**مولاتي سكِينة روحي فداها

أنا دمعة ونحيب .. أنا بنت الغريب ..دمعاتي تشرح هضمي
عمري خلّص شجون ..اشگد مِحن بالعيون... منهن تغير رسمي

بريعان عمري اتراكضت
..صوب البراري .. شيطفي ناري ...آه

مجروحة كل عمري عشت
بدمع انكساري ...ليلي ونهاري ....آه

بهايه عيني ..شفت أغلى انسان عندي امسلبينه
بهايه عيني ..شفت فوگ النوگ مشوها الحنينة
كلـي غربة .... ما عشت مثل البنات ابسد اهلهن
بهاية عيني...احسين أبوي اعله الرمح تبچيلي عينه

آه...أنا التي سُبِيَت .. آه...أنا التي سُبِيَت ..
••••••••••••••••••••••••
يا فرات العذاب ...چم گمر منه غاب...وچم غالي خليته ايون
ماتت أمـي الرباب...گبلي بعد المصاب...وگلبي الهله صار يحن

ما أدري اعلينـه تشــح
ونبقى بعطشنه.....وتاخـذ گمرنه ...آه

اشما اشرب الماي انجرح
يا ظامـي اذكره ؟!.... تخنگـني عبرة ..آه

بگلبـي لوعة .... اشما اشوف الماي تنزل دمعة دمعة
بگلبـي لوعة .... بذني صوت البلمهد يصرخ اسمعه
مات ظامــي .... واحنـه النـه الماي.. الله امنزله النه
بگلبـي لوعة ......اليا ورد عطشان دمع اعيوني اوزعه
••••••••••••••••••••••••
ما نسيت الرحيـل..انسه لا مستحيل ...وذاك السبي وأحزاني
بصفنة اصير و ذُهول ..بحبل امشي أگول ؟..وانا استحي امن اخواني

الناس السبونه بلا رحم ..
لا ما رعونـه .... اشگد عذبونه. ..آه

أيتام ، مرعوبة و حـرم
مذبوح ابونه .... نبچي امنعونه ..آه

نبچــي سكتـة .... حته ما يسمعنا واحـد ما له رحمة
نبچي سكتـة ....... وصوت رايح عمه لا تبچون عمّـه
هايـه عمتــي ...... المنها راح الحيـل ، وتباري اليتمة
نبچـي سكتــة ......العل رمح بگلوبنـه وگوة نكلمـه
••••••••••••••••••••••
أرد أغمض العيون... وصارت اعله الجفون ..زحمة محن : خيمة وتل
والخرابـة وحبال ... وصرخة بويه تعال .. اعليك الله لا لا ترحل

المن اظل وكل هلــي..
راحوا سوية .....حتى رقية ...آه

الما عدها بالوادم ولي
تمشي سبية ..ولا موش إليه... إليه

هايه آخر ...لحظة وعيوني التصب يطفي ضوها
هايه آخر ....لحظة الي والروح تتلاگه ابمناها
عمري غربة ...ابلا حُسين الدنيا بعيونه غريبة
هايه آخر .... كلمة راح احجيها واتلوه بصداها

آه...أنا التي سُبِيَت .. آه...أنا التي سُبِيَت ..

اللّٰهم بِآمنة الحُسينِ وأحزانها عجل لوليكَ الفَرج .

قاسم المالكي**#اللهم_عجل_لوليك_الفرج

#فزاعيات#شهادة **مولانا الحسن العسكري صلوات الله عليه

ياروحي التحن عالحسن ومصابه
عدنه دموع كـون أطيح يـم بابه
اليوم المهدي يبچي وشاد أنگابه

المهدي يريد واحد   .. بالبچي أيعينه
كون من الصبح لليل ماتنشف بواچينه

الله يعين گلبه الينكسر ظهره
وياكسر الگلب ماواحد يجبره
رد من كربله أتوجه السامره

حال المهدي هذا...   ودمعته بعينه
كون من الصبح لليل ماتنشف بواچينه

لا وحدة ونگول تهون سالفته
وهوة بكربلة مذبوحه طايفته
بالله شلونه حاله التنسبي عمته

خلي نذب عگلنه  ...وكل چفافينه
كون من الصبح لليل ماتنشف بواچينه

العندة أدلال خل يچفيهن أدلاله
وخل طاري السبايا دوم يبراله
المهدي من المصيبه شصاير بحاله

چا ليش الدهر .. مايرحم أسنينه
كون من الصبح لليل ماتنشف بواچينه

المصايب عذبنّه ولوعن روحه
لايشفن ولا ينعدن أجروحه
نوح الفاگده خنشاركه بنوحه

ونين الثكلى ون..   خنشارك أونينه
كون من الصبح لليل ماتنشف بواچينه

تسعر بالگلب ماتنطفي ناره
يطلب ثار لازم ياخذ بثاره
العلم يمته يرف ويسله بتاره

ويلي دموع حمرة ...  يبچي مهدينه
كون من الصبح لليل  ماتنشف بواچينه

✍️حسين حمدان الدلفي**#اللهم_عجل_لوليك_الفرج

*?*رجوع ضعن الامام الحسين علية السلام الى المدينة..

تمنيت كون اتعطلينه
ولانوصل لباب المدينه
ياهو ايتلگاها الضعينه
وجيت بضعن هايم..

خاف أنشد بخواني حيره
چا وينه سيدها العشيره
اوين الكفل ضعن الاميره
ينشدون اهل هاشم..

ما چن هل الضعن لحسين وين اخوانه واولاده
وبخت السادة بيها شصار النشد عن عمة الساده
وعاده القتله لو گالوا بس السبي مو عاده

بكل نشده بيه الجروح اكثر تزيد
معقوله مسبية بنت الاجاويد
وهل عاودت من غير اهلها

شحجي وشرد وآنه ما املك اجواب
اليسئلني عن الكفلني وعلي انصاب
چاوينه عباس الكفلها

عاودينه يهلنه واجينه..والضعينه لفت للمدينه
____

ارجع وطب ابيوت اهلنه
ولا بيها گطره امن المحنه
لا چنها هاي الدور النه
المابيها خواني..

متفطره بيها الحياطين
چن گلبي هم كاتلها الونين
عگب التركها ورحل لاوين
ومنضرها اذاني..

مابيها دفوّ امن حسين وضلمه دور اهالينه
وفارگها الامان وراح عگب عم ضعني وسكينه
وصرت ادعي الله چف اخوان لو ساعه يرد لينه

صرت ادعي الله يرد ليه الحسين
ويشوف حال البقو بفراگه ميتين
بحي الهواشم صرنه غربه

يخنگني صاير بعد عينه الدار
بكل ذكرة التمر علي انجوي بنار
نار الفراگ هواي صعبه

يله موتي يروحي الحنيه..والضعينه لفت للمدينه
_

خلاف اخوتي تمنيت موتي
المن اعيش ابلا اخوتي
ياهو البعد يسمع نخوتي
ذاك الزمن وينه..

محمد اجه وماعرف اخته
ولمن عرف لونه خطفته
شافاني بس گلبة كسرته
وسولف دمع عينه..

ابتشر گلبي اخو عندي وهضمني أشر عليه
هاي الحرمه كال منين اخوي ويشتبه بيه
ومن گالوله زينب هاي طاح وگال مو هيه

اختك إنه وخويه نادي عليه
هل چلمه فوگ النهر حيف رميه
مشتاگه حيل اسمعها منك

من ماتت الخويه صرنه سبايه
لا ضلت اخيام ولا عدنا راية
وهل صار هذا كله بختك

لا اخو الضل بعد ويحمينه..والضعينه لفت للمدينه
____

وين اليعاوني ابمصابي
ويشارك اجروحي وعذابي
وأم البنين ايتاني بابي
تنعى مصيبتنا

حملي انچفه وبلكت تشيله
وتبچيهن ادموع الثجيله
وتتگابل اويانه العليلة
دمعه اعله دمعتنا

اول ماحچت عباس گالت وفه الخوه
ونزفت عيني دم مو ماي يمن دمعاتي اله تسوه
كلتلها يأم عباس راح الطيب النخوه

وين المثل خوته الگه بعد وين
راح وكسر كل ضهر بينه نصين
وضعنا وحبل گيد ادينه

طاح وبعد ما بقت النه اخيام
ومات الحسين وخذونه اسره للشام
ورديت هم زين بَسكينه

وانتهت يمه رحلة سبينه..والضعينه لفت للمدينه
__

حسين سعد البهادلي**#اللهم_عجل_لوليك_الفرج

**اسف.   منك مولاي.    اسف
خايف. انه على زعلك. خايف

فان طرتني بمن الوذ
وان رددتني بمن اعوذ
يا ابوعلي

اخذني العالمك مولاي بدونك دنيتي ذله
العمر يا ابو علي ابلياك مدري شلونه مايحله
وحركني الحرك مريود على الي صعدت التله
الزمن يحسين خله ام  عون اسيره  وتركب الهزله
____
نادم اي وعيونك نادم
خادم خاف اطلع مو خادم

فمن جنايتي  وأسفاه
ومنَ فضيحتي وا لهفاه
يا ابو علي

انه خايف يجي يوم واضيع وما تدليني
وخاف اسمع مصايبكم وما يجري دمع  عيني
كلشي ولا اضعينك واضل محتار بسنيني
الدرب يا ابو علي عثرات عليك الزهره دليني
____
جايك عايف كلشي وجايك
رايك مشيني على رايك

ضلل ذنوبي برحمتك
واستر عيوبي برأفتك

يا ابو علي
مدري شلونها الدنيا وخنفله على عيونك.
لو ما ابجي الك جا مات كلبي وداعت اضعونك
امده الماي الي ماضكه  يبدونه ويعطشونك
شمسويلهم يحسين وبلحافر يسحكونك
____
گلبي هنا يالماخذ كلبي
حبي ارجوك اقبل حبي

انت غياثي في كربتي
انت نجاتي في وحشتي
يا ابو علي

اذا مو انت تصفحلي ياهو اليغفر ذنوبي
وانه اعيوب شكثر بيه ومنو اليستر على عيوبي
منو غيرك الي محبوب وعلي بس انت محبوبي
انه ثوبي دمعتي اعليك وهاي الدنيا مو ثوبي
قاسم الغزالي**#اللهم_عجل_لوليك_الفرج

**يامن هداني حبه بيده رسم مسيري
بكلبي صدح حنانه وحزنه قبل ضميري
كلمن اله أميره واني الحسين أميري

حزني ابد مو موسمي .. بل دائمي نكساري
ماخذ عهد كلبي اله .. طف كربله خياري
ماله ابد موضع بدل .. جرحك يضل قراري

خيامك نجاتي
وقبلة دموعي .. الها خضوعي
بيها احصل رضاك حسين

ايامي كلها
‏ لوعه ومصيبه .. ادفع ضريبة
حبك يضامي وهواك حسين

شايل عقيده جرحي وبهل العقيده أواضب
بحب خدمتك يضامي وعن دمعتي احارب
اجمل مدينه حبك بحبلك وصالي ذايب

حب جون علمني الادب .. هوه سبب خدمتك
طاعة جروحك واجبي .. كلي انسبي بغربتك
مو قصة دموع وتصب .. تدور كلب نصرتك

دلالي مجوي
بنار الرزيه .. والغاضريه
سوت خيامك جمر حسين

مايكفي عمري
لحسرة ضعونك .. غربة عيونك
لوحدها هيه عمر حسين

اني أقل حبيبي من نتمائي لاسمك
هذا رزق حنينك خلاني اون واخدمك
وصار الحلم اموتن وراسي يوسده حضنك

اني الفقير الي غنه .. بحب كربله وعطائك
كلبي بقيودك ورتجي .. يبن الوصي لقائك
وبخدمتك ما انغلب .. يزودني حب بلائك

يامن تكفل
كلبي بضياعه .. من الرضاعه
ولهسه بيده الكلب حسين

باصعب وقت
ماضيعني جفك ..ادبني عطفك
بس لغرامك تصب حسين

اغصبني عن محبتك لو عني تبقى اضيعك
وصلني حاله حبك بلا دم ارسمه درعك
من تخلص الزياره مالي كلب اودعك

عني يعز بعدك جرح .. يل مايصح مثيلك
على دنيا كايله العفى .. كلبي اكتفى بقليلك
بدلالي أشد من آلام .. مثل سهم جميلك

السيافه حاطت
داير جمالك .. محد بقالك
يا حسرتك تلفت حسين

فكرك تطشر
للخيمه ترجع .. للحومه تطلع
بكل المعاني متت حسين

بيه نزرع عذابك يبقى هويتي حبك
شاف شكثر متاعب ما حسساني كلبك
شوفني بس جماله ما شوفاني جرحك

لحساسه يبجي اعله الضعن .. من كل وطن يهاجر
يعيش السبي بكل مهجته .. تهز دمعته المشاعر
الغيره توجهه عل السبي .. واعله العبي يناصر

يا كلبي موت
انته الي توده .. علتربه خده
يدور برودوة ترب حسين

بلغربه عيش
وافهم نصيبك .. ضامي حبيبك
ولوحده بلحرب حسين

اللهم عجل لوليك الفرج
مصطفى سلمان**#اللهم_عجل_لوليك_الفرج

#تراث#نعي مفجع ?**

رجوع الركب من الشام الى كربلاء وحال الفاطميات

. على قبر الحسين (روحي فداه) :

هوت عالگبر و المدمع تهله
او تسولفله ابفجع زجر او خوله
لفينه امن اليسر ليكم تـگله
گوم انصب لعيالک امخيم

سدرنه امن اليسر للغاضريه
يخويه اضيوف عندک هالمسيه ?
يبو السجاد اجیناک ابشچیه
لبونه ایـزيد بالديوان شـتم

يخويه هاي ما چانت على البال
اطب المجلسه او بزنودي الحبال
راسک بالطشت و تشوفه العـيال
بيده العود و يوسم المبسم

صاحت يلحرم گومن امشنه
لعد اللي تچفلنه امن اهلنه
نریده ایگوم و يردنه الوطنه
او مثل ما جابنه بينه ايتوزم

.على قبر العباس (روحي فداه) :

زينب و الحرم كلهن تعنن
الشاطي العلگمی او عالگبر گعدن
گامن ونة الثكله يونن
او حمام الدوح من عدهن تعلم

يبو فاضل تصیح ابگلب مالوم
لفينه امن اليسر يم گبرك اليوم
شسولفلك يخويه اشسووا الگوم
اعادي و العدو هـيهات يرحم

یخویه اگعد يراعي العلم و الجود
او شوف امتونه امن اسياطهم سود
وشوف امن الحبال اشحال الازنود
بگت لليوم مـنها ينضح الدم

يخويه اگعد آوردنه الوطن جدنه
حرم و ایتام مانسدر وحدنه
اشنگله لليجي او عنک نشدنه
ابو فاضل على الشاطي تخذم

.على قبر علي الاكبر (روحي فداه):

گامن من ابو فاضل للاكبر
دارن عالگبر و النوح گبر
تگله امه او گلبها ابنار يسعر
ما تگعد يبعد الخال و العم

يبني امن اليسر ليكم لفينه
دگوم اوشوفنه ابيا حال اجينه
تريد اظعونه اترد للمدينه
يلكبر گوم للمشـه تولم

.على قبر القاسم بن الحسن (روحي فداهم) :

او عجن بالبچه اعليه الفواطم
گامن من علي الاكبر الجاسم
تگله امـه ينور العين نايم
هظيمه اعلى الولد لو ذلة الام

يجاسم يسر بالشامات چنه
اولیک امن اليسر عود ظعنه
نريد انروح يوليدي الوطنه
او تبارینه نریدک یلمشيم

.ام الرضيع (روحي فداهم)

لفت تبچي الرباب الزين العباد
تگله ويـن گبر ابني يسجاد
ورم صدري على ابني و الوجع زاد
او گلبي من كثر صبري تورم

ارید اگعد عـلى گبره و انوحه
و بفيض الدموع اغسل اجروحه
بـلچن لو سمعني اتعود روحه
او يعود الفرح ليه او يذهب الهم

الشاعر المرحوم
السيد عبد الحسين الشرع**#اللهم_عجل_لوليك_الفرج

**رديت بهضم كلبي .. اجيتك يابو المروه
خويه انفض ترابك جيت وفتح عينك الحلوه
اريد اتشوفني بلياك .. شلون اعليك اتلوه
وحكك غيراني الشوك .. حنيت لحجي الخوه

لون تدري شكد بجيت
خويه لاكيني اجيت

..............

وحك العشره تعبانه .. وماعندي بعد طاكه
هاي الغربه ما تكضي اله وياك اتلاكه
مو مالت ارد للبيت وانه هواي مشتاكه
مالت انعه حد الموت هيج الفركه حراكه

يحفر بضلعي السكوت
خويه يمك ارد اموت
...............

لنعيلك واهد الحيل وابجي اعليك يلضامي
محنيه واجر حسرات واحن بحركه ليامي
جنت شما ادير العين خويه الكاك كدامي
دنيا وهسه ما اشوفك اله حسين بحلامي

تدري بيه بلا هواك
حسين اتعذب وراك

..............

بعبايه متربه وثكله ومهدولة متن جيتك
بكد جروحك البيه خويه حسين حاجيتك
وين الملكه ذاك الحار تكوم شكد تمنيتك
جا المن يدك كلبي وانته الهيمه غاطيتك

المن يدك الكلب
وانته غاطيك الترب
.................

اللهم عجل لوليك الفرج
مصطفى سلمان** #اللهم_عجل_لوليك_الفرج

**زينب رســـالة عبــــر العــصور
وكل المـــواجع بـــين السـطور
مايهده جـــرحه اليفهـمهه زين
واعليهه تبـــقى حرّى الصـدور

عيش ابخيــالك   خلهه اعله بالك
واتصور اشگد مــر بـيهه ضيم
عبرت مــــراحل   حزن الثــواكل
وصار الدمع فوگ الوجنه غيم

تكـتم دمعـــهه اتهـــيج العــيون
ياويلي زينـــب ماعـــدهه عون
بالحـــومه مــوت وبالخـيمه نار
وياهي التعدي ويـــاهي التهون

°°°°°°°°°°°°°°°°°°°°°°°°°°°

كل المــــشاهد بالطـــــف عذاب
تعبر مصــــاب ايعثــــرك مصاب
وابكل مصـــــيبه زينـــب لگيت
عاشت مشــــاعر حــــته الرباب

اخت الهـــواشم   وام الفـــــــواطم
زينب حنيـــنه وهظـــموها حيل
اتعاين لهــــــلهه   ويگـلب شكــلهه
كلما تشوف اعله ابن امهه خيل

ماينسمع صـــوت ام العــــــفاف
ولامن اخـــوها بالبيـــــهه شاف
جوه الحـــــوافر يومـــــي بديه
اخر نفس بــــــس اعليهه خاف

°°°°°°°°°°°°°°°°°°°°°°°°°°°

عانت مصـايب مــن كل جهات
عاشـــت ظهر عاشــر نايبـــات
طاح الحسـين وطاحـت خيام
تفــــزع لخـوها لـــــــو للبــنات

كلهـــــن عليــهه    وطفــــله ابأديهه
چانت رقــــيه والـــــدنيا نـــــار
احترگت خيمهه    حيره اشيـــلمهه
طشـــــت بنات بــــــــذاك النهار

تحـــــمي ابــــرقيه اتيهـ النساء
اتلم الزغـــــار ايـــــــــزيد العناء
تلگــه المخــــيم صــــــاير رماد
حرمـــــه وعليــــهه كــل كربلاء

°°°°°°°°°°°°°°°°°°°°°°°°°°°

قبـــــل الدلال وبعــــــد الدلال
كلشي اختلف من حال ولحال
ضعن الله شاف ابــطف كربلاء
اغرب مـــواقف واكــثر سؤال

السمـعو قيامه    وعرفـــو مقامه
هذا الحســين وفــــزعه يريد
بنسوانه حاير    تعـــمه بصــــائر
المحد وگفله بيـــــوم الوعيد

بين الســـيوف وذيــــچ الرمـاح
حسين انكسر مــن عباسه طاح
واكثر هــــظم كاســــــرله گـفاه
چــف اليذبحه لخـــــــيامه راح

°°°°°°°°°°°°°°°°°°°°°°°°°°°

الماعدهه خيمه تغفى اعله گاع
وحسـره ابگلبهه ماصـــح وداع
وتريــــد اهـلهه گبـــــل الغروب
لو حـــل ضلام ايحـــل الضياع

وين الحــــدوها    من بيــــت ابوها
لحگـــوها باچر زيـــــنب تشيل
الليله الاخـــيره    وتطـــــلع اسيره
ومو ناگه عدله ابهــزله الرحيل

باچر تــــروح ابهـــودج غـــريب
وحدر العـــبايه ايصــير النحيب
من تبچــي اهلهه تجـــرع حبال
وتطلع شمــس عالناگـــه وتغيب

خادم القصيده
شاكر الصيمري**#اللهم_عجل_لوليك_الفرج

#شور_شجاعة لمولاي الحسين صلوات الله عليه ?**

الشيخ الهاشــــــمي وادخيله من غار
وانطه الخيمه ظهره وللـــــــــزلم دار
طب ولا شجاع ابـــــــــوجه الحسين
ياهيبة علي ونضــــــــــــــــــراته فقار

ابو الاكبر لوه اعــنانه   وجيش ابكبره ساواه
وگف والوگــفه كتاله    سياده وكلـــهه جواه
عدل مايعرف الميـله    يسبــحان الي سواه

ادخيل اعيونه وجفه ايلوحن مثل السيف

طب يــــــــوم القيامه وزعزع الخيل
وخله الجــــيش تايه صبحه من ليل
جر سيفه وبرز والنــــــــــاتج الموت
حيالله ابو الاكـــــــــبر فوگ الكحيل

كشفهم وانفـــتح دربه    يشاره وتغلب الصوت
يحـــوم و وكر اعليهم    اجتهم ســكرة الموت
نفس ماخله بالحــومه   هوى مايقــبل ايفوت

حسين وطب للعسكر ياهو ايكض حسين

فن المعركه اتريـــــــــــــــدلهه فنان
طبوها المعاره اثنـــــــــــــين خوان
عباس الزلم ربطـــــــــــــها عالخيل
وحسين الشوارب بيـــــــــده تنهان

مثل عباس يتــــــــكرر    ابد ماتنـــــــــوجد هاي
ولا ابو الاكبر ايشـــبهه    بشــــــــر عارك بلا ماي
يشيخ امشيخ امن الله   واخوك امن الله سگاي

الماي اليومك هذا ايســـولف بالعباس

عالي ومن يــــــــــگوم اتدنگ اركاب
بـــــــــــس خلفة علي بالعركه تنهاب
ميدان اليطبله حســــــــــين يگضيه
هذا ابن الخزرها وطــــــــــيح الباب

علي ابكل عركه يلگــونه    عجيب ويطلع امنين
لگــو شخصيته والشمره     ورثهن كلهن حسـين
مراجل كل علي ابچـــفه     يسوي الواحد اثنين

اركاب الخيل اتدنك من تسمع بحسين

كل هاشــــــــم شجاعه وتزرع الخوف
ماتعله اعله حـــــــدهم حفنة اسيوف
حسين الوحــــــــده وركضهم اركاض
واگباله اليغمض حـــــــــــيدر ايشوف

بعدهم ظنهم ابخـــيبر    امس هذا الحلم چـــان
عليهم طـــــول الساعه    عذاب ابكــــــربله حان
زلم من يعـــــبر اعليهه     تقشعر يمـــــه الابدان

الگـــــاع ابيوم العاشر تفـــــــتر بالفرسان

خادم القصيده
شاكر الصيمري**#اللهم_عجل_لوليك_الفرج