باچر فاطم يوم المحشَر.... تنصب لحسين اكبر مَنـبَـر

وحيدر بلايه اعمامه...ويلطم اوياللطامه.. يوم المحشر
★★★★★★★★★★★★

مجلسنه باچر لو بـــــــده دعوتنه من الزهره
مجلس عزه ننصب سوه ويوگف مُحمد يقره
يبچي الحسن دمع ابدمه وحسين ينزف نحره
وحمزة الزغير من يجي اهناكه نشوفه اشكبره

ياحمزه اقره ابدمع اعيونك.... گلي يالميمون اشلونك

وحسين تبچي ايتامه.... .....و يلطم اوياللطامه... يوم المحشر

★★★★★★★★★★★

تكتب بطاقات العزه وكلمن ابأسمه الدعوه
كل الخدم باچر تجي وانسوي مجلس يسوه
يقره النونيني ابدمعته جسام مامش ضنوه
الماباچي لحسين وعلي ايامه ابد مو حلوه

الماباچي اهناك ايعرفونه.... من اتباوع فاطم بعيونه

وتعرف الضارب قامه....و يلطم اوياللطامه... يوم المحشر

★★★★★★★★★★★

من المگابر ننبعث وتفز جميع الموته
من يقره ياسين وعلي يگعد الضماير صوته
الفاتاه بالدنيا العزه بالحشر هم ايفوته
الماشاگ ثوبه اعله السبط محد يجي التابوته

الباچي اعله حسين ودگ صدرة.... توصل دعوه ابأسمه الگبرة

ويصير چفنه احرامه.... .....و يلطم اوياللطامه... يوم المحشر
★★★★★★★★★★★

نوصل سوه ابطرگ الچفن للمجلس و رادوده
ونلگه الحسن وسط العزه امهدل يظيف احشوده
ذبـــــينه چفن المگبرة البسنه الهدوم السوده
اتهيئ المجلس للطم عباس ماكوا ازنوده

خجلان ام حسين اتشوفه.... بالمجلس مگطوعه اچفوفه

امصوبه العمود ابهامه.... ..... ويلطم اوياللطامه... يوم المحشر

★★★★★★★★★★★

عبد الرضا الزينب قره بس وطن بچه الوادم
وكلهم يصيحون ابحزن بلكي الله يصعد باسم
ينحب جليل ابلوعته وينعه البديري الهايم
وعمار گال امنيتي تقبلني فاطـــــم خادم

اهناكه عطيه الجمري ابذاته.... يقره ويالمنضور ابياته

وابو شبع جدامه.. يلطم اوياللطامه... يوم المحشر
★★★★★★★★★★★★

باچر اذا نلتم سوه ويــــــــــفاطــمــــــة نـتلاگه
ويعرض الطف ومصيبته وزينب تجي اعله الناگه
راس الحُـــــــسين اعله الرمح ورقيه اله مشتاگه
وزينب تنادي ياگمر چفـــــــــــي اشيحل اشباگه

زينب تشكرنا اگبال امها.... چي نبچي وياها ونخدمها

الحرگوا على اخته اخيامه....ويلطم اوياللطامه... يوم المحشر
★★★★★★★★★★★★

لا والله منعوف العزه نلطم اليوم وباچر
لوهل محرم نبچي اله ويكتب قصيده الشاعر
سيد سعيد ابدمعته يعرض ابياته الجابر

وبگلبي مايشفه الجرح احاه يجرح العاشر

فدوه الدم عبدالله اوليدي
كون حسين يكضني من ايدي

ويجازي كل خدامه.... ويلطم اوياللطامه... يوم المحشر

★★★★★★★★★★★★

ــــــــــــــــــــــــــــــــــــــــــــــــــــ
ماجد حبيب الخيكاني
ونسالكم الدعاء

للمــدينه للمــدينه. خذني ياطير العشگ للمدينه

ابدمعي اخط مكتوبي  
للنبــــــــــــي محبوبي  
 ★★★★★★★★★★★★


خذني ياطير العشگ فوك الجنح
گلب شاعـر گلبي مايحمل جرح
لاتذر بجروحــــي من تبعد مــلح
ترف اني وتدري بالنسمه انذبـح

صوره بين اهدوبي.. للنبي محبوبي
 ★★★★★★★★★★★★
 يمــته ياطير العشگ تنوي السفر
خلي فوگ اغصانك الكلبي خبــــر
حته نمشي اثنينه ابليل السهر
وننــزل انطش ورد يم سيد البشر

ورد اطش ادروبي     للنبي محبوبي
★★★★★★★★★★★★

صاحــــت الوادم شرك عن مذهبي
صحت اني من المهد عاشگ نبي
انت شـــنهــــو الظارك يالناصبي
انحب محمد انــه واطفالي وابي

بعشگي يحله اسلوبي       للنبي محبوبي
★★★★★★★★★★★★

ازغير چنت وبالعشگ ذايب اله
حب مُحمد سكن گلبــي وي هله
هــــــوه قران العشگ والبسمله
اليوم نهديله عطر من كربله

العطر غازل ثوبي    للنبي محبوبي.
 ★★★★★★★★★★★★

ابحضن ابو طالب نزل مثل الشمس
وهمه مختاضين كلهــم من أمس
لوكبر يدرون يسحگ عالرجس
والمشايخ بعد ماتسوه فلس

زاعليت اذنوبي ... للنبي محبوبي

ــــــــــــــــــــــــــ
ماجد حبيب الحيكاني
ونسألكم الدعاء

مات الأمل مـــــــات الورد

يايــوسفـــي يمــته تـــرد

وردَك بلا ماي….ليش انته ماجاي.… يابو صالح

★★★★★★★★★★

ماظــل امـل يالمنتظر … مات الورد مات الشَجر

بالگاع ماظل شي خَظر…. يغايب

ماحنت اعليــه السمــــه… تمطر ييوسف فاطمة

ظليت كاتلنـــي الضـمـه… .. يغايب

ماترحم اسيوف العطش….مات الورد وسط النعش

اسمك على گلبي انقش…. يغايب

يالتعصر ابگلبي عصــر …كل مايحل وكت العصر

صليت عد اهلي قصـر….. يغايب

ظليت اتاني ومـــــــا أمل 🙏…
وبچي مثل بچي الطفل

محد بچه اوياي …..ليش انته ماجاي … يابو صالح

★★★★★★★★★★

سَمعني چَم عاذل حچي… ويلچي على گلبي لچي

بس انـــه اسمعنك بچي… يغالي

محبوبك ايگلي اشعجَب…منك فلا يسمع عتَب

وبوجهي مرسوم التعَــب…. يغالي

ظليت أكابـــــــر عالجرح….والشامت ابحچيه يلــح

يمته تجي ويطلع صبح…. يغالي

من البچي اعيوني انعمَن…. چايمته اشوفك بالصحَن

وتــتلگـــة زوار الحَسَــن…. يغالي

اتنادي هلا وميت هــــــله….
زايــــرنــا واحنه انــــدلله

امروتك يمولاي ….ليش انته ماجاي … يابو صالح

★★★★★★★★★★

يالشوفتك صارت حلم.... بجروحي اطش وارجع ألم

وبروحي نيران الهظم … يمهدي

أسهر واتاني بكل مسه…والدنيا ضيم امعسعسه

چم نوح بدموعي الرسه…. يمهدي

ابيضت اعيوني من الدمع... وشاعلك اسنيني شمع

يعگوبك اني ابهــــل وضع… يمهدي

مَلــت محــــطات السفــر …. يمته تــجي يالمنتظــر

بعيوني راسمــلك صـــور…. يمهدي

بدموعــي كاتب مُستَهل ...
يالمهدي ادركني العَجل

حاطتني بلواي. ….ليش انته ماجاي. … يابو صالح

★★★★★★★★★★

كل يوم اتاني اعله الدرب… وتتصدق اعليه الغـــرب

حافي مشيت اعله الترب… تر اني

في جمكران ام ذي طوه … موگلبي بالنــــار ارنچـوه

يالمهدي خانــگني الهــوه… تراني

في أي بالد عندك سَكن…سايم عليك ام الحسن

ماعندي غيرك أي وطن… تراني

ماتدري محبوبك ســـأل… بدموعه كاتب مُستَهل

وناديت ياالمهدي العَجل…. تر اني

الفارگ محب مايستچن…
يلبس اثياب من الحزن

ويبچي بلا راي. ….ليش انت ماجاي. … يابو صالح

★★★★★★★★★★

صاحت عَـلَـــيْ هاي البشر. … مَهديَك انـــته ماحظر

وصب دمعي من دَم الحَمَر… هضيمه

رحت ودمع عيني أيهلي … ودنگت يــــم گبت عـلــي

المهدي اريد اترجعه ألي… هضيمه

يالرجعت حته الشمس … رجعلي غايـــب من أمـــس

جرحَتني وادم ماتحس…. هضيمه

يالبيضـت وجـــــــه النبــي… بيضلي وَجهــي ابمطلبي

أعليك المشَت درب السبي… هضيمه

ابعبدالله احلفك والسهم ...
ودمعـــة رُقـــيه والعَلــم

سهلي بس هاي…. ليش انته ماجاي…يابو صالح

★★★★★★★★★★

ابجــــاه الشموع اوحنته… ذاك البچــــوله ابزفــــته

ولطمـت ابعرســه عَــمته…. والحسين

ابجاه الذي جسمه انطبَر…وراحاله ابوه مَحني الظهر

چم گلب وي ليله انكسَر… والحسين

ابجاه العله الشاطي انرمه… وامفرعه اجت ليه السمه

وزينـــــب بچــت بمخيمه… والحسين

ابجاه الحنه ظهرة ابألـم… ونــــاده يشـــيال العَــلـــم

ظلت رُقـيه ابــلا خيَـــم ⛺ والحسين

اقسم عليك ابعَـمـتك …
راويني بس اعمامتك

مو ورم اچلاي.... ليش انته ماجاي... يابو صالح

ـــــــــــــــــــــــــــــــــــــــــــــــــ
ماجد حبيب الخيگاني
ونسألكم الدعاء

هذا اخوي الچنه هيل… ولا تسحگينه يخيل

والله شيب حالي ... عوفي اخوي الغالـي

ولاتسحگيــــنه يخيل

★★★★★★★★★★

امشي وامرافگه الدمعه والمسافه ابعيدة

هذا اخوي حسين طايح شمر حَز اوريده

بالذبـــح ويصـــد عليه

چن يگــلـــــي يالسبيه

راح اموت اهنا يزينب

أمـنـــت يمـــچ رُقــيه

.گلي عينچ عاليتام….. وبيده أشر عالخيام

انذبح عمري اگبالي… .. عوفي اخوي الغالـي

ولاتسحگيــــنه يخيل

★★★★★★★★★★

ابصدري ياخيل المنايه اليوم دوسي وباچر

وخلي اخوي حسين نايم لايگعدة الحافر

انه هاي اخته العقيله

وزعت دمعي ابسبيله

شبيچ ياخيل اويخيي

نايـــم ونومـــه طويله

طاحت الدنيا ابگفاي….. والشمر يرگض وراي

من عگب كفالي …. عوفي اخوي الغالـي

ولاتسحگيــــنه يخيل

★★★★★★★★★★

ابهدوت اليل أعتنـــيته وعـــفـــت كــل ايتامي

حسين مايرظه انــه اطلع وامشي من اخيامي

حسين ماريد انه ازعله

بس اريد اوصل واقبله

شــرد اگــله مــن يگلــي

وياي زينب چنتي احله

اشصاير ابگلب الرباب…. وشيلتچ طمها التراب

مو شغلتن بالي…. عوفي اخوي الغالـي

ولاتسحگيــــنه يخيل
★★★★★★★★★★

انه مامتعلمه اطلع وحـــــــــدي من اخيامه

لاچن حسين الشغلني ابراسه ماكوا اعمامه

حُرمة الميت عَجَبيبه

وسلبوا جثته السليبه

مارعـــوا حـرمة مُحمد

وزينب الظلت غريبه

والله چا لو تستحين … ماسحگتي اعله الحُسين

الدم يخضب اهلالي… عوفي اخوي الغالـي

ولاتسحگيــــنه يخيل

★★★★★★★★★★

ماكسر گلبچ عجيبه حسين گطعوا راسه

وانـه اخته اگبال عيني الف حافر داسه

النار بهدومي وأجيته

حسين عالغبرة لگيته

لا تسحگين اعله صدرة

والله زحمه من اهل بيته

صحت مابين الرجال… يابو فاضل بس تعال

ابهدمي غطي الوالي…..عوفي اخوي الغالـي

ولاتسحگيــــنه يخيل

★★★★★★★★★★

دنگــت ياخيل يمه وگتله زينــــــب رايحه

خويه برض الشام اخبرك راح اسوي الفاتحه

عالنهر عباسي عفته

وگتله صَعبه العايف اخته

شال اديه اوگلي شوفي

والله ياخيل وعذرته

اگبالي من شفت الچفوف… عسن عميه وما اشوف

الشمر سابي اعيالي… عوفي اخوي الغالـي

ولاتسحگيــــنه يخيل

★★★★★★★★★★

ـــــــــــــــــــــــــــــــــــــــــــــــ

ماجد حبيب الخيگاني
ونسألكم الدعاء

من اذن اذان الصبح...... عبدالله ساجد عالرمح

اتوظه الگمر من دم ذراعه..... وحسين الي ايصلي جماعه

من اذن اذان الصبح
★★★★★★★★★★★★

صفت نحور اعله الأجل وحسين متقدمهم

وصلت زلم فرض العشگ والموت لا ميهمهم

سجدوا اوصاحت كربله شالتهم اشلون امهم

ممنوع ماي ابكربله اتوضوا سوه من دمهم

صاروا گلب يحضن گلب.... لمن بدوا فرض الحرب

والغالي مايخلص وداعه.... وحسين الي ايصلي جماعه

من اذن اذان الصبح
★★★★★★★★★★★★

عبدالله صله من الزغر والجيش كافر كله

من عمت عينك حرمله ذابح الورده ابنبله

باچر محمد بالحشر لو سأل چا شتگله

اعله حسين سديتوا النهر چا ليش تذبح طفله

صله ويعبدالله النهر... وحسين ظل شابع قهر

خايف يموت ابنه اعله ساعه.... وحسين الي ايصلي جماعه

من اذن اذان الصبح
★★★★★★★★★★★★

گطعوا الماي ابكربله واتوضوا امن ادماهم

وحسين اجه اباب الخيم والتموا اوحاچاهم

گلالهم هاي الخيم عالبلخـــــــــيم وصاهم

بس گال زينب دمعوا كلهم سوه بچاهم

سجدوا على اباب الخيم.... وصلوا طبرتين وسهم

عباس ظل يخفک شراعه... وحسين الي ايصلي جماعه

من اذن اذان الصبح
★★★★★★★★★★★★

كبر ابو فاضل وسف والسيف صوب ايده

والجود طاح اعله النهر والشمر راسه اريده

صارت مصلاته الأرض ياوسفه صگر البيده

وعيونه صدت للخيم زينب عليه ابعيده

ناداها يازينب وسف ..... عالغبره ظل شيخ السلف

طايح تره وطايح متاعه.... وحسين الي ايصلي جماعه

من اذن اذان الصبح
★★★★★★★★★★★★

حافي ركض من الخيم وتعثر ابخطواته

حسين وخشع يم النهر صله ويخوا ركعاته

من الخيمه حد المشرعه ابگلبه اطلعن شيباته

ودنگ على العباس اجه من خلصن سجداته

باساه الحسين وبچه... وعباس ابـد لا ماحچه

نضرت عشگ محسوبه طاعه..... وحسين الي ايصلي جماعه

من اذن اذان الصبح
★★★★★★★★★★★★

العاشر طلع مثل الشمر لمن طلع مصباحه

جمع الروس اعله الوعد صلن سوه اعله ارماحه

زينب مشت فوگ الهزل تبچــــــي ولا مرتاحه

والناگه عرجه والشمر خوفهم من اصياحه

صاحت يسايـگ ناگتي... خليني امرن بخوتي

بس نذكر ايام الرضاعه.... وحسين الي ايصلي جماعه

من اذن اذان الصبح
★★★★★★★★★★★★

ــــــــــــــــــــــــــــــــــــــــــــــــــــ
ماجد حبيب الخيكاني
ونسألكم الدعاء

عبدالله يانسمة هوه… أمك عليله ابلا دوه

أ يالولد… خالي المهد

وضاع الربه وگلبي انچوه
★★★★★★★★★
عبدالله لو مات الورد يشتم وريدك يرتاح
اول عطر مر بالسلف مو أمه شايلته ارماح
يوليدي مو مالت ذبح وجهك يخجل الذباح
من ايدي ابوك ابياوضع لمن خذك مني وراح

ظليت اصيح ابلا وعي… .وحسين گابلني ابنعي

طاح العَمَد …خالي المهد

وضاع الربه وگلبي انچوه
★★★★★★★★
لمن خذك مني ومشه وتوجه الصوب الماي
گتله يبو الأكبر خفت بالحومه ينباگ ارباي
لمن درت وجهك احس عيني ترف هاي وهاي
هاك اخذ گلبي للحرب لو أبني ايظل اوياي

صار الحچي بس بالنظر… وچن طير رد ابلا نحَر

ابيا حاله رَد….خالي المهد

ضاع الربه وگلبي انچوه
★★★★★★★★
هاي انه اول مره احس گلب امك انطر نصين
من الخيمه وانضرلك صرت يبني عسن عميه العين
عطشان شالك للسمه وبالماي متهني الطين
وسهك يعبدالله تره هوه الـــكسر ظهر حسين

من ارد اليه من النهر….تشبه رجعته من الگمر
كل حيله هَد…… .خالي المهد

وضاع الربه وگلبي انچوه
★★★★★★★★
حسين الچبير البالسمه معروف صيته وبالناس
من الحومه رد الخيمته لچنه باخر انفاس
بالمششه يعثر بالدرب وعمامه ماكوا اعله الراس
نــــاده يزينـب لحگي الي عـــــبدالله راح وعباس

زينب اجته من الخيم…وبرگبتك شافت سهم ?

وشظل بَعَد… ..خالي المهد

وضاع الربه وگلبي انچوه
★★★★★★★★
التمن خواتك عالمهد وذاك النعي ايهد الحيل
وظلن يشمن بالنحر مو دم نزل منك حيل
سوينه مجلس بالخيم يالشَعرَك ابلون الليل
وحسين يم باب الخيم تفتر علي هاي الخيل

عبدالله يالطولك ترف… .بهاي العرب مامش عرف
چبدي انمرد…… خالي المهد

وضاع الربه وگلبي انچوه
★★★★★★★★
ناس الي ذبحوك ابسهم ذبحوني يبني ابفرگاك
يوليدي رتك تبقه الي من اعثر تگضني ابيمناك
يعين الله گلب الوالده يبني بعد وين الگاك
عايفني المن يالولد ماتخـــــــذ امــــك وياك

لومات ابنها الأم تره….تسكن طريق المگبره

ماظل سند… .خالي المهد
وضاع الربه وگلبي انچوه
★★★★★★★★
ــــــــــــــــــــــــــــــــــــــــــــــــــــ
ماجد حبيب الخيكاني

ليلة العاشر … ذبحـــوا الوالي

ليلة العاشر…. سافــــر الغالي

★★★★★★★★★★

ليــــلة العــــاشـــــر جــــــــرح ماينســـــه

اشسوه بيه وانـــــه بت خـــير النــــســـه

كـــــربــــلـه صـــارت ظــــــلام امعسعسه

والـــزمَــن وي بــت علي كلـش قــــســــه

وصحت يالناطر…. دمعتي اتلالي

ليـــــلة العاشر…. سافــــر الغالي

★★★★★★★★★★

حـــــافـــيه أركـــض بالمعارة اموزرة

والخـــــيم فــــــــوگ العيال أموجرة

صحت بين الگــــوم وانـــه امحــيرة

يامَـــن ايحشـمــلــي ســبع الگنــطرة

زينب اتناطر… والدمع هالي

ليلة العاشر….. سافـــر الغالي

★★★★★★★★★★

رحت صوب المشرعة اوبدموعي اصيح

يابـــو فاضـــل زحمه لـــو هدمي يطيح

انـــه زينــــــب گبل مامســانــــي ريـــح

والشمر هســــه يطگنــــي ويستــريــــح

انته ماحاضر….. هوا يبرالي

ليلة العاشر… سافــــر الغالي

★★★★★★★★★★

حسين اول تالي يغفه اعله التراب

وليـــلـة العـــاشـــر گمر دنيانا غاب

ليـــش عبـــدالله انحرم من الرباب

وليش نامت بالترب هـــاي الشباب

چم جفن ساهر…. هم مثل حالي

ليلة العاشر…… سافـــــر الغالي

★★★★★★★★★★

بـــس اشيع بالجــنايـــــز للقبور

واعله حالي بچت من دم الطيور

گمت اشد روحي علگ بيد اليزور

وبالمگابر گاعده واشعل بس بخور

ابكسرت الخاطر….. ظلت اعيالي

ليلة العاشر…… سافــــــر الغالي

★★★★★★★★★★

چـــم عـــزيــــز المني راح ابلا وداع

الغالي نايـــــم بالتـــــرب مالچ يگاع

انـــه اخت حسين واشعـــر بالظياع

وبيتي ظل فارغ يويلي من السباع

چم ظهر كاسر…. ياگمر عالي

ليلة العاشر… سافـــــر الغالي

★★★★★★★★★★

ــــــــــــــــــــــــــــــــــــــــــ
ماجد حبيب الخيكاني
ونسألكم الدعاء

من خيمه لعد خيمة ⛺…زينب تركض ابهيمة

والجمر بذيالها… وشيلم اطفالها

والشمر يبرالها…. سوطه بيدة

★★★★★★★★★★

اتگوم وطـيح العقيله يم خيمها وتشتعل

ساعة طفله اطيح يمها وساعة يتلوع طفل

منين ماتركض تشاهد نوگ واسياط وحبل

والشمر جدام اهلها ايگلها اصعدچ عا الهزل

اشماتگرب على اخوتها..الشمر ابسوطه يشحتها

ويلي عذب حالها… وشيلم اطفالها…
والشمر يبرالها…. سوطه بيدة
★★★★★★★★★★

ابعيني چن الطف اشوفه ويعرض اصورة الوحي

هذا وحي الشعر يمي وظل يصـــــــــور مسرحي

اطفال من الخوف ترجف وستمع صوت الرحي

وانه گتله هايه زينب ياشمــــــــــــــر ماتستحي

تركض وبعبايتها… رادت تطفي خيمتها

الصخر يبچي الحالها…. وشيلم اطفالها
والشمر يبرالها..... يابو فاضل
★★★★★★★★★★

عني مكشوف الغطاء وخانگ عيوني الدمع
وگمت اشوف الطف مناحه وصوت بالخيمة
استمع
هبت ارياح المنايـه وخمدت كـــــــل الشمع
الخيل تركض وانه اشوفن ضلع مكسور ابضلع

حافر خط اثر حافر…. اه يالوعـــــة العاشر

حسين طاح اگبالها… وشيلم اطفالها…
والشمر يبرالها…. سوطه بيدة
★★★★★★★★★★

غـــورگت عــين العقيله واجت تبچي محزمـــة
زينب وشافت اخوها طايح اويجري الـــــدمه
صاحت وشهگت يويلي وصدت اعله امخيمه
يا اللهي حسين طايح المن امخلــــــي السمه

فوگ الغبره وجه الله….وراسه اعله الرمح صله

وجثته محد شالها…. وشيلم اطفالها
والشمر يبرالها..... سوطه بيدة
★★★★★★★★★★

تركض ونار ابخيمها وچم طفل يمها انسحگ
وچف رقية ابهدم زينب من اجت يمها احترگ
چم عزيز وچم عزيزة ابحرگ الاخيام افترگ
اگماط عبدالله لحوافر منه اخذن چم علگ

صاحت سكنه مرعوبه… ليش اخيمنه منهوبه

وعالترب كفالها…. وشيلم اطفالها…
والشمر يبرالها.…… سوطه بيدة
★★★★★★★★★★

حسين طاح اعله الترايب ويلي محزوز النحر
وزينب اتصيح يااللهي من عسه ابذمة النهر
ابعرس جاسم مافرحنه ولاعلي الأكبر حظر
ولانحر عبدالله سالم حته يشتمه الگمر

رمله اليله مالومه…. وجاسم حضر اهدومه

والعرس چتالها….. وشيلم اطفالها…
والشمر يبرالها.……. سوطه بيدة
★★★★★★★★★★

ـــــــــــــــــــــــــــــــــــــــــــ
ماجد حبيب الخيكاني
ونسالكم الدعاء❤️

صحت اه… وويلاه… من رحت يالصادق

★★★★★★★★★

رايح والسمه اتنوح…. وبينه تنزف اجروح…
يالماكوا ابغلاتك

يالصادق يمظلوم….. روحك ظلت اتحوم
ابسجادت صلاتك

ابرمشك يسهر اليل…... وتشبه والدك حيل
يالماكوا ابحلاتك

صادق كل العلوم…. . خلي العاذل ايلوم
مايعرف صفاتك

يغارون… يخافون…. وانت بيهم ناطق
★★★★★★★★★

شوگك بين الانفاس…… وفگدك شيب الراس
يالبعدك ذبحن

ابچي وادري مَيفيد…… دمعي وانته ابعيد
والمدمع فظحني

يالساكن بالعيون ….. ياالبيك انـــــه مجنون
وفراگك جرحني

جرحي ينزف احساس….. لجلك مو على الناس
يالچفك ملَحني

بالعيون والجفون… اتضل صوره العاشق

★★★★★★★★★

الشامت گلي احاچيك … عاشگ ميت اشبيك
أي گتله انــه مجنون

كلالي العشگ عيب….. گتله انــــه ابقه للشيب
لو بيه يگودون

گلي زحمه والناس….. گتله عــــمــــه عــــباس

وظميته بالعيون
گلي ملتقي اويـــــاه….. لا مــــــا شفته والله
وبيه من زغري مفتون

اليعشگون… يگولون…. واليحبك واثق

★★★★★★★★★

ياهو المثلي يشتاگ….. ومنه گلبه ينباگ
ويروح الخليله

يسولف قصْته بدموع… ويشعل يمـــــه الشموع
ومايبطل مسيله

الظيع بالسلف شاب…. يترس لحيته اتراب
لا والله قليله

حگي من ابچي اليوم. رايـــح منـــــي معصوم
وتبچيله العقيله

والحسين… بلا عين… يبچي الك ويناشق
★★★★★★★★★

عندك سيدي ادخيل…. صارت دنيا خربيل
خليني ابخدمكم

رايد ابقه وياك….. وهم بالمحشر انعاك
وعالشايل علمكم

انصب مجلس الحين…واقرة بس عالحسين
وتبچي فاطمه امكم

فورٱ يلفي جبريل…… شال ابجنحه زنجيل
يلطم وي لطمكم

يعزون…. يلطمون…. المهدي يحضر واثق

★★★★★★★★★

باچر نمشي ونزور…. اونبنــــــي كل الگبور
ونعلي المنارات
نبني اگبور الاطياب… وكلمن للصحن باب ?
وطوفه الحمامات
حظرت فاطمه اتصير…. كعبه والحسن خــير
والباقر مُناجات
الصادق وي علي اصروح… وام الأربعـــــه اتنوح
الغالي ابكربله مات

بالانفاس…. يعباس…. ظل لخوك امعانق

ـــــــــــــــــــــــــــــــــــــــــــــ

ماجد حبيب الخيگاني
ونسألكم الدعاء

كاتب الصادق وصيه….. ابكل وكت ننصب عزيه

ولوا نقصر باالمجالس….. تزعل اعلينا الزچــــيه

★★★★★★★★★

ابكل وكت احيوا أمرنا الخبر واثق
فدوه  كل ارواحنه الجعفر الصادق
صحنه اه يحسين بحبال المشانق
والمگابر صارت احله من الحدائق

صحنه مانترك عهدنــــه...والكم انضحي ابولدنـه

عدنا عابس يفدي عابس…. ونستلذ بس باالمنيه

★★★★★★★★★

والله ياالصــــادق هتفنه من السواتر
احنه كلنا انموت بس تحيه الشعائــر
الما قره اعله حسين ويطبگ الحناجـر
أومابچه اليوم ولطم خسران بــــــاچر

المابچه ابهاي المئاتـم…ما تسجله الزهرة خـادم

حسين تبچيله النوارس…وتلطم اعليه كل مسيه
                      ★★★★★★★★★

هذا زود البينه كله ابفضل زودك
وعلمتنه التضحيه ابكلمة صمودك
همه عدهم داعش وأحنه جنودك
احنه شعية علي ومانخلف عهودك

ابكل شبر علگنه رايه.... والعلي تبقه الولايه

مانذل والمهدي حارس....انسوي دوله مهدويه
                        ★★★★★★★★★

يلـــي تستشكل علينا وعن عزانا
انته لا تحظر الزهرة تجي اويانا
هاي مو بيدك ترة من امك خيانا
كلمه گــالاهــــا مُحمد من لِســانا

اليبفَض الزهرة وأهلها.. ينشد أمــــه عن حَملها

يبقه بين اذنوبه راكس.. الما تبَع حامي الحمىيه

★★★★★★★★★

هـــــاي صيحه وخل يسمعـــون النواصب
اشما تــزغرونــا وعلـــي انكــــبر المواكــب
بــاچـــر انطــب للبقــيــع اويانــــا غـــايب
المـهدي ينصب محكمـه وبـــيكـم يحاسب

انصف منارة ابصف منارة.. المهدي لا ماينسه ثارة
يبنـي للصادق مـــدارس . وللحسن گبه زهــــيه

★★★★★★★★★

نــعــقــد اعـله حســــين مجلـــــس بالمديــنة
وتعتني أم البنـــين اتـــواســـــــــي بــــيــــنه
يلطــم البـــــاقـــــر اويهــمــل دمـع عـــيــــنه
ويحضر السجـــــاد والــگــــــيــد ابــيــمـــيـنه

فاطمه امــحَدب ظهرها…تلطــم اوتلچم كـسرها

ولابسه سود المـلابس.. وتقـــره ويانا للطمــيه

ــــــــــــــــــــــــــــــــــــــــــــــــ

ماجد حبيب الخيگاني

ونسألكم الدعاء