#قصيدة للمشاية
*مخول للتعديل والتنقيح

خطار الحسين...هلا بيهم هله
خطار الحسين..كصدو كربله

خطوه تمشي الك جنه عرضها ارض وسمه
صفي نيتك حتى تضمن تسجل اسمك فاطمه
اذكر الراحت سبية حافية وحر وضمه
واسي زينب بخو زينب مو دمع ابجي دمه

وبنحب الونين.. واسي العايله
خطار الحسين.. كصدو كربله

شما تكون ارسم طريقك وفكرك الي يتضح
انته ساعي حتى تدري ليش هوه منذبح
ليش جسمه على تربه وراسه عالي ع رمح
حسين من الله اصطفاء وراد بيه كلشي يصح

بدمه حيه دين.. ويخسه القاتله
خطار الحسين.. كصدو كربله

علم واخلاق وقداسه خل طريقك للعشك
خلي بالك دوم واسئل ليش جسمه منسحك
ليش عنده ايتام طلعت تركض وخيل وحرك
من علة راسه على رمحه اعتله بيه الصدك

رب العالمين..رفعه للعله
خطار الحسن.. كصدو كربله

راية بيدك خل تذكرك ببو فاضل والأدين
وخطوه خطوه اذكر الموقف المر بيه الحنين
من طاحت الرايه ارتفع صوته انكسر ضهر الحسين
ورد على مهره محدب يصيح زينب بالونين

اتلكي الحسين..طايح كافله
خطار الحسين.. كصدو كربله

وبوصولك اكصد اخيامه واذكر ما جره
من رجع وحسين وحده، والكفل ع كنطره
من رجع وشافته زينب الفراك ظهره كاسره
هل من ناصر صاح بطف صير انته ناصره

فدوه للحسين..افدي العايله
خطار الحسين.. كصدو كربله

منتظر الكعبي

ليلة ظلمة وناس غربة
ونسوه وحدهن يضلن بالعراء

الموت اهون صار عد هاي العيال
عكب ماضاكت طعم ذاك البلاء

حسين ماعدهن اليله ولا ابو فاضل
ولا خيم عدهن فقط عدهن عباء

والعطش اوف العطش جتال اخوهن..!
فوك كل هذا يضل بلا رداء

الله اكبر على المصيبة الها تمطر
دمع مو دم السماء

لأن دم حسين وابنية الرضيع
صعد العالي الاعلياء

ولذلك السمه من حسين استحت
من وصلها دمه طلكت كل السحاب
وحتفظت بذيج الدماء.

جبتلك ماي وينك ياضوه العين
اركض وأعثر بذيج الصواوين
عطشانه وجبتلك ماي...يهون اكبالك اني ضماي
يحسين

جبتلك ماي شط هذا الفرات المنه محروم
اركض بصواوين واصيح وحيلي مهدوم
واسمع ناس كالت بلفله و مسلب اهدوم

سليب وحيل مابيك...اجيتك بويه ارويك
يماي اعيوني طايح وين.. يحسين
الضمة ماهمني غلطان...المهم ماتبقه عطشان
خل بيدي اشربك وغمض العين.. يحسين

من الخيل هجمت اني فريت
وجبتلك ماي  تشرب اي  تمنيت
هيه هاي كل منياي... عطشانه وجبتلك ماي..
يحسين 

امنيتي اوصل الراسك يبويه العلى رمح ذاك
من ذا بوية هجي الذابحك ومكطع اعضاك
من ذا ايتم  الطفلة التي امدلله برباك

من حركوها الخيام.. اجيتك ولطم الهام
وجدم ماشالني من الخوف... يحسين
ورد يم هاي الاشواك..منهو الهجي خلاك
كتر مابيك مالايحته السيوف.. يحسين

نسيت التعب يمك وانته مجروح
صعبه اعليه اكول حسين مذبوح

شفت بيك الجروح اهواي.. عطشانه وجبتلك ماي
يحسين 

عمتي زينب المذعوره ليه تركض اتصيح
كوم اتلكه اختك بويه اجت وتكوم وتطيح
الدلال الراح موهينه عليها شامت يصيح 

منا مرت بساع.. ماشافتك على كاع
بلغبره انفرش جسمك... يلحنين
صحت اهنا يعمه...ألم اعضام جسمة
خربو ليش كل رسمك... يلحنين

تكوم وياي ترجع للخيم كون
من البجي راحت تعمه العيون

يمك متت من ابجاي... عطشانه وجبتلك ماي
يحسين

يمك ارد اضل ومني اخبرك قرطي مسلوب
وجيتك نار خيمتنه الجبيره حاركه الثوب
تعذرني ييويه انته اكثر مني متعوب

اصد اعليك ماشوف..بس طعنات السيوف
بس اثار دوس الخيل.. يحسين
واعدني التقي بيك.. حتى امشي وخليك
عمتي ادور بهليل.. يحسين

وبذيج الخرابه التقي وياك
ماريدك تجيني مكطعه اعضاك

بخرابه اتشوف عيناي.. عطشانه وجبتلك ماي
يحسين

منتظر الكعبي

سلام عليكم
راح نبلش باذن الله كتابه القصائد لمحرم الحرام هذه السنه
اطلب من خدام الامام الحسين عليه السلام ارسال الحان لي على الواتساب 07830700518

نسئل الله التوفيق

كعديه شور
#السيدتي زينب.ع.
(١)
بذاڰ الرعب.. طلعت وترڰض بلفله
بهيمه وصحاري ڰربله...ياويلي مشلوعه ڰلب
بذاڰ الرعب.. حيرتها اخوها المنڰسر
كل وذره من جسمه بڰتر...ماعرفته فوڰ الترب

هذا اخوي الماعرفته..ونجاني يمه اڰعدت
بريحت الخوه وصلته..تمنيت حاله ماشفت
الخيم وجوها وسئلته..ترضاها الڰ ترڰض اخت

ڰوم اڰعد وياي تحامي خيامڰ
ضاعت يخويه بحرڰه يتامڰ
شينفع ششدها جروحڰ غميجه
ومن صدرگ شلون اطلع سهامگ
*
(٢)
ناده الضهر.. هل من محامي ع خيم
ضل لا له ناصر لا علم...بطيحت اخوها ع نهر
ناده الضهر...هل من يدب النصرتي
وڰعو على الرمضه اخوتي.. ونڰسر ضهري بلڰمر

ماڰو من ناصر ينصره... ويشده ضهره المنڰسر
محني من الڰوم ضهره.. واحد ينصره ينتظر
ثاري تدوس الخيل صدره.. وماهمه بس همه الخدر

داست علي خيل وباله عليهن
بسحڰه يهجمون يجون اديهن
من حرڰ الخيام يطلعن يدورن
وبيا ڰتر طاح يويلي وليهن
*
(٣)
باجر هزل.. ومن الدلال الڰيد ادين
ماڰفه همه امسلبين..يجرونهم ليش بجبل
باجر هزل.. والحادي ماهو  من الاهل
لاعلم لاضل الڰفل...شتڰول لمن تنسئل

وين اخوتج صعبه هايه.. احجايه تڰسر الڰلب
من ترد بلايا رايه.. وخوتها ڰلها على ترب
هاي الكفيله ويا السبايه... باجر ترد من الغرب

وين اخوتج وين يجاوب دمعها
عفت اخوتي وجيت يڰسرت ضهرها
هيه الڰفيله عڰبهم على الا طفال
ومن بعد اخوها المحامي ڰفلها
*
(٤)
بذاڰ القصر...من وڰفت رقيه بجت
ومن البجي اعيون انعمت.. ولجيته اشڰد تنتظر
بذاڰ القصر... اتعجب ويسئل شڰو
ڰالوله طفله اتريد ابو... اخذولها راسه امر

وسڰنه تسڰت بيها ڰوه..ولن جابو الراس بطشت
لفه  هذا حسين توه.. ياريت ميته ولا شفت
وصاحت يبويه هاي بلوه.. وماتت ع راسه اعرفت

ماتت ع راس رقيه ابجيها
من بطشت رد يراسڰ وليها
وحرت اني سڰنه تكول بأخيتي
وزينب يحيرتها هاي الي بيها
*
(٥)
ضعنه رجع...الڰربله ومن رجعته
ڰل وحده اخوها ڰصدته...ولنوح علشاطي انسمع
ضعنه رجع...لن هاي زينب علنهر
ڰعدت ومڰسوره ضهر...والحزن اعليها ڰبع

ها يخويه من رحيلي.. رديت توني بضعن
اڰعد يخيي وياڰفيلي.. خياتڰ العندڰ اجن
من الغرب انهدم حيلي..ومتوني حيل اتهدلن

ڰوم اڰعد وشوف اخيتڰ يخوها
لديار الاجناب سبيه خذوها
وهسه اجتگ يخوها اگعدلها
من عگبگ الگوم يعباس سبوها
***:
منتظر حسين الكعبي

سلام عليكم
اليريد الحن يكتب بالتعليقات

✨اسعد الله ايامكم... بمولانا محمد بن علي الجواد {عليهم أفضل الصلاة والسلام}
ذكرى اطلال نور ولادته ١٠رجب..

-من درره الفاخرة.
-عن مولانا الإمام محمد بن علي الجواد(عليهم أفضل الصلاة والسلام ) : ((إن رضا الله وطاعته ونصيحته لا تقبل ولا توجد ولاتعرف إلا في عباد غرباء، أخلاء من الناس، قد اتخذهم الناس سخريا لما يرمونهم به من المنكرات))
المصدر : بحار الأنوار.
-المؤمن ليس من اهل الجاه والشهرة والاموال.

✨جمعة مباركة✨

-اللهم صل على محمد وال محمد
-عن النبي الأعظم-صلى الله عليه وآله وسلم-: ((مَا مِنْ أَحَدٍ صَلَّى عَلَيَّ مَرَّةً، وَاسْمَعَ حَافِظِيّهِ، الا أَنْ لَا يَكْتُبَا ذَنْبًا لَهُ ثَلَاثَةَ أَيَّامٍ))
-?مستدرك الوسائل ج5 ص 335 .

يافاطمة مولاتي

صفينة بدار ضلمة ياضوه البيت.. هجموها الديار
حسن وحسين ناحو واني حنيت.. صعب الانتظار
ابوي بدمعة اشوفه يكول ياريت.. قبلها موتي صار

فكدج صفة هوه المالة حيل
وكت المغرب اليخنك ترة الروح
من هذا الزمن اني تاذيت
وصار الضلم كلش عطره يفوح

غادرة.. القوم هاية.. غادره
اجت ليج بنارها وازلامها غايره
بلاسبب.. هجمو.. بلاسبب
وانتي وحدج على بابج والهظيمة مرة

محسن ريت اخونة انشوفة وياج..بس هذا حلم
بالبيت ويصوتة شمحلة مسموع.. يبجي ويبتسم
امنية بكلب جانت هاية والموت.. صارنة خصم

دمج بقة فوك الارض كالسيل
يفور من الفجيعة بذاك المجان
جان الطفل امنية اخو يصير.
بلطف يفزعنة اكبال عدوان

مأملة.. يفزعلنة.. مأملة
طاح فوك الكاع ومحد استقبلة
والالم.. ماسمحلج.. الالم
ادنكيلة ومن الكاع يشيلة جفج للعلة

حركة بكلب صارت والكلب شاب.. وجرحنة مايطيب
ابونة اول فجيعة اتمرة مهظوم.. وبدموعة خضيب
خطوة امشي وطيح وبالي محتار..شمالك يالحبيب

شمالك يابعد روحي يمجروح
الجرح يابوية ريتة بية وارتاح
شفتك منقهر من يوم المصاب
وتبجي اتكول عمري والولد راح

مودعة.. ريتني.. مودعة
ولا اشوفن هجي سوت بيك الفاجعة
وللكبر.. من عسني.. للكبر
اني افوت ومحسن وامي الك راجعة

سمعت حسين كاعد وكت الغروب..وباب الديار
كلتلة خوية خيرك كال على باب.. اشوف اثار نار
كلتلة ادخل يخوية يكلي ياريت..المها بضلعي دار

اشيل الالم عنها ودفعه الباب
وبسمار البضلع الزهره منبوت
وتعيش امي وابنها محسن يعيش
على هذا فكده اهون الموت

انظره.. البابها.. انظره
على حايط دمها ويلي المنها جره
اتخيلت.. جنة كال.. تخيلت
طاح محسن على ارض واشلاءة مطشرة

هاي بعد خلصت والعمر صار.. سفينة للجروح
باجر اني اركض بين الازلام.. حسيني من يروح
وباوع فوك تل صدره برجل خيل.. ماخلتلة روح

احير بعائلة وطفالي وخيام
واشوف الدنية عجت نار وصياح
ايتام اني اكفل عكب عباس
عكب ما راسة يصفة فوك الارماح

العايلة.. حايرة.. العايلة
اشلون راح اتبات صحره بلا خيم كربلة
ناطرة.. الزلم جانت.. ناطرة
وكعتة وهسة اشوفة عاري جسمة بفلة

منتظر الكعبي