يا طارشي بالليل بالليل
بدموعي اخذ هاي المراسيل
روح لهلي الكلهم بهاليل
جدامهم سولف بتفصيل
گلهم حرمكم شافت الويل
نسوان ولياها مچاتيل
سوط الشمر ما خله كل حيل
وحسين ابنكم سحگته الخيل
...
وين الطارش الانخاه وينغر
ويگطع فيافي الهيمه والبر
ويِلكد مُهُرته ولَهْلي ينحر
وايصيح صوته اللهُ اكبر
يا آل طالب يا الـ جعفر
بتكم ابين الزلم تعثر
وكلسا تطيح اگبال منحر
وحسين فوگ العطش والحر
ما ظل عظم بي ما تكسر
...
يطارش هاك اخذ وياك مكتوب
واوصل اهلي واوگف عله البوب
وترس بصوتك كل الدروب
يامن ناركم تنوج بالغروب
بالطف خدركم بات منهوب
وحسينكم عالوجه مگلوب
سلّبو تاجه وسِلبو الثوب
ما شفنه ميت گبله مسلوب
...
يا طارشي لو نامت الناس
روح لهلي البالعرش تنقاس
البيبانهم كل يوم تنباس
حيهم تصيح لگطع الانفاس
زينب ولوها وادم ارجاس
وطگو متنها خلاف عباس
وحسين ظل جثه بلا راس
وعفت الصدر بالخيل ينداس
...
يا طارش اگصد للمدينه
تلگه مره ثگله وحزينه
ام البنين امي الحنينه
گلها ابو فاضل ذابحينه
بالسهم لمن طفت عينه
اگبال الزلم عثرت سكينه
ومن طاحن يساره ويمينه
شفنه الشمر چتف ادينه
من وگع حماي الضعينه
للشام يا يُمه انسبينه
...
يا طارشي لا تركب النوگ
إلكد الما بالخيل مسبوگ
وهناك صيح بگلب محروگ
لزينب حچاية سبي متلوگ
الشيّب گلبها طبت السوگ
يشوفون چفها بحبل مشبوگ
شفت الحسين بخيل مسحوگ
وصدره اعله ظهره عفته مطبوگ
...
يا طارشي والمسه امسه
اوصل لگبر الحسن هسه
وگله الولد ما شاف عرسه
وإلحگ عالاكبر طفت شمسه
وعباس لخته ضحه نفسه
وحسين يا رابع الخمسه
مذبوح والحافر يرفسه
وخدر الحرم ياهو اليحرسه
...
يا طارشي هالساع هالساع
روح لهلي الگروم الاسباع
وخل الخبر بالكون ينذاع
خدر الهاشميه بكربله ضاع
وحسين عاري يريد فزاع
طشرو كل جسمه عله الگاع
گطعو ركبته بسيف گطاع
وفوگ الهزيله صار الوداع
...
خادم الحسين ( عليه السلام )
كرار حسين الكربلائي
( ابو كميل )

في خدمة اخوتي واساتذتي خطباء المنبر الحسيني عليه السلام

ابيات نعي للسيده زينب عليها السلام على بحور واوزان مختلفه وارجو دعائهم

ملاحظه: ستجهز ابيات نعي للعشره الاولى من محرم الحرام وارجو دعائكم
...

حيدر يه انفاسه مولانا الاكبر
والغيره من عباسه مولانا الاكبر
محله خصاله .. محله جماله
...
هله يا بو الشهامه
محله هالابتسامه حبيبي يا علي
هيمتني بجمالك
گلبي رايد وصالك حبيبي يا علي

عاشگ وصاله .. محله جماله

هذا هيبة ناسه مولانا الاكبر
والغيره من عباسه مولاناالاكبر
....
هذا نورك تجله
والفرح النه يحله حبيبي يا علي
تدري حبك يالاكبر
كل زمن بيه يكبر حبيبي يا علي

نور الجلاله .. محله جماله
ما ينوصف احساسه مولانا الاكبر
...
يا علي حيدر الجد
وانت تشبه محمد حبيبي يا علي
يا قوافي ترسمك
وصاحب الغيره عمك حبيبي يا علي

ضيك تلاله .. محله جماله
من الگمر نوماسه مولانا الاكبر
...
منك اخذ وفائي
انت اول فدائي حبيبي يا علي
يا حسيني الهويه
من المهد للمنيه حبيبي يا علي

حته بقتاله .. محله جماله
والگابله يگص راسه مولانا الاكبر
...
لجيتك بالمحافل
احله فرحه وهلاهل حبيبي يا علي
مولدك بي اشارك
لوالدك جيت ابارك حبيبي يا علي

ابعث رساله .. محله رساله
الزود منك ساسه مولانا الاكبر
...
خادم الحسين ( عليه السلام)
كرار حسين الكربلائي
( ابو كميل)

اسألكم الدعاء
عند دموعكم

https://youtu.be/cgmbgsERVnk?si=cLTRLE4EE3T7Sd1X

الما يحب الكرار ما عنده غيره
...
نبايعه بيعة وفه هالليله
علي سلطان البريه ادخيله
الما يوالي حيدره يا ويله
هذا لا ام لا ابو داعيله
وبجهنم ياناس حتماً مصيره
...
عمري يكبر والعشگ بي يكبر
علي هو آمّن يجيب المظطر
ما اخاف من الگبر والمحشر
وما يزل جدمي وعلي عالمعبر
عندي حب حامي الجار يسوه العشيره
...
علي خطيت بضميري حروفه
شمس بعيونه عمه الميشوفه
صوت عدنه ويعتلي للكوفه
نعوف كلشي وحب علي منعوفه
الما يبايعه صار بايع ضميره
...
المؤمن بحبه صبح عنوانه
الما يحبه فارغ من ايمانه
أشهدُ ان علي مولانه
نگولها غصباً على العادانه
بالحشر خصيمه حيرته حيره
...
بالگلب نبضي علي سميته
بالصلاه فرضي علي صليته
من گبل ما انخلق واليته
واليعادي المرتضه عاديته
لأن شفت الكرار لله سفيره
...
لا تلوموني ملك انفاسي
حب علي عرشه بوسط احساسي
انه عشكي حيدري عباسي
من ابو فاضل عندي غيره براسي
يشهد اعله الميثاق بدر العشيره
...
خادم الحسين ( عليه السلام)
كرار حسين الكربلائي
( ابو كميل)

سبع الدجيل وماخاب كلمن تعنه لبابه

لوصابك بسهمه الزمان الغدار
لسيد محمد اكصد ولاتحتار

سبع الدجيل المايرد الزوار
جم حاير وجم معلول رد والفرح جلبابه
.........
شارات اله معروفه تعرفها الناس
من تعتنيله ترد مرفوع الراس
باب الحوايج مثل عمه العباس
طيب گلب والينخاه لامايرد احبابه
......
بالك يصيبك شك إذا تتعنه
چفينه جنه وماتشح الجنه
باب الاله واطلب شتتمنه
خل گلبك اليحجي وياه حاشا يرد طلابه
.....
يوم العسر والضيج باسمه انادي
ادخيلك انه يبن الامام الهادي
هليله من عندك اريد مرادي
منك اجدي وموعيب يبن الكرم واسبابه
......
عليك اقسم بكسر الضلع والطبره
بصدر الحسين المنهشم وبنحره
نظره نريد وتكفي منك نظره
ذوله احنه خدام حسين لجدك نون ومصابه
....
ياهيبة الله وياجلاله وضيه
نحلفك بعمتك زينب المسبيه
بجاهك حوايج شيعتك مگضيه
ياسفرة الله الميخيب كلمن سجد باعتابه
.....
ادعيلنه لگبرك نجي ونزوره
براية علي البيكم تظل منصوره
والمنتظر ربنه يعجل ضهوره
ثارك وثار الاجداد هو اليصفي حسابه
.....
خادم الحسين( عليه السلام)
كرار حسين الكربلائي
( ابو كميل)

وين هاشم خل تهد بخيلها
وتاخذ بثارات سبع ادجيلها
..
خل تِشد وتِهد سوه هدة زلم
التِنّدِب ما تِندِب بيوم الحزم
غيضها يصعد سمه ويمطر عزم
المايلات اهيه التعدل ميلها
...
اهي اتعدل المايله بيوم التميل
وما تِهَدل امتونها بحمل الثجيل
تنطي دمها وابد ما تنطي الدخيل
خلفة اليحمي الدخيل ادخيلها
...
ادخيلها اهل المواضي الباشطات
الما تسلهم عينها بذل وتبات
حيهم اليرگون ظهر الصافنات
المن تهد يلبد نجمها بليلها
...
بليلها يلبد نجمها من تهد
ومن يِسَيَر الگيض تذبحله برد
بالوغه بغير المغانم ما ترد
الماكو گدها وماكو جيل بجيلها
...
الما لهم بين البشر كفواً احد
مسابگ اويه الريح خل توصل بلد
ابسم بني العباس راحلهم ولد
للتِهَدّم حيله تِهدِم حيلها
...
جرح عدهم كلف يدي وما يطيب
سيد محمد يهل يثرب غريب
چم بدر وشچم شمس منكم تغيب
والنعوش چفوف غربه اتشيلها
...
مته لغايبكم روايه العز ترف
ومته يدچ الگاع والگاع اتخسف
ويرد صاع الثار كل صاع بألف
لمحكمة سيفه الجناة ايحيلها
...
ايحيلها بسيفه ويرد حگه لهله
وياخذ بثاراته والعيش ايحله
تنطفي نار الخيام بكربله
بطلعته هاي الظلامه يزيلها
...
خادم الحسين ( عليه السلام)
كرار حسين الكربلائي
( ابو كميل )