《香港01》今天（13日）逐一向黨內其餘五名立法會議員查詢看法，其中何敬康表明「所有地球人都不應有第三者」，自己亦絕不會犯。黎棟國表明婚姻是莊嚴的承諾，任何婚外情都不能接受。容海恩、陳家珮均支持葉劉觀點，餘下的李梓敬原本答應下午回電，惟之後未能聯絡。

#20250214

中區警區最近將中環10號碼頭化成「提子碼頭」，小編見到現場水靜鵝飛，未見有人打卡。

有艘掛住「提子號」、「提子閃閃耀維港」橫額的船在海面移動，其實有幾多人聯想到所謂提子原來講防騙呢？

最神奇係，有個仿效大陸城市整「我在提子碼頭很想你」路牌，但向住尖沙咀方向竟然係南，向住中環係北。

小編因而發現，成個中區警區似乎唔知尖沙咀其實位於中環嘅北面。

#20250213

星島報道中環摩天輪旁舉辦的戶外聖誕及元旦市集主辦方「Try Mart嘗市集有限公司」走數，苦主群現有近50人，涉款近10萬元，記者去Try Mart辦公室尋人未果，連貨倉都欠租未繳。

參與者踢爆市集安排錯漏百出，包括攤檔延遲搭建，市集開幕後因牌照未批而緊急煞停近3小時。有檔主採用主辦方的電子收款系統，但一直未獲主辦方歸還利潤，連負責搭建場地的工作人員都被拖人工。

原來Try Mart亦曾於赤柱美利樓有市集，但幫忙布置市集的工作人員被拖薪，原來盛事經濟都變提子！

#20250213

【楊潤雄講罷工】

楊潤雄任內最彪炳政績不是由郵輪頭或Taylor Swift，而是做教育局局長時令教育界腥風血雨。

2020年，教育局去信全港學校，禁止唱政治歌、罷工同罷課，楊潤雄在《在晴朗的一天出發》斥任何行業都不應罷工，點估到而家自己被罷工。

主持：邊首政治歌唔得？

楊：邊首睇發展啦，可能遲啲又有新歌。

主持：《願榮光歸香港》一定唔得？

楊： 呢首好明顯係政治宣傳的歌。

主持：在音樂比賽唱《孤星淚》呢？呢首有革命背景。

楊：宗旨係佢做呢樣嘢會否干預校園、影響學生情緒、令佢參與活動，就係政治宣傳。

主持：如果學生唱熱愛基本法呢？

楊：熱愛基本法不是一個政治行為，是每個人應有的行為，正如好似孝順父母，這不是政治宣傳，是法治行為。

主持：咁佢宣傳國安法呢？

楊：這是應有的態度，這不是政治的行為。

主持：所以支持法治不是政治，反對就是政治？

主持：林鄭話絕大部分人贊成立法，起碼你肯講社會有唔同意見。

楊（知道賴嘢）：你問我，我都相信絕大部分香港市民支持，但的確有少部分人有意見。

主持：基本法講明有罷工自由。

楊：罷工要關乎佢服務條件，老師因為政治原因，咁學生點呢？

主持：任何行業罷工都會影響其他人。

楊：老師為了個人信念或理由而將學生利益不顧係有問題。

主持：咁各行各業都唔應該罷工。

楊：如果你三位突然罷工點算，咁呢個鐘頭點算呢，貴台都要同你哋跟進。

#20241205

今朝政壇最爆消息係文化及體育旅遊局局長楊潤雄及運輸及物流局局長林世雄被免職，正好星島日報報道葉劉淑儀主持立法會經濟發展事務委員會時炮轟官員，都係來自呢兩個局。

葉劉當日主持2個半小時，但有4項議程，葉劉質疑為何不提早交上立法會，現在卻催促審議。記者翻查該4個議程，1個屬文體旅局，其餘3個屬運物局。

有建制派議員形容葉太是性情中人，其發言道出不少議員心聲。

如果官員廢可以被議員鬧到下台，咁市民覺得議員廢仲可以月逗過10萬，又可唔可以令佢免職呢？

#20241205

文匯報頭條報道記者放蛇參加兩日一夜大灣區睇樓團，聲稱有景點、有自助餐、住SPA水療酒店。重點係呢個團係免費，正常人都知係騙案，但文匯報記者煞有介事去搗破騙案。

出發前，對方以爆額為由，要記者付66元參加另一個睇樓團。

記者同30名團友去到珠海睇足3個樓盤，但冇人幫襯，說好的海鮮自助餐變了青菜肉末「頹餐」，仲要被導遊警告：「今晚未必有酒店瞓。」

說好的SPA水療酒店變成瞓會所按摩椅，但全晚有技師監視同問詢問要不要加錢按摩，90分鐘收398元。

第二朝，大家未食早餐又參觀兩個樓盤，說好的「特式中山粵菜」午餐變成24元飯票，團員夾菜後鎊重計錢，記者小心翼翼夾幾片肉及菜已值21元，請睇版面右邊有磅的相。

感謝文匯報親身驗證中國人最愛割自己同胞的韭菜。

#20241204