قصيدة مولد للامام السجاد عليه السلام ..

الليله كدامي ..احلى ايامي
مولد السجاد .. احلى ايامي
...............
ماكو اغله من القلب بس هوه اغله
دمعة الشوك التِظٕل بالعين كُحلَه
ان راد يحيي اموات هاي بإيده سهله
حاكم السجاد والله الكون كُلَّه

عاشك احساسي .. هوه بانفاسي
اعشكه واهواه .. هوه أعز ناسي
...............
عندي شوك البلكلب كل نبضه تهواه
احلى شي ربي خلقني وصرت وياه
عمري كله ابلا طعم مايسوه لولاه
الشوك دمعه والجفن يحتضنه يلكاه

نظرته نِعمَه .. الينكره يِعمَه
عِطرَه تَرس الكون .. بكلبي اشتَّمَه
...............
دمعة الليله ابفرح واتطش الكلوب
جم اسم سجلت الزهره اليوم مكتوب
شما حِجَو عني اكِلهُم بشوكه ما توب
واليحبه الله يسجله يمه محبوب

الجنه والبيهه .. وحُور تملِيهه
الخَادِمه ربنه .. كلهه يهديهه
...............
يحرك بكلبي ويُعُصرَه الشوك جَن نار
ظلمه اي جانت حياتي وهو لِنهَار
بكلمه عنده اهواي سهله كلشي يندار
كلشي بالكون ويطيعه ايِكِّل اله صار

بشرعه واحكامه .. جُوده كدامه
مَلِك اعله الناس .. الخير بخيامه
..............
نفرح بهالليله حتى نِنثُر اعيون
هذا امام الشيعه رغم الي مَيرضُون
طِين خلق الشيعه والله بطينه معجون
شيعه كلهه بصك علي كلهم يطبون

الجنه كلهه الهم .. الحور تخدمهم
انهار شتى الوان .. تجري من يمهم
..............
ابو مريم الاسدي ..
4/شباط/2025 ...

قصيدة مولد للامام العباس عليه السلام..

دخنت الدنيه تره العباس اجه
يعني دنياهم بعد ماكو رِجَه
طبهه ابو فاضل .. طبهه ابو فاضل
............
بزوده يتأمر .. ماكو مثله اثنين بالعالم أبد
أبد مايخسر .. هذا ابو حيدره وشرايد بعد

لو زعل بعيونه .. عِمَو ميشوفونه
الموت نفسه الينزل .. منه ماخذ لونه

يعني وبصدره هوى المِيَّت الف
لو سمه بكَدهُم فلا جِفنَه يِرف
طبهه ابو فاضل .. طبهه ابو فاضل
............
الدنيه تتكَدَّر ..لو رِمِش عينه غِضَب نزل غَضَب
ابالك اتصَّوَر.. الجيش كله ايصير لجفوفه حطب
جفه جف الحيدر .. من قِلَعهه الخَيبر
حتى لمن تِهوي .. السَبعه توصل واكثر

الحومه بعيونه مثل حَبَّة تُرُب
الحومه ما تِحمِل اذا جدمه يُطُب
طبهه ابو فاضل .. طبهه ابو فاضل
............
الغيرة تتفجر .. بعين أبو فاضل اذا العين اجدِحَت
الموت يتحضَّر .. كافي بس النظره جم رُكبَه اذبَحَت

ايلمهه كلهه بإيده .. الحومه هَلَّت عيده
والوِصَل يم سيفه .. كلشي لا ميفيده

تموت بيده اكوام مايحسب بعد
ايحارب ولو جان حربه للأبد
طبهه ابو فاضل .. طبهه ابو فاضل
............
الناس تتحجر .. هيه من اتشوفه ايست بالحياة
بشر لو يِظهَر .. هذا عباس وعلى جفوفه الممات

حلوه جَدحَت عينه .. الجيش كالت وينه
جهنم المعروفه .. سيفه بينه وبينه

يعني وَدَّاهم كُبَل لِزمو سِرَه
اسرع من الموت سيفه يشطره
طبهه ابو فاضل .. طبهه ابو فاضل
............
بزوده لو بس مَر..حتى نهر العلكمي منه رِجَف
كباله يتحير .. شلون ابو فاضل اذا السِكنه حِلَف

ايجيبه هوه وعِركَه .. الجيش يَمَّه يسحكه
يشيله بيده سمانه .. حيل بارضه ايدكه

شنو وابالك تره كِلهِن عِدَه
سيفه من يضرب رِعَبهُم بالصَدَى
طبهه ابو فاضل .. طبهه ابو فاضل
............
ابو مريم الاسدي..
1/2/2025 ..

قصيدة مولد للامام الحسين عليه السلام..

احلى صوره بالعين
واحد ما إله اثنين
صيحو هذا الحسين .. صيحو هذا الحسين
..............
اول عشك همسه
لاهل الكِسَه الخمسه
بنبض الكلب لَمسَه .. من عالم الذَر
هناك بعهد ربي
بصمت بعشك حبي
وكل الخلك تربي .. وبروحي أكثر

صحت بعالم اشباح
بيهم روحي ترتاح
عندي ولايه مفتاح .. صيحو هذا الحسين
..............
خَضَّر عشك دمعي
وآنه الوفه بطبعي
يحسين من ضلعي .. جن الكلب طار

هذا عشك يحرك
نبض بحياتي يدك
شمع الفرح يعلك .. خله سِمانه انهار

عشكك صَوَّب اسهام
واكثر بالكلب ضام
عيني الليله متنام .. صيحو هذا الحسين
..............
اوياك من زغري
والبِيَّ بي تدري
بالدم تره تجري .. والله محبتك هاي

يحسين الي دمعه
بليل العشك شمعه
معذور الي ابطبعه .. العطشان وانته الماي

تروي كل الافلاك
هامت حتى الاملاك
كلشي رايد وياك .. صيحو هذا الحسين
..............
كطرة مطر نزلت
بكلب المحب أحيَت
بيهه العشك وَدَّت .. تلاله بالعين

صورة هوى بعيني
مرسومه لحسيني
ياوردة اسنيني .. بيِدَيَّه الاثنين

لمن أدعي بالليل
دنيه تنترس هيل
شوكك يُمرد الحيل .. صيحو هذا الحسين
..............
غَطَّه السمه نورك
حَد الله يم سورك
كلوب التحب دُورَك .. دُور المحبين

نبنيهه ظل تكبر
بحبك فلا تزغر
نورك اذا يظهر .. يمليهه للعين

بيتك بالكلب صار
يهوى والعشك نار
بيه ادموعي تحتار .. صيحو هذا الحسين
..............
ابو مريم الاسدي ..
30/1/2025 ..

على طور (ما اشوف بعيني)لملا باسم لشهادة الزهراء عليها السلام..

وكفو بصف بابك .. ياعلي يكرهونك
اليوم اذا متبايع .. بنية يجتلونك
بكَسِر ضلع الزهره .. طِفَو نور عيونك
...........
هواي ملتمه المصايب .. ابيتك ودنيانه ظلمه
وِحده وِحده
والدهر بَيَّن انيابه .. وعله بيتك ذاب سَمَّه
بكلشي عنده
يوم بيه الصخر يبجي .. شحال لو ايتام يَمَّه
يموت وِدَّه

وانته كلبك تكطر .. بالحزن نبضاته
ليل كلمن فاكد .. جن دهر ساعاته
والشماته اهوايه .. بفرحه ويقهرونك
...............
والله مايسواله درهم .. جدمه يم الباب وكفت
وسفه وسفه
ماله ابو طاهر نحشمه..نكطه من اجبين طاحت
هنا تِشَّفه
رجله باب البيت رُفسَت..جفه ذيج العين سِطرت
بحيل جَفَه

والحطب وج ناره .. طبت عله اعيالك
زينب وخوّانهه .. برعب وسفه كبالك
(امي طاحت بويه) .. بحُركه ويندهونك
...............
دفع حيل الباب حقده..والنفس بالزهره كُوّه
من تِشِّمه
الباب من تعصرهه موته ..الدنيه لمن بيهه تِهوَى
تصير ظلمه
الهوى التِشتَمه أذيه .. الكلب اي عدهه تِجَّوه
ومات حِلمه

كل نفس تشتمه .. بالوداع اتِحسّه
جنهه ابوهه طه .. وألم جن نَفسَه
ياعلي بهل الحاله .. رادو اشوفونك
................
رجعت بجم دوب بابك .. تطحن بصدر الزجيه
هناك طاحت
انته جن روحك انعصرت..اللحظه بيهه شجم منيه
البيهه ماتت
وانته لسه جروح طه .. بكلبك وفكده أذيه
هنا انعادت

من البجي منعوهه .. كالو إتأذينه
تبني بيت احزانك .. باقي أَثَّر بينه
فوكه دمع أُولادك .. بدَمعَك ايزيدونك
................
كل نِفَس سيف ويذبحك.. فراك أم الحسن غالي
وماكو مثله
صوره يابو الحسن وسفه..المجرم الظل ابخيالي
نجس اصله
حرمة الدار انتهكهه ..ويجتل الزهراء تالي
وعنده سهله

راحت اليم ربهه .. ياعلي تشكيله
والي عنه تغضب .. باجر وياويله
توكف وبالمحشر .. يخسر العادونك
................
ابو مريم الاسدي..
14/11/2024 ..

لشهادة مولاتنا فاطمة الزهراء عليها السلام

يمه يمه .. كسرج بصدري احسه
يمه يمه .. والقلب يلزهره نفسه
يمه يمه .. جرح ما فد يوم ينسه
..............
منهو ينسه والدمع ماينسه لحظه
كل جرح هالليله وي ضلعج تِشّضه
الثاني كَسَّر ضلعج ويخسه الميرضه
النِكَر هذا بس جهنم تِبكه حظه

بِيَّ حُركه .. صوت وادم ما نِسِمعه
بِيَّ حُركه .. بذكرج السان وتبلعه
بِيَّ حُركه .. من اشوف اكلوب تِقسه
..............
آه يوم الباب واخباره قليله
هيه لحظات اعله دنيه تظل ثكيله
ياهو يسمع بالخبر ويظلَّه حيله
للكبر عدنه جرح ليله ويه ليله

مانملهه .. دمعة الفاكد جوتنه
مانملهه .. جرح ليل وعودتنه
مانملهه .. كلبي صار لحزني مرسى
..............
مدري هاي الناس لو هالحطب اكثر
ناس بالباب اوكفت وي ناس تفتر
الثاني بيده النار بيهه الحطب وَجّر
مثل هذا اليوم يم الحسن ما مَر

من شِعَلهه .. نار لسه وبينه تلهب
من شعلهه .. اتجَّرَه والعتبتج يِكرب
من شعلهه .. ماطفت يم حسن لِسّه
...............
مثل حَب الرَّحَه بلباب ويطحنج
ما يِكَفِي العَصُر وبرجله يرفسج
الله واكبر بت محمد رد يسطرج
وانتي وي بسمار فَتَّت حتى ضٌلعج

خنكتي صوتج .. خاف يوصل للشماته
خنكتي صوتج .. والاهم حيدر حياته
خنكتي صوتج .. الموت جن اعليج مَسّه
................
بيت احزانج بنوه ونه ويه ونه
جَنّه كلبج وانصب بحزانه جنه
كل حزن بالدنيه ياخذ الا مِنَّه
بعد جتلج صار بهل البيت سُنَّه

كلهه بعدج .. كبار وصغار التِيَتمت
كلهه بعدج .. كلوب ماصَّحَت تِثَلمت
كلهه بعدج .. الدهر خَلَّه بينه درسه
...............
ابو مريم الاسدي ..
31/10/2024 ..

مولاي صاحِبَ الأمرِ
مولاي صاحبَ الأمرِ
...............
ياأجمل صوره في بالي
يبو القاسم جبل عالي
شوصف احساسي ياغالي .. العِشِك اسمه

افكّر وانته بحشايه
ينهر وصافي كل مايه
يذِكرَك احلى الحجايه .. وتظل نِعمه

هاك العهد مني ابد ما نفترك
انته الشجر وانته الورك وانته العِرِك
كلبي تعب من العشك ظل يحترك
ماكو نبض بسمك صُبح لمن يِدِك
...............
قريت ومحله هاي اقره
اسمهه فرحة الزهره
بتسعه اربيع مِنذَكرَه .. عدوهه مات

الك تاج الامامه وياه
يعطر شفافي من ذكراه
نطيتك عهدي ما انساه .. ابد هيهات

بالذر نطيتك هالعهد نبقه سوه
ماريد شمس الله اريدك ياضوه
يااغله من كلشي بعد انته الهوى
عشكك غريب وللكلب عشكك جوه
..............
ياأول شي خلق ربنه
كبل آدم اي شهدنه
بنفس طينتكم خلقنه .. أمر ربي

أنه من الذر بده درسي
عبد لك روحي وبنفسي
لحد ما ينكطع حِسِي .. عشك كلبي

لولا وجودك بالفلك ماظل فلك
ولولا رحمتك واللُطف كلشي هِلَك
كل الخلق ربنه جِعَل كله إلك
مفروض عالجن والبشر حتى المَلَك
...............
ياول عشك أنه اعرفته
صور بخيالي ورسمته
سكنت بكلبي بس انته .. يدك حبك

سِواد الليل بي دمعه
اليحبك يسهر بطبعه
تظل بعيني هالشمعه .. وصُنُع ربك

بيدك شمسنه والكمر تأمر أمُر
فدوه الك ناسي وهلي وكل العمُر
يحرك حرك هذا العشك مثل الجمُر
ندعي يعجل ربنه ما عدنه صبُر
...............
يماي واصفى من صافي
يكلمه اتعطر اشفافي
يإحساس بكلب دافي .. انكتب باسمك

أنه العبد والك دومي
صلاتي انته وي صومي
سكنت بيقظتي ونومي .. وأحس يمك

محله الدرب وانته الدرب وانته الهدف
تحكم الدنيه باجر من ارض النجف
بكل العوالم اسمك المهدي انعرف
كوثر الباري انياله باجر من غرف
...............
ابو مريم الاسدي ..
5/ايلول/2024 ..

مولد لمناسبة تتويج الامام المهدي عليه السلام 9 ربيع الاول ..

ياحبيبي .. سوده هالليله عليّه
ياحبيبي .. باللطم لكسِر ايديه
ياحبيبي .. أرد اواسيهه الزجيه
............
ينعقد هالليله مجلس بي دمعهه
تنعى بس المهدي مولاي السمعهه
تمشي محنيه الك دامي ضلعهه
عيون حمره من سطرته الي طُبَعهه

شلون حاله .. إيد عالضلع وتلزمه
شلون حاله .. ذاك أثر بالايد دَمّه
شلون حاله .. ردت اردود المنيه
.............
لو أكَّسر اضلوع صدري اي قليله
ما أحس بلطمه توجعني وثكيله
ريت اظل ابلا صبح ليله طويله
والفُكَد كَلبه يوادم مايجيله

المن اشكي .. والفُكَدته اهواي غالي
المن اشكي .. دومه ميفارك خيالي
المن اشكي .. اظلمت الدنيه الضويه
.............
المات من شوكه حبيبي اي تعذره
كل نِفَس مولاي صار بصدره جمره
والدمع غَرّك وجنته وعينه حمره
جروح عنده تندفن وياه بكبره

وآنه عبدك .. عينك الماتنسه أحّد
وآنه عبدك .. خادمك للموت إشهد
وآنه عبدك .. دموعي لو تنزل دميه
..............
اليوم سامره دموع كلوب يَمّك
واليحبك يِشعُر وبحساسه هَمّك
شكد سوالف لو جروح ايشيل دمك
وآنه أحس يم الكبر موجوده أُمك

اي بيديهه .. اتسجل ادموع التِنِدبَك
اي بيديهه .. إتأشِر اعيون التحبك
اي بيديهه .. وتعرف اكلوب الهِمِيه
..............
وليخدمك جاب ريحه من طفوفه
عطر جدك من يزوره لو يطوفه
بكربله وبالنجف يمك اي جفوفه
اضيوفك بيوم الزياره هم ضيوفه

لا ميتعب .. والعمر يكضيه خدامه
لا ميتعب .. نياله لليخدم امامه
لا ميتعب .. يِفَّرِح اجداده ونبيه
..............
ابو مريم الاسدي ..
9/ايلول/2024 ..

لشهادة الامام الحسن العسكري عليه السلام على طور ملا باسم (يابو فاضل طيحت ايدك مو وكتهه )

امشي وبالدمع ..بجروح الكلُب
لحسين العشك .. تحتار الكُتُب
مالك كل نفس .. وفراكه صعُب

بعيني ما ابجي بعد اعميهه
فدوه لعيون الكمر اطفيهه
اسمه لجروح الكلب يجويهه
عالشريعه احسين ميت بيهه

ظهري انكسر ظهري انكسر صاح
امن الصدر كلبي أحس طاح
سهم الي صابه بروحي جن لاح
ياريت اموتن يَمَّه وارتاح
.............
امشي وجن مهد .. بالدرب إنصّب
اتصدله ابحزن .. بي تنسه التعب
لَعَّابة طفل .. بعيونه العَتَب

شنو ذنبي جن يكول بهايه
هيه شربه زغيره ردت ابمايه
ليش كالو( لا ) لَيَّه هوايه
السهم جاني هنا يفرض رايه

آنه الرضيع المات مذبوح
ابجف ابوه محمل اجروح
دمي رِمَه صوب السمه يروح
حتى الملائك بالسمه اتنوح
..............
امشي وبالعشك .. وبجفي علَم
وابالي نحر .. ماينشفله دَم
باحساس الكلب .. مَشّاني الجِدَم

اذكر اخيول التهم وبسرعه
حافر يروح وترد اترجعه
بالصدر جم اثر منه وطَبعَه
وجم عظم مهشوم منه اتطلعه

جاله الشمر من حَزّه بكفاه
حز قلب زينب اخته وياه
اتحسهه جبيره صيحت الآه
كل دمعه تنزل بيهه ويلاه
.............
جن وصلت سِمه .. نيران الخيم
ومفازع ركض .. ومخاطف سهم
جم طفل انسحك .. بي يبجي القلم

جم طفل حَد الحوافر داسه
حافر ثكيل اعله صدره وراسه
ولا فِزَع واحد يظل بناسه
يموت كل طفل انجرح بحساسه

احتركت خيم واتطشر شِرار
شايل جمر والباقي من نار
اتجّوت جدم وايدين الزغار
تراب ونِفَس يجوي لأن حار
...............
امشي بدمعتي .. واتذكر السبي
مارحمو ابد .. حتى بت نبي
غصبا كل مشي ..لو حتى حَبي

جم طفل بدموع غمضت عينه
جم طفل ليموت راح احسينه
جم طفل ليصيح عمي وينه
جم طفل بالسوط تدمي ايدينه

زينب كلبهه من الصبر ذاب
وبيبان ضيم وتسد يا باب
للموت عدهه الجرح ماطاب
حتى الكلب من الحزن شاب
...............
ابو مريم الاسدي ..
16/ آب/2024 ..