الفلسفة : عندكم بزاف أساتذة في يوتيوب، انا قريت على أستاذ هواري و أحيانا من عند الاستاذ خليل سعيداني و عادل مڤرود ( كنت نخلط شوية ) ?
الكتب : كتاب هبة جبابرية و كتاب الهدى في الفلسفة و المقالات اللي يحطهم عقبة بن نافع ما شاء الله ❤️ بزايد عليكم ??❤️

الاجتماعيات تعبتني صح صح ? لازملكم تفهمو مليح و تلخصو و تلخصو و تلخصوو كلش لخصوه و ما تحفظوش كلش كيما راه ? المهم نكملو المراجع ❤️??
-
علوم إسلامية : الأستاذة بوسعادي ! قناتها ما شاء الله ? فيها كلش كلش حتى الاسئلة تاع الطلبة كانت تجمعهم في فيديو و تجاوب عليهم، بلا ما ننسى كتابها السلسلة الارجوانية ( حفظت منو هو المصدر الأول و الوحيد ??? ) فيه كلش ما تحتاجو والو من بعدو و اذا حبيتو كاش ما تطبيقات ولا زيدو شوفو السلسة الخضراء تاعها ✅ و الباكالوريات ?✨ ( مام إسلامية و حليت فيها باكالوريات ?راني نقولكم ما خليتش ??? )
تقدرو تبعو الأستاذ سعدون و شمس الدين تاني ?

نكملو المراجع تاع المجموعة الثالثة ?
-
الاجتماعيات : عندكم الاستاذ بورنان راح يساعدكم بزاف بزاف و راح يمدلكم كلش فيما يخص المادة ✨ حرفيًا ما يبخل عليكم بوالو في اليوتيوب و قناته تاع التلغرام فيها ملفات مفيدة بزاف و اللي فادتني في نهاية السنة ✅ انا اعتمدت على قناته في اليوتيوب و الانستا تاعو و التلغرام تاني + ملفاته و كتاب السلسلة الأرجوانية اللي استغنيت عن الكراس تاع القسم كي شريته ( ما وليتش نكتب الدروس تاع القسم ? ) وليت نحضر فالقسم و نفهم من عند الأستاذة تاعنا و كي نحب نراجع الدروس تاعي ندير اليوتيوب و نحكم الكتاب تاعو و نحفظ منه + ملفاته نأكد عليهم ? مفيدين بزاف و يختصرو عليكم الوقت و مختصرين + بعض الخرائط الذهنية اللي كان يحطهم
عندكم تاني الاستاذ أمين عنده اسلوب هايل في الشرح يبقالكم في مخكم من بعد و تفهمو عليه صح صح ✅?? طريقة تاعو كانت تعجبني و يسيي يفهمكم حاجات مشتركة و يمدلكم عفايس تسهل عليكم الحفظ + كاين استاذ اكتشفته في نهاية السنة و عاونني تاني في المراجعة و هو الاستاذ عبد النور خليفي ( اعتقد ) كان يحط كلش مختصر خاصة المصطلحات اللي حصلت معاهم ألى آخر ليلة قبل الباك ?
كتب الاستاذ محمودي عادل هايلين بصح ما قريتش منهم، في نهاية السنة قريت شوية من تاع المراجعة الذكية هداك لي فيه خرائط ذهنية برك ? و مشي بزاف درس واحد برك ?

نصيحتي ليكم ما تكثروش المراجع بزاف ? و ما تبقاوش تتنقلو من واحد لواحد، بالنسبة للكتب الخارجية اقراو من كتاب كي تكملوه روحو للي وراه، و الاساتذة، اقراو عند استاذ واحد ولا زوج العام كامل ما تبقاوش من هذا لهذا باسك ما راح تقبضو والو ??? راني قلت لكم !!
و مشقاش تروحو تبعولي أشباه الاساتذة اللي ما عندهم حتى علاقة بالمادة ? ولو يبانولكم بلي يوصلو الفكرة ما تغلطوش و تقراو عندهم ?
سيرتو العلوم و الفيزياء ? اقراو عنذ استاذ يستاهل تمدولو وقتكم و ثقتكم ✅??

المجموعة الثانية 2️⃣ : مواد اللغات
اللغة العربية :
الاساتذة : الاستاذ حيقون أسامة + الاستاذ خالد حماش ? بصح الاستاذ حيقون يفصل اكثر و من الافضل تقراو عنده من بداية السنة باش توالفو ? مشي كيما حالتي قريت عنده حتى مارس ?
-
الكتب الخارجية : المراجعة النهائية للأستاذ حيقون + ملخص الأدب للأستاذ خالد حماش ? و الأفضل هو المراجعة النهائية ✅
-
زيدو الباكالوريات برك ✅?
اللغة الإنجليزية :
الأساتذة : الأستاذ ناصري ✅ و الأستاذة خيار ?
الكتب : السلسلة الفضية + المراجعة النهائية ( راح تلقاوهم فالدرايف ) فيهم الدروس و الكلمات و بعض المواضيع
+ باكالوريات الشعب العلمية ?
اللغة الفرنسية :
الأساتذة : الاستاذة سالي ?? حرفيا مهما حوست على أستاذة مليحة و تمدلي طرق باش نجاوب صح ما لقيتش من غيرها، مام طريقة تاعها هايلة و توصللكم الفكرة و تمدلكم des astuces ??
الكتب : كتاب الأستاذ منصوري، كتاب الأستاذ شبوة ??
+ باكالوريات الشعب العلمية ??

الرياضيات ? :
الأساتذة : الاستاذ نور الدين ❤️ قريت عليه كل المحاور و حليت التمارين تاعو و سلسلة دير لاباز ✅❤️ كنت نحبها و تعجبني و نحسو حط الفيديو في الوقت المناسب ? قريت عليه + أحيانا كنت نشوف عند الاستاذ عبد الباسط ❤️ مشي بزاف، فالمتتاليات برك ?? + prince math قريت عليه فالمراجعة النهائية ✅? و الصراحة انها فادتني بزاف ❤️
-
الكتب : تقريبًا ما استعملت حتى كتاب ?
-
السلاسل : سلاسل الاستاذ مصطفاي + سلاسل تمارين عقبة بن نافع ? كنت اي تمرين نلقاه عند الأستاذ نور الدين ولا عبد الباسط ولا اي تمرين فيه افكار نحله و تلقاو المواضيع فالدرايف تاعي

الفيزياء 🧪 :
الأساتذة : الأستاذ محمد الامين زدون ❤️ مهما هدرت و مهما فضلت مش راح نوفيه حقه 😭 تبعته في يوتيوب و انستاا 💕 كنت نشوف لي فيديو تاعو بالتفصيل الممل و نكتب معاه الدرس و التمارين و نحل ( ما شريتش الوثائق ) و هو يفصل بزاف فالدروس و يمدلكم كلش و كان يحط افكار التمارين تاع ليباك و الاسئلة النظرية، و الحاجة اللي تعجبني فيه هي التنظيم 🥹 كلش منظم ما شاء الله تبارك الله ولا غلطة 😌❤️ شغل نتحمس باش نقرا عنده و يعجبني التنظيم و الترتيب اللي يخدم بيه، مام الطريقة اللي يقري بيها هايلة و توصل الفكرة مهما كانت درجة صعوبة تاعها ✅ في نهاية السنة قريت على المراجعة النهائية تاعو ❤️ و كانت مميزة بمعنى الكلمة، ملخصات الوحدات، و افكار التمارين الصعبة موزعة على عشر مواضيع ❤️✅
ممكن تتبعو تاني الاستاذ شعلال سيد أحمد ( كنت نتبع نصائح تاعو و الجانب النفسي فادني فيه بزاف )
-
ملاحظة : أستاذة تاعي في القسم كانت هايلة و أفضل وحدة فالولاية على هكا نقصت على روحي المراجع من اليوتيوب 🥰
-
الكتب : تأشيرة النجاح 💕 كل الأجزاء ✅ فيهم ملخص الوحدة و تمارين متنوعة و شاملة ليها من الأسهل إلى الأصعب ❤️🤌🏻 و تاني كتاب المغني ( ما حليتش منه كلش )
ما شريت حتى واحد فيهم في زوج pdf 😂❤️
-
سلاسل التمارين : تمارين الاستاذ قزوري 🤍 صعبة نوعًا ما بصح حليت منهم ✅🫶🏻 و زيد تاني تمارين لي في صفحة عقبة بن نافع 💕💕 كامل هايلين و فيهم افكار شابة، تمارين الاستاذ زدون، و تمارين الاستاذ شعلال 🤌🏻❤️

من غير هذو المراجع ما تزيدوش و ما تحوسوش لأنو راح تشتتوا رواحكم و ما تحكموا والو ❌ انا اعتمدت عليهم بالإضافة الى استاذي في القسم فقط ❤️✅

هذو هوما المراجع اللي اعتمدت عليهم بالنسبة للعلوم الطبيعية، الاستاذ ياسين ربيع ممكن تقراو عنده بصح شخصياً ما قريت عنده والو ( غير التركيب الضوئي ☘️? ) و خلاص ✅
ننصحكم ما تقراوش عند اي استاذ او شبه أستاذ، قراو عند كتفي شريف زينة او خيرة فليتي او الاستاذ طلحي رحمان فقط ❤️ و ارشح لكم الاستاذة كتفي ✅??❤️

الباكالوريات حليت تاع شعبة العلوم التجريبية و مام تاع شعبة الرياضيات ✅ و كانو من 2019 و 2020 و 2021 فقط ❌ استاذة كتفي كانت تحل دي فوا باكالوريات قديمة و انا كنت نحلهم معها و نسمع واش تقول و واش تهدر، ما كنتش نروح نحلهم وحدي ?