مات كما يموت النور .. لم يترك أثر منه لعدو أو صديق .. ولم يكلّف أحدا في حمل جثمانه .. رغم ذلك كان ابناءه يسيرون خلف ذلك التابوت كأنهم أعجاز نخل خاوية ..

وإنّا لله .. وإنّا إليه راجعون ..

نحن الآن نشعر بفراغ اكبر
نعيش بحاجة ماسة واضطرار مؤلم
انا اعلم أن هذا الفراغ وهذا الأضرار هو من يولّد العظماء امثالكم
ولكن متى ؟ وكم سيطول الصدى ؟
القضية ليست بهذه السهولة
والاستثنائيون لا يتكررون بهذه الانسابية
قد يعاني الناس عقود من الزمن حتى ينضج فيهم قائد عظيم وقد يعانون أكثر حتى يولد من رحمهم قائد ترابيّ عقله حار وقلبه بارد ..
ينام على التراب بين جنوده وأبناءه
يملأ الشيب هامته ولحيته والهمّة تفيض من جوانحه
يبكي على سجادة صلاته ويضحك وسط غبار المعارك واصطكاك الموت
يجلس بين الضعفاء كأنه واحد منهم .. يعاني مما يعانون ويستمع لما يقولون
ويقف أمام الضراغم والابطال كأنه طود شامخ وصنديد لا يتقهقر يعطي الهمة لمن حوله فيتبدد الخوف كما تهب الشمس شعاعها فيتبدد الظلام

مثل هذا لا تنجبه الايام الا برهة بين عتمتين طويلتين وضوءا خاطفا بين ليلتين قاسيتين
والله المستعان وانا لله وانا اليه راجعون

اذا كان ولا بد من الاحتفال بنهاية هذا العام المليء بالتضحيات الجسام

فلا بأس بالاحتفال على هذه الأغنية .. شريطة أن تجعلوا اطفالكم يفهمون معانيها جيدا ويتعلموها على أنها حقائق ومسلّمات .. عسى أن لا يكونوا "زواج" و "قشامر" عندما يكبرون

سُئلَ الإمامُ الرضا (عليه السلام) عن خيارِ العبادِ فقال:

«الذين إذا أحسنوا استبشروا، وإذا أساؤوا استغفروا، وإذا اُعطُوا شَكروا، وإذا ابتُلوا صبروا، وإذا غضبوا عَفَوا».

تحف العقول

بسنة تخرجي من كلية الطب قبل حوالي ٧ سنوات

كانت الحفلات بشكل عام أقل تهتّك وانفلات من اللي جاي يصير هالايام بس مع ذلك كان اكو غناء ودي جي باخر الحفلة يصير وولد يرگصون بنص البنات الخ من المظاهر اللي يعتبرهه الشاب أو الشابة المحافظة ما تليق بيهم

كنت متردد احضر لو ما احضر ؟ احضر الجزء السليم واعوف الجزء غير المناسب الي لو اترك الموضوع كله ؟

كان إشكالي بالبداية أنه حتى لو ما احضر هاي الفلوس اللي ادفعهه ويجيبون بيهه دي جي وأدوات تستخدم لأمور محرمة شنو حكمهه ؟

هاي الإشكالية كان الهه حل أيضا وهو اشتراط صرف المبلغ المدفوع من المجموعة المتدينة على الطعام فقط مثلا او صرفها على الفقرات السليمة بالحفلة وكانوا الشباب المسؤولين عن الحفلة كلش متعاونين مع هذا الشرط وگالوا أنه الجزء الأكبر من الحفلة وهو الجزء الاول راح يكون يوافق اذواقكم تماما

بوقتهه سألت أحد الفضلاء وأساتذة الحوزة بالنجف أنه المتدين إذا حصل هيج مجال بهاي التفاصيل الدقيقة الافضل يشترك لو يترك ؟ فهو بوقتهه شجعني عالاشتراك وكان وجهة نظره لا تخلون الساحة فارغة لمن تختلفون معه ما دام عدكم قوة وتكدرون تفرضون شروطكم بيهه ولو بهذا المقدار

انا بالنهاية ما اشتركت شفتهه ما تسوه اصلا واحد يذب عليهه شكم فلس 🤣

بس الفكرة أنه المتدين اللي يشوفهه تسوه ويشترك بالجزء الموالم اله فقط ويخرج بثقة تامة وغير مهزوز من انسحابه من يصير الوضع غير ملائم اله هذا ابدا ما ألومه واصلا ودّي فد خمسين واحد هيج يسوون بكل مرحلة بلكي الما يستحي يبدي يستحي ويحس روحة فاول ؟!

حقيقة امس شفت مقطع تخرج تخيلت هذول متخرجين من ملهى شعبي مو حرم جامعي وصرح علمي محترم وبنفس الوقت گلت هاي لو منسحبة وحدة من البنات الموجودات بالفيديو لان تشوفهم ما يمثلون توجهاتهه أو لان الوضعية طلعت من ماعونهه هم يسووهه مزق ومرائية وتدور سمعة ؟!

لحظة خروجي من المنصة

انا ما اريد اشجع ع هذا الترند لان انا عندي مشكله وية الترندات بشكل عام .. بس شدعوة هيج ضايجين منه ؟ ليش ما ناخذ الأمر بدون تعقيد ؟ بنية حبت توثق تنازلهه عن إكمال فعاليات الصورة بعد تشغيل الاغاني وممارسة زملاءهه لتصرفات هي ما تتبناهن ولا تستسيغهن وتعتقد بيهن حرام وعيب .. شنو المشكلة ؟

جاي ترائي ؟ ما اعرف ولا انت تعرف لان الرياء شيء قلبي وميجوز اتهام الآخرين بي

جاي تتباهى ؟ شنو المشكلة تتباهى بشي تعتقده صحيح مثل ما باقي الطالبات يتباهن برقصهن وردحهن كبال الولد والولد يسوون المثل بدون ما يگلولهم تعالوا شنو هالسليت الجاي تسووه ؟!

بتصرفهه هذا جاي تسيء لبقية البنات الما طلعن ؟ .. يعني اللي ترگص عالستيج أو واگفه بنص الرگص والغناء هذا ما يسيئ الهه ؟! بس من وحدة محجبة تترك هذا المكان وتعلن افتخارهه لترك المكان صارت مسيئة الهن ؟ لو اللي بعبّه طلي يمعمع ؟

تسيء للعباية لان حاضرة بهيج مكان ؟ .. هنا كل واحد يقدر الموضوع حسب فهمه والتزامه البعض يشوف الابتعاد عن كل الفعاليات هو الخيار الاسلم وانا قد اتفق وياه .. بس اللي يشارك بالجزء السليم ويرفض ما يتنافى وية عقيدته هذا على الاقل ما اهجم عليه حتى لو ما كنت اشوف خياره هو الخيار الأفضل للمتدين ..

كلامي هذا مو تشجيع للبنات أن يسون مثلهه لان انا ما اتبنى هذا النوع من الطرح والنشر وأشوف سلبياته أكثر .. بس ضد الهجوم عليهه ومشاركة السفهاء والحمقى حفلة السخرية منهه وضد الدخول بالنوايا واتهام الآخرين بما لا نستطيع إثباته وضد ترك الجموع اللي جاي تطمس الهوية الثقافية للمجتمع بكل اريحية ومهاجمة المتدين أو من ظاهره التدين فقط لاني ما اتفق وياه بجزئية صغيرة ..

اكو خيار أن اسكت.. ما مطلوب مني دائما اتخاذ موقف مع أو ضد من أمور الله ما راح يسألني عليهه

ماكو مبدأ اسمه "زين من عنده"

زين من عنده يصلي حتى لو كلهه تصير قضاء ونقر كنقر الغراب
زين من عدهه لبست حجاب حتى لو لابسه حصر أو متمكيجة
زين من عنده ما يسوي مكسرات حتى لو نظرته مو نظيفة
زين من عنده ..... حتى لو .... الخ

هذا الشيطان مرات يزيّن للإنسان سوء عمله ويخليه يشوف سيئاته حسنات
الإنسان اللي يطيع الله بجانب معين هذا مو زين من عنده ..وما متفضل على أمة محمد بشي وانما جاي يأدي واجبه تجاه نعم الله عليه وشكد ما يسوي يبقى مقصر أمام مطلق الخير ومطلق العطاء

اما صاحب الطاعة المخربطة والمزاجية اللي يطيع الله مثل ما هو يشتهي مو مثل ما يريد الله ويقارن نفسه وية اللي ظاهرهم اسوأ منه حتى لا يشعر بوخزة الضمير هذا لا بي ولا بزينيته ولا يستحق الاحتفاء بهذا الجانب

أَفَمَن زُيِّنَ لَهُۥ سُوٓءُ عَمَلِهِۦ فَرَءَاهُ حَسَنًا ۖ فَإِنَّ ٱللَّهَ يُضِلُّ مَن يَشَآءُ وَيَهْدِى مَن يَشَآءُ ۖ فَلَا تَذْهَبْ نَفْسُكَ عَلَيْهِمْ حَسَرَٰتٍ ۚ إِنَّ ٱللَّهَ عَلِيمٌۢ بِمَا يَصْنَعُونَ

هذا ملف المقال لمن يحب الإطّلاع

مع فائق الشكر للسيد صلاح مهدي الحلو لتدقيقه وإضافة لمساته الأدبية الجميلة عليه 🍀