمـنزلتهـا وهيه ايه
والسلطان اخوها
وگال الكاظم ابنص الروايه
يفداها ابوها

عـمـة تـاسـع الـعـتره
الـزارج زايــر الزهره
هيبه ومنزله وقدره .. مـولاتـي الـكـريمه

ليزورج اله الجنه
وينازح القهر عنه
القـم ليليه يتعنه .. گلبي ويحجي ضيمه

بنت الكاظم يمته اشتم ثراها
نـعمه وخـادم سـوانـي هواها

--------------------

معصومة .. اسـمــهـا لــلـخــادم مــدد
معصومة .. تقـضي الـحوائج والشدد
معصومة .. شحجي عن افضالج بعد

من جفها اشكثر صبت عليه
ماخلتني حاير
هـايـم گـلبي بيـها ومو بديه
غذتني مشاعر

جفج شـطلب انطـانـي
وعـطفج غـيـره غذاني
بعشگج يكـمل ايـمـاني .. وحاشه انسه وگفتج

يـا مــولاتــي اعــذريني
واذا انسه انتي ذكريني
عــنـج احـجـي خلـيني .. وخليني ابخدمتج

بنت الكاظم مولاتي بحماها
نعمه وخـادم سـواني هواها

--------------------

معصومة .. هيبه ومقام ومنزله
معصومة .. اسمـها گـلبي يـرتله
معصومة .. باب الدموع الكربله

كل دمعه التصب من خير اديها
ودمعة كل مواسي
بـالازغيره وبالاجبيره اعتنيها
وجفوفي اعله راسي

بزودج احجي مولاتي
ومـنــج اخـــذ اهـاتي
بسـمـج تجري دمعاتي .. لحسين ومصابه

وديني لشكـو اقرايه
خلي اعيوني همايه
على الراحن بلا رايه .. وباتن بالخرابه

بنت الكاظم حزن الطف گضاها
نـعمـه وخـادم سـوانـي هـواها

---------------------------------------

**ابو حميدة الشويلي

اللهم عجل لوليك المنتقم الفرج**

#الليالي_الفاطمية

اول ظلـم مـنـا بـده .. بس غمض اعيونه الرسول
التمو على بابه العده .. وحـرگـوه عله بنته البتول

اعليها احترگ باب الجذع
وخــلت اديـها اعله الضلع
والــزهره عالـعتبه انرمت
وطاحن سوه الدم والدمع

الباب المُـقــدس
من نذل تاليهه يـُرفـس
حـاقد وعالعتبه هـوس .. ااااه

اعظم جساره
ينركل باب الطهاره
والضلع دم ايتجاره .. اااه

كسـرو ضلعهه وانرمت فـوگ التراب
باب الله فاطم وانـدفع فوگـاهه باب

اللهم العن قاتلي فاطمة

.........................

اتلث مـيه مابيهم شهم .. هجمو عله بيت العفاف
بلنار واسياط وحطب .وگفو عله الباب استطفاف

هــدو عله الزهـره بحطب
لاغــيـره عدهم لاكــو رب
كسرو ضـلعهه بــالهجــوم
وخد فاطمه ويلي انضرب

حرگووه عليهه
الباب.. واتعاله بجيهه
وانجوت بالنار اديهه .. اااااه

اااه ياحزنهه
فـاطـمـه ذبـحـو ابـنهه
محسن الدمه بحضنهه .. ااااه

مذبوح ابنها وصارت اتگوم وتـطيح
رادت تشـيله بس ضلع عدهه جريح

اللهم العن قاتلي فاطمة

...................

كــســـرو ضـلـعـهــه والـورد .. ذب لونه يم باب الحجاب
اليرضه الله من ترضه صفت .. تبجي وتون فوگ التراب

من عصرة الثاني النذل
بحشاها ماضـل الحمل
وهيه المصيبه عالامير
من بيته ماخوذ بحبل

اااالله اكبر
ينجتف ياوسفه حيدر
الناصي عل عالي تكبر .. اااه

اااه يالصميده
شافت احبال اعله ايده
طلعـت وصاحت اريده ... ااااه

طلعت وراهم والگلب من حزنه شاط
اتـريـد الصـميده وردو اعليهه بسياط

اللهم العن قاتلي فاطمة

...................

وزينب تشوف اللي جره .. وتتحمل اهموم الزمن
وبـاجـر تـضيع ابـكربـله .. هيه وبنات ام الحسن

من هالمصيبه اللي جرت
زينب بـعـدهـا اتيـســرت
باب الزجيه امن احترگ
اخـيـام العقيـله وجــرت

من طاحت امهه
وابتـدت قـصة هـظمهه
وباجر اتماشي خصمهه .. اااااه

ايذبحون اخوهه
وبني هاشم مـــا يجوهه
وتنسبي برفجة عدوههه .. ااااه

مـن انـكسر بـالـعصره ضـلع امهه البتول
انكسرن ضُلوع احسين اخوهه بالخيول

**ابو حميدة الشويلي

اللهم عجل لوليك المنتقم الفرج**

#الليالي_الفاطمية

وبدئت مصائب مولاتنا زينب عليها السلام

طفله وعــمري خمس اسنين
وشـفـت الـزهـره بــيــن النار
مـنــا امــي جـــاي اتــمــوت
ومـنــــا غـربـه ويــن انـــدار

من شفت الحرگ عالباب
گلت باجر يشب صيوان
ومن داسو حدود البيت
گلت بـاجـر اطـب ديوان

ويلاه .. بـخامس اسنـينـي اتعذبت
ويلاه .. اتطـيح امـي گدامي شفت
ويلاه .. وجهلو قــدر بـنـت الرسول

عالباب .. اتلث ميه اجوها بالحطب
عالباب .. وخـد امي گدامي انضرب
عالباب .. وكـسرو ضلع من البتول

بخامس سنه .. وحيلي انهدم
اشحـالــي اذا. .. تــوگع خـيم

..............................

كـل لــيـله امــي گـدامـي
تـتـلوه و الـمها ايــزيـد
ومن تدعي بصلاة الليل
مــا تگـدر تـشيل الايــد

امي وهــايــه حــالـتـهــه
حگي امن ابجي ما انلام
تون مـن لــوعــة البـسمار
مــا خـلاهــا حـتـه اتــنـام

مكسور .. خـاطـرهـا مــن كـلمـة وإن
مكسور .. ضـلــع امـي والـدنيه حزن
مكسور .. گلبي عليهه وگـمت اصــيــح

شيفيد .. جرح امـي ماضـنه يطيب
شيفيد .. وحيدر علي اگبالي غريب
شيفيد .. من يمشي كل خطوه يطيح

اسمع ابوي ..ااهنــا حـجه
يـا فاطـمة .. صـاح وبجه

...............................

امــي اگــبـالي اشـوفـنـهـه
تغـطي بجفـهه جي محروگ
مـعـنـاهـا انـا هــم بـــاجــر
اضــم بجـفوفي فوگ النوگ

بـعدني بـخامـس اسنـينـي
وشفت السطره فوگ العين
گـلت ياروحي شيضل بيج
لـو صـار الـعــمر خمسين

لو صار .. يـا روحـي خـمسـين العمر
لو صار .. جدمي يدوس اعله الجمر
لو صار .. عـاشور جا شيضل عليــج

ياروح .. مـوتـي قـبل لا تـنسبـين
ياروح .. باجر تره يطيح الحُسين
ياروح .. ويلـتـف حبلهم فوگ اديج

بداري اهون .. او لااا بالفله
بـاجـر اضــيع .. ابــكـربــله

............................

ضليــت اعـلـه هـذا الـحــال
لـيـلـيه ابـجـي مـاضـل حـيل
كـبـرت بـدمعــتي وهــظـمي
وشفت ابن امي جوه الخيل

وكـبـرت دمـعــتي بـعيـنــي
وكـبر بـيه الهظم والنوح
الـربـيت اويـا وعشـت اويـا
شـفـتـه ابـكربـله مذبوح

مذبوح .. الجبت العمر ويا سوه
مذبوح .. من الگفه بطف نينوه
مذبوح .. بـصف النـهـر مـيت ضمه

ناديت .. يـا فاطمـه يــمـه اشبعد
ناديت .. لا ضل اخو ولا ضل ولد
ناديت ..لـحـگـيلـي يــمـه فـاطـمــه

شوفي اشعمل .. بينه الزمن
ضــيع بـنـات .. ام الحــسن

**ابو حميدة الشويلي

اللهم عجل لوليك المنتقم الفرج**

#المشاية_المقدسة

هوى المشايه هب وانه
تعب گلبي امن المتانه .. اعله حر من جمر گلبي يتاني

اگل الگلبي شد حيــلك
وامشي وصيح ادخيلك .. دخيلك ياحُسين الدللاني

يگلبي امشينه خل نتلگه ضعنه
ودربه انخـلصه بالونه اعله ونه
شيــل ايــدك ونادي يابـوفاضل
بتـسيـارك يـخو زينـب طـلعنــه

مانـخلف اوياكـم وعــد
يابــالفضـل هبـنا الـمدد
خليـنه نخـدم من صدگ
كافي امن الاسوالف بعد

................

الرضا وفقني هالمـره
اذاً واجب علي شكره .. دخيلك سيدي جيت بدمعتي

واگــدر عالتـعـب اگـدر
وعندي موسى بن جعفر .. ابو طلبه الولا رجع طلبتي

مــن بــيت الــكــرم ياگــلبي اطلب
ومــن معصومة تاخذ دمـعة الحُب
المشي والخدمة والمجلس والادموع
خــير اجفوفـهم عـالــخادم ايصـب

وام البنين اتــحــزمـــك
الحب والبواجي اتعلمك
گلها انه احب بس الحُسين
وهيه بـاديها اتقــدمك

..................

المن رايـد اجــدامي
اذا ماتمشي للضامي .. وشلي بعافيه وعالگاع جسمه

كل خطوه الي دمعه
وااه ياكربله انعه .. لحد ما اوصل والگاني يمه

اباب القبلة اگابل گبته واللطم
عله المحد بجاله وحاله يهظم
الضل وحده ثلث تيام بالبر
لا اخت البجتله ولابجت ام

اشسوه بعزيز امه السهم
بالحومه كل حيله انهدم
لا هوه ضل فوگا جفن
ولا خلوه اعله اخته خيم

...................

سنه كلها بجي ولهفه
والمشايه مختــلفــه .. وايام التمر بيها عجيبه

امشي ودمعتي اتنادي
بنات الزهره بالوادي .. طلعن للضوه وشافن مصيبه

دمعتي اتگلي حيل ابجيني وانحب
مشــت من دون اخــو للـشام زينب
تعبت مــن حجي الشمات والــويل
وگلبها امـن الهـظم والنــوح شيب

يـاگــلبي لاتــتعب لان
راحن مشي ابنات ام حسن
لاتمشي مــرتاح و امــس
ابــذاك الــدرب ماهودن

**ابو حميدة الشويلي

اللهم عجل لوليك المنتقم الفرج**