#olis_yaqin_ovozlar
Og‘riq

Og‘riq – xotiringda aylanur mudom,
O‘tkinchi hislarga sovrilgan yoshlik.
O‘ylamay har kasga qilingan in’om,
Ishonching ko‘ksini kemirgan g‘ashlik.

Pismiq ummon bag‘ri berkitgan sadaf,
Tashna lab qoshida bo‘y cho‘zgan sahro,
Endi qo‘l yetganda to‘kilgan qadah,
Sal ko‘zing ketganda yo‘qolgan Zuhro.

Vafodor it bo‘ynin qizartgan sirtmoq,
Parvozga shay burgut solingan qafas.
Xudodan beruxsat tamaki tortib,
Bandadan so‘ralib olingan nafas.

Pinhon minnatlarga qorilgan himmat,
Oshkor tilla suvi yuritilgan mis.
Kuppa-kunduz nurni yashirgan zulmat,
Muhabbatdan baxtni o‘g‘irlagan his.

Gunohlardan keyin qilingan attang,
Unutib qo‘yganing asl Egani.
Sen ishidan bo‘yin tovlagan otang,
“Kamchiliklar yo‘qmi, o‘g‘lim”, degani...

Tomirlaringgacha otguvchi ildiz,
Qon-qoningga singib ketguvchi alam.
Jon-joningdan o‘tib borguvchi tilsiz
Og‘riq – o‘zingniki bo‘lmagan qalam!

Shukur LATIF,
Farg‘ona viloyati

“Yoshlik” / 2023 / 7

yoshlikjurnali.uz
@yoshlikjurnali

#nazm

Ikki koʻngil birlashgan joy - ufq
Quyoshni-da yoqib yuborgay.
Shunga dunyo oʻt olmasin deb,
Bizni Xudo ayro yuborgan...

Ketsam,
kuyma...
ishqimiz xolis,
Yurak doim hamohang urar.
Bizning ushbu ayriliq bois
Ikki dunyo bogʻlanib turar!

Shukur LATIF

@yoshlikjurnali

Aprel edi...
Nastarinlar gullagan chogʻ,
Bahor hidi ufurardi toʻrt yonimdan.
Koʻrganim shul: hilol edi, yulduz edi
va yodimni silab oʻtgan hur yoding-la
tushlarimga kirib chiqding.

Bahor edi— toʻkilmoqlik mumkin emas,
Yigʻlamoqlik xiyonatdir tabiatga.
Hatto oddiy yolgʻon deya qarab boʻlmas,
Shahzodalar minib kelmish oppoq otga
Bu faslda...

va yo gʻamga fojiadek qaralmaydi,
yo shunchalar goʻzal edi baxtsizlik ham.
Kuldirgichi osmongina bir qiz edim,
Sen umrimni soʻroq qilib chiqmagan dam.
"Baxtlimisan?" deya mendan soʻrmagan dam.

Nomozshom rang chizgilarim,
soʻng kuylarim,
Ham Ruhimda aytilmagan soʻz bor edi.
Tushlarimga kirganingda lablarimda
Bir umrimga yetgulik bir soʻroq undi:
         Baxtlimanmi?!
Gulzoda Karimova*

@Karimova_Gulzoda

​#Qutlov

Bugun yosh shoir Shukur Latif va Gulzoda Karimova tugʻilgan kuni!

Shukur LATIF 1998-yili Fargʻona viloyati Buvayda tumanida tugʻilgan. Oʻzbekiston Milliy universiteti Filologiya fakultetini tamomlagan. Ijodkorlarning an’anaviy zomin seminari qatnashchisi. Hozirgi kunda “Jadid” gazetasida faoliyat olib bormoqda.

Tabassum ortiqcha, kulgu begona,
Gʻam-anduh sodiq doʻst, dardlar hamxona.
Bu dunyo zulmatdan iborat, faqat
Ovunar xolos dil quyosh bahona...

Kuz – koʻyim, qish – gumon, bahor – afsona,
Yoz – hijron, visol yoʻq – umr sarsona...
Hazonday toʻkilib yasharman mudom,
Haqiqatga eltar yoʻl shu yagona...

Gulzoda KARIMOVA 2003-yil Fargʻona viloyati Qo‘shtepa tumanida tug‘ilgan. Ijodkorlarning an’anaviy zomin seminari qatnashchisi. Hozirda O‘zbekiston Milliy universitetining 4-bosqich talabasi.

“Bahorsiz kunlarga oʻt qoʻyib yubor…”
Madina Norchayeva

Dengizlar ortiga ketdim koʻmilib,
Sathida kul boʻldim, ivimagan kul.
Bir ishq istar edim va bitta yonish
Oʻtinchim uchun.

Qayiqlar oʻtadi yurak chayqatib
Va osmon gumburlar, boshlanar jala.
Sevmoqlik eng oliy qonunlarimga
Qurilgan qalʼa.

Nurab boryapman bahor yoʻq, yoz yoʻq.
Yilimda mujassam faqat bir fasl.
Kuz...
Yuraksiz vujudda gulxan va olov
Yonar muttasil.

Dengizlar ortiga ketdim koʻmilib,
Sathida kul boʻldim, ivimagan kul.
Bahorsiz kunlarga oʻt qoʻyib yubor
Muhabbat uchun.

@yoshlikjurnali
yoshlikjurnali.uz

#Olis_yaqin_ovozlar

Qasdimga huv tog‘lar toshlarin otsa,
Yorilib ketsa-da bosh egmam hecham.
Faqat tinch yurgizmas toshlari botsa,
Turtinib-surtinib ulg‘aygan ko‘cham.

Ayanchmas ummon yo sahro, o‘rmonda
O‘limga tik boqib, qolmog‘im tanho.
Do‘st-u yor bo‘lsa-yu to‘rtala yonda,
Hech kim tushunmasa, shudir muammo.

Ranjima, cho‘chitmas, gulim, so‘lishing,
To‘kis baxt yo‘q azal sevgi yurtida.
Asl foje menga sening bo‘lishing
Qarsillab yopilgan eshik ortida...

Shukur Latif@yoshlikjurnali
yoshlikjurnali.uz