حــزن مــولاتـي الربـاب صلوات الله عليها ..

عبد يـالعمرک بـعمر الــــــورد ليش
يـــوليدي الــــسهم يغفى بوريدک
تمَنَت عيني شوفة طـولک بــــيوم
تمشي احذاي و ايدي اشبچها بيدک

حظني خالي يا دلالي
ردت احظننک و اشمک
يا حبيبي دَر حليبي
ليش تمشي و تجرح امک

فگدک يـــا هَظم عمري
فَت گلبي و ذبَح صَبري
مكتوب الـــحزن گدري

دَر لْبني على شــــــفافک
الصابک يمه مــــا شافک
زغيرة ارسومک و عافک

اســـــألمَن يقبل طفلة
يعطَش و تـــرَوي نبلة
و عيونه تغير و شكلة
يشَيب ابوه
يـــا عالم چـــــا ليش ابني
مــــا چَـــن يكبر و يحبني
مات و ضَل حسرة حظني
تعبوه

،،،

اجه مهَدَم ابوه و حيله متعوب
گوة يجر نفَس من هَظم گلبه
كسَر گلبي الطفل متلوع يگول
عطشان انذبح ما ضاگ شربة

محني راجع و المواجع
تستعر بيه من اسمعه
راح ابننه گطعي ضنه
گال و بي دخانه دمعه

صاح و صوته شيبني
يَم عبدالله راح ابني
منظر طفلي عذبني

جاني و شايل جروحه
و يفسر الصخر نــوحه
طلعَت ع الولد روحـــه

ما يگدر يحچي حچايه
مــشــدوه و تـــايه رايه
مــا صارت منها سوايه
شنهو صار
شـاله و تــانـه يقدموله
ماي ، و ذبحوه معقوله
دم ابنه يسيح بـــطوله
و گلبه نار

،،،

هرش صاحي حرام يضل بالگلوب
گطعهن افراگ اولام روحي
عله المذبوح عمره و كاتله اضماه
من الليل حَد الليل نوحي

موش صعبة طلَب شربة
و ارتوة امثلث زغيري
صاب ريجة و شَب حريجة
بروحي و الوَنة مصيري

راح من الولد صوته
و تـگَرَب عليه موته
طفلي الچنه ياقوته

گَطَع گلبي من شلته
متلوع عــبــد شفته
مروية بـدماه شفته

يا ضيمي و تعب اسنيني
طـــــــولک ردته يباريني
مــــــو مذبوح تجافيني
يمه ليش
عشگ امک يا سلواها
يــــا هظمتها و بلواها
تلحگ رسمک مـنواها
ما تعيش

،،،

مصطفى موعد العيداني

نسألكم الدعاء و إهداء ثواب قراءة سورة الفاتحة إلى روح المرحوم بـ إذن الله والدي
( موعد مصطفى عبد الكريم )
و جزاكم الله خير الجزاء

آخــر انفاس و گصَر بـ عيوني شوفي
شايغة الروح و ذبَـــح دَلّالي خوفي
الهظم كاسر عود عمري و راح حيلي
ما يرَكدنهن قَهَرهن راجِفات چفوفي

يا علي احظر موت زينب مالها اخوان
ناحلة و مشدوه مـــنها البال حــــيران
جرعَت المُر هايه بتكم لاحها الضيم
و الگلب مَــلچوم گَطَر دَمَه حــــــزنان

ترضونها تموت ام عون بالحيرة و الويل
چـــــا وينكم يـالوليان بايد صفة الـحيل

مـــــن عِزكم لـ غريبة هنا يـا هَلي
غَرَبني عمري تالي و ما مش ولي
مـــا يمي حس كَفيل و محد الي

،،،

آخـــر انفاس اشيجرها و كلشي خنگة
ريت واحـــــــــد منكم يمرني و اشبگة
و احچي يمه جـــــروح گلبي الكاتلتني
و موش عطر الشام عطر اخواني اشهگة

كلشي جارح عشته و تفَطَر دليلي
و انتهت بحچاية هَدَت بيه حيلي
الله يا دنيا يگول اكسرله خاطر
و انكَسَر من گال هالچلمة عليلي

هضمتني نضرات ام عون يمنة اعلى يسرة
چنها تناطُـر فَــــــــزاع و الحَسرة حَسرة

تالي الرفاگة ذيــــــچ انـــــدار الــــزَمَن
و من البچي اعلى حالي عيوني انعمَن
أمَـــــن يُجيبُ مُضطَر أشــــكوا لـِـ مَـن

،،،

آخــــر انفاس و تغَمض عين حرمة
فاگدة اخوَتها بنعشها شلون هظمة
وينكم يزلام هاشم اناا زينب
دونكم يـ بــدور عيني الدنيا ضلمة

نعش اليموت شحلاه بمتون اخوته
هذا يبچي و هذا ينعى احزان موته
زينب الـ ما شيعوها شلون بيها
ماكو واحد شاگ زيجه و صاح صوته

ودعتچ الله يـ ام عون فگدچ مصيبة
و الراح يصفگ ع الراح موتچ نهيبة

زينبكم الحبيبة تغَرُب نــــــــوَت
راحـت بعد ليالي الخوة انطوَت
و العالية بشملكم وسفة و هوَت

،،،

آخــــر انفاس انگضَت و الحرمة ماتت
ضيم و أحزان و مآسي و هظم عاشت
تكسر الخاطر يـ ناس اعظَم جَليلة
مــــــــن ليالي الصبة لـ آخر ليلة عانت

تشجي كل عين و تهل دمعتها قصتي
گَدر اميرة اتسَلَب و جَف مـاي گصتي
مو عَتَب يـ زلام لاچن لچمة بالروح
ميتة و اتعَذَركم اهلي الـغربة حصتي

آخر محاچيها ام عون ابــــــروني ذمة
شو خل اموتن و ارتاح من اقسى چلمة

مــــــــن چلمة السبية انداف الگلب
و النايبة العَظيمة و اصــعب صعب
اسمي الغُرُب حچَته بــذاک الــدرب

،،،

مصطفى موعد العيداني

نسألكم الدعاء و إهداء ثواب قراءة سورة الفاتحة إلى روح المرحوم بـ إذن الله والدي
( موعد مصطفى عبد الكريم )
و جزاكم الله خير الجزاء

زينب علي تالي
تفگد شكو غالي
و تضل وحيدة
ما تلگة چف تچوة
تتحَسَر الـخوة
الچانت سعيدة

ايامها الحلوات فگدتها
فوگ الترايب عافت اخوتها
مَجبورة زينب غَـرُبَت
يعقلها يا حظ يا بخت
وادم غرب يا ناس شافتها

متعودة اعلى حسين بس حسين طولة اعلى الترب طايح
مرمي و يدير العين صوب ام عون من يسمع دَوي الصايح
تهمل دمع و تنوح ع المذبوح و بسيل الدمة سابح

،،،

ناگع ردنها تهل
مدمعها دم ينزل
حنت على ايام
بيها الاهل يمها
طول الابو و امها
و مامش سبي و شام

و تذكرت كل المضى و حَنَت
و استعبرته و بالهظم وَنَت
شيرده وكتي الي مضى
يا وسفه معشرنا انگضى
عدوانها بهذا الوضع سَنَت

سَنَت سنينة الگوم صوب الشام نسبي اعيال هالحرمة
سمعتها من عدوان دون اخوان زينب هاي يا هظمة
مهضومة من هالناس لطمت راس صاحوا بـ إسمي يا يمه

،،،

تالي اصعدَت هَزلة
مــتگَيدة و عَـزلة
و تلاشت احلام
من گالوا اخذوُها
غربة الي يحدوُها
و منواها للشام

عين لرقية و عين لسكينة
يـــــا عمة مسبيات تالينة
هــــذا الوضع مــّا ينحمل
من چف اخو لچف الحبل
و تگَطعَت بالگلب هرشَينة

طَرَن علاوي حسين ذاک السوگ و الوادم تصد ليهن
اصل العفاف شلون فوگ النوگ و الملعون سابيهن
دف وطبل و اجراس هَبَت ناس تتفرج على اعبيهن

،،،

حيرتها فد حيرة
شماتة هالديرة
ما بيها رحمن
جبناها جبناها
ماكو اخو وياها
بس روس ع الزان

و هــــــنا ثَمن ساعات وَگفوُها
و اعلى القصر مَسبية دَخلوُها
خـ يطگ گلبها من القهر
مــــا عدها راية ولا گمر
و كلساعة بـ الوليان ذَكروُهــا

تعبها ذاک الشـام آخ الشـام كاســر عـــود علوية
چهبته دون احيود بين اشهود عـالم باطلة النية
شيردها ذيچ ايام بس تحتام ع البيت و طوارية

،،،

مصطفى موعد العيداني

نسألكم الدعاء و إهداء ثواب قراءة سورة الفاتحة إلى روح المرحوم بـ إذن الله والدي
( موعد مصطفى عبد الكريم )
و جزاكم الله خير الجزاء

يلا يا روحي استعدي لـ هالمصيبة
هاشمية تصير تالي العِز غريبة
مَر عليها انهار غير كلشي بيها
منه زينب طگ گلبها و فَز نحيبة

من بَعَد ذيچ المهابة و فَي الاخوان
طلعت بذاک الظهر و الدنيا دخان
يا هَلي هنانه تنادي و حمرة الاعيون
ع الهزل راح امشي وين ازلام عدنان

مو الي تلوگ صَعدة النوگ يا هضيمة
تالي احتار و الگلب نار سبيي ضيمة

وسفه و علي و ركبنا ضهور الهزل
و چفوفي تالي عمري مگيدة بحبل
و التحدي ضعني اجانب ما تنحمل

،،،

دنيا مرة و دارت اعلى ام المحنه
من بعد عِزها غريبه تصيح اهلنه
عازة الخوان عازة تگول زينب
بين طَف و شام ضعنه و طَش شملنه

بالغرب و تريد اخو يغير و يجيها
يمسح ابردنه دمعها يفض بچيها
يكسر اعيون الشماته الصَدت الها
يفتح بچفه الحبال الي بـ اديها

تعبت هواي ماكو حماي يفزعلها
مبللة جفون تربي العيون صوب اهلها

آيــــة علي العظيمة تحَشم ولي
جار الزمن عليها و صاحت هَلي
حيهم غريبة اختكم بَــزرة علي

،،،

عاشت و ماتت كَسيرة و ماكو راحة
الشــــام و اهواله زرَع بيها النياحة
شگد هظيمة تضَل وحيدة الله يـ دنيا
ماكو زاير يمها هسه يحِل جراحه

كل سنة الخدام تمشي و تبچي يمها
ويلي ضلَت هسه وحـــدها بـ المها
خالي صَحن ام العفاف و وحشة بالليل
تعمى عيني غــــربة بـالدنيا سَهمها

حاسرة تگول و الحچي يطول وين اخوتي
بالسبي جروح بالحية النوح حتى موتي

مهيوبة الهواشم بين الــغرب
فارغ صحنها باقي و ضلمة الدرب
تتغرب بسبيها و تالي بحرب

،،،

هايه مــا تعبر غيور و تدوي حَيله
بزينب انعاد السبي و ما عدها حِيِله
سدوا البيبان و يشمتون بيها
الشام اصفر لونه من خوف العقيله

يعقَل الحُر حُرمه متروكة ويه اعادي
ذبحوا اخوَتها و اجوا بـ اجنبي حادي
يا ابو صالح احظَر الشبعانة بالضيم
حگها يمک رده و اصلُبهم و نادي

غار ابو الثار يضرم النار فازعلها
عمتي ام عون تنتخي العون و اناا اهلها

عـالـوا عليها سيد حـــــــان الأجَل
و ترد لأديها حگها من اهل الدَجَل
و افنيهم بحسامک رد ثــــار أهَـل

،،،

مصطفى موعد العيداني

نسألكم الدعاء و إهداء ثواب قراءة سورة الفاتحة إلى روح المرحوم بـ إذن الله والدي
( موعد مصطفى عبد الكريم )
و جزاكم الله خير الجزاء

احزان مولاتي ام البنين صلوات الله عليها

المنها بزغت چم شمس طافي عمرها
و الحزن ذَبَــل غصن شجرة و كسرها
وحشة الخلان تبدي بــوكــت الغروب
مگابلة البيبان تبچي و قَـــــل نَضَرها

أم البنين
خـــاب املها وسفه اهلها مـــا لفو للدار
أم البنين
بيها مأتم و الدمع دم و الگلب بــي نار

ع البقوا بـالغربة و ما صح ليهم چفَن
جــــــرح هظمة زينب و الوليان التقن
منفجع گلب الما شـافت طــول الگمر
من الدمع ما سلمن عدها عيون انعمن

،،،

حرمه و جـــروح البعد جاسن عمرها
نــاطـــرة الاولاد و تلاشى صـــــبرها
تـــانــت حسين و عياله عليها يلفون
و من بشر سمعت خبر حدب ضهرها

ام البنين
دمعه هلَت لما سمعت بالوِلَد عطشان
ام البنين
لطمت الخد ع التمدد طوله ع التربان

تمنت يــرد ليها و تلمح طــول حسين
بس بعد مـــــا چنه يمر گــــدام العين
ضـاگ صــدر الحرة و ما تشفيها الـ آه
موتها يحل كون و مـا تجفي الطيبين

،،،

ضــاگــت الــدنيا بنضرها بهيچ رجعه
و الحنينه النـاطرتها أجــــــــــت تنعه
تنعه ضل عريان اخوي و حار الاتراب
ويلي يمه يصيح بأسمي و ما اسمعه

آه يا عذاب
ماكو راية بس عباية ردَت ابـــــلا راي
آه يا عذاب
وصلوا الها قلة اهلها وسفه خان الماي

لاگت ام عـون بحيرة و تلطم ع الراس
ليش ضعنچ وحده و ماكو وياه حراس
يمه شـــــــو متغيرة و راكد بيچ الحيل
ويــــن طول حسينچ يــا يمه و عباس

،،،

نـصبَــن المجلس ثكالة و بلش اونين
فگدن الما منهم أحَـــد گمر و حسين
تنشد اعلى الصـــــــار و تهل المدامع
و زينب بحيرة شتگول و دامية العين

آه يا عذاب
يمه سمعي عمه طلعي گلي السجاد
آه يا عذاب
هالتوَذر طرَن البَر ع الترب الاجواد

يمه ضعنا بهيمة و حفاي اعلى الجمر
ماكو حس نغار و يفزع لأجــل الخدر
كلها فــوگ الغبرة و مخضبتها الدمــة
يمه فوگ الهزلة يصعدون اصل الستر

،،،

مصطفى موعد العيداني

نسألكم الدعاء و إهداء ثواب قراءة سورة الفاتحة إلى روح المرحوم بـ إذن الله والدي
( موعد مصطفى عبد الكريم )
و جزاكم الله خير الجزاء

يا مالک ادموعي
كالعادة موضوعي
ارد اعتنيک و صبر ما ضل بيه

صوت الگلب يصدح
هـــذا البعد يذبح
هواي الحزن و الگلب حمله شويه

گاضيها بس انحب و اوادع
يمشون و اناا بحسرة اباوع
چا شنهو نقصي و ما اجيلک
ضايع بدونک والله ضايع

چا يمته اجيک و اسمي زاير ينگال
مُر الصبر شصبر بعد ما ضل حال
جرح الگلب ربعي مشوا و اناا الضال

،،،

بيه الهظم سرمد
تسمع يبو محمد
گلب اليحبک من يسولف شوگه

دنياه صفَت صَحرة
و يتأمل النظرة
تحيي دليله و يجري حب بعروگه

داخــل عليک اعطف عليه
و ارزقني لأختک و الک جية
يابو الكرامة انسان تعبان
رافعلک ايدي و جمرة بيه

طاري الزيارة ايفت گلب كلمن راد
يكحِلها عينه بگبة الاسمه ضماد
تدري اليحب و ما وصل صار ارماد

،،،

چا يمته هالفرگة
تتبدل بـملگة
و اتمشى بالحضرة و اعيش النعمة

احلام الي ينطرک
يشتَم عذب عطرک
و يسولف امن ايرد على اهله الرحمة

ثالث سنة اتـــوَسَل يـمولاي
ما بيه فرگة و صارن هواي
كَسرة دليلي الماكلة الروح
باقي بمچاني و غيري مَشاي

يا بويه لـــو رد زاير و يحچي الشاف
يمک عطَش رحمة ارتوى و منا طاف
يعرض صـــوَر يمک أخَذ و انا انداف

،،،

شوگک فتَک بيه
و گلبي عگد نيه
كون السنة اوصل مو مثل كل مرة

ارد اگعد ابابک
و انعاهم احبابک
و بطور اهلنا انعى المشن بالصحره

و دموعي اطشها و ما المها
انعى الغريبة و ابچي هَمها
و بحرگة ادگ صدري اعله هاية
عگب الكفلها انگال اسمها

ارد ابچي يمک و انتحب و الطم حيل
ع الفَرَن ابــذاک الظهر بين الخيل
ع اليمشن بضعن الغرب صبح و ليل

،،،

مصطفى موعد العيداني

نسألكم الدعاء و إهداء ثواب قراءة سورة الفاتحة إلى روح المرحوم بـ إذن الله والدي
( موعد مصطفى عبد الكريم )
و جزاكم الله خير الجزاء

سلطان الـــــمشاعر و الاحاسيس
مُر طاري الهجر يا طيب الانفاس
عبدک خلَص صَبره و گلبه ناخيک
يتمنى بـ ضـريحک يـرفع الـراس

مَد الک چفه و راد يبچي عند اعتابک
و انت عطفک سباگ مــــا ترد طلابک
بالعبد فــــاض الشوگ للمنارة و بابک

ملهوفة روحة امنيته الزيارة
عطشانة عينه لــذيچ المنارة
سويله حل للما عنده چــارة
يضامن
يترجى عطفک يروي دليله
رزقه يــزورک سَهل الثگيله
يــم بابک يريد يبدي حيله

،،،

متوسل بــإسمک و انــت معطاء
حاشة ترد دخيل و جايک ادخيل
مـــــا ينضام ادري الـ انته مولاه
وَحشة الدنيا دونک ضلمة الليل

هم يجي هذا اليوم و امشي وي زوارک
ارتوي و اشهگ طِيب مــن عَبير اديارک
هالسنة اشواله الموت گلبي لو مـا زارک

گلب اليحبک بي جمرة تسعَر
بـالـه يهيم و يـــرسمله منظَر
يوصل يجيلک و اقلامه تعثَر
عجيب
داخل على اسمک هالدنيا مُرة
اقـصــى امنياته صَحنک يمُرة
يـــــــا سيد الحب سهلها مَـرة

،،،

روحي الخوف بيها يزيد كل يوم
خايف لا امـــــــوت و انا مشتاگ
حق هـــــذا لَچَن تدري يـ سلطان
شوگ المشتهي يزور اهله حَــراگ

بعيني اشوف الــزوار ماشي واحد واحد رد
و انـــــــــا أون و مهظوم و العسر بيه اشتد
ليش مــــــن دون الناس ما وصلت لـ مشهد

مشهد تضل بـــــ دلالي حَـــسرة
شوگي كسرني و مـا بيه اكسرة
اتوسلک وضعي العاصي يَـسرة
اريد
ارد اعتنيلک خلصانه روحـــــــي
بباب الجواد الچمهن جــروحــي
و الروح اگلها بكل هَضمة نوحي

،،،

مو صادگ خشوعي إنسان چذاب
بس و الزهرة احبک صادگ بهاي
اكـــرُمني بـزيارة يـــبن الأكـــرام
مــــــا بيه بعد ع الفرگة مــــولاي

ضامي گلبي و صحنک ماي اروي مشتاگك گطرة
ارحم الملهوف اعليک و اومــي اله بعينک نظرة
مـــيــت بضيمه المحروم گلبه كـــل ليله يعصرة

كـــل ليلة امــــــوتن مية موتة
گلبي يشوغ و يصــــدَح صوتة
منطَر هَظَم چي مو ويه اخوتة
اجاک
اگضي عذابه بنظرة رحيمة
خلي يشوف الگبة العظيمة
گله تعال و فـک عنه ضيمة

،،،

مصطفى موعد العيداني

نسألكم الدعاء و إهداء ثواب قراءة سورة الفاتحة إلى روح المرحوم بـ إذن الله والدي
( موعد مصطفى عبد الكريم )
و جزاكم الله خير الجزاء

#وداع_مولاتي_العقيلة_لمولاي_الحسين_صلوات_الله_عليهم

زينب كصدته بحيرة متعوبة و رچيچة حيل
تندب يا ضوة عيوني شسوت بالجمال الخيل
هـــذا انت يبو الاكبر شو مسلوب منک حيل
طايح و الشمس فوگاك مـا مَـرَک نسيم الليل

يــــــا بــعـــد اهلنا والله حيرة
بـ ياهي ابــدي اولى لـو اخيرة
حرگ الخيم على الحرم عليک

هـضـمـة تـفـكـنـا تـلـفــي هـضـمـة
دنـيـانـه عــــگـــب اهـلـنـا ضـلـمـة
وين انطي وجهي ماكو غير اجيک

جيتک وحيدة بــــلاية خــــوُان
شبوها نـــار و طــاح صــيـــوان
ركضت وسط هالصحرة نسوان
اقـدَس بشر مــوش اي نساوين
،،،

وصلته و تــــدگ الـراس آه يـحسين و تگله
غاروا ع الخيم بجفاك ناس اجناب مو سهله
فَـرينا اعلى طــول الـگــاع ثكلة تلوذ بالثكلة
ما ضل عندي حَــل و راي غير اتعلى ع التلة

ع التلة صـــــعــــدت العقيلة
تندب اخـــــــــــوها تشتكيلة
ان كنت حياً افزع لـ هالبنات

بعـــدَک خــــدرنا مــالــه والـــي
يـكلَـف عليه هـــــــذا حــــالـــي
بهالحالة ريته يلفي الي الممات

ريت الله روحـــي تموت هالساع
و ما اشوف ضعني بهالفلا ضاع
مـتوسـدة اعلى الـگـــاع السباع
ويــن انطي وجهي و اتجه وين
،،،

دَهــري ويانه شَـــد اوزار راد يشوف علويه
چَـفهـا يفارگ الـمهيوب و يـدور الزمَــن بيه
يرفگ چفي ويه حبال و ادخل ديرة مسبية
و انا اعلة الهظم و الضيم و عيونك فلا بيه

گـــالــتــهــا و انــعــصَــــر گلبها
تــحـچـيـلـه لـ انــكــتــب دربها
ياخويه ع الهزل يصير الرحيل

گـالتها خــويــه راح اروحن
وي غــربة و الحـرَم ينوحن
عگب المهابة ما بقالي حيل

راح امشي خويه و فاگدة الحيل
مـــــن الركــــض و مـدافع الخيل
حامينا مَــرمــي ويــــه المچاتيل
خــلافک نعيش النـــوح و الضيم
،،،

زينب خويه شَـــوف العين حالي و منفطر گلبي
و انـــا مــوَسَــد الـتـربـان و عـيـونـي الــچ تربي
مـــن كثر السحگ و الخيل مـــا وچد گمت دربي
اول مرة احس مهضوم حچيچ خويه فت گلبي

يــــا زينب انـــا هـــــــــذا حالي
كســـرولي ضهري غــالي غــالي
ما ضل كتر يشدلي حيلي اگوم

عــذريــنــي يختي و الفواطم
خبريهن بـــ غـــــربـتـي نـــايم
بالهضمة و الگلب عليچ يحوم

يـــا زينب الدنيا اوجرت حيل
و حسينچ انـرَک حيله بالخيل
صــار الصبح بعيوني چن ليل
عگب الگمر هذا الجرة و صار
،،،

مصطفى موعد العيداني

نسألكم الدعاء و إهداء ثواب قراءة سورة الفاتحة إلى روح المرحوم بـ إذن الله والدي
( موعد مصطفى عبد الكريم )
و جزاكم الله خير الجزاء

https://youtu.be/-On3fWvMoGA?si=3HEklOGMiEIrXOxD