أقابلك في زَمنْ ماشي وزَمنْ جاي وزَمنْ لِسة..??!

بيقولوا كل مرحلة وليها ناسها، في ناس بيدخلوا حياتنا في أوقات معينة بملوها فرحْ وبيمشو، وبيجي غيرهم والدنيا حلوة والحياة ماشة..

إلا هي!
مرات كتيرة بنتخاصم وبنتشاكل وبنتحول لناس غريبة بين ليلة وضحاها..
بس بتكون موجودة بطريقة أو بأخرى في حياتي..
وبسرعة بنرجع كأنو ما كان..

يمكن ما إحتجت يوم أشرح أو أبرر ليها في كل الأحوال فاهمين كل حاجة..
بنغيب وبنظهر وما بينقص من الود حاجة..

لما أزعل، وأزهج، ولما إتأخر ناس بيتنا بيكونوا عارفين يفتشو وين..

لما سألت روحي ليه هي بالذات.؟
ليه ما كانت مرحلة ذيها وذي القبليها..

في آخر المطاف لقيت إنو سر الإستمرارية إنو عمرو ما كان بينا إلتزامات..
حتى لو كنا متشاكلين عارفين الخصام حاجة والإحتياج حاجة تانية..

يمكن ما إتشاركنا كل أفراحنا ونجاحاتنا..
بس كنا موجودين في كل خيباتنا وما لينا إلا كتف بعض..
بنشكي وبنبكي سوا ونرجع نواسي نفسنا ونواجه العالم..
بالطريقة دي جو ناس قبليها وجو ناس وهي موجودة في زمن ماشي وزمن جاي وزمن لسة.

في صاحب لمرحلة معينة، وفي كتف مدى الحياة وكانت هي الكتف دا..?.

#على_سبيل_الجمال.

أي عيون بتتقابل إلا عينيكِ ما بتتفات..
في عينيك بتوه..

كيفن في حلاة البسمة في القاسيات
وعطر الصندل المستني يفرح بيكِ فرحتو جات

وحاتك خلي منو شوية شان يتكاحلن منو السمحات..?.

٧:٢٦م
#محمد_ورق.

يا حَلاة الشامة في خدك والسِن بتضوي اللُولي.. ?!.

كانت عندها شامة في خدها الشمال، كانت مخلياها حاجة تحفة خالص..
تحديدًا لما تبتسم والوجنة الفي خدها بتظهر ومع الشامة ديك بتدخلك في متاهة..
لدرجة مرات كتيرة بسكت بمجرد ما شفتها بتضحك و بنسى العايز أقولو..

سبحان الله وفي خلقه شؤون كيف بمجرد نظرة و بسمة من زول مُعين كفيلة إنو تصنع يومك للأخر، لدرجة لو جات في خيالك بتبتسم..
تلقائياً بلاقي روحي بدندن بصوت السيد خليفة :

ببسمة يذيدو عُمرنا وكان العُزال إرتاحو.."

أمتع بيها عيوني،، أضوق من فاها السُكر.. "

لكن الحظ العاثر،، خلاها تغيب ما تظهر.. "

حرفياً كل حاجة فيها أو دايرة حولها بتتحب، نحن ضحايا التفاصيل بنغرق للأخر..
الزول البنحبو دايماً بنشوفو مختلف حتى لو كان ذي الكُل.

بنشوف ضحكتو مختلفة..
بسمتو مختلفة..
حتى الأغاني البتخصو أو المربوطة بيهو إيقاعها بيتغير..
حتى الأماكن البحبها بنشوفها غير..

في نهاية السكة بنكتشف إنو شخصنا المُعين مش مختلف عن الباقي كل الحكاية نحن تلقائياً بنبدأ نشوف التفاصيل بعيونو عشان كدا بنشوفها حلوة مختلفة.

على سبيل المثال كنت بكره الكاروهات لحدي ما قالت لي بيجي حلو عليك، من وقتها حياتي بقت كلها مربعات.

#عند_المُفترق.

يا عقد اللولي اللولي يا بت يا حلوة يا لولي..?.

#محمد_ورق.

نار البُعدِ والغُربة!
شُوق لأهلي والصُحبة، شُوق لكل جميل في الحيِّ..??'

-بيقولوا دوام الحال من المحال، بتجي أوقات كتيرة الواحد بعاين لنفسه كان وين وبقى وين! ، بتنهزم أكتر لما تحس إنو أجمل أيامك وسنين عُمرك خليتها في قفاك..

الحلة وكيف حافظها بيت بيت، المناسبات الأفراح والإتراح، اللمات، الكورة الدافوري، النادي والجوطة الفي آخر الليل ديك وأي إتنين تلاتة راجعين سوا على بيوتهم ضحك وهظار واصل البيوت..

حتى دكاكين حلتكم غير..
في بتاع الدكان الوناس والإنت مصاحبو داك، زول ظريف ويدو رخية، وقت ما تجيهو بفك ليك حوجتك بوش ضاحك..
منظر الدكان من بعيد ساي راحة للنفس..

حتى أصحاب الحلة مختلفين فيهم أصحاب روضة ومدرسة وشارع، بتلقاهم يد واحدة في المناسبات ولما يكون في شغل في الحلة من توزيع أنابيب الغاز ولما يكون عندك نفير أو شغل في البيت..
بتجي أوقات بسافروا وبتفرقوا فيها كلهم بسبب ضروب الحياة وتارة آخرى بتلموا..

حتى أعمامك الكبار البتلقاهم متوهطين الأرض مع العصاري وونستهم كلها أيام نميري وثورة الإنقاذ وإنتقاداتهم للجيل الحالي الراكب راس..
في دفء ومحنة كدا غير عادية، حلة فيها كل الألوان، كل الأجناس، كل الثقافات مشكلين كيان واحد..

مشتاق لحلتنا وشوراعها، مشتاق لطفولتي الخليتها بين زقاقتها..
مشتاق للبلي ونط الحبل، مشتاق للمة اللستك الونستو كلها ميسي وكرستيانو، والشلة الخرخارة..

لو عبرة تزيل غصة، لو ذكرى تهدي حنان..
لو إنسان صبح قصة، أنا القصة يا أم درمان..

وفي آخر المطاف نحن هنا، لا الديار ديارنا، ولا الأصحاب أصحابنا، ولا المكان بشبهنا، ولفي بينا يا دنيا..

عند_المُفترق..

بين اليقظة والأحلام، بين أجفان تقول للناس..
أريتو النوم يزورني اليوم! أنوم ليلة في كل عام..
#محمد_ورق.

"بحسِبْ دقايّق الليَّل أنا و النَجم زُملان..?!"

إتخيل يا إنسان تقع في حُب زول بيوزع حب لكل الحواليه بس جاف من ناحيتك تماماً ما معبرك ذاتو..

يعني الناس الحواليهو محظوظين بقربو و حبو ليهم، و إنت بجاي يا معلم بتعافر عشان تقدر توصل ليهو..
ما فضل إلا تقول ليهو عليك الله هاك حُب من عِندي حِبني بيهو..

بتراقب تصرفاتو بيقابل كل الناس البيعرفهم بحب و بشاشة، و لما يشوفك ملامحو بتبقى ذي أخر الشهر..

العِناد و التجاهل الفي البدايات دايما بيذكرني بشاعرنا أبو صلاح لما كتب و قال..

أعطف علي ياريم..!
با نافر الغِزلان..!

خصرك رقيق علي و قلبك حجر علي ما لان..

_شتان ما بين قسوة المحبوب، و هيام المتيم..
فوق ما هي قاسية عليهو شديد و قلبها حجر من ناحيتو..

فبنلاقيهو بعتابها بحب شديد فبقول ليها أعطف علي يا ريم..

الترجي و التوسل مع مدح المحبوب بجميل اللفظ و بشبها بالريّم، أس الغزال معروف إنو الريِّم بيمتاز بعُيون تبارك الرحمن سمحة و قوام رشيق منمق فبعاتبها و بيتغزل فيها في نفس الآن، بس بطريقة أبعد من بعيدة...

لما يرجع تاني و يكمل القصيدة..

بحسب دقايق الليل أنا و النجم زملان..

مُتابع هواك و مُجافي الأهل و الخِلان..

يا العالي صدرك و مالبو ضميرك الهزلان..

لو عيني تنظُر خدك، لو متَ ما زعلان..

_كلنا سهرنا ليالي طويلة عشان نقدر نوصل لناس بنحبهم..
القلب أحياناً ما بسوقك إلا لصعب المنال..

فهنا بيوصل ليها الهوان و الضعف الفيهو، حتى إنو في سبيل يوصل لقلبها علاقاتو إتلاشت صحابو و أهلو..
و حتى إنو من التفكير الكتير فيها بقى ما قادر ينوم الليل..

مؤمن تمامًا و عارف إنو كل الدروب في سبيل توصل للزول الصح بتكون صعبة في الأول، بس لما توصل صدقني حانسى كل الصعاب الجاريتو في سبيل الوصول..

الحلو شنو في الحب لو ما عافرت عشان توصل لقلب زول شل أفكارك و قلبك..

اقلاها لما تعدي مرحلة ستين لو ربنا أحياك حتكون قاعد وسط اولادك و أحفادك و إنت بتحكي ليهم كم المعاناة عشان توصل لقلب أمهم..
وبتحكي ليهم و إنت بتعاين فيها كأنو أول مرة تشوفها..
ياخ إحساس عظيم شديد..

ياخ حبو و عرسو و أملو الكون محبة، و عل قدر المحبة.

#عند_المُفترق..

أنا يا جميِّل بهواك فعلاً و قول لِسان.!
بالنغمة تسكرني، بالنظرة و الميسان..?!

#ديناريتو