طاح من القصر .. مسلم منتصر
بدموعه الحسين .. قدمله الشكر

.........
أول ما صعد .. على قصر الاماره
سلم بالدمع .. من أول عباره
وحسين استلم .. ما بيهم غياره

شاف دنيا الليل بعيون الصبح
والسوالف ماصخه بلايه ملح
والنفوس اتكبرت ضد الصلح
والحچي البي خير رادو يندثر

.....

مسلم ما رجف .. ما خاف اعله راسه
ما رايد حكم .. لا رايد رئاسه
دوله بلا علي .. يسحگهه بمداسه

سلهم السيف برگبته وما رجف
بيده شال الكوفه والزيف انكشف
دمه حار و يا علي حيدر هتف
وحده بالكوفه بقه وضده شكثر
............

شامخ كالجبل .. ما هاب العساكر
وسيفه اشگد حضن .. من عدهم مناحر
گال الكوفه إلي .. واحنه اهل المنابر

هاي گاع المرتضى خير العمل
بيهه لا منريد ولد ام الجمل
للعلم مخلوقه لا مو للجهل
بيهه بيت الغايب ومهدي العصر
..........
شال ايده وهتف .. يتباع الدراهم
يا أهل الدجل .. چفكم ما اسالم
وعمايم شفت .. متغرني العمايم

يا عمامه التحكم وكلهه دغش
ياعمامه البيهه شيطان انقش
بس عمايمنه بعلي طاريهه طش
وبعمايمكم عمر لو ابو بكر
........

راواهم علي .. بالهجمه اعله بابه
ما بايع برز .. من رفضو كتابه
وطلابه وبدت .. شيفضهه الطلابه

زلزل الگاع التحتهم زلزله
گلهم المني شرد مو مشكله
باچر يصيده الكفيل بكربله
وينعصر بيده مثل عصرة گبر
.........

جيش اشكبره اجه .. ضده وهو وحده
مسلم ما رجع .. زلمه ووفه وعده
گادو للسطح .. بس حچايه عنده

سلم اعله حسينه وحسينه سمع
وما وگع مسلم لمن مسلم وگع
شاله حيدر بيده للسبعه ارتفع
وارتفع مسلم لچن طاح القصر
........

علي عبدالله المفرجي

يا زينب يا آلام يا أيام شنساهه
يا حيرة حرگ اخيام والايتام وياهه
يا هضمة ذاك الشام اه يالشام يا عمه
ـ .........
عدنه الدوه لكل منجرح .. بس جرحچ الماله دوه
كل ذكرى الچ بيهه اختنگ .. وبريتي ما يدخل هوه
يا بت علي يا عمتي .. يمغيره حالچ نينوه
وطبة القصر ذاك الوكت .. منهه الگلب عمه انچوه

طبيتي نص شمات .. صاحو كفيلچ مات
مو هينه يا عمه وعلي .. تذبح هالحچايات

كل ذكرى تشوغ الروح وابچي جروح من عيني
شفتي احسينچ مذبوح صحتي بنوح يحسيني
وصحت بگلبي المحتام آه يالشام يا عمه
ـ ..........
مو سهله من رحتي بسبي .. وصعبه شكثر طبة القصر
عفتي الحسين اعله الثره .. وراسه برمح بيد الشمر
كل خطوه بدروب اليسر .. تمشيهه گلبچ ينعصر
وكل خطوه من دون الگمر .. يا ريته ما دام العمر

چان الگمر موجود .. عمرچ گضه وميعود
ما شفتي فرحه بهالعمر .. عمرچ مصايب سود

يا عمه بلا عباس شفتي الناس فرحانه
تمشين ومتسمعين غير اونين نسوانه
بالشام وماكو خيام آه يالشام يا عمه
ـ ..............
دمعي تره ما منگطع .. يجري لحد هذا الوكت
عاللي جره بطف كربله .. ومنه شجره بحالچ شفت
شفتي الخيم من تحترگ .. والاكثر بگلبچ يفت
موقف رقيه استشهدت .. من شافت الراس بطشت

من كربله وللشام .. عشتي اصعب الأيام
فرگة أخو وطفله وأبو .. يا زينب الآلام

شفتي الما شافه إنسان والاحزان يالحره
طبيتي بنص ديوان دون اخوان يا حسره
ويتشمتون الظلام آه يالشام يا عمه
ـ ............
بعيوني الچ صوره تظل .. لمن صعدتي اعله الهزل
هالصوره ابد ما تختفي .. موقف عظيم ومو سهل
بيچ اشكثر لوعه وغصص .. شفتي انذبح حتى الطفل
فوگ الجرالچ ما كفه .. جرو يتاماچ بحبل

يا حيره شتصبرين .. صاحو نريد احسين
وكل ام بچت فگدت ولد .. شيرجع الميتين

اجمل ناس اعله الگاع كلهه ابدور مذبوحه
والفارگ هيچ احباب ميسد باب لجروحه
جفنچ ساهر ما نام آه يالشام يا عمه
ـ ...........
يا عمه دعواتچ بعد .. محلاهه من تدعين إلي
ومن اظهر انصبلچ عزه .. يم الكفيل اتدللي
أستقبل الناس التجي .. وانتي الحسين استقبلي
رجعيله راسه اعله الجسد .. ويرجع هذاك الأولي

من اظهر اتشوفين .. كل اخوتچ عدلين
ما يبقه واحد منذبح .. وامگطع الچفين

باچر كل احنه ابيت لو رديت نتلاگه
وترجعين بلا نوگ للمعشوگ مشتاگه
وترجع احلى الايام آه يالشام يا عمه
ـ ..........

علي عبدالله المفرجي

خطار الحسين اجه
وما فرشو بساط اله
هوه انفرش للخيل
........
عاده اليسير يم عرب .. يتحاوطونه بيا هله
ويرحبون بجيته .. ويفرح بالمعزبين اله
وحسين كلش يختلف.. حين الأجه لطف كربله
هذا اليلاگيه بالسهم .. والـ بالرمح يستقبله

ما جان يسمع كلمة أهلاً بالجاي
بس چان يسمع خل نحرمه من الماي

وهنا بدت غربته
والغربه ما تنحمل
وبروحه تخنگ حيل
ـ ............
متغرب حسين بسفر .. بس مو غريب وتنگطع
وي غربته طاح ابشر .. بالرحمه ابد ما تقتنع
لاگوه وبذاگ الحچي الـ .. مسموم ابد ما ينجرع
گلهم سلم گالو حرب .. واليوم لازم تنفجع

حقدو گصصهم ماي ما بيهه يشوف
ومحاوطينه و رفعو بوجهه سيوف

يدري الوضع مو سهل
بس قرر يدگ خيم
رغم المخاطر سيل
ـ .............
آمر اخوته وصحبته .. كل واحد يدگ خيمته
وخيمة وديعة حيدره .. عباس دگهه بشيمته
شال ايده اشر عالخيم .. وهنا تبين هضمته
يحترگن اعله العايله .. و بگلبه زينب لچمته

بعده اعله طوله اگبالهه وتحچي وياه
وشلونه بدونك يبو عبدالله

ضماهه حيل وبچه
وهنا مصيبة أهل
يتوادعون بليل
ـ .........
لم إخوته وياهم حچه .. ووصاهم بشد الحزم
گلهم يخوتي هنا تره .. واليوم تنشاف الزلم
واصحابه سمعو هوسو .. ركضوله گلوله بعزم
قدمنه گدام اخوتك .. خل ننذبح ما ننهزم

شال ايده دگ اچتافهم حيهم صاح
عفيه اخوتي وصحباني نصكم مرتاح

بس لو گضيتو أضل
من دونكم وحدّي
ولحملي ياهو يشيل
ـ ...............
خلصو هله وصحبانه هم .. ما ظل ولا واحد عدل
واگباله بس روس الزلم .. لا ما سلم حتى الطفل
حان الوداع وبت علي .. ودعهه والمدمع يهل
گلهه الاميره مدللـه .. باچر يصعدوهه بهزل

وصاهه بعياله ومشه وبيهه شلون
الله يساعد گلبه من عاف ام عون

بالخيمه وتشاهده
وسيوف التحاوطه
والگاع بيهه تميل
ـ .............
طاح الحسين ومنذبح .. خطار بس راسه انفصل
يم ناس ما عدهم كرم .. والماي يمه ما وصل
دمه النزف من منحره .. فوگ الترب خط الحصل
وزينب تلم بي وشقرت .. يا صاحب الثار العجل

چتاله راد يذبحه بس شاف شصار
من گلبه يسمع صوت يا راعي الثار

جدك تره بكربله
ما فرشو بساط اله
هو انفرش للخيل
ـ ........

علي عبدالله المفرجي

يا زينب يزينب
ـ ...........
ناداهه مكسور الظهر .. يا زينب يزينب
خويه شعمل بيچ الدهر .. يا زينب يزينب
فارگتي عباس الگمر .. يا زينب يزينب
وساعه ويگطعولي النحر .. يا زينب يزينب

يا زينب يزينب
ـ ـ..........

خليني اودعچ بت علي .. يا زينب يزينب
يا ريحة امي وكل هلي .. يا زينب يزينب
ودعيني يختي اتدني الي .. يا زينب يزينب
صوت المصيبه معتلي .. يا زينب يزينب

يا زينب يزينب
ـ ............

منا وعشرتنه انتهت .. يا زينب يزينب
والفرگه لينه اتوجهت .. يا زينب يزينب
وسيوفهم نحري اشتهت .. يا زينب يزينب
وسهامهم بيه التهت .. يا زينب يزينب

يا زينب يزينب
ـ ............

هسه آنه گدامچ عدل .. يا زينب يزينب
جسمي وتشوفي مكتمل .. يا زينب يزينب
ساعه ويصير المو سهل .. يا زينب يزينب
عن جسمي راسي ينفصل .. يا زينب يزينب

يا زينب يزينب
ـ .............

يا زينب وهذا الألم .. يا زينب يزينب
لو نحري ينزف منه دم .. يا زينب يزينب
وبخيلهم صدري انهشم .. يا زينب يزينب
معناهه ما تبقه خيم .. يا زينب يزينب

يا زينب يزينب
ـ ........

هالليله يا زينب دمع .. يا زينب يزينب
خلصت بعد ما ننجمع .. يا زينب يزينب
يختي النحر خل ينگطع .. يا زينب يزينب
بس السبي ما ينجرع .. يا زينب يزينب

يا زينب يزينب
............
هذا آخر وداع وصعب .. يا زينب يزينب
ودعيني يا نبض الگلب .. يا زينب يزينب
باچر سبيه ويه الغرب .. يا زينب يزينب
للشام وبعيد الدرب .. يا زينب يزينب

يا زينب يزينب
...........
باچر يأسروچ الزلم .. يا زينب يزينب
بس ما يهدمولچ عزم .. يا زينب يزينب
ليزيدهم دوسي الخشم .. يا زينب يزينب
والباري منهم ينتقم .. يا زينب يزينب

يا زينب يزينب
..............

علي عبدالله المفرجي

عمري ماي .. وشفته طاح
راح اموت .. واستراح
كلشي جان .. وكلشي راح
........
من ماكو دموع امسحهه برداني
معناهه العطش يبسني واذاني
ولمن ثگلت الخويه على لساني
يعني گطّعو عباس عدواني
ولو لخيامه ما رد سالم الغالي
گول الجربه صابوهه بسهم ثاني

اذا حتى الهوه المار .. يطب ريتي سهم حار
اگول شحال الزغار .. عطاشه
اعاين ليهم اشلون .. ينوحون ويونون
وضعهم هذا ميهون .. عطاشه

موقفين .. مو قليل
الزغار .. والكفيل
عاليصير .. گلبي ناح
............
من امشي واطيح وماكو عوانه
گولو حسين وحده وفاگد اخوانه
والمكسور گلبه وترخه ذرعانه
مابي حيل يوگف هيچ صرت انه
چن ماي بنهر وجروفي عافتني
ومن دون الجروف اتشربه گيعانه

تره الماي وبلا جروف .. يتيه وهذا معروف
وانه جرفيني الچفوف .. گطيعه
غرف مني الأجل جاي .. بقيت بعازة الماي
وچفوف امبرد احشاي .. گطيعه

مرمي وين .. عالفرات
بيه حيل .. وهسه مات
ما اشوف .. بس جراح
...........
من زينب إجتني وصارت اگبالي
معناهه الكفيله اتصير لعيالي
ومن شبگتني حيل اشخطرت ابالي
آخر شبگه هايه ونفترگ تالي
حضنتني بشغف ودموع چنهه امي
من احضانهه اوگع بيد چتالي

واصد اعليهه بعدين .. وتصدلي بحرگه وونين
وتنادي ابن امي يحسين .. مصيبه
وانه الذباح فوگاي .. يگلي زينبك هاي
سبيه تروح وياي .. مصيبه

راح اروح .. وتبقه وين
لا كفيل .. ولا حسين
وتلگه روس .. عالرماح
................
من شبگتني زينب حسره خنگتني
وشهگة فرگه من شبگتني شهگتني
يعني خيول اميه تشوف سحگتني
وصدري ويه الظهر بالگاع طبگتني
تعرف بيه رايح ما أرد ليهه
ما رادتني اروحن من تلگتني

لان تعرف اذا اروح .. اطيحن نحري مذبوح
گلبهه يسولف اجروح .. وداعي
تگلي لمن اتطيح .. علَيْ چتالك ايصيح
تسبح لله تسبيح .. وداعي

هالوداع .. والأخير
وكته حان .. واليصير
تمشي وين .. بالصباح
........
كل انصاري مذبوحه وگضو ولدي
يعني الدور اجاني من صرت وحدي
زينب ودعتهه وطاحت بسدي
گتلهه يزينب للخيم ردي
يختي الدين لازم ينهض براسي
وحشمي المهدي إلي يا عمة المهدي

يا لثار .. هالنحور
مو بعيد .. الظهور
بسمه شوگ .. صوتي صاح
...........

علي عبدالله المفرجي

لو أدْرَكتهُ .. لَخَدمتهُ .. أيام حياتي
ـ...............
إمام وشيخ ائمه .. أدور عطره اشمه
اروحن فدوه لاسمه .. مهدي
على مر الليالي .. ولا فارگ خيالي
حزين بدونه حالي .. مهدي

جرح بُعده بدليلي .. خليل الله وخليلي
سكن بعيوني صوره بلا وجه ينشاف
صبح كل اشتياقي .. للتراب العراقي
التراب اليدوسه المهدي ما ينعاف

گبل لا ينولد محبوبي انتظره
يهنياله اليطول لجيِّته عمره

وعمري يطول يا ريته .. كل هذي امنياتي
ـ.................
انه بكل يوم اذكره .. يمن عمري اعله عمره
ردت بس وجهه انظره .. مهدي
ادور بالعوالم .. على الـ بمحبته هايم
شفت بس اسمه قائم .. مهدي

ومشيت انه لزمانه .. شفت سرقو مكانه
يعرفونه ويجهلونه شكثر عميان
والاكثر شي لكيته .. يدثرون بقضيته
مصيبه العافو الله وتبعو الشيطان

ورجعت انه لزماني بس اون وحدي
يعينه الله بزمانه الغايب المهدي

الله يحفظه من كل شر .. ادعيله بصلاتي
ـ .........
انوح ودمعي اسيله .. لبو الغيبه الطويله
اشوفه بيا وسيله .. مهدي
صحت بسمه بحناني .. ايا صاحب زماني
الك متلهف اني .. مهدي

گمت كل جمعه اناطر .. و اصب دمع النواظر
اناطر بالعشگته والعشگ چتال
اگولن يمته اشوفه .. واقبلهن چفوفه
ويصد لعيوني لفراگه الدمع همال

انه بكل يوم جمعه امحسب احسابه
يجي ويلگاني اتاني وگاعد ابابه

ابقه انتظره يستاهل .. حد ساعة مماتي
ـ ............
احب غايب واريده .. يضمد جرحي بيده
لچن جيته بعيده .. مهدي
متى يطفي لهيبي .. ابو صالح حبيبي
جريح انه وطبيبي .. مهدي

على ايميني ويساري .. سوالف إنتظاري
شفت حتى الهوه حافظهن الچلمات
گمت حتى بشهيقي .. أشم جية صديقي
صديقي المهدي عايش لا أبد ما مات

سمعت اهواي گالو صاحبك ميرد
گلت حتماً يجي ما يخلف الموعد

باچر يرجع واجزم .. إن المهدي اتي
ـ ..............
اخير ايامي هايه .. بالحسين البدايه
وصلت اجمل نهايه .. مهدي
حضر موتي وندبته .. يجي الغايب حسبته
متى يرد من غربته .. مهدي

منو يخبرني عنه .. هديته لوحده جنه
مثل جنة عدن انطيهه اله ومشكور
اشوفن يمته نوره .. يرب عجل ظهوره
دعائي لجيته واليدعيله هم مأجور

هنيئا لليتاني المهدي كل جمعه
علَي مكتوب اشوفن وجهه بالرجعه

فرحة فاطمه الزهره ... وفرحة كل حياتي
ـ..............

علي عبدالله المفرجي

لو ظهر .. ثار المقابر ما يضيع
لو ظهر .. تعله المناير بالبقيع
واولهن لام البنين
يكتب عليهن يا حسين
لو ظهر
......

هاذي أمنيتنه بكل وكت .. تتحقق بجيته نعم
المهدي لو باچر يجي .. يبني شكو گبر انهدم
لأرض البقيع الطاهره .. يوميه نشتاگ بألم

يا يوم ونشدهه الحزم وترف بدينه الرايه
وچن اربعين وكربله نتعنه هم مشايه

لو ظهر .. أول منبدي بالسلام
لو ظهر .. مشايه ياخذنه الامام
من ارض أمير المؤمنين
يكتب عليهن يا حسين
لو ظهر
........
لگبور أئمتنه اعتنو .. هدموهه اصحاب الجهل
يمحون رادو كل اثر .. للمرتضى خير العمل
ما گدرو شگد حاولو .. ترباتهه الركبت جمل

باچر ظهور المنتظر واتباع ابن تيميه
ميخلي اثر ليهم بعد فوگ الكره الارضيه

لو ظهر .. والهدمو صرح القبور
لو ظهر .. يذبحهم بيوم الظهور
ويبني قبور الطيبين
يكتب عليهن يا حسين
لو ظهر
..........
باچر ملائكة السمه .. هم تنزل ويه المنتظر
وتشارك الناس التجي .. تبني البقيع بكل فخر
واعله المواقع ينّشر .. بانيهه ابو صالح حضر

ويعيد للزهره فدك من الذي سلبوهه
ويظهر گبرهه المنخفي للوادم الحبوهه

لو ظهر .. ميظل گبرهه بالخفاء
لو ظهر .. يبني مناير للسماء
وضيهن يشع بالخافقين
يكتب عليهن يا حسين
لو ظهر
...........
كلما طلبنه تنبني .. من هدموهه المجهله
يستهزؤون اكثر بعد .. أحفاد شمر وحرمله
يا يوم ونزور الحسن .. نطلع مشي من كربله

ونقيم مأتم عالذي ذبحوه اگبال اعياله
ونقراله عن زينب نعي ويا ضنوتي نقراله

لو ظهر .. كل هذا النريده يصير
لو ظهر .. ويانه يطلع بالمسير
ورايات نرفع معتنين
يكتب عليهن يا حسين
لو ظهر
........
باچر يجي ويعلن حرب .. ضد الظِلَم آل النبي
والمهدي ميوزع ورد .. والموت حصته الناصبي
ياخذهه بيده من العده .. ويمليهه عدله الطالبي

وبيده يرد حكم البشر مو بيد وادم هوسه
والچان يحكم بالظلم بجدامه راسه ايدوسه

لو ظهر .. ميظل حكم لاهل النفاق
لو ظهر .. يحكمهه كلهه من العراق
بيبانه يمهن ناطرين
يكتب عليهن يا حسين
لو ظهر
...........

علي عبدالله المفرجي

باچر المهدي يدگ الرايه
بالبقيع ونعتني مشايه
..........
يا موالين الصبر ثم الصبر
والبقيع تريد وادم تنتظر
وبأمر راعيهه لازم تأتمر

هو يحچي لغيره ماكو حچايه
..........

البقيع اليوم مغصوبه تره
بيد ناس اتبعو اوصية مره
هدمو گبور الائمه الطاهره

حاقدين وكفرو بكل آيه
..........

ناس ضد الشيعه وأصلاً ضد علي
هذا رسهم من هذاك الجاهلي
باچر الموعود بيهم يبتلي

و روسهم تتطاير مدمايه
...........

ليش ما هدمو گبر راعي الحطب
والدفع باب الوصي ولبيته طب
حتى يرضه ابليس المسوينه رب

ما يخلفون بطلبته و رايه
..............

غصباً اعليهم يرد گبر الحسن
وترجع ادلاله وبعد ما ينچفن
والبقيع ترد مثل جنة عدن

ونگصد الهه من النجف عنايه
..............

باچر السجاد نتعنه إله
ويمه نتذكر مصايب كربله
ونبچي وي الباقر اعله العايله

ونحيي يم الصادق الهه قرايه
......

مو بعيد المهدي ما باقيله شي
وللبقيع ان شاء الله نطلع مشي
باچر الهادمهه نلگاه مختشي

بالسواد يشوفهه امغطايه
...........

ندعي اللهم عجّل بالفرج
وبظهور المهدي ترتاح المهج
واحنه عطشانين وبجاه العرج

يظهر ويروينه باچر مايه

..........

#علي_عبدالله_المفرجي