انتظر واحد يجيني.. ياهلي بيوم اربعيني
يمي اينوح
امن السياط الالمتني... دمعه منكم تشفي متني
الكله جروح
وينك... وينك... ياعباس
....................

شكد اراقب... يالحبايب.. وانتضر واحد يمر
اهلي كلهم... ماشفتهم.. ولادمع فوك الكبر
وينه اليجي ويوكف عليه
زينب تره الهسه سبيه
هذا حزني... وهذا وني.. وخاطري بي جم كسر

من مشيتوا الهسه اني... مارحم بيه زماني
ماتدرون
من طلع ضعن السبايه... امن الشمس حمره العبايه
ماضل لون
غربه... غربه... هاي الناس
وينك... وينك... ياعباس
...................

ماكو محمل.. واني أخجل... والدرب ماينحمل
يهلي انحب... انه زينب.. والسبي نوكه هزل
البعدو اهلها ومشو عنهه
سوط الشمر يضرب متنهه
والاميره... تصير أسيره.. وجفهه ينكاد بحبل

منهو يحمل هذا حملي... طشرو بالهيمه شملي
ازغار اكبار
گلبي يوكف ساعه ينبض.. ساعه امشي وساعه اركض
بروحي النار
همي... همي... ماينقاس
وينك... وينك... ياعباس
....................

بالمخاطر... وانه اكابر.. وعالحرم گلبي يرف
والخرابه... بلا كرابه.. والحرس وين الصلف
بعد الكمر حراسي غربه
يآال هاشم والله صعبه
شكد مشينه... ومالكينه.. من بعدكم كل عرف

روحي تنشدني عليكم... سلمتها ابين اديكم
يغله الناس
هسه محتاره اشاكلهه... يهلي ياهو اليفزعلهه
وشاب الراس
ضاكت... ضاكت... بصدري انفاس
وينك... وينك... ياعباس
...................

كل مراري... وحتضاري.. والهدم حيلي هدم
دخلوني... ومارعوني... بذاكه ديوان الزلم
كلهه شماته واعرفتهه
ووجوهم تضحك شفتهه
بصدري عبره... وگلبي جمره.. وثابت بروحي العزم

شكد بجيت انه بغربتي... بس ولا شافوا دمعتي
مني اتطيح
هيه شتفيد المدامع... وروس اخوتي اكبالي اباوع
دمهه ايسيح
دمعي... دمعي... كله احساس
وينك... وينك... ياعباس
....................

هذا حالي... والجرالي.. وفتره من بعد الجره
موتي اجاني... ومن خذاني.. روحي مشتاكه تره
صار اربعيني وما شفتكم
زينب تره اني متانيتكم
والله احبكم... وبدربكم.. روحي تبقه مناطره

كل الهموم العليه.... من تجون زياره إليه
كلها تهون
حسين لو شفته اجاني... والكفلني وما نساني
ايصيح ام عون
ذخري... ذخري... يانوماس
وينك... وينك... ياعباس

محمد هادي العقابي

يروحي توجهي
لبو وجه البهي
حبيبي المنتظر
عشك ماينتهي
...................

هايه فرحتنه الجبيره.. مهدويه
گلبي كل أحلامه صارت ..مهدويه
ضلي بفراحج يروحي.. مهدويه

اليوم كل الخير اجانه المهدي جاي بهيبته
ونزلت الأملاك كلهه بالولاده اتلكته
الله لايحرمنه دنيا وآخره من شوفته
المهدي ابونه من زغرنه وكبرتنه امحبته

اغله صار امن الهوه.. ابن الحسن
بكل درب نور وضوه.. ابن الحسن

وجوب اسجد شكر
عليه هب عطر
حبيبي المنتظر
عشك ماينتهي
......................

الليله هاي احله الليالي.. فاطميه
والسعاده ابلا نهايه.. فاطميه
خادم وكل امنياتي.. فاطميه

الف مبروك الولاده انهني امنه فاطمه
والفرح بسم ابو صالح يوصل السابع سمه
انولد نور بدنيا صارت من ضلمهه مضلمه
شكراً بكد رحمة الله العلي حماي الحمه

المهدي صار ومن صلب.. علي علي
اوياي افرح يالتحب.. علي علي

الكمر خل يختفي
جماله يوسفي
حبيبي المنتظر
عشك ماينتهي
........................

انئدي للمهدي التحيه.. عسكريه
قائد واحنه جنوده.. عسكريه
ونبعث السامره فرحه.. عسكريه

غرد الطير بسمانه انولد راعي المرجله
وكل گلب للمهدي يهتف ياهلا ومية هله
العسكري ناده يشيعه وصوته بالحب اعتله
الليله كل محفل فرحته وصلوهه الكربله

هايه فرحه امن العمر.. للمنتظر
افرح افرح وابتشر.. للمنتظر

بلا حيره ووجل
اعيد المستهل
حبيبي المنتظر
عشك ماينتهي
.........................

الكمر ضم نوره وجماله.. بهل مسيه
انولد نور الهاشميه.. بهل مسيه
ابو صالح طل علينه.. بهل مسيه

والعجايب سبعه كلهن بالامام اتعجبن
تواعدن كلهن مشله هناك يم مهده التقن
صار اول عجبه بيهن ابن مولاي الحسن
المهدي خير المهدي نعمه المهدي المحلي الزمن

يسري حبه اويه الدمه.. نبض الگلب
يمته روحي اتكلمه.. نبض الگلب

اماني ودنيتي
اشوفه منيتي
حبيبي المنتظر
عشك ماينتهي
........................

يمته اشوف الرايه بيده.. حيدريه
بدولة الحب والعداله.. حيدريه
الناس متجمعه اعله حبه.. حيدريه

يمته يضهر للبريه ويضهر الحق والعدل
والكره الارضيه كلهه تصيح بسمه وتحتفل
أدعو وياي الضهوره والفرح خل يكتمل
بالفرج ادعي الامامك بالك السانك يمل

أسأل الله برحمته.. ربي الفرج
عجلنه بطلعته.. ربي الفرج

يجي شايل لوه
ويشك صدر الهوه
حبيبي المنتظر
عشك ماينتهي

محمد هادي العقابي

اكصد يمهدي بهل رزيه
وهل الدمع بالكاظميه
اجنازه الكم غريبه بعازة متون
..................

يالحزنك يعيش اوياك كل يوم
جدك يابو صالح مات مسموم
الله يعين روحك شافت الضيم
گلبك عالاهل يوميه ملجوم

الفاكد احبابه يعيش غربه
وبس الله يدري بحال كلبه
تعال اوياك جيب ادموع العيون
اجنازه الكم غريبه بعازة متون
..........................

بسجن اظلم وجوه الكاع مسجون
لا نسمة هوه ولا ضي للعيون
عايش غربته الكاظم معانات
وياطوك الحديد مثكل المتون

والليل يخلص دمعه دمعه
الحسره شكبرهه الجوه ضلعه
لاخوان تفزعله ويحضرون
اجنازه الكم غريبه بعازة متون
.......................

مامرتاح ابد ومساهر الليل
وحياطين السجن جن حافر الخيل
على شوفت بناته بصدره حسرات
وفراك الاهل ماخله كل حيل

لا اهل يمه ولاعشيره
والوحشه بعيونه چبيره
الهضم والضيم ماخلن عليي لون
اجنازه الكم غريبه بعازة متون
.........................

امن الطاموره مل وشيب الراس
من الخنكه كوه ايجر الانفاس
باب الحاجه هذا بجفه كل خير
الشامت على بابه مخلي حراس

والشيعه منتظره علامه
بلكت يردلهه بسلامه
وكل يوم اليمر بيهم ينطرون
اجنازه الكم غريبه بعازة متون
........................

شايل گلب ينبض بس بالجروح
وعلى اوليده الرضا بكل مغرب اينوح
انحرم من شوفت ابنه وروحه تشتاك
وشيطيب الوجع لو چان بالروح

موجوع كلبه وظهره مايل
من الفركه لو من السلاسل
وين اولاد هاشم خل يشوفون
اجنازه الكم غريبه بعازة متون
..........................

باچر عالجسر موعد للدموع
والنبضات توكف جوه الضلوع
يمهدي احضر وشيعه بدمعة العين
الكاظم مات كلبه هواي مشلوع

يالمهدي الله يعينك بهاي
ويعظم الله اجرك يمولاي
گلبك منفطر هليله محزون
اجنازه الكم غريبه بعازة متون

محمد هادي العقابي

https://youtu.be/epUTpAC_Wts?si=T9WSSTvPTXw1gAOK

هذا العمر ياخدام يمشي ويخلص فتره
محلاته لمن تكضيه خادم تواسي الزهره
..............

شد حيلك وطيع الضلعهه مهشم
والله بدون الزهره ابد ماتسلم
لم حسن تستاهل تصب دمعك دم

وي فاطمه الراد ايفوز تخنكه عليها العبره
..................

صفيها نيتك وعرف المخدومه
مسطور خدهه وغمضت مهضومه
تلجمها بالك ماتت وملجومه

ماتلكه مثل الزهراء هاي الحنينه الحره
.............

اليخدمهه طول العمر رافع راسه
وامن الزجيه هيبته ونوماسه
اليذكر الزهره اتطيب كل أنفاسه

اليخدمها مو ياهو الجان المن عدها حصل نضره
................

يصبح ملك كلمن يحصل نضره
وشلون نضره من تجي امن الزهره
تغير حياتك كلها ام العتره

حالك يصير احسن حال من تخدم اعله الفطره
...............

للزهره كوم بكل وكت وتحزم
واكضي العمر خادم وابد ماتندم
من حقك بهاي الخدامه تشيم

مبخوت كلمن تلكاه بالمجلس ايدك صدره
.............

واسيها والمجلس ابد لتعوفه
وذكر حسين وغربته وطفوفه
دمعك لون طاح الزجيه تشوفه

هذا الدمع دين بدين وترده يوم الحسره

محمد هادي العقابي

يادنيا اشهدي الي.. بمحكمة رب السمه
خادم كضيت العمر.. متمسك بفاطمه
فتحت عيني وبالصدر عَبره
رايد مماتي بمجلس الزهره
متمسك بفاطمه
....................

يادنيا عندي شهود.. لولاها ماكو وجود
حجه عله العتره
كلشي انخلق الهه صار .. حته الأرض والبحار
مخلوقه للزهره

فاطم شفيعه واعضم انسانه
خدمتهه روحي وروحي ربحانه
هنيالي تقبلني واضل خادم
يادنيا بيج ايامي خلصانه

اتمنه اعيش بذكر.. ماينمحي شما جره
ماعندي شي للكبر .. بس خدمة الطاهره
امنيتي هايه وبالگلب جمره
رايد مماتي بمجلس الزهره
متمسك بفاطمه
.....................

يادنيا ضلي وراي.. بمجلسهه اشتم هواي
وتتغير انفاسي
منبرهه صحه الضمير.. خليته هوه المصير
تاج وعلى راسي

الدم يسري بالشريان كل عمره
هيج انه گلبي بمنبر الزهره
حسبتني ابنهه وخوش ربتني
امي وفضلهه بداخلي شكبره

يوميه اصحه الصبح.. واغسل عيوني بدمع
بداخلي الباب احترك.. وبروحي كسرت ضلع
يوميه ادعي الباري من أقره
رايد مماتي بمجلس الزهره
متمسك بفاطمه
.......................

خلصانه هاي الحياة.. وحب الزجيه النجاة
من الله هل نعمه
اني عبد للبتول.. سمعاً وطاعه شتكول
تامرني بالخدمه

ماعندي غير الدمعه البعيني
وحسين احبه وهيه تدريني
اني وحواسي وكلشي يرجعلي
اندور عله الناعي اليبجيني

بكلشي خساره اكو.. وصاب الگلب جم جرح
يادنيا كلج وهم.. بس الحُسين الربح
وبحبه اقسم اني عالعتره
رايد مماتي بمجلس الزهره
متمسك بفاطمه
..........................

غير الرضا ما اريد.. تقربني وآنه البعيد
مجلسها ماعوفه
بدموعي اروي ضماي.. دموع العزه عندي ماي
ترويني معروفه

كل العطايه العندي من عدهه
وباب الگلب بالخدمه ماسدهه
ماعندي غير الزهره تشفعلي
هيه الامل وجفوفي ماردهه

من عدهه اطلب اضل.. وامن الطلب ماامل
تسجلني ويه الخدم.. باخر أوراق السجل
يادنيا صارت تكبر الحسره
رايد مماتي بمجلس الزهره
متمسك بفاطمه
.........................

لابد يزول الضلام.. وعيني تشوف السلام
والحضره مبنيه
زاير اجي ويمهه اطوف.. وبالحضره شيعه الوف
جنهه اربعينيه

مشتاكه روحي هوايه مشتاكه
بدموعي وي شباجها اتلاكه
ماشد علك بي انه اشد گلبي
ماينحمل يادنيتي افراكه

لازم يحين الوكت.. من تدك ساعة صفر
وبعيني اشوف الذهب.. گبه ومناير صفر
يضهر إمامي وآنه منتضره
رايد مماتي بمجلس الزهره
متمسك بفاطمه

محمد هادي العقابي

مولد رسول الله صلى الله عليه وآله

عطايه الناس لابد منه بيهه
الامور المانحلهه منه بيهه
الامه الما توعت من نبيهه
يضل بيها الضلم والجاهليه

محمد هادي العقابي

انخلق هل كون كله الخاطر اعيونك
يالبيك العقول تحيرت كلهه
شحجي اعله المعاجز وادخللهه منين
والتاريخ عاجز ماوصل حلهه
ضلمه الدنيه جانت والجهل بالناس
وجفك بالإسلام العين كحلهه
هبل من طاح محد فسرلنه شلون
امن الوكفه تعب؟ ماكدر يحملهه
لذالك فكرت يمكن نتيجه الكيت
بعقلي القاصر ومقتنع من حلهه
جدمك يامحمد يوم لاح الكاع
من ثكلك الباري الدنيه زلزلهه
الله يحبك وسر حبه ماضماه
حبيبي ايگلك وبس الك گايلهه
ماضل لانبي ولامرسل ايضاهيك
كلها تضل وراك وانته اولهه
بميلادك الليله مانوج شموع
كون الروح من الفرحه نشعلهه

الفرح معلوم بشره ماهوينه
هوينه وبعد عنه ماهوينه
نبينه وغيرك انته ماهوينه
ونضل منك فقط ناخذ وصيه

محمد هادي العقابي

كل السماوات والاملاك الك ودها
وكل الاراضين تحييك يمنقذها
المولدك نبينه
بالفرح اجينه
والورد بدينه
هالليله
.................

نورك غزه عيون النضر
يااطهر وانقه بشر
يالمصطفئ حبك كبر
بالدنيا شفته.. وشخصك عشكته
هوه العشك من أوله
انت الذي تستاهله
الغيرك ابد لا ماحله
يحلالك انته.. گلبي ملكته

بميلادك الليله الأمل يارحمة الله
كل الوجود بطلعتك يالهادي صله

نورك كحل عين الزمن
انته الابو وانته الوطن

يانور الأنوار بالأسرار علم عندك
كل المعاجز اجت زايره المهدك
الليله مامثلهه
الله الك جعلهه
وبلطف شملهه
هالليله
..................

غرد الطير امن الفرح
وگلب السماوات انشرح
بارض وسمه اسمك صدح
فرحه وبشاره.. حبك تجاره..
بميلادك الخير النزل
ماشفنه مثله ولا حصل
يمهدم اصنام الجهل
واهل الحجاره.. عاشوا خساره

من طاحت اصنام الكفر والجاهليه
هاي العلامه المولدك سيد البريه

ربنه الك سوه العجب
مثلك منو منه اقترب

ياصانع الخير والامجاد ضوه سنينك
يارحمه للناس والإسلام يضل دينك
يااصل عشكنه
نحبك وتحبنه
مولدك جمعنه
هالليله
....................

ضحكت الدنيه بشوفتك
وتغازلت بمحبتك
والكون كله بخدمتك
بأمر الجلاله.. وارث خصاله
من عطرك ايغار الورد
من تمشي لعيونك يصد
انته بخصالك منفرد
يابو الرساله.. بدر بكماله

كلمة حبيبي بس الك كالاهه ربنه
هنياله كلمن يخدمك والترضه عنه

أجمل عمر في خدمتك
انته الشفيع الامتك

بميلادك اليوم نهنيك يبو الزهره
وتحوم الارواح فراشات على الحضره
ياهله بمحمد
غالي الله يشهد
والفرح تجدد
هالليله

محمد هادي العقابي

علي الاكبر (شور)

شاغل فكري    شمعت عمري
لونك احس   مو مثل امس   وجهك ذبل
..................

علي يبني ونضر عيني شيصير وياك
ابوك آنه وعِلم گلبي وشفت عيناك
دخبرني الحزن بيّن على محياك
يروح حسين ما اكدر على فركاك

فراكك تدري    يكسر ضهري
حملك حمل   من انسئل   راح الامل
.................

اشوفنك تصد عينك على الخيمات
بعدنه بخير والحره بأمان تبات
اخياتك يالاكبر ذني مهيوبات
تره عمتك بعدنه تعاشر الحسرات

دينك رايد      مثلك واحد
إحمي الخدر    النه النصر    ربك جعل
................

كلام هواي يابويه  وصعب يالزين
لجن خليني اخبرك بالتشوفه العين
تروحون وعليّ تفزع تره الصوبين
يضل وحيد بين اعدآ ابوك حسين

موت الناصر    يوم العاشر
كل صحبتي    وحته اخوتي   اه الكفل
................

يبويه مصاب من عنده يّشيب الراس
تشوفه عيوني وبصدري تموت انفاس
وّحكك ياعلي يبني فلا ينقاس
تطيح اجفوفه كدامي البطل عباس

وسهم بعينه      ومطبرينه
حزام الضهر    يم النهر     ومشي بعجل
................

تضل زينب وحيده وبويه كلنه انموت
وتهل عبرات عالخوه ودمع مبخوت
تصيح اعلينه لاكن مانرد الصوت
اطيح آنه وسهم نص كلبي يبني يفوت

ويسلبوني   ويذبحوني
وخيل الغدر   فوك الصدر    هذا الاجل
..................

يالاكبر هذا يومك ما اله تأجيل
وشوفن كل كتر دمك يضل ايسيل
عليك اني صبح يابويه جسمي انحيل
اجيك المصرعك وجدامي بيه تميل

يّطول دربي     تشلع كلبي
فراك الولد    هوه الاشد    عند الاهل. 

محمد هادي العقابي.