美國政府發出「更新版商業警告」，警告在香港營運的美國企業面對《國安法》帶來的風險，今日文匯報同大公報道有市民團體去美國領事館抗議。

本來文匯大公成日報道有人去美國領事館示威，但今次兩份黨媒都連結「點新聞」拍攝的示威片段，小編得閒得滯開來睇。

呢班唔知係咪持雙程證來港的示威者用充滿鄉音嘅廣東話嗌口號，但小編一句都聽唔明，本專頁呼籲點新聞下次勤力一點增加旁白。

#20240909

曾經承諾若美國實施《人權法》就「吞file」但最終食言的湯文亮，經常在香港01投文分析市況，努力唱好大市，今日佢寫樓市劈價成交係代表業主睇好後市，佢嘅邏輯是咁的：

「業主點解要劈價，因為開價太高，點解開價太高，因為睇好後市。」

小編無意再寫湯文亮有幾傻，只係好奇點解香港01繼續畀個傻嘅投稿呢？

#20240908

劉鳴煒的威水史：

2001年結婚，2010年離婚，歷時9年。

2010年同幾個富二代搞「香港精神大使」第一屆選舉，最後一次選舉係2019年，歷時9年。

2015年成立智庫「MWYO青年辦公室」，無端端做咗青年代表，但而家話「已達階段性里程碑」停辦，歷時9年。

不過9年好長啦，佢2020年臨危受命做海洋公園主席，話要拯救因疫情財困的海洋公園，未待入境旅遊業重啟就辭任。

#20240907

文匯報報道民主黨羅健熙藉立場案話煽動罪的「定罪門檻好像降低了，法例收緊了，但收緊完之後仍然是不知道那條紅線在哪裏」屬扭曲香港法律，與西方反華勢力如出一轍。

連論壇版都有文章寫羅健熙拾西方主子牙慧，與西方反華勢力遙相呼應，只識唯西方反華勢力馬首是瞻。

末段話香港已由治及興，民主黨要清理門戶，刮骨療毒，不能再讓羅健熙之流恣意妄為。

#20240902

玻璃朱在Facebook透露警察禮品廊換承辦商，佢好惋惜問點解要換呢，又叫人趁最後一日大清貨去買嘢。

警察禮品廊由「萬龍國際」承辦，據聞老闆本身撐警，留言者有萬龍國際成員，話「只可以同大家說聲問心無愧」。

結果留言有人話「因為佢啲嘢定價太貴…….依家有折扣先至叫做正常」。

有幾個人問警察禮品廊喺邊度。

更有人話完全唔知道有咁嘅地方，結果被玻璃朱反問佢「你係咪撐警㗎？」

你幾時見過藍絲會齊心撐藍店㗎？

#20240831

文匯報今日攻擊陪審員制度，又話陪審員未必識英文，又話佢哋容易受律師影響。明明立場案法官話林紹桐英文醫療報告「查字典都唔識」都可以照判案。

唔知律政司、司法機構、大律師公會同律師公會等等係咪要出來譴責文匯報呢？

#20240830

文匯報專題報道《黑神話：悟空》火爆上線，全平台銷量突破1000萬套，帶旺打機周邊和促使玩家去深圳華強北升級電腦配置。

睇真啲遊戲商官方配置推薦，處理器係美國Intel的，顯示卡係美國Nvidia的。似乎今次悟空火爆大贏家，唔係國產遊戲商而係美國公司，Nvidia CEO黃仁勳今年五月訪問台灣仲話「台灣是非常非常重要的國家」，小編認為大局當前，中國網民應該抵制美帝英特爾英偉達，玩唔到悟空只不過係犧牲小我啫。

#20240826

文匯報報道習主席親切接見奧運運動員，與不少運動員握手和交談，話有啲運動員仲未趕得切自我介紹，總書記就叫出佢哋個名。報道引述張雨霏「每一名運動員的成績和名字，他都記住了」，仲要放埋响標題。習主席記憶力震驚全國13億人呀真係！

#20240823

特區政府與港協暨奧委會揀响平日上晝搞巴士巡遊慶祝運動員凱旋，睇直播只見到運動員畀風吹到甩頭、彌敦道水靜鵝飛，但文匯報頭版標題寫「沿途人山旗海歡聲雷動」，小編深感黨媒宣傳工作的偉大。

#20240822

李家超琴日响大埔舉行施政報告地區諮詢會。這邊廂東方報道話唔少市民大吐怨氣，證券商倒閉、銀行call loan、年輕人買唔到樓。那邊廂大公報報道好多「好橋」，經民聯幹事建議用麥兜搞無人機同煙花匯演，仲有前委任區議員將大埔林村河比喻為巴黎的塞納河，「好橋」個引號係大公報自己加。

不過有一樣嘢係東方大公咁南轅北轍嘅解讀都認同嘅，李家超話「明年經濟會比今年好」，咁即係今年唔好啦係咪？

#20240819