📚 Universitetimizda haftalik treninglar yakunlandi!

Joriy haftada universitetimizda o‘qituvchilarimiz uchun maxsus treninglar tashkil qilgan edik. Ushbu treninglar davomida pedagoglarimiz yangi bilim va ko‘nikmalarni egallab, ta’lim jarayonini yanada rivojlantirishga qaratilgan samarali usullar bilan tanishdilar.

Bugun mazkur treninglar o‘z nihoyasiga yetdi va barcha faol ishtirokchilarga sertifikatlar topshirildi. Yana-da quvonarlisi, o‘qituvchilarimiz treninglarni ijobiy baholab, o‘z fikr va takliflarini bildirishdi. Bu esa bizni kelgusida bunday tadbirlarni yanada takomillashtirishga ilhomlantiradi.

Ishonchimiz komilki, ushbu treninglarning samarasi tez orada ta’lim jarayonida o‘z aksini topadi. Talabalarimiz ham o‘qituvchilarimizning yangi yondashuvlarini his qilib, ta’lim sifati oshganini sezishadi.

Yangi bilimlar – yangi marralar sari! 🌟

*📢 Toshkent davlat yuridik universitetida atoqli huquqshunos olimlarning nomlarini abadiylashtirish ishlari davom etmoqda!*

Toshkent davlat yuridik universitetida huquq sohasi rivojiga ulkan hissa qo‘shgan olimlar va yuridik soha arboblarini yod etish hamda yosh avlodni ularning ilmiy merosi bilan tanishtirish maqsadida tizimli ishlar olib borilmoqda.

Ana shunday ezgu tashabbuslarning biri sifatida atoqli olim, akademik Xoji-Akbar Rahmonqulov tavalludining 100 yilligi keng nishonlanadi va universitetimizda uning nomi bilan ataluvchi maxsus auditoriya tashkil etiladi. Bu auditoriya nafaqat akademik Rahmonqulovning boy ilmiy va pedagogik merosini o‘rganish uchun, balki yosh yuridik kadrlarni tarbiyalashda ilhom manbai bo‘lib xizmat qiladi.

Akademik Xo‘ja-Akbar Rahmonqulov O‘zbekiston huquq maktabining rivojida muhim o‘rin tutgan, milliy huquqshunoslik fani rivojiga beqiyos hissa qo‘shgan shaxsdir. Ushbu tashabbus universitetimizda ilm-fan an’analarini davom ettirish va yosh avlodni huquq sohasiga bo‘lgan qiziqishini oshirish yo‘lidagi navbatdagi qadamdir.

Yurtimiz huquq sohasining rivoji uchun fidokorona xizmat qilgan ulug‘ olimlarimizni yod etish va ulug‘lash barchamizning burchimizdir!

8-yanvar – Prokuratura organlari xodimlari kuni muborak bo‘lsin!

Bugun yurtimizda qonun ustuvorligi, fuqarolar huquq va erkinliklari, jamiyat hamda davlat manfaatlarini himoya qilishdek sharafli vazifani ado etib kelayotgan prokuratura organlari xodimlarining kasb bayrami keng nishonlanmoqda.

O‘zbekiston Respublikasi qonunchiligiga muvofiq, 8-yanvar Prokuratura organlari xodimlari kuni sifatida belgilangan. Prokuratura organlari oldidagi asosiy vazifalar – qonun ustuvorligini ta’minlash, qonuniylikni mustahkamlash, fuqarolar huquqlarini himoya qilish va jinoyatchilikning oldini olishdan iborat bo‘lib, ushbu mas’uliyatli faoliyat jamiyatimiz tinchligi va barqarorligi garovi sanaladi.

Ta’kidlash joizki, TDYU va prokuratura organlari o‘rtasida yaqin hamkorlik yo‘lga qo‘yildi, jumladan “Bo‘lajak prokurorlar klubi” tashkil etildi, “Toshkent shahar prokurori stipendiyasi” ta’sis qilindi, shuningdek Huquqni muhofaza qilish akademiyasi bilan Amaliyot kafedrasi ochilgan hamda memorandum imzolangan, turli ilmiy-amaliy tadbirlar tashkil etildi.

Toshkent davlat yuridik universiteti jamoasi nomidan barcha prokuratura organlari xodimlarini bayram bilan chin dildan muborakbod etamiz! Sizlarga mehnatingizda ulkan muvaffaqiyatlar, bardavom kuch-quvvat va shaxsiy hayotingizda farovonlik tilaymiz.
Qonun ustuvorligi va adolatni qaror toptirish yo‘lida olib borayotgan fidokorona xizmatlaringiz uchun samimiy minnatdorchilik bildiramiz. Bayramingiz muborak bo‘lsin!

Toshkent davlat yuridik universiteti va O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi o‘rtasida hamkorlik memorandumi imzolandi! 🌿⚖️

Bugun universitetimizda O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vaziri o‘rinbosari Qutbiddinov Iskandar Alisher o‘g‘li tashrif buyurdi. (Ta'kidlash joizki, vazir o'rinbosari TDYU bitiruvchisidir).

Uchrashuv davomida hamkorlikning quyidagi asosiy yo‘nalishlari belgilandi:

🔹 Talabalar uchun amaliyot va ishga joylashish imkoniyatlari:
Vazirlik va uning tuzilmalarida talabalar amaliyot o‘tashi va ish o‘rganishi uchun imkoniyatlar yaratish, shuningdek, istiqbolli yosh mutaxassislarni ishga joylashish jarayonida qo‘llab-quvvatlash.

🔹 Ilmiy izlanish va tadqiqotlar uchun qo‘llab-quvvatlash:
Magistrantlar, doktorantlar va mustaqil izlanuvchilar uchun dolzarb ilmiy va amaliy muammolarni o‘rganish imkoniyatlari yaratish, vazirlik bilan birgalikda ilmiy tadqiqot mavzular bazasini shakllantirish hamda muammolarni joyida o‘rganish.

🔹 O‘quv jarayoniga amaliy mutaxassislarni jalb qilish:
Vazirlik mutaxassislarini universitetimizning Ekologiya huquqi kafedrasida dars berishga, master-klass o‘tishga jalb qilish orqali ta’lim sifatini yanada oshirish.

🔹 Birgalikda tadbir va ilmiy anjumanlar o‘tkazish:
Hamkorlikda konferensiyalar, davra suhbatlari va boshqa muhim tadbirlarni tashkil etish.

Ushbu hamkorlik talabalarimizga nafaqat nazariy bilimlarni, balki ekologiya va huquq sohasidagi amaliy tajribalarni egallashda katta yordam beradi. 🌏 Universitetimiz talabalari va professor-o‘qituvchilarini ushbu dolzarb yo‘nalishda faol bo‘lishga va mamlakatimiz kelajagi uchun muhim masalalarga o‘z hissalarini qo‘shishga chaqiramiz!