قصيدة في مولد الإمام المهدي عجل الله فرجه الشريف ،،،،

ـــــــــــــــــــــــــــــــــــــــــــــــــــــــــــــــ

طيور السعادة غَرّدت وُصلَت أخبارَه

وكِلّ الملائِك رَدّدَت شَعّت أنوارَه

مهدي الأُمَم جانه والدنيا فَرحانة

والدنيا فَرحانة مهدي الأُمَم جانه

ـــــــــــــــــــــــــــــــــــــــــــــــــــــــــــــــ

يا روحي حَلّ المُنتَصف
بانَت أفراحه

مِنتَظرَة هَالشيعة بشَغف
يِضوِي مِصباحَه

وأهدَتلَه هالليلة ألِف
وردة فَوّاحة

مِتعَنية كِلها لكربله
بنَبرَة صدّاحَة

تِهتِف يمولانه والروح وَلهانه

والروح وَلهانه تِهتف يمولانه

ــــــــــــــــــــــــــــــــــــــــــــــــــــــ

فاضت ينابيع الفرح
والگلب هايم

وخِنياب امجاده طفح
بالسعد دايم

بآمَالَه عالوَجنَة ٱنسِفَح
مَدمَع الوَادم

ومَن أحيَا هالليلة رُبَح
نصرة القائم

حُبّه الرُّوَى ٱظمانه عاش ورُبَى ٱويانه

عاش ورُبَى ٱويانه حُبّه الرُوَى ٱظمانه

ـــــــــــــــــــــــــــــــــــــــــــــــــــــــ

وارث العترة الطاهرة
جده أبو القاسم

أهل العلوم الباهرة
حيدر وفاطم

أحبابه كلهه ناطرة
والدمع ساجم

يَمتى الفجر يبزغ يبن
نبع المكارم ؟

جِبريل هَنّانه وِبجِنحه ضَمّانه

وبِجنحَه ضمانه جِبريل هَنّانه

ـــــــــــــــــــــــــــــــــــــــــــــــــــــــ

بمولد إبن حامي الحِمى
ٱنوِلدَت آمالي

والكون يضحك مَبسَمه
بطَلعة الوالي

هالليلة كوكب بالسمَه
ضَيّه ٱيلالي

مِشتاقه كِلها لمَقدَمه
والدمع هالي

وِالطير بَغصانه ظَل يِشدي بَلحانه

ظَل يِشدي بَلحانه والطير بَغصانه

ـــــــــــــــــــــــــــــــــــــــــــــــــــــــــــ

يا نَسمة بَلغِي المُصطفى
أجمل تهاني

وحَيدر وَريثِ المعرفة
أحلى الأماني

وِلفَاطمة خَيرِ النّسَا
الحُبهه نجّاني

وحسين غيره الماصُفَه
بالگلب ثاني

يَالحبهم ٱنجانَه ولِلجَنّة مَسرانه

ولِلجنة مَسرَانَه يالحُبهُم ٱنجانَه

ـــــــــــــــــــــــــــــــــــــــــــــــــــــــــــــ

بقلم الأستاذ ،،، ستار عذاب الحچامي

قصيدة في ولادة الإمام المهدي عجل الله فرجه الشريف ….
ـــــــــــــــــــــــــــــــــــــــــــــــــــــــــــــــ

إجَتنا أخبار سَعِيدة وسِمَعناها
بشَعبان الٱنوار ولادة ٱنتظَرناها

المَايِفرَح ٱويانَه مَرفوضَة ٱعذارَه
والمُنتَظَر جَانَه وتِتلالَة أنوارَه

ـــــــــــــــــــــــــــــــــــــــــــــــــــــــــــــــ

أهلاً وسَهلاً شَعبان صَاحَت ٱجروحِي
إرحَم دِلِيلِي الوَلهَان نَادِتَك روحي
مِنّ الفَرَح طَگ بُركان بجَيّتَك بوحِي

أطيار السّعَد غَنّت بالسّمَه
والكون إبتِشَر يِضحَك مَبسَمَه

مِن فَرحِتي ٱعلَلخَد أهمِل دَمعاتِي
وَلِلمَهدي ٱبِن أحمَد أبعَث وردَاتِي

ـــــــــــــــــــــــــــــــــــــــــــــــــــــــــــــــ

هَالليلة لِيلَة أنوار بفَرحة نِحييها
وَارِث نَبينا المُختار يِنوِلِد بيها
باچِر يِزيحِ الأكدَار الغُمّة يِجلِيها

بمِيزانِ العَدِل يِحكُم قَبضِتَه
بالحَق والقِسِط ٱيشَيّد دَولِتَه

ما يُبقىٰ بِن آدَم مَسلوبَة أحگوگه
خَل يِفهَم العالَم حَالَة مَعشوگه

ـــــــــــــــــــــــــــــــــــــــــــــــــــــــــــــــ

مِيّة هَلَا بهذا اليوم نَادَت الشيعَة
تِگصِد ضَريح المظلوم تجَدّد البِيعَة
رَبها العزيز القَيّوم الخالِق ٱطّيعَه

بأنشودة أمَل تِحيِي المُنتصَف
بأهزوجَة خَجَل دَلّالي ٱعتَرَف

هَالليلة لِيلَتنا ونِتسامَر بِيهَا
يارَبّي دَعوَتنا يِظهَر رَاعِيهَا

ـــــــــــــــــــــــــــــــــــــــــــــــــــــــــــــــ

مَحلاهَه لِيلَة أفراح وكِلهَا سَهرَانَة
والصّندَل ٱويَ القِدّاح موَرّدَة أغصَانَه
دَمعِ المَشاعِر سَيّاح ورَدّد ٱويانَه

يا فُلكِ وحِمَل آمَالِ البَشَر
يا سورَة شَمِس يا سورَة قَمَر

غايِب يتانونَك مولانَه الهَيبَة
شِيعة ويِسألونَك طَالَت هَالغَيبَة

ـــــــــــــــــــــــــــــــــــــــــــــــــــــــــــــــ

بيوم النّصِف أنسَى الآه وَأنسَى أحزَاني
لِيلَة إنِس مَا أحلاه وجَوهَا رَوحاني
وباچِر يِجِي الأتمَنّاه ويُبقَى عِنواني

ظامي و أنتِظِر وَنطِر جَيّتَه
وكِل هاي البَشَر تِحچي بسِيرِتَه

وَينك يَبو صَالِح يا نور ٱعيوني
بيك الفِكِر سَارِح ذَبلانَة ٱجفوني

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في ولادة الإمام قمر بني هاشم عليه السلام ، مُلَمّع
ـــــــــــــــــــــــــــــــــــــــــــــــــــــــــــــــ

عَبيرُ اليَاسِ
مَلَا أنفاسي
ونورُ البَدرِ تَسامَىٰ بَينَ عَينَيهِ

ـــــــــــــــــــــــــــــــــــــــــــــــــــــــــــــــ

يَشَعبانِ البِشائِر
دِلِيلِي اليوم حايِر
مَوالِيدَك تِزِيدِ الدنيا أفرَاح

هِلالَك مِن يِجِينَه
المُحِب يِكبَر حَنِينَه
يِصِدلَك بالحَنان وهَمّه يِنزَاح

الفَرَح يِلگِيلَه فُرصَة
الوَرِد ياخِذلَه حِصّة
سَعِيد بهَالمَوالِد بالعِطِر فاح

الزّنابِق والصّنادِل
عَلَى ٱعنادِ العَواذِل
يِبادِلها التّهانِي اليوم قِدّاح

بِكَ التّهليلُ
بِكَ التّبجيلُ

بِكَ الكرّارُ تَجَلّىٰ حُسنُ نَجلَيْهِ
ونورُ البَدرِ تَسامَىٰ بَينَ عَينَيهِ

ـــــــــــــــــــــــــــــــــــــــــــــــــــــــــــــــ

خَبَر مُفرِح إجانَه
گُمَر هَلّ ٱبسِمانَه
گِشَع غَيمِ الحِزِن والهَم والٱكدار

إجَه بشَعبان رَابِع
الحِسِن بَوصافَه جامِع
تِصِدلَه بعَين غِبطة كِلّ الٱقمار

الهَوَى ٱينَسّم بُرودَة
إذا مَرّ بخُدودَه
مَرِج أخضَر شِمَل أنواع الٱزهار

إذا سَاىٔل سَألنَه
شِنو السّرّ بفَرَحنَه
نِگِلّه اليوم مَولِد نَبعِ الٱيثار

حَلِيفُ الغِيرَة
طَهورُ السّيرَة

ويَجري الفَضلُ نَدِيّاً بَينَ كَفّيهِ
ونورُ البَدرِ تَسامَىٰ بَين عَينَيهِ

ـــــــــــــــــــــــــــــــــــــــــــــــــــــــــــــــ

بأكالِيل السعادة
وأهازيج الرّيادة
نِهَنّي حَيدَرَة كَفّال الٱيتام

ونِقَدّمله التحية
الحُسين ٱبنِ الزچية
بأبو فاضل عِضيدَه اليِرفَع الهام

ونِبَشّر زينب إختَه
أخوچ بهاذي جَيتَه
يِبَدّل بالفرَح أحزَان الأيام

أصِيح بصوت عَالي
يَبو فاضل يَغالي
يَمَن حُبّك رِمَاني بحَفنَة ٱسهَام

أصابَت قَلبِي
أجَنّت لُبّي

وَوَجدي شادٍ سَعِيدٌ بَينَ غُصنَيْهِ
ونورُ البَدرِ تَسامَىٰ بَينَ عَينَيهِ

ـــــــــــــــــــــــــــــــــــــــــــــــــــــــــــــــ

عِشِگ مِنّ الطفولة
رِدِتْ بَلكَن أنولَه
وَصِير بخِدمِتَه سَيّد زِماني

وَتَرجِمها المَشاعِر
بمَدامِعهَا النّواظِر
وأظَلّ بعِتبِتَه لِجوابَه أتانِي

يَهالناس ٱعذُروني
عَلَيْ هَيمَن جُنوني
بتَراتِيل العِشِگ يِلهَج لِسَاني

الذي يِسأل عَلَيّه
إذا صُبحِ ومِسِيّة
مُقيم بحَضرَةِ الكافِل لِگانِي

أُحَاكِي القُبّة
وتِلكَ الهَيبَة

فؤادي يَهفو صَرِيخاً نَحوَ فُلكَيْهِ
ونورُ البَدرِ تَسامَىٰ بَينَ عَينَيهِ

ـــــــــــــــــــــــــــــــــــــــــــــــــــــــــــــــ

إلَىٰ الأُمّ الوَفِيّة
الكِلابِيّة النّقِيّة
إلَىٰ أُمّ البنين أُمّ الكرَامَات

مُبارَك يالنّجِيبَة
يَمَن رَبّيتِي هَيبَة
إلِچ أبعَث تَحِيّة ٱويَ الحَمَامَات

نَعَم يَمّ الأكارِم
عَلَى بَدرِ الهِواشِم
أسَد وِلْغِيرِتَه بانَت عَلامَات

كفيل الفاطميّة
العقيلة الهاشِمِيّة
جَبِينَه ٱمنِ النّدَى ٱيمِدّ السّحَابات

هُوَ الإيثارُ
هُوَ الإصرَارُ

فَلا مِن حُسنٍ يُضاهِي حُسنَ خَدّيْهِ
ونورُ البَدرِ تَسامَىٰ بَينَ عَينَيهِ

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة بلسان حال أم البنين الطاهرة العفيفة  ،،،  
ـــــــــــــــــــــــــــــــــــــــــــــــــــــــــــــــ

أنَه باب الحوائج ياللي تِنخاني
اليِجيني  مايِظل ٱمحَيّر ٱيتاني

الدّخيل ٱستقبلِيتَه
ويِرِد غانِم لَبيتَه 

اليِجيني مايِظل ٱمحَيّر ٱيتاني 

ـــــــــــــــــــــــــــــــــــــــــــــــــــــــــــــــ

يا مَن بالشدَايد  طايِح  اليوم    يَمَن  تِسأل عَلَيّة 
آنه البابي ظل مَفتوح  للدوم    مِن الخالِق مِزِيّة
جَرُّب وِنتِخي  بِلسان  مالوم    وبِالدمعة الجِرِيّة
ماواحد إجانِي ٱمحَمّل هموم  وماحَصّل عِطِيّة 

ولا  تِسأل  حَكيم   وإسأل  الجَرّب
الإجانِي بذاك حَالَه وحَصّل المَطلَب

حَزين وفَرّحِيتَه
يِرِد غانِم  لَبيتَه

اليِجيني مايِظل ٱمحَيّر ٱيتاني 

ـــــــــــــــــــــــــــــــــــــــــــــــــــــــــــــــ

آنه  أم  البنين  الحُرّة  لَبّيت       لِبوالأكبر نِداءَه
أولادي إجمَعِتهم ثُمّ  وَصّيت      تموتون  لِفداءَه
بعَبّاس وأخوتَه الزهرة وَفّيت      وِتجَسّد  وَفاءَه
طايِح عالشريعة شَمعة البيت   مَخضوب بدماءَه

رِدِت مِن إبني يوفي حسين بچفوفه
وِذا  طاح  السهم   بعيونه  مَيعوفه

أبو فاضل نَخيتَه
يِرِد  غانِم  لَبيتَه 

اليِجيني مايِظل ٱمحَيّر ٱيتاني 

ـــــــــــــــــــــــــــــــــــــــــــــــــــــــــــــــ

جَازاني الإله  بخدمة  حسين    مَوجودة بوجودَه
وِنطاني الكريم أربع  ميامين      قربان  ٱعلموده
حَگهُم لوغِدَوا بالحُب مجانين    وِتناسَوا  حُدودَه
لو  واحد  سألهُم  إنتم  ٱمنين      هاي أول رُدودَه

آنه إبن  الوَفية  الطاهرة  الحُرّة 
قرابين إحنا كِلنه لمُهجَة الزهرة

بدِمَه المَنحَر فِديتَه
يِرِد  غانِم  لَبيتَه 

اليِجيني مايِظل ٱمحَيّر ٱيتاني 

ـــــــــــــــــــــــــــــــــــــــــــــــــــــــــــــــ

مِن يَمّي العُسُر بِذنَ الله يِسهَل    باب الباري بابي
وِقرَالِي الحَمِد والصعبة تِنحَل    مِن تِذكُر مُصابي
إسأل  رَبّك   بقَدري  وتِوَسّل    وِبحُرمة  حجابي
لو  رايِد  دُعاءك  هذا   يُقبَل    وِتحصّل  جَوابِي

عَلَيّة  تِقسِم  بإبني  الوِگع   دامي
أبو الأكبر عزيزي المِنذبح ظامي

حبيبي الضّيّعَيتَه
يِرِد  غانِم  لَبيتَه 

اليِجيني مايِظل ٱمحَيّر ٱيتاني 

ـــــــــــــــــــــــــــــــــــــــــــــــــــــــــــــــ

لوعندك دَمع ما تِعرِف شلون   مِن عَينَك تِسِيلَه
إحضَر مأتَمي  وَيّه  اليِعَزّون   بِحساسَك تِجيلَه
تِلگه أحباب بالمَجلس يِنوحون بِالوَنّة  الثجيلَه
دمعك راح يجري وإنتَه محزون بچفوفك تِشيلَه

إذا تِنعى ٱويَ ناعي الفاجعة ٱعلَيّة 
يظَل  دمعك  يِهِل  نِهران  يومية

حُضورَك سَجّلِيتَه
يِرِد  غانِم   لَبيتَه 

اليِجيني مايِظل ٱمحَيّر ٱيتاني 

ـــــــــــــــــــــــــــــــــــــــــــــــــــــــــــــــ

آنه  اللي وَفائي مَضرَب  أمثال   سَمّوني الوَفِيّة 
رَاس أوليدي لَجل حسين يِنشال  بِرماح  المِنِيّة
ما گِدرَت تِحِمله حَتّى الجبال حِزن الغاضِرية
أنعَى حسين ظَلّيت ٱعلَهالحال كِل صُبح ومِسِيّة

تِشَرّفت  وصِرِت  لِحسين  خَدّامَة
إعتُبرني ٱعمامِته وخَلّاني عالهَامة

لَحَد موتي نِعَيتَه
يِرِد غانِم  لَبيتَه 

اليِجيني مايِظل ٱمحَيّر ٱيتاني

ـــــــــــــــــــــــــــــــــــــــــــــــــــــــــــــــ

بقلم الأستاذ  / ستار عذاب الحچامي

قصيدة في وفاة أم البنين الطاهرة عليها السلام ،،،،،،

ــــــــــــــــــــــــــــــــــــــــــــــــــــــــ

والنعم  منچ  يَمّ  البنين     ....      والله
لأم الحَسَن يالحُرّة توفين  ....      والله
بالأربعة العندچ تِضَحّين    ....       والله

ـــــــــــــــــــــــــــــــــــــــــــــــــــــــــ

والله يَم عباس حاير شردسولف
والقلم خجلان بيدي وهسه يرجف
شگد إلچ ويه الزچية من مواقف
خايف بحگچ أصيرن غير منصف

خايف تِقصّر عندي الاشعار  ـــــــــ  والله
أطلب سماحچ  يَم الأطهار  ـــــــــ  والله
لو عندچ اكثر ما تبخلين     ـــــــــ  والله
بالأربعة العندچ تضحين     ــــــــــ  والله

ــــــــــــــــــــــــــــــــــــــــــــــــــــــــــ

صرتي أم لحسين من عگب الزچية
والحسن  ناداچ  يالحُرة  الوفية
وللعقيلة انطيتي كل عمرچ هدية
والگمر  نوّر  لياليكم  سويّة

عبد الله وي جعفر وعثمان  ــــــــ والله
للمرجلة  وللغيرة  عنوان     ــــــــ  والله
كلهم نذر لتراب الحسين     ــــــــ  والله
بالأربعة العندچ تضحين     ـــــــــ  والله

ــــــــــــــــــــــــــــــــــــــــــــــــــــــــــــ

يذكر التاريخ عنچ أروع أخبار
ياللي ربيتي بوفائچ أربع أقمار
منّچ العالَم عِرَف مفهوم الإيثار
واللي ما يعرف نگله بكربله شصار

حِملِچ ثِجيل وشِفتي الهموم ــــــــ والله
سهرانة عينچ تحسب انجوم ــــــــ والله
حاشاچ إنتي الماتقصرين     ـــــــــ والله
بالأربعة العندچ تضحين      ـــــــــ والله

ـــــــــــــــــــــــــــــــــــــــــــــــــــــــــ

عن  فِعِل  أولادچ  الأخبار  تشهد
موقف بوادي الطفوف وظل مخلّد
إسمچ  بلحظة  شهادتهم  تِرَدّد
حاشا ما خذلوچ وي بضعة محمد 

والنعم منهم رفعوا الراس    ـــــــــ والله
للتضحية وللغيرة نبراس    ـــــــــ والله
عباس ينطي الخوة چفين  ـــــــــ والله
بالأربعة العند تِضَحّين       ـــــــــ والله

ـــــــــــــــــــــــــــــــــــــــــــــــــــــــــــ

يَمّ البنين اعتقد بالطف حِضَرتي
بساعة الكلمن وگع بالحومة شِفتي
وعالكفيل الظامي بدموعچ نِدَبتي
ولَجل أبو السجّاد عالوجنة  لِطَمتي

يا يمّة  چتلك  هَدّم  الحَيل ـــــــــــ والله
إنته علَصدرك تسحَگ الخَيل ــــــــــ والله
يا مَن  أخوك  بلاية  چفين  ــــــــــ والله
بالأربعة  العِندچ  تِضَحّين   ــــــــــ والله

ـــــــــــــــــــــــــــــــــــــــــــــــــــــــ

مِن وِصَل ناعِي المصايب للمدينة
شنهو  أخبار  الأطايب   تِسألينه
والأجر   عظّملچ  بوَنّة  حزينة
بالشباب الطاحوا وحامي الظعينة

جاوِبني إبني حسين وينه ـــــــــــ والله
بَس لا عِزيزي  ٱمگطعينه  ـــــــــــ والله
المِنّه لا ما شبعَت العَين   ـــــــــــ والله
بالأربعة العندچ تِضَحّين  ـــــــــــ والله

ــــــــــــــــــــــــــــــــــــــــــــــــــــــــ

تِنقضِي الحاجات يَمّچ يالنّجيبَة
يِنتخِيچ الشيعِي لو طاح بمُصيبة
يالمُصابِچ بالگلب يٍسعَر لَهيبَه
لو يِحَلفوچ بأبو الجِثّة السلِيبة

لا ما تِرِدّين اليِگصدون ..... والله
وشما يِطلبون ويِريدون ..... والله
وباچِر نِريدِچ هَم تِحِضرين ..... والله
بالأربعة العِندِچ تِضَحّين ..... والله

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في أم البنين عليها السلام  ،  لسان حالها يقول  ،،،، 
ـــــــــــــــــــــــــــــــــــــــــــــــــــــــــــــــ

حَزينة آنه أم الأربعة 
حَزينة آنه أم الأربعة 
ـــــــــــــــــــــــــــــــــــــــــــــــــــــــــــــــ

أبعِدَوا عَنّي  بظعنهم  بالغُرُب خَلّوني
سافَرَوا ما گالَوا أُمنَه ولِلحِزِن سَلْمونِي
هالكواكِب عَنّي غابَوا بالهَجُر ذِبحونِي
وانَه چانَت أمنياتي بموتِتِي ٱيحِضروني

هَجُرهُم حَنظل ومُرْ أجرَعَه
حَزينة  آنه  أم  الأربعة 

ـــــــــــــــــــــــــــــــــــــــــــــــــــــــــــــــ

رِدّت أحاوِل أنسَى لاچَن ما گِدَرت أنسَاهُم
توَسّلِتهُم  ياما ياما  وما  خَذوني  ٱوياهُم 
بالمَدامِع  جِفنِي  ذايِب  مِن هَضُم فَرگاهُم
وذِكرَياتي  تگِلّي  رَاحَوا أيْسِي مِن مَلگاهُم 

والٱحلام مِنهَا أگعِد فازِعَة
حَزينة  آنه  أم  الأربعة 

ـــــــــــــــــــــــــــــــــــــــــــــــــــــــــــــــ

عُمرِي  كِلّه  آنه  أرَابِي  وأنتِظُر  يَومية
بَلكِي طارشهُم يِجيني وروحي تِهدَه ٱشوَيّة
عَينِي  فاضَت   بِشتِياقِي  والحَنانِ  البِيّة 
بالحِلِم  شِفت آنه زينب  بالغُرب  مَسبِيّة 

بالآلام شِفت أخوها ٱتوَدّعه
حَزينة  آنه  أم  الأربعة 

ـــــــــــــــــــــــــــــــــــــــــــــــــــــــــــــــ

والعِليلة  ٱويايَه  ظَلّت  والگلُب  كاسِرتَه
والمَرَض  ذَبّل غِصِنهَه  والفَرَج ناطِرتَه 
والحِزِن غافي بحِضِنهَه والفَرَح  ناحِرتَه
تِلهَج  بسِيرَة  أبوها  بكِل  وَكِت  ذاكِرتَه

يَبويَه صَوت مُحزِن أسمَعَه
حَزينة  آنه  أم  الأربعة 

ـــــــــــــــــــــــــــــــــــــــــــــــــــــــــــــــ

مِن سِمعَتِ الناعي  يِنعَى أركِض ٱتعَنّيتَه
عَن  أبو  الأكبر  سَألتَه  هَم  يِرِدّ  ٱلبِيتَه
جَاوَب  بدَمعِ  الوِسافة  عَالتّرُب   خَلّيتَه
وِنهِدَل   چَتفي  ونِعَيتَه   والدّمِع   هَلّيتَه

وعِضيدَه ظامي يَمّ المَشرعَة
حَزينة  آنه  أم  الأربعة 

ـــــــــــــــــــــــــــــــــــــــــــــــــــــــــــــــ

عُمرِي  خَلّص  بالنواعِي  والقهَر يِبرَالي
وِنذَرِت   أربَع   بَنيني   لِلعَزيز   الغالي
بَس  يِرِدلِي  حسين سالم  هايَه  كِل آمالي
رَيت أنه الذّبحَوا وِريدي وگطّعَوا أوصالي

ولا أشوف جِثّة إبني ٱمبَضّعَة
حَزينة   آنه  أم   الأربعة 

ـــــــــــــــــــــــــــــــــــــــــــــــــــــــــــــــ

خادِمة   إبّيت   الزچية    أفتِخِر  وَتباهَه
وزِينب   الكافِل   ظَعَنهه  بالنّحَر   لَبّاهَه
هذا خادم هذا روحَه ٱعلَى الشّرَف رَبّاهَه
هذا أبو الغِيرَة الشهادة  من الزغر حَبّاهَه

عَلَى الماي والچفوف ٱمگطّعَة 
حَزينة   آنه   أم   الأربعة 

ـــــــــــــــــــــــــــــــــــــــــــــــــــــــــــــــ

ساكِن حسين  بدِليلي وعايِش  بوِجداني
وسِيرِتَه  الما  بَطّلِتهه وظَلّت  ٱعلَلسانِي
آنه  باب  الله  الوِسيعَة  والوِفا  عِنواني
أقضِي حَاجات اليِجيني وما يِظَلّ ٱمتانِي

ولا خاب اليِمّي يِنزِل مَدمَعَه
حَزينة  آنه  أم  الأربعة 

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في ولادة الإمام الصادق عليه السلام  . 
ـــــــــــــــــــــــــــــــــــــــــــــــــــــــــــــــ

هالليلة  ميلادك  يبن هادينه
يا سيدي ودَمعِ  الفَرَح هَلّينه 
ظامي الگلب لزيارِتك حَنّينَه 
ـــــــــــــــــــــــــــــــــــــــــــــــــــــــــــــــ

إلَك أبعث تَهانِي 
وتَحيات وأماني 
يَبن هادينه طَه 

يَبــن باقر عُلــــــومَه
الفَلَك فُرحَت نُجومَه
الخَبَر لَمّن إجاهَه

صَلّت على الهادي النبي وصَلّينه 
يا  سيدي  ودَمعِ  الفَرَح  هَلّيـــنه 
ظامـــي  الگلب  لزيارِتك  حَنّينَه 

ـــــــــــــــــــــــــــــــــــــــــــــــــــــــــــــــ

إجَه الخير بحُضورَك 
گُمَر ساحِـــرنه  نورَك
شَسولِف عَن جَمالَك

الوَرِد خَدّك  يِعُرفَه 
المُوالِي بگلبه لَهفَة
ودَمِع عَينَه الدّلالَة

والشوگ شَمعة وتِحتِرگ بِونِينَه 
يا  سيدي  ودَمعِ  الفَرَح  هَلّــينه  
ظامي  الگلب  لزيارِتك  حَنّــينَه 

ـــــــــــــــــــــــــــــــــــــــــــــــــــــــــــــــ

يَنبراس  الشهامة 
يَعِنوان  الكــرامة
يَمَحبوبي وإمامي 

الجَرِح  إنتَه وطَبيبَه
الگلُب  يِســعَر لَهِيبَه
بجَمُر حُبّي وغَرامِي 

طَال الهَجُر يا لصادق ومَلّينَه 
يا سَيدي  ودَمعِ  الفَرح هَلّينه 
ظامي الگلُب لزيارِتك حَنّينَه 

ـــــــــــــــــــــــــــــــــــــــــــــــــــــــــــــــ

يَمَن قَولَك سَبائك 
نِزَل فَوجِ المَلائك
يِرَدّد هالعِبارَة 

هَلَا  بإبنِ  الزچــــيّة 
بِزَغ عـــــالدّنيا ضَيّه
إهتِدَت بِيك الحَيارَى 

يَالساكِن بروح المُوالِي وعَينَه
يا سيدي  ودَمعِ  الفَرح  هَلّينه 
ظامي الگلب لزيارِتك  حَنّـينَه 

ـــــــــــــــــــــــــــــــــــــــــــــــــــــــــــــــ

إلَك تِحله القيادة 
نِهَنّي بهَالـــولادة 
جَميعِ الجَعـفرِيّة 

ونِهَنّي الحُجّة كِلنَه
أبو صـــالح  أمَــلنه 
بقَصــــائِدنه البَهِيّة 

دَربَك يَبو الكاظم نِظَل ماشِينَه
يا سيدي  ودَمعِ  الفَرح  هَلّيــنه 
ظامي الگلب لزيارِتك  حَنّـــينَه 

ـــــــــــــــــــــــــــــــــــــــــــــــــــــــــــــــ

يَمِنهاج العَــــدالة 
إلَك رَبّ الجــلالة
جَعَل عِزّة ومَهابة 

لأن قُــــرآنه إنتَــه 
وعِلِم جَدّك خِزَنتَـه
وذِكَر فضلَك كِتابه 

وحَتّى الكواكب بالسما اتهَنّينَه 
يا سيـــدي  ودَمعِ  الفَرح هَلّينه 
ظامي الگــــلب لزيارِتك حَنّينَه 

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي 

قصيدة في مولد الإمام الصادق عليه السلام  .
ـــــــــــــــــــــــــــــــــــــــــــــــــــــــــــــــ
**

هالليلة كِل هَمنه ٱنجلَِه والبَهجة غُمرَتنه
ونِزلَت ملائكة السّما ٱتشــاركنَه فَرحتنَه

تِحمِل وَرِد واليَاس    في مولد الصادق
فَرحانَة هاي الناس    في مولد الصادق

ـــــــــــــــــــــــــــــــــــــــــــــــــــــــــــــــ

طَير السّعَد  فَرحان
وِيخاطب الأغصان
وبأعــذَب الألحــان
أحمِل إلِچ  أخـبار

عالدنيا أشــــرق نور
ليلة  فَرَح  وِســــرور
بساق العَرِش محفور
إسمه بحِبِر أنوار

ساحِر جَمالَه الكون
بحُبّه الگلب مفتون
وبمَولِده  المَــيمون
تِتناثَر الأزهار

هذا الخبر أجمل خبر يِمكِن تِسمعينَه
طَبعاً شُعورِچ  يخـتلف لَمّن تِشوفينه

يِتشابَك  الإحساس  في مولد الصادق
فرحانة هاي الناس   في مولد الصادق

ـــــــــــــــــــــــــــــــــــــــــــــــــــــــــــــــ

جَدّه  النّبي  المختار
بوَصفه العَقِل مِحتار
وَجهَه  اليِـشِع  أنوار
سُبحانَه  مَن  سَوّاه

سادس وَتَد معصوم
بخَدّه الورد مَرسـوم
بحُبّه  الوَجِد مَهيوم
ولكِل جَرِح  سَلواه

مَنبَع  تُقَى  وإيمان
وللطِيبة  والعِرفان
أقوالَه كالمَـــرجان
لِليفتِهِم  فَحواه

حَتى الفَلَك مِن فَرحـــتَه مِبتَهجَه أبراجَه
باب الحَوائج ما يِخِيب اليِگصِدَه بحاجة

للأمة رَفعـــة رَاس    في مولد الصادق
فَرحانَة هاي الناس    في مولد الصادق

ـــــــــــــــــــــــــــــــــــــــــــــــــــــــــــــــ

ضنوة علي الكرّار
عِندَه  العِلِم أسرار
مِن  عادِتَه  الإيثار
تِتناقَلَه  الأجيال

إبن  النبي  ومَـعروف
حَولَه الشهامة ٱطّوف
دَمعِ  الفَــرَح  مَذروف
فوگ المحاجِر سَال

كِل  التحايا  اليوم
للصادق المعــصوم
لو شافه أي مهموم
كِل هَمّه رَاح وزال

كِلّ  البلابِل غَرّدت  فرحــانة  مَسرورَة
تِلبَس بَراقعهه الشمس لو عايِنَت نورَه

چَنّه  الگُمَر عَبــاس     في مولد الصادق
فَرحانَة هاي الناس     في مولد الصادق

ـــــــــــــــــــــــــــــــــــــــــــــــــــــــــــــــ

وبمَولِده  الميمون
كِل شِيعته ٱيهنّون
مَهدينا  وِينشدون
يَمتى الفَرَج مَولاي

يا حُجّة المعبود
يا أيها الــموعود
والإشتياق ايزود
صَحرَا وتِريد المَاي

بِينه الگلب مَجروح
رَافگنه  بَـس  النوح
يَمتى بلُواك ٱنــروح
لِلصّادق الوَفّاي

ونِبني الضّريح وبالفَرَح جَمرَتنه لَهّابَه
ونِقرَه الزيارة الناحية والنُّدبة يَم بَابَه

عِتبَة  ذَهَب  تِنباس     في مولد الصادق
فَرحانَة هاي الناس      في مولد الصادق

ـــــــــــــــــــــــــــــــــــــــــــــــــــــــــــــــ

يا صادق الأقوال
والسيرة والأفعال
مِن أفضل الأعمال
نِفرَحلَك ٱحنه اليوم

وبفَرحة المِيلاد
تِتوافَد  الأمجاد
كِلمَن يِريد ٱمراد
مِن خالِقه القَيّوم

مِنّ  الفَــــرح آيات
تِنقِلهه إلَك نَسـمات
مَشحونة بالبَسمات
مِن عاشِگ ومَحروم

نِبعَث تهاني بمَولِدِك  لِلمَهدي هالليلة
وِنگِلّه  طالت غَيبتَك  يَمعَدّل  المَيلَة

تِتلاهَب الأنـــفاس      في مولد الصادق
فَرحانَة هاي الناس     في مولد الصادق

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في مولد الرسول الأكرم صلّى الله عليه وآله وسلّم .
ـــــــــــــــــــــــــــــــــــــــــــــــــــــــــــــــ

نور و جـمال
حُب ووصال
كِل هَمنه زال
بِولايِته

أجمل كلام
يِحمِل غَرام
لخَيرِ الأنام
بِولادِته

ـــــــــــــــــــــــــــــــــــــــــــــــــــــــــــــــ

لحظة فَرَح هَالليلة جِمعَــتنه
نِنسى الحِزِن والبهجة غُمرَتنه
يِحـلَى السهر والليـــلة لِيلتنه
بأجمل شِعِر تَرجمــنه فَرحتـنه

نِشعِل ضِــلوع
ٱبدال الشموع

بلَهفة صُدور
نِنـثُر زُهـــور
فاحَت عُطور
بِمحَبتَه

ـــــــــــــــــــــــــــــــــــــــــــــــــــــــــــــــ

اليوم الشمس لاحَظنه غَيرَتهه
نُور الرسول الهــادي باغَتــــهه
مِن هالجَــمال شاهَدنه حَيرَتهه
وبكِل سُرور ألقَــت قصــيدَتهه

أهلاً تِگـول
يابو البتول

نُورِ الحَـــبيب
ساطِع عَجيب
لازم أغيـــــب
في حَضرِتَه

ـــــــــــــــــــــــــــــــــــــــــــــــــــــــــــــــ

شافَه الگمر مِن لَهفِته ٱتعَنّه
يِنضَح خَجَل لو يِقتِرِب مِنّه
يِلمَع ذَهَب مِن يِبتِسِم سِنّه
ويِصبَح يَتِــيم اليِبتِعِد عَنّه

آية جَمال
مَنبَع دلال

كوكــب نَقاء
مَصدَر صفاء
شَعّ الضــياء
مِن وَجنِتَه

ـــــــــــــــــــــــــــــــــــــــــــــــــــــــــــــــ

بالمُصطفى تِتكامَل الأوصَاف
وبالمَرجلة لِيث وأبد مَيخـاف
يالسِيرِتَه سِيرَة عَدِل وِنصاف
يالعِشــرِتَه جَنّة وفَــلا تِنعاف

بَرّ وكــريم
فَذّ ورَحيم

صادق أمين
ثابــت يقين
واضح مُبين
في كِلمتَه

ـــــــــــــــــــــــــــــــــــــــــــــــــــــــــــــــ

مِن ضِحكته تِتـولّد الأنوار
مِن بين إديه تِتفَجّر الأنهار
بَعذَب لَحِن غَنّت إلَه الأطيار
وِلكِل نَبي خازن عِلِم وَسرار

يِعلَه الهِتاف
بالإعـــتراف

بفَضلَه ونَـدَاه
بعَطفَه وهُدَاه
كِل حُر فِــدَاه
وِبخِدمِتَه

ـــــــــــــــــــــــــــــــــــــــــــــــــــــــــــــــ

يا سيدي يا حُــجّة المَعــبود
نِبعَث إلَك في مَولِد المَحمــود
أجمل شِعِر يِحمِل عِطِر وورود
وبطَلعِتَك يُبقى الأمل مَوجود

طُولِ الزمَن
يَبنِ الحَسَن

نِكتب سُطور
بعِطر الزهـور
لحظة سُـرور
لكِل شِيعِتَه

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في ولادة النبي الأكرم صلّى الله عليه وآله وسلّم . مُلَمّع
ـــــــــــــــــــــــــــــــــــــــــــــــــــــــــــــــ

حَبيبي يا مُحمد يا مُحمد
حَياتِي يا مُحمد يا مُحمد
ـــــــــــــــــــــــــــــــــــــــــــــــــــــــــــــــ

على الأغصانِ طَيرُ الحُبّ غَرّد
وهاجَ الشوقُ في قلبي وَوَرّد

وغَيثُ اللهِ قَد نَزَلَ ٱحتفاءً
بمَولِدِ سَيّدِ الثّقَلَينِ أحمد

عَليمَن تِسأل وتِنطُر جَوابي
تِخِبرَك هالسهول وهَالهِضابِ
بِزَغ فَجرَه وگِشَع كِلّ الضبابِ

وفَرَح هالكون في ميلادِ أحمد
حبيبي يـــــا محمد يـــا محمد

ـــــــــــــــــــــــــــــــــــــــــــــــــــــــــــــــ

وأوصالي وما يَسري بجِسمِي
وأنفاســــي تُنادي يا مُسَدّد

رســـــولٌ طاهِـــــرٌ بَرٌّ نَقِـــــيٌّ
لَكَ الأعداءُ قَبلَ الصّحبِ تَشهَد

رسـول وأكرَمَك رَبّ البَرِيّة
حَبيبه وخَصّك بهاي المَزِيّة
أمين وصـادق ورَادَك نَبِيّه

ولا يوصَل مكانَك طه أحّد
حبيبي يــا محمد يا محمد

ـــــــــــــــــــــــــــــــــــــــــــــــــــــــــــــــ

بُعِثتَ إلى البَرِيّةِ فٱستنارَت
وكانَ نهارُها بالشّركِ أسـوَد

بُعِثتَ تُتَمّمَ الأخلاقَ فِينا
ومِن أنوارِكَ الدُّرّيُّ يُوقَد

إلهي الأرسَــلَك للناسِ هادي
وجَعَل حُبّك خلاص لهَالعِبادِ
الشّرِك هَدّمتَه ورموز الفسادِ

وجَعلتِ البَرّ والفاجِر يِوَحّـد
حبيبي يــــا محمد يا محمد

ـــــــــــــــــــــــــــــــــــــــــــــــــــــــــــــــ

ولَم تَقبَل سِوَى الإسلامِ دِيناً
وتَأبَـــى أنّ غَــيرَ اللهِ يُعبَد

رَسولَ اللهِ يا أمَلَ البَــــرايا
أهذا طِيبُ ثَغرِكَ أم زَبَرجَد ؟

رسولَ الله ونِعِم مِنّك يَطَه
وَصِيّك حَيدرالجَنّة ٱشتَراهَه
سَلامي لفاطمة الكوثر وَباهَه

وعلى العِترة الشريفة المِنهه تِمتَد
حبيبي يـــــــا محمد يــــــا محمد

ـــــــــــــــــــــــــــــــــــــــــــــــــــــــــــــــ

سَيَبقى فيكَ مَدحِي وٱعتقادي
فَمَدحُكَ مِنهُ مَدحُ الحَقّ يُولَد

بِكَ الرّحمنُ قَد بَاهَى وصَلّى
عَليكَ وقَلبُك المِعطاءُ مَعبَد

هُوَيتَك مِن قَبِل ما نُطفة أصبَح
حِزَنـــتِلكُم يَـطَه وإلكُم أفرَح
يفوز اللي مِشَى بنَهجَك ويَربَح

أنا بوَصلَك جَمُر دَلّالي يُبـرَد
حبيـــــبي يا محمد يا مـــحمد

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي