Doʻstlarga rahmat!

Хамма хамма расмни куриши шарт эмас😁Шунчаки шу ерда туришини хохладим холос

Олисларда туриб хам яхшилар эътироф этса хурсанд буларкансан???

Яхши одам ёҳуд пайпоқ шўрва ҳикояси

Яхши одам қандай бўлади? Бу саволга ҳамма бир-бирига ўхшаш жавоб беради. Яхши одам ҳаммага яхшилик қилади, яхшилик қилолмаса яхшилик тилайди. Эҳсон қилади. Ёрдам беради. Ҳеч бўлмаса дуо қилади... Булар бари яхши одамга берилган сийқаси чиққан таърифлар. Менимча, ҳар қандай одамнинг ичида битта яхши одам яшайди. У дангаса бўлсин, ичиқора бўлсин, бағритош бўлсин, қўпол бўлсин...барибир ичида яхши одами бор, деб ўйлайман.
Қайнотам илк бор кўрганимда қўпол, қаттиққўл одам бўлиб кўрингандилар. Оилада тўрт ўғил. Мен биринчи келин. Баъзида йигитларга қаттиқроқ гапирсалар ҳам чўчиб кетаверардим. Айниқса, таом масаласидаги инжиқликларига чидаб бўлмасди (кейин билсам ошқозонларидан қаттиқ оғриган эканлар).Бу хонадонда энг биринчи қоида - овқат вақтида тайёр бўлсин, мазали бўлсин ва албатта, фақат у киши хоҳлаган таом бўлсин! Хамирли овқатларни фақат уйга борганда еб келардим. Хуллас, куйиб-пишиб таом тайёрлайсан, яна танқидга учрамаслик учун дуо қилиб турасан...
Келин бўлиб тушганимга 6-7 йил бўлган. Одатдаги кун. Тушлик вақти дастурхонга овқатларни келтириб қўйдим. Ҳамма дастурхон атрофида. Лекин ҳали ҳеч ким таомга қўл узатмади. Шу пайт эндигина юришни бошлаган кичкина ўғлим оёқчасидаги пайпоғини бир силтаб ечиб олди-да, ўнг келган томонга қараб отди. Даҳшат! Пайпоқ ёруғлик тезлигида тўғри бориб бобосининг шўрвасига тушди. Ҳеч умрингизда вақт тўхтаб қолди, ер айланмай қолди деган ибораларни яшаганмисиз? Мен яшадим!
Бирданига ҳаммамизнинг миямизда бир хил фикр бир вақтда пайдо бўлди ва тилимиздан отилиб чиқди:
- Мана, менинг овқатимни ичақолинг!
- Келинг, алмаштириб бераман...
Олдимдаги шўрва қуйилган идишни дастурхондан оламан, узатаман, яна жойига қўяман. Қарасам, қайнонам билан қайинукаларим ҳам айнан шу ҳаракатни такрорлашяпти. Ҳамма овқатга инжиқ одамдан нохуш бир гап эшитмаслик пайида.
- Йўқ! - мўйлов тагидан қатъий овоз эшитилди.
- Ҳамманг ўзингни овқатингни ич!... Мен пайпоқ шўрва ичаман!
Ҳаммамиз тенгдан гур кулиб юбордик. Дастурхон устида ёқимли шабада эсгандай бўлди. Ўғлим бир оёғида пайпоқ, бир оёғи ялангоёқ келиб бобосининг тиззасида дунёдан бехабар пайпоқ шўрванинг гўштини мароқ билан чайнаб ўтирибди.
Анчагача, дада, нима овқат қилай, деган саволимга , бугун бир пайпоқ шўрва ичайлик, деган жавоб олиб юрдим.
Яхши одам қандай бўлади, биласизми? Мен биламан!

Маҳфуза Йўлдошева 2024 йил.