استشهاد الرسول محمد عليه وعلى اله افضل الصلاة والسلام

ياهو الكال موت الله هـــاي الوادم اتوهم

+++++++

رسول الله انجتل ياناس واحنه المغزى ندريبة
رادوا منصب وكرسي كلمن فكر بجيبة
الجانوا همه خط اول منهم طلعت العيبة
كالوا سيف ماينفع علينه يوجه الريبه

وادم ما تحب الله
بس تريد تتعله

نبي..معصوم ميهمهم اليهم تصعد وتحكم
ياهو الكال موت الله هاي الوادم اتوهم

++++++++++

هذا وذاك والشله واول باغي حط فكرة
كال السيف وكت الضيج والسم للقوي نغدره
نبديها ب محمد سر حدما تخلص العتره
حيه مامش اطباع الذيب شتقدمله و ينكرة

ريائيين نكارة
قبل الدين خمارة

طبع الحيه ناعم حيل بس بداخله يبخ سم
ياهو الكال موت الله هاي الوادم اتوهم

++++++++++++

سوي كلشي يحلالك دامك ماتخاف الله
دامك بلرياء استاذ ينغش بيك عبدالله
الخافي نيته عن الناس يوصل مبتغه غله
جانوا بل سرة الاول بلسبحة ولمصلة

دكات الصحب تخذل
ميسويها المعدل

هو الما يحب دينــه شتسويله هـــم يخم
ياهو الكال موت الله هـــاي الوادم اتوهم

++++++++

جبير وكلبه كد اسمه نبينه وماقبل يعلن
لكن خوفه عن الدين خلاه كلهن يضمهن
اسنون الحقد مرات تكدر انت تكسرهن
لكن مستحه امن الناس والصحبه تغض عنهن

هاي الوادم شبيها
تعض ايدين راعيها

ازدواجية بلا مبدأ بست اوجوه تتوسم
ياهو الكال موت الله هـــاي الوادم اتوهم

++++++++

طــه بلغه لحيدر وكله يا علــــي اتركهم
حتى الدين ما ينضار خلي الناس تكشفهم
هاي وصيتي ياكــــرار بلمحشر نحاسبهم
وإلا جان ابو الحسنين مثل الماي طشرهم

وين يروح بلمحشر
مني ومن ابو الاكبر

سم العترة وي الطف هناك الدم يجي بلدم
ياهو الكال موت الله هـــاي الوادم اتوهم

+++++++++++

الشاعر مصطفى الربيعي
2023/9/11

استقبال محرم .. الخدمة

شحلات اسمي اذا ب اسمك يلقبوني
الحسيني فلان افرح من يصيحوني

###########

انذرت عمري بخدمتك وانه ممنونك
تسجلني بسجل وي الي يخدمونك
فضل منك اذا تحسبني مجنونـــــك
العمر سفرة وخلاصي شفته بعيونك
انه خادم
فلا نادم
على الخدمة
ضوه انت
وانه اجهبته
من الظلمة

اعشگنك وصرت شوفي الي بعيوني
شحلات اسمي اذا ب اسمك يلقبوني

#############

لون حيلي ركد وامشي اعله عكازة
اضل خادم لحد ما اصبح جنازه
جبت دناي مامعتاز بس شباجك اعتازه
انه بأسمك افك ضيجي من اتوازه
احشمنك
اكلفنك
وتحلنها
احبنك
اتبعنك
يلروحي تفهمنها

وكت ضنكاي اكلهم يمه ودوني
شحلات اسمي اذا بأسمك يلقبوني

##########

يماي اجبال افرفح من تجي ابالي
انه العابد واشوفك انت شوالي
اعترف اسمك صيت هواي سوالي
يم الله اليخدمنك يقينآ ينحسب غالي

عشك فقرة
على الفطرة
هويتنك

برياحيني
ونظر عيني
لكيتنك
عن امحبتك شجاوب من يسألوني ؟
شحلات اسمي اذا ب اسمك يلقبوني

##########

شفيع انت وتنور ظلمه المحشر
واليخدمك ضواه مثل الكمر و اكمر
ووجوه الماتحبك تسود و تصفر
الماباجي دمع لجلك يم الله شكثر يصغر

هوى شلتك
تنفستك
انه بريتي

عشت طفك
وشفت جرحك
اعله لاهيتي

يمر طاريك اشوغ وينخطف لوني
شحلات اسمي اذا ب اسمك يلقبوني

##########

رزق انت واشكرك ربي يوميه
نعمته انت ووجوبآ احمد اعليه
احبنك لأن شفتك جريم تعرف شبيه
اضل خادم وعد بي نكهه شيعيه

وعد كلته
وجددته
ويخدامك

طبع روحي
تحب نوحي
عله مصابك

اله بجاي اضل كل عمري خلوني
شحلات اسمي اذا بسمك يلقبوني

الشاعر الحسيني مصطفى الربيعي

الخدمه وتجديد البيعه

هاي الشعائر خالدة .. هاي الشعائر
بكل المصادر واردة .. هاي الشعائر
كل الديانات
بيهن ثقافات .. واحنا ثقافتنه اللطم

############

خل يبقى عيسى بدينه لو موسى شتريدون ؟
محد ابدالي ايتحاسب بيها تدرون
شلكم غرض لو جا عمت لحسين العيون ؟
خل ياكل الزنجيل قابل بيها المتون
لاتشكل وياي
مانطلع براي
من راسي شيطلع الخيم
واحنا ثقافتنه اللطم

#############

تركوني اسلطن ع النعي وصوت الرواديد
شمحلاها جوه المنبر اكعد واسمع ونيد
نعيدها انوب احنه غير حسين منريد
ما ينفع ويانه الحطب واحبال بلجيد
بلخدمه باقين
بدروب الحسين
خدامه منهم والنعم
واحنا ثقافتنه اللطم

#############

هو العمر مابي طعم جا لولا الحسين
وليكول عندي عيون انه الماعامي اله العين
باجر فرض يوم الحشر من تحجي الادين
تشهد على الي مالطم اجفوفه الاثنين
رب السماوات
بي خله ميزات
خصصله جنة للخدم

#############

انه لحسين اتنفسه وبريتي اضم بي
لو ابجي ليليه بحر لا ما اجازي ؟
امتانه يعكوب اولده هلشهر اتاني
مثل المضيع هوه وبلمجلس الكي

توجعني الامتون
من اذكر ام عون
لو بيدي الطم بالسهم

#############

هاي المجالس عامرة دامن اكو انفاس
مرفوعه رايتنه مثل رايات عباس
روج المواكب ماركد يرطم بالاحساس
بين اللطم والي خدم واليطبر الراس

لليخدمه اعدام
كالاهه صدام
ضلت ويحسين الزلم
احنه ثقافتنه اللطم

#############

عند اليحب لا ما تلاكي مفردة خوف
عابس شمر هدمه وانه شمرت الاجفوف
شكثر ذاك الطاغي حط بركابنه سيوف
مايدري عيد الشيعه من بحضرته نطوف
فرطنه بلروح
وصحنه يمذبوح
شكم خادم بخادم عدم
احنه ثقافتنه اللطم

الشاعر الحسيني مصطفى الربيعي

استشهاد امير المؤمنين علي عليه السلام

الابو راح
الگلب ناح
من الهجر بينه علامه
بطبرة الهام
صرنه ايتام
ضلت الشيعه يتامه

##################

ياعلي صعب الهجر
جنه نار ويستعر
مابين الاضلاع

الموت ميرجع احد
لو توسد باللحد
شيفيد الاوداع

دموعنه بيها ثگب مثل البراكين
تترك بجريانها اعله الخد نياشين
كلي شنهو الي يردك يا قرابين

علي راح ..
مايرد بعد بسلامة
الابو راح
الگلب ناح
من الهجر بينه علامه

################

هو شيفيد العمرمن امامكينطبر
صعبه و ثكيله

ابمجانه لو يصح
بينه خلينه الجرح
والدم نسيله

جروح ميحسها بشر ماساهر الليل
جروح المفارك علي بلمدمع تعيل
ياابونه الليله دم محرابك يسيل

العرش صاح..
اه واويلاه من نزف العمامه
الابو راح
الگلب ناح
من الهجر بينه علامه

###################

يكتل افراكك عليحزنه ماظن ينجلي
يندس بلنياط

بحزني يعقوب اكثره
انه مفارك حيدره
مامفارك اسباط

جروح مايفهمها ابد بس المفاكيد
جروح يفهمها الينام بمكبرة بعيد
جروح جن بركان تتنافر ولاتهيد

جن ارماح..
وغافيه بصدر اليتامه
الابو راح
الگلب ناح
من الهجر بينه علامه

################

هسه ياهو الضل اله
اليتيم ويسأله
عكبك يبو تراب

ياهو يتلثم بعد
ويتصدق يا مدد
من خلف الحجاب

انت يا خبزة فقير وخيمة ايتام
وسفه يابوحسين مثلك بلحد نام
لهذا يومك تطعم بسر خلف الالثام

علي طاح ..
ولسه ماطايح لثامة
الابو راح
الگلب ناح
من الهجر بينه علامه

#################

الابو خيمه ترة
لو خذته المكبرة
تفكد حنانه

علي خيمتنه مشه
الدنيا صارت موحشه
ياهو بمجانه

التاكل بروحي بقت نظرات الحسين
يركض يضمد جرح لو يدمع العين
اه يا نظرات زينب بيهن ونين

الاجراح ..
بينه ماخلت اثر من ابتسامه
الابو راح
الگلب ناح
من الهجر بينه علامه

الشاعر الحسيني مصطفى الربيعي

جرح الامام علي ع و استشهاده

ياريت اني انطبر بمجانك ياعلي
خافن من تنجرح مايبقالي ولي

##########

لو رد بيه الزمن تجهبلك خطوتي
بيديه انطيها الك روحي وي جبهتي
كلبي بيك انوله ويامكبر دمعتي
انت اكبر من عشگ يلماخذ صفنتي

علي علي علي علي علي

من اتذكر ونينك
والدم سال اعله عينك
زينب تجي اعله بالي
من باوعت جبينك

وي دمعات الحسن ياهم لاتنجلي
ياريت اني انطبر بمجانك ياعلي

############

يامولاي الدمع ينزل من السمه
لا حسبالك مطر.. جا دمعة فاطمه
بجت هي الفلك دمعة بلون الدمه
مجلس فوك انصبت حزنانه ولاطمه

علي علي علي علي علي

اصعب لحظه بطبرتك
من اتخايل نظرتك
ومن توصي حسينآ
خل بالك اعله اخيتك

باجر من تنسبي وع تل من تعتلي
ياريت اني انطبر بمجانك ياعلي

#############

يعصر گلبي شكثر رمضانك ماكمل
وانت هلال العشگ يم بابك جا نزل
وماتتسحر بعد وسفه يخير العمل
عيد الله لو يجي مابي لذة يضل

علي علي علي علي علي

مو بس احنه بجينه
املاك الله ونبينه
وشكم نبي فجعته
ويم جرحك ابكى عينه

ياركن امن الهدى وسفه جا تنولي
ياريت اني انطبر بمجانك ياعلي

###########

كمنه نحس بليتم ياخيمة شيعتك
ما تروينه الصور لو نحضن صورتك
نار وبينه تشب تطفي من نظرتك
يابير ومانشف اتروينه امحبتك

علي علي علي علي علي

يا كافل اليتامه
صرنه تره بظلامه
خسفت شمس ضحكتك
من طبرة العمامة

ركن الكعبه جره دم وي عرش العلي
ياريت اني انطبر بمجانك علي

###########

عمر الدمع يشيعه ميرجع اليسافر
لو رجعلها ابوها مثل العليله اناطر
بس المشه يشيعه مترجعه المقابر
راح الولي وبقينه ع ظنه يجي باجر

علي علي علي علي علي

لا مايرد ولينه
غررب بعد علينه … علي
حنيته هسه راحت
ياوسفه من ادينه

الي يعوض علي ياشيعه بس علي
ياريت اني انطبر بمجانك ياعلي

الشاعر الحسيني مصطفى الربيعي