🖊️**КЎНГАНДАЙМАН...

Сингандайман... тўғри, андак сингандайман,
Довул эдим, бугун бироз тингандайман,
Худойимдан қўрқиб, бандасидан ҳуркиб,
Кўнгандайман, барига жим кўнгандайман...

Бошга ёққан дўлми, қорми Художоним,
Жони қаттиқ гуноҳкорми Художоним,
Юмшоқ тупроқларинг борми, Художоним,
Мен энг қаттиқ ерларингда унгандайман.

Тополмайман, бахтим мендан писингандан,
Бўйим чўкди, елкаларим қисингандан,
Ҳамма илиқ баҳорларда исинганда,
Мен  қаҳрли совуқларда тўнгандайман.

Кул бўлишин билиб олов кўкка ўрлар,
Қолдимикан яна олов бўлар қўрлар,
Шундоқ синармикан ўзи ҳамма зўрлар,
Олов эдим...сўнгандайман, сўнгандайман.

Нени дорга илсам, барин тенг илдим мен,
Бор бахтим деб бир бахтимга тенгилдим мен,
Гарчи кеча ғанимларга енгилдим мен,
Лекин бугун ўз-ўзимни енггандайман!

Мен барига қўл силтаб, кўз юмгандайман.
Ҳаммасини юрагимга кўмгандайман,
Кўнгандайман.

✍️Гулжамол Асқарова**https://t.me/SHohiraHamro

✍🏼 БУГУН ТУНДА , КЕЛАРМИШ БАХОР…

Деразангдан мўралаб аста,
Гул юзингдан бўлиб шикаста,
Узун қишга силтаб қўлини,
Ҳам қалбингдан бошлаб йўлини,
Тўққиз ойки, елармиш баҳор,
Бугун тунда келармиш баҳор...

Қору музни сувга ғарқ қилиб,
Изғиринни буткул тарк қилиб,
Эшитгандек менинг ноламни,
Гулдастага ўраб оламни –
Тушда бошинг силармиш баҳор,
Бугун тунда келармиш баҳор...

Гўзалликни элтиб жаҳонга,
Сано айтиб ҳар ўтган онга,
Жамолингга бўлиб маҳлиё,
Истарангдан олганча зиё-
Бизга иқбол тилармиш баҳор,
Бугун тунда келармиш баҳор...

Унутилар ҳазонрез кузак,
Табассуминг юзингга безак.
Меҳрларинг менга оғдириб,
Ёмғирларин ерга ёғдириб,
Сувларини элармиш баҳор,
Бугун тунда келармиш баҳор...

Ҳиссиётга тўлдириб дилни,
Кенгайтириб кичик кўнгилни,
Дуоларга ижобат етиб,
Табиатни чаманзор этиб,
Бахтимиздек кулармиш баҳор,
Бугун тунда келармиш баҳор...

✍🏼Масъуд Махсудов.

https://t.me/SHohiraHamro

?️БАХТ

"Сукунатнинг тилида гапир"* –
Суҳбатингдан ҳеч ким безмаса.
Яхшиликлар қилсанг кимгадир –
сен қувонсанг, ҳеч ким сезмаса.

Ортиқчалик қилмаса тананг,
Яшайверсанг тобора улкан.
Ҳар қадамда туғилсанг яна,
Супурилиб кетмаса кўлканг.

Севги билан чиқишаолсанг,
Юрагингда ловулласа ўт.
Ва бир куни жи-и-и-мгина ўлсанг...
Яшнаб кетса ўшанда тобут.

✍?Зоир Алим

?️***
Оловли йилни кечдим, оловли,
Ишқорли ишқни ичдим, ишқорли.
Шивирлайди бир нигоҳ эркалаб:
"Виқорли бўлинг, хоним, виқорли".

Саволли қарайдирман, саволли,
Ҳар неки янги бўлса – заволли.
Сув каби тинди руҳим–эркталаб,
Виқорли бўлинг, хоним, виқорли.

Деворли бошим маним, деворли,
Ғуборли кўзлар қарар, ғуборли,
Анжуман ичинда хилват қалб,
Виқорли бўлинг, хоним, виқорли.

Шоқолли тўда кўп, шоқолли,
Аларга назарим уволли,
Шерликнинг юки бор шул сабаб,
Виқорли бўлинг, хоним, виқорли.

✍️МеҳрНоз

Биласизми, одамлар нима учун ҳаётидаги хурсандчилик, қувончли воқеаларни тез эсдан чиқариб, кўрган ёмонликларини эслаб юришади.Чунки, хурсандчилик қалбда чандиқ қолдирмайди...

?️**Она тилим

Гарчи зуғум қилганларни ёқтирмадим,
Шеър ёздиму бўлак ишни қотирмадим.
Тилим туриб ўз тилимда гапирмадим,
Бир эсласам эзилади бағри-дилим,
Она тилим, кечир мени, она тилим.

Онам «эркам» деб қучганда тунлар ярим,
Эрким йўқ деб зирқирарди бир жойларим,
Паровозни ҳансиратган буғдойларим,
Олтинларим, маъданларим, ипакларим,
Она тилим, кечир мени, она тилим.

Кимлар учун биз эдик бир бадавийлар,
Ўзбекни қон қақшатганни ўзбек сийлар,
Ҳолимизни қон кузатди Яссавийлар,
Топганимиз ҳандалакдек тилим-тилим,
Она тилим, кечир мени, она тилим.

Кимдир майда миллат бўлди, кимдир катта,
Катта миллат — Афандиси йўкдир ҳатто,
Биз пиёда, биз боққанлар юрди отда,
Зулм ўтса фақат сендан ўтди зулм,
Она тилим, кечир мени, она тилим.

Сен бўлмасанг нима бизга силлик шеърлар,
Бу дунёда тили йўкда дил йўқ дерлар,
Баҳоинг-ку бериб кетган Алишерлар,
Юрагимнинг тўридаги сўлмас гулим,
Она тилим, кечир мени, она тилим.

Бир қарасам ҳар шевангда минг жилолар
Ҳар новдангда, ҳар мевангда минг жилолар.
Қодирийлар, Чўлпонлар-у, Абдуллолар,
Сенинг қайтган кунинг мен туғилган йилим,
Она тилим, эй муқаддас Она тилим.

Мухаммад Юсуф**https://t.me/SHohiraHamro