-لمولاتي  السيدة  فاطمة الزهراء عليها السلام

- كَهف  الحنان- ( ربيع الثاني. 1446 )

يا كَهف  الحنان  "    يا خَيمة  وأمان 

اغيثيني    "       اغيثيني

----------------------------

انتي  كَهف هاي  الخَدّم  -  والخير انتي  هوايّه

مولاتي  رايد   نَظرِتج   -   ماعندي غير احجايّه

انتي  الأمان  بدِنيِتي   -  رزق  الدموع  اقرايّه

خليني  بالخَيمة  اضل   -    والروح  امجوايّه

يا غوثَ  الزّمان   "    يا خَيمة   وأمان

اغيثيني    ""      اغيثيني  

-------------------------

كل  عمري   اندب  فاطمة  -   غيثيني  يامولاتي

امي  الحنونة  بكل وكت  -   ناذر  الج  دمعاتي

بلا  خدمة ميت انحسب   -  جمرة حزن  آهاتي

اتمنه  اموتن  من صدك  -  اعله الضلع حسراتي

الخدمة  الضمان  "    يا خَيمة  وأمان

اغيثيني      ""      اغيثيني 

--------------------------

وفقيني  يا ام  الحسن   -  هاي المجالس روحي

باب  الحُسينية  الهوه  -  نسمة  هوه بجروحي

بكاروكي عالمقتل عشت  -  والمنذبح مذبوحي

عاشور  كَبرني  جرح   -    والفاطميّة  بنوحي

مفتاح  الجنان   "     يا خَيمة  وأمان

اغيثيني    ""     اغيثيني 

-------------------------

عاشوري  زهرائي  اللقب  -   أجمل أسم  يافاطم

للموت  اني   فاطمي   -     اني  بخدِمتج  هايم

الكَلب   لازم  يحترك    -    هايّه صفات  الخادم

الشايل  بكلبه  الخِيم   -    متهِمه  كلّ   الوادم 

بكلبي  واللسان    "    يا خَيمة  وأمان

اغيثيني   ""    اغيثيني 

----------------------------

الغوث  لو  ماكو   دمع   -   الغوث  من   إذنوبي

لو  انحرم  من  مجلسج -    يعني  ظلام ادروبي

الينطرد  فشله  وعلي  -  الخدمة  سِتر  اعيوبي

لون الحزن هو  العشك -  بالمجلس اسود ثوبي

لو  حانَ  الآوان    "    يا  خَيمة  وأمان

اغيثيني       ""      اغيثيني 

----------‐--------------

الخادم-  ابو فدك الشامي ✍🏻

-كعدية-  للسيدة فاطمة الزهراء عليها السلام

- اُم  الذبيح  - (  شهر ربيع الثاني.1446 )

اني  اُم  الذبيح   وضلعي   مكسور

الليالي  الفاطميّة   ثاني   عاشور

عيني  عله  الخدام  "  هاي  اني  الزِجيّة

----------------------------

اني  اُم  المات  ضامي   وانذبح   بالغاضِريّه

بين  جرحي بين دمعي  كلبي  باني  حُسينيّة

عيني  عالخدام  اني   بالليالي    الفاطميّة

عاشور  ثاني  هذا  اِلي  "   اسمع  هلا  وادللي

خدام  انتو  بوعلي   "   واني  أمكم  الزجيّة

برعاية  فاطمة   كُلّ  اليخدمون

مو  ممنون  مَرّه   الف  ممنون

مشكورين  كل  عام   "    هاي  اني  الزِجيّة

--------------------------

اني  اُم  هاي  المجالس  ياهو  منكم  دره  بوضعي

وين  ما اسمع  مُصيبة  العبره تخنكني  بدمعي

لسّه  من الباب  اني  امشي  وايدي  اعله ضلعي

الضلع  ياناس  إنكِسر  "  مابين  عاشور  وصَفر

يذكِرني  من طاح الكُمر  "  عالنهر احزاني تِسعِيّ

اهناكَ  إنكِسر  جم  ضلع   ياناس

من حسين  ضل   بلايّه   عباس

المَقتل   طول   الايام  "  هاي  اني  الزِجيّة

--------------------‐------

ناري  من ذاكَ  المُخيم  جان  أول  طف   اليّه

بابي  محتركه  يوادم   لو  خيام   الزينبيّه

صِحت  بَردآ   وسَلامآ   عالغريبه  الهاشميّه

من أحترك  باب  الألم   "  اتذَكَرِت  حَرك  الخِيم

بعيوني  كلشي  انرِسّم  "  شلون بذيج المسيّه

الباب  أحترك   والنار   تِسعر 

شلون  بزينب   واللّهُ  أكبر 

روحي  بين   اِلخيام   "   هاي  اني  الزِجيّة

---------------------------

وين  اِلي  يِواسيني  عله امصابي  والجرالي

اني  من  مأتم  لمأتم  ابجي  يوميّه اعله غالي

انتحب  ليا  مُصيبة  مساهِره  كل   الليالي

من اسمع الناعي  يِون  "  لحسين  ياخذني الحزن

من  الدمع  شاب  الجفن  "   العاشر شسّوه بحالي

اني  اُم   الغريب  وكلبي  لهفان

اني  اُم   السبيّة   واُم   الاحزان 

شسّوه  بيّه  الشام  "   هاي  اني  الزِجيّة

----------------------------

ادعي  الله  يوفقكم  يا  أهل   هاي   المنابر

لا  تتركون  القضية   والعقيدة   والشعائر 

والبجالي  بدمعه  حقآ  بالكَبُر ماعوفه باجر

الخادم  اعرفه بنِيتَه   "   الخادم  اعرفه بلوعِتَه

الخادم  اعرفه بدمعِتَه  " بخِدمِتي ليصير حافِر

رسالة   للخَدّم    مِن   الزِجيّة 

نظف  كَلبك   وابجي   اعليّه 

انتَ  بدربي  ما دام   "   هاي  اني  الزِجيّة

---------------------------

الخادم-  ابو فدك الشامي ✍🏻

( على طور المرحوم حمزه الزغير )

( اني ام البنين ودهري ذبني ) ⬆️

-لمولاتي  السيدة  فاطمة  الزهراء عليها السلام-

- مُحرّم  الزِجيّة  - ( ربيع  الثاني. 1446 )

قادم   مُحرّم    الزِجيّة 

اسمَه  الليالي  الفاطميّة 

كلشي بدنياي    "     مولاتي  اوياي

يازهراء

--------------------------

النحر  عطشان  بعاشور

واهلال  السمه  منحور

مُحرّم  ثاني  بس مكسور

اسمَه   الفاطميّة  

ليالينا  بدمع  كل  عام

نبجي  بدمعة  الايتام

نبقى   لفاطمة  خدام

وليوم  المنيه

اُم  الذبيح   ويا كَسِرها 

اُم  المجالس   ياصَبُرها 

خيمة  وافياي   "     مولاتي   اوياي 

يازهراء

----------------------------

تِلمنه  خيمة  الزّهراء 

احنه  بدونها  صحراء

من نعطش  اسمها الماء

والكوثر  نهرها

ام الحسن  ام  حسين

هيّه  الخير   بالدارين 

هيّه  الروح هيّه  العين

بالخدمة  عطرها

الزهره  مفاتيح  الجنان

بالرحمة  نلكاها  الأمان 

تِرويني  بماي    "        مولاتي   اوياي

يازهراء

--------------------------

صلّى   الله   اعليها 

اغيثيني    اناديها

دوم  اوياي الكيها 

احلفها بالِحسين 

يا مولاتي   بالمنحر

بالغالي ابو  الاكبر

ولا  فد  يوم   تتعذر 

ولا تكلي  بعدين

بنظرتهه  نِخدم  آمنيّن 

ماعدنه  غير  أُم الحُسين 

والخير  هواي   "     مولاتي  اوياي 

يازهراء

-----------‐--------------

حلاّة  الخدمة  بالفطره

دمع   الخادم   بكَسره 

دعوة  فاطمة   نظره 

هنيالك   بفاطم 

تِسوه  كلشي  تستاهل

عله  البِسمار   لتجامل

عين  الزهره  بوفاضل

احذر  ها  يخادم

خليك  صاحب  القرار

لتجامل   بقِنفذ   النار 

تِخسر  بهاي     "      مولاتي  اوياي 

يازهراء

--------------------------

الباب  المحترك   باجر

نفس  الخيم  بالعاشر

والبسمار   والحافر 

يتلاكن   سويّه 

من تِسكِت  عله  الجاني

يعني   امشارك   الثاني

تصافح   أيد   سفياني

فَكِر   بالقضيّه

مِن   تبتِسم  يعني  القبُول

نفس  الحِرَك   باب   البتُول 

فَكِر   بالراي     "      مولاتي  اوياي 

يازهراء

--------------------------

الخادم-  ابو فدك الشامي ✍🏻

-لمولاتي السيدة  فاطمة  الزهراء عليها السلام

-محكمه -  (  ربيع  الأول - 1446 -  ) 

محكمه   ""       اْقضِي  يقاضِي المحكمه

محكمه   ""         اني   الزجيه    فاطمه

بِيديه  اِلكتاب    "   قَد حانَ   اِلحساب

محكمه    "      محكمه
..............................................

محكمه  والباري شاهد

دفع  باب  الدار  حاقد

اعله الزجيه

الاول  الثاني  بحقدهم

ماكو  كل  رحمه  ابكلبهم

ناصبيه

ربي  اشهد  ذوله  هُمه  الما رعوني

شِعلو  ابابي حطب  ويها جموني

يا سِمه   ""          شِهدِي  عليهم  ياسِمه

ياسِمه    ""          ماتت  شهيده  فاطمه

تقرير   الاسباب  "   قد  حان   اِلحساب

محكمه   "     محكمه
.............................................

هُمه  اجوني  بكل  صلافه

ضحكة  الشامت  حسافه

انقلابات

بلا  ذنب  طايح  جنيني

وسطرة   الظالم  بعيني

والحلم  مات  

كالو  الكلمة  ( وأن)  واني اسمعتها

حته  لو   دار  الزجيه  احنه   ضدها

ياظلع    ""     احجي  الجرالي  ياظلع

ياظلع   ""     المحسن  وكع  ماينسمع

من  جرحه  ماطاب  "   قَد  حانَ  اِلحساب

محكمه  "   محكمه

................................................

ذوله  حرموني  شبابي

ذوله  خلوني  بمصابي

وِ نكِسارِي

أُم  أبيها    يا إلاهي

فاطمه  بحقي  اداعي

دمعي جاري

هاي  أسماء   العصابه  الناصبيّه

فاطمه  ظلموها  يارب  البريّه

ياكتاب  ""     انطق  أسماء   اِلّي هِجم

ياكتاب  ""       أولهم    اليِعبد    صَنم

بزِمرة  الحَطاب   "   قَد  حانَ   اِلحساب

محكمه   "     محكمه

...............................................

اثمنطعش   زهرة   حياتي 

العرش    يِرضه   لرِضاتي 

أُم  اِلحسين

سامِري   الأُمَّة   وعِجِلهُم 

إبليس   يِمشِي    بكَلبهُم

يعني  وَجهين 

من حَدِيث  الدار   تِروي   الرِزيّة

اهناك  البسمار   حافر   اعوجيّه

جَم  ألم   ""       ذِبحو   حسيني   بكربله

جَم  ألم   ""         ذوله  نفسهم    حَرمله 

اني  أُم  الحجاب      "    قَد  حانَ   اِلحساب

محكمه    "     محكمه 

-------------------------

القِصاص   اهنانه    يبدي

مِن  الباب  والى   المهدي

كلبي  محروك 

راحت    اُولادي   امن   اديّه

ذَبِح  .  وِ بسّم .    و  سبيّه 

جرح  مبيوك 

المُشتكى   لله  جرحي  كل  الايام

كلبي  محروك  وينادي  آه  يالشام

محترِك    ""        كلبي  عله  اسم  السبي

محترِك    ""       هذي   أنا   بِنتُ    النبي 

شيبني  اِلمصاب    "    قَد  حانَ   اِلحساب

محكمه    "      محكمه 

--------------------------

الخادم-  ابو فدك الشامي ✍🏻

-استشهاد  السيدة فاطمة الزهراء عليها السلام

-باب  وخيمة- ( شهر ربيع الأول 1446)

عالباب  اِنرِسم   "    صوره من  الخيم

كاسرلي   ظلع

احساس الهوَه       "    عالَم   نينوه

ياخذني  الدمع

لو  رِحتي  يا  عافيتي

كولي  تِمُوت   بنيتي 

يالزجيه       "        يالزجيه 

--------------------------

مثل  المُخيم  صار  بابج  نيران

كلشي بخيالي  منرسم  للأحزان

اسم الله صحت من الحرك والدخان

الباب  خيمه  ومحسن اول عطشان

كِلِت  بعدها  كربله

واني دِموعي هامله

يايُمه ادخيلج  صحت

المِحسن  أول مَقتَله

بعيوني  القهر     "        مكسورة  ظَهر

ما نبقى  سِوَه

لو مات الورد      "      عطره ما يرد

عيونج  ضِوَه

بس  الدمع   خليتي

كولي   تِمُوت   بنيتي 

يالزجيه         "          يالزجيه 

------------------------

كَسرة  ظلع  اني  شفت  مو  ظلعين 

البسمار  هذا  يصير   حافر  لحسين

الخيل  باجر   تِنكلب   من  صوبين

يايُمه  هسه   اني   اشوفن  طَفيّن 

هيه  الهظيمه بالذبح

والجرح شايله  جرح

يعني  اموتن من وكت

واكبالي راسه عالرمح

ينزف  منحره         "      بالطف  حايِره

اني  أم الحزن

احسيني   صدك    "       صدره  ينسحك

لجروحه  أون

بس  الجرح   تاليتي

كولي   تِمُوت   بنيتي 

يالزجيه      "       يالزجيه

-----------------------

تِعطش  سنيني  لو جِبت طاري الماي

يوم  الضِمه   لاجِمني   يايُمه  هواي

الآن  اشوف  المشرعة  وجف  وفاي

كلبي  اعله  نهر العلكُمي راح  بهاي 

دمع  انكساري  عالنهر

هذا   انتظاري  للكمر

إسهام  بعيونه  دِمه

مايرجع الكافل  قهر

لعيون  الكفيل         "     المدمع  يِسيل

وشكد  انتظِر

سيّد  المشرعة      "       جفوفه مكطعه

كافل  للخِدر 

بكد  العطش  اُمنيتي 

كولي  تِمُوت   بنيتي 

يالزجيه       "         يالزجيه 

-----------------------

عالتل  ييمه  راح  اخلي  الذِكره

يُمه   تعالي   يالحبيبه    الزهره 

ام عون  اني شكد  الج  منتظره

هناكَ  المصيبة هيه هاي الكَسره

بالغاضِريّه  جم  حلم

مثل الكواكب والنجم

لا شمس  عندي لا قمر

حيل   الغريبه  ينهدم 

جم غالي  يِروح    "       دامي   بالجروح

وبكلبي  سهم 

من  بعد  المُصاب   "     من  بعد  الغياب

والغربة  ألم

ادري  الي  شتاكيتي

كولي  تِمُوت  بنيتي 

يالزجيه      "          يالزجيه 

--------------------------

بنتج  غريبه تصير   يوم   العاشر

الساتر  الله   من   يجيني  باجر

وكت الظُهر  يرجع  بصدره الحافر

امن  الخيمة  كلبي يحترك ويناظر

يُمّه  اندعيلي بالصبُر

عاشور جرحه ينتظُر

هم نلتقي ليل اهدعش

وعيونج  اعليه  تُمر

اهناكَ    اللقاء          "      يُمّه  بكربلاء

عيني  عالدرب

اتمنى  تجين        "       وبجاه  الحُسين

والموقف صعب 

وشكد  الي  ونيتي 

كولي  تِمُوت  بنيتي 

يالزجيه      "       يالزجيه 

--------------------------

الخادم- ابو فدك الشامي ✍🏻

بمناسبة الليالي الفاطمية ومُحرّم الزهراء عليها السلام ..

ننشِرُ لكم القصائد الجديدة . إتباعآ 👇

هذا ما وفقنا الله تعالى بهِ ورزق مولاتي السيدة الزهراء عليها السلام 🤲

كونوا بالقُرب 💓

---‐------------------------

"  نزله  كربلائي  تراث  (  لمولاي زين العابدين عليه السلام ) 

- محرم الحرام - 1446

يا  ابو  الباقر   سيدي     يالمسموم

عاشور  حزنك  ماطفت  ناره  دوم

يالعايش  جروح  السبي  يالمظلوم

يامولاي   اعليك  الزهره  

              نريد  منك   بس    نظره

---------------------------

ياسيدي   بدمع   الحزن    نادينه

اعليك  الحُسين  ادير  عينك  لينه

خدام   الك  مولاي   هم   تدرينه 

عدنه  حوائج   يّم  بابك 

ياسيدي   بجاه   امصابك  

-------------------------

غير     المجالس  لا  ابد   ما  نِهوّه

غير  الخِدامه   لا   ابد  ما  نِسوّه 

فدوه  التعب لحسين  والله فدوه

والخير   كله   بالخدمة

نشكركم   اعله  هالنعمه

---------------------------

قبلة   شعائرنه   تضل   هيّه   الروح

نعوف  كلشي  وما  نعوف  المذبوح

من  كربله  هذا   عشكنه    المجروح

خِدمتكم   لا   ما   نِتركها 

اغلى  امن الروح   ونِعشكها     

--------------------------

ياعلي    السجاد    بكلبنَه    اليسعر

عاهدنه   الله    ما   نعوف   المنبر

واليِخدم  احسينه  صدك  ما  يِزغر 

والخادم   يامحلى  الخادم

واليبقى  بس بيكم  هايم 

----------------------------

الخادم _ ابو فدك الشامي ✍

(  عله  طور  المرحوم حمزه الزغير )

زينب من الخيمه  إطلعت... ⬆️

رئيسية (   لمولاي  زين  العابدين  عليه السلام )

(  يا ابا حمزه  الثَمالِي ).  1446 هج

ويدخل عليه  احد اصحابه "ابا حمزه  الثَمالي" ويسأله على دموعه  وبكائه  فيقول  الامام. ع ?

راح  اسولف   بالجرالي

يا  ابا   حمزه   الثَمالِي 

كربله  حزني    "       الشام   موتني 

يا   ابا  حمزه   الثَمالِي 

-----------------------------

يا عَم   يا  ابا حمزه   يالتسأل   على  حزني

المن  ابجي  ليل  انهار ليش وهذا  كل  وني 

هم  مَرّت  عله  بالك  علويه  انسبت   مني 

هم  سامع  قبل  بالشام  آه  الشام  شيبني

هذا   حالي   بالمُصيبه 

عمِتِي   زينب   غريبه 

السبي  عذبني     "       الشام   موتني

يا  ابا  حمزه  الثَمالِي       

--------------------------

جزاك  الله  كل  الخير  يالكلبك   علينه  ينوح

يا عَم  القتل   عادة   بس  زينب  اشد  جروح

دخلنه  باب  الساعات  وكالو  ذوله  اهل مذبوح

هناك  احجارهم   اسهام  وعيون الشماته تلوح

اجت   كالو   عالسبيه

هيه   هاي   الهاشميه

احجايه  كتلتني   "      الشام   موتني

يا ابا  حمزه  الثَمالِي

----------------------------

هوّ  العنده  مسبيه   منه   يروح   كل   الحيل

ما بين  السبي  والطف  ولا نامت عيوني بليل

شما  اتصور   المقتل  افز  وبكلبي صوت الخيل

انا  مضيع  بشر  مذبوح ونحره  جان مثل  الهيل

يا عطر  عايش  خيالي 

والحوافر   اعله    بالي     

اثنين   هظمني   "       الشام   موتني 

يا  ابا  حمزه  الثَمالِي 

---------------------------

كلما  اشرب   اني   الماي   اتذكر   انا   العطشان

جمر   وبصدري   يحركني  وبخيامي  الورد  ذبلان

ظُهر  عاشور  بعيوني  المُخيم   محترك  نيران

من  خيمه  الى  خيمه  اشوفن  رَكضّت  النسوان

بالطف  انا  جروحي  تلهب 

كلما    تُمر    كبالي   زينب 

جروحي تلجمني   "       الشام   موتني 

يا ابا  حمزه    الثَمالِي 

-----------------------------

اني  الشام  موتني  اشد  من  الطفوف  هواي

بركبتِي  الجامعة  تنزف  عاشرت  الدِمه   مشاي

الدم  مثل  النهر  يجري   مثل  عين  الكمر  عالماي

وبيدين  العقيله  احبال  مجتوفه  بسبي   دنياي

جم  خرابه  بروحي  عاشت 

كل  حياتي   اهناكه   ماتت     

هواي  تعبني     "       الشام   موتني    

يا ابا  حمزه   الثَمالِي 

-----------------------------

الخادم _ ابو فدك الشامي ✍?

مقدمة (  لمولاي  زين  العابدين  عليه السلام )

(  دِموعك  كربلائك   ) محرم الحرام.1446

دِموعك   كربلائك  "     لِخيامك  عزائك 

السّلامُ  عليكَ   ياعلي   ابنَ  الحُسين

---------------------------

نشرح  بالمصيبه   والحدث  واقع

ابو  المقتل  بعد انت  صدك  جازع

يبو  الباقر   عله    باب   المُخيم 

اليعيش ارماد  بعيونه  حَرِك شابع

نارك  ذكرياتك   "   بالخيمه   حياتك 

السّلامُ   عليكَ  ياعلي  ابنَ   الحُسين 

----------------------------

ياسيّد  الدمع   ايامك  انت   الطف

عله  عيون العطاشى جرح  تتوصف

عطش  جم  فاطميه روحك تشوفه

آيات  الخيام   وكربله   المُصحف

ياتسبيحة النوح "   تقراها يمذبوح

السّلامُ   عليكَ  ياعلي  ابنَ   الحُسين

-----------------------------

عله  بالك   الخيل  الداست  احسينك

بخيالك  يا  حوافر  عاشت  اسنينك

يزين  العابدين   ومن  ظُهر  عاشور

جم  ظلع   انكسر   ما بينه   وبينك

عاشورك   يِفجعك   "    كاسر  هوّ  ظِلعك

السّلامُ   عليكَ   ياعلي  ابنَ  الحُسين

---------------------------

لعيون   الكفيل   إتسافر   اعيونك

من  كَد   الضِمه   ما ينعرف   لونك 

عله  العباس   عمّك   منكِسِر   حيلك 

عله  ماي  الشريعة  طاحن   امتونك

تنحب  يابوفاضل    "   دمعك  انت  هامل

السّلامُ   عليكَ   ياعلي  ابنَ  الحُسين 

----------------------------

يامولاي  ارزقنه   لطم    و ادموع

عالمهشوم  صدره  نِكسر  احنه  ظلوع

كل  خادم    اُمنيته   بالعزاء   اِيموت

كون  احترك  بالخدمة  بكلب مشلوع

واليِخدم  اِمامه   "    يِعشكها  الخِدامه  

السّلامُ   عليك   ياعلي  ابنَ  الحُسين 

---------------------------

الخادم _ ابو فدك الشامي ✍

قصائد ( استشهاد الامام زين العابدين ابن الحُسين عليه السلام )

جديد _ هذا العام #1446_ ?

نسألكم الدعاء ? ( الليالي السجادية )

--------------------------