امي  الحنينه  الــماكو  منها
مشتاگه اريد اغفه ابحضنها
مستعجله اعليها الـــــــمنيه
راحت  غفل  من  بين  اديه
................................

انه زينب   والمحاجر    دامــــعه
فارگتني    رحمة الله    الواسعه

امي حين الودعتها حسره ظلت بالصدر
ما گدرت احضنها خوفي ينلچم بيها الكسر

ودعتها    وگلبي ماشابع حنان
ودعتها    مدري ودعت الامان

ليل اليمرني اشلون انامه
وابــروحي آهات اليتامه
أذكر  واحن  كل  مغربيّه
راحت غفل من بين اديه
.................................

اشما يدگ   الباب اذكر   من مشت
وبيه لاذت   والضلوع    اتهشمــت

عيني اذا تغفه يمرها حلم بي كلمة وأن
واصحه مرعوبه ودمعتي سايله وترس الجفن

يا حسرتي   الچانت اغله امن العمر
يا حسرتي   غفت بحضان الگبر

لا ما رضت لـ اخر عُمُرها
لا عن  الاول  لا  عُمَرهــا
وناتج فعال الــــــناصبيّه
راحت غفل من بين اديه
.................................

حمره چانت    عينــها اذكر     داميــــه
من سطـرها     ابچفه حيل     الطاغيه

طاحت امن السطره امي ودمها سال امن الجفن
والرجس بالصوط اجاها وگام يضرب بالمتن

ألموهـا    وهيه ما تحمل ألم
ألموهـا    وردو  لدين الصنم

ماتت وبالموت استراحت
بس الضلع مهشوم راحت
لحگت رسول الله  ونبيّه
راحت غفل من بين اديه
................................

عمر محسن    چـان عصره        وبيها مات
ومثل امي     اضلوعه همِّ         امكسـرات

الف هنيالك يَـ محسن ما نظرت الناصبي
وهو يعصر بـ امي مره ، مره يشتم بالنبي

كل هذني   شاهدتهن من زغر
كل هذني    نار وسياط وكسر

واعظمهن الأكثر اليــــــمه
يامحسن احساس اليتيمه
من امي محرومه  اشبديه
راحت غفل  من بين  اديه
................................

چانت امي    ورده بيضه   امفتحه
هــــيَّ أول    زهره بالدم    سابحه

امي لهل الأرض رحمه من ألآه العالمين
رحمه بس ابلايه رحمه صگطو منها الجنين

رافضيه    للظلم ما تنطي أيد
رافصيه    وقدمت اول شهيد

راحت غفل  من  بين  اديه
................................

امي من الله هديه للنبي ولـحيدره
امي تفاحة الجنه طاهره وامطهره

يايمه  شذكر   من  صفاتچ
وانتي الخدر خيط ابعباتچ
ياعفة الله اعله الــــــوطيه
راحت غفل  من  بين  اديه
................................
سيد علي عبدالزهره الناجي

ضلعي المكسور    يلجمني
وخدي المسطور   يلجمني
يمه وصار اشجم يوم      ماشايف جفني النوم

م**ن الباب ضلعي انصاب وتهشم
وعالبسمار يمه آثار نزف الدم
اگوم اگعد اون وحيلي اتهدم
تعبت وحتى من اتنفس اتألم

ما انام الليل          من ضلعي
شگد شفت الويل   من ضلعي
ينزف ضلعي المهشوم      ما شايف جفني النوم

صار** ايام يمه النوم ما شفته
انحنيت وضلعي ليل انهار لازمته
يزينب والحزن مايوم فارگته
والباب شكثر بدموعي عاتبته

ياباب اهواي    تهضمني
شعندك وياي     تهضمني
ارحم گلبي المهضوم           ما شايف جفني النوم

يوم**يه الضلع يلجمني يوميه
وبعد لجمات زينب يمه مابيه
من كسر الضلع گمت امشي محنيه
اهموم البيه يم اهمومج شويه

البنيه اهواي       تتعذب
من امها تموت    تتعذب
زغيره وگلبج مهموم          ما شايف جفني النوم

الم**حسن ابني طاح وعيني اتنظره
بحشاي ورفس من شدت العصره
گلب الوالده عله الولد شيصبره
ليش اوليدي مات وما كمل عمره

طاح اعله الگاع     يبنيتي
ومات ابني بساع    يبنيتي
روحي عله اوليدي تحوم         ما شايف جفني النوم

عيو**نج راح من كثر الدمع تتعب
والله يعينج عله افراگي يازينب
راسج يمه زينب عالضلع شيب
بيج اشلون لو شفتي الاخو مسلب

مجروح اهواي      بالغربه
وما صح له الماي   بالغربه
من ابني ايظل محروم          ما شايف جفني النوم

اخو**ج بكربله ضامي يذبحونه
وبنحره اثنعش طبره يطبرونه
بحوافر خيلهم بالطف يسحگونه
وراسه عله الرمح يمج يرفعونه

ما تبقى اخيام     من بعده
وترحن للشام     من بعده
يسبوجن راح الگوم          ما شايف جفني النوم

تمت**
ميثم العمري

رسول الله ص يوصي امير المومنين ع
بالصبر على مصيبة الزهراء ع
--------------------
تموت الزجيه او دمها عالتراب
  وتصبح يحيدر دنيتك عذاب
انته الامير على الصبر .. شد حيلك او لا تنكسر
سلام .. سلام
-------------------------
صح جفك الخيبر قلع .. والشافك اكبالك وكع
تتگيد ابذاك  الوجع       .. تطيح
اهل الحقد بيهم طبع  .. لاذمه عدهم لا شرع
باجر يكسرون الظلع   ..  تطيح
على خد يسطروها تره  .. دين الله يمك منبره
ياحيدر اصبر عالجره   .. تطيح

حتى السمه علنت ترى الحداد
انحب يحيدر ولبس السواد 
كسر الگلب ماينجبر   ..  شد حيلك او الاتنكسر
سلام .. سلام
-----------------------------
باب او عله الحايط هوه  .. عالزهره ونطبگن سوه
مختنگه واتدور هوه   ..  تصيح
ريتها دخان انملت  .. اعليها الچفوف اتطاولت
ياعلي الزهره اتالمت      .. تصيح
ضلوع الزچيه مكسره  .. ومحسنها اصد دمه جره
او وردة حياتي  محيره      .  تصيح

خلي ابن عمي مني هالرجاء
لا ارفع ايدي واگلب السماء
اگلبها عاليها حدر     .. شد حيلك او لاتنكسر
سلام .. سلام
------------------------
لمن اموتن ياعلي  . .  مو بلوه رايح تبتلي
ولاواحد ايضل من هلي  ..  حرام
امر الله هذا الكاتبه  .. وعين الله هيه اتراقبه
الجامع حطب وي صاحبه     ..حرام
لا رحمه عنده ولا يحن  ..جاب الحطب يصرخ وان
الزهره گالوله تون          ..   حرام

باچر يحيدر دمعتك تسيل
وظهرك مثل هذا الكمر يميل
كلبك صبح مثل الجمر    شد حيلك ولا تنكسر
سلام .. سلام
------------------------

واليندبك تحظر اله  .  وتفظله اعظم مشكله
والزهره عندي مدلله    ..   تنوح
جرحك إعلام ايظلله  .. صعبه ترى هل مرحله
خلگك ياحيدر طوله    .. تنوح
ياحيدر اي هذا الصدگ  .. چفوف التسبح تنحرگ
ويه الباب عمرك ينطبگ   .. تنوح

يمك ياحيدر يبقه هل قرار
وانه ادري كلبك على الزجيه نار

صبرك عله كل اليمر   .. شد حيلك او لاتنكسر
سلام .. سلام
------------------------
باجر يحيدر شيعتك  …  كلها تصير  ابخدمتك
يرفعون باجر رايتك      ..امير

الحاضر يبلغ غايبك    .  يالصابر الله يعوظك
ياهو الي منهم يوصلك    .  .. امير
هذا الحقد ظل للازل    ..يغارون منك لااقل
والحبك ابنعشه انحمل  ..   امير
هاي العصابه العلنت الولاء
باجر اموت أو تنصب العداء
اي وحق خدها المنسطر   .. شد حيلت او لاتنكسر
سلام سلام
--------------------------

الخادم
حسين الزيدي

نزله... للرسول محمد صلى الله عليه وآله

بويه بغيابك.    ما عودتني
ابچي لمصابك   يالدللتني
...................

بويه البنية سندها   الوالـد اليرعاها
بالدلال تعيش بويه   من يعيش وياها
تموت لو فارگها ساعه   من حزن بلواها
شلون لو چان الأبو.  يالغالي شخصك طه

اتمنّه موتي.     من فارگتني
ابچي لمصابك   يالدللتني
................... ..........

چنت اشوف الدنيه حلوه.  منّ شوفك يمي
بوجهك اليسطع جماله.   ينجلي كل همي
كون اموت وياك بويه   هذا اصبح حلمي
ولا اظل بجروح گلبي   وبشماتة خصمي

آلامي زادت.     من ودعتني
ابچي لمصابك   يالدللتني
................... ..............

ماكو مثلك بالخليقه   شايل انسانيّه
تمطر عله الناس رحمه  والدي وحنيّه
انت بس انت يبويه.  تدري بيه شبيّه
يالچنت تنشد عليه    وماتمل يوميّه

مفجوعه بعدك.    ريتك شفتني
ابچي لمصابك.      يالدللتني
................... ...........

ياحبيب الله مُحمّد     جرحك يأذّيني
فاطمه الزهراء اني.   انحب مخلّيني
بويه تدري بالمصايب  لو غبت تلفيني
تهجم عليه الصحابه   بعدك تعاديني

مهضومه وبچي.    المن عفتني
ابچي لمصابك       يالدللتني
................... .........

نكرو الكرار بويه   يالرسول اصحابك
بس علي ويّاك باقي.  منشغل بمصابك
غسّلك بيده يبويه   وچفّنك بثيابك
بالگبر واراك بويه   ظل يشم اترابك

يالهادي ويّاك.      ريتك خذتني
ابچي لمصابك        يالدللتني

سيد زيد الفحام

بخطــوة الزايـر. هلا.       
            بصـرخه صاحت كربله

هلا. بالمشايه.   هلا بالمشايه
___
نمشي خطوات.    مسافات.      نون المصيبتك
شنهو حر صيف.     يمــولاي.    نروح الكـبـتك

شفــنه انواع المشولك شايب يكـوده لولد
مكَـٍرم وجاي الضريحك زحف جاي ولاكعد
الله سير كلش الـــجلك ياحـسين ع الوعد
أحنه شيعه وأنتـه حبنــه مانعـــوفك الأبد

طلعـت آلااف الألوف
رايه شالو بالجـفوف

عايف البـــيت وهــله     بصرخه صاحـت كربله
___
طلعت الناس.      ملايــــين       تلاكي أم الخـدر
رجعت بروس      للطـفوف.       يويلي من اليسر

رجعت بدمـعه عذرها الدمعه بيها تلاالي
وعايفه بديره غربها.رقيـــه بنــت الغالي
تكله لا تنـشد يخـويه ماتطــمن أحـوالي
نكصد بدمعه حزنه نواسـي أخت الوالي

رجعت الأرض الطفوف
تسعه يم كبره وتـطوف

رقيــه مـــو بالــــقافله.     بصرخه صــاحت كربله
___
خادم  يـصيح.    يـــــزوار.   علي وياكم علي
فدوه مشـاي      يله وياي       مبـيتك يم هلي

فـدوه يازاير تمـرنــه الجلك أفرش عينـي
والله اغـطيك برمــشها يل تـزور حسـيني
من اخدمك ها يزاير خـدمه تسوى سنيني
خاف أقــصر أنه بــيــها ماأكــمل دينـــي

الخدمه أحله من العمر
الخـادم يــنادي بـعــذر

الخادم بصـيتك عـــله.     بصرخه صاحـت كربله
___
سفرت  حسين    حتى. الطير.     شبع منها وقنع
كل سنه تزود     للمعشوك        يعشـكي الماكطع

سفرت  وحده بهل مواكب تنمد بطول الدرب
زايد الخير وننافـس خلهـا تــسمع الغــــرب
العالم يحير بفعلنه عدنه سهـله وموصــعب
فـــدوه ياالزاير تـــمرنه أفــرح أنه من تطب

الزاير بكل خطوه حــــج
المهـــدي ندعيله بـــفرج

بالفـــــرج ندعـــي إله      بصرخه صاحـت كربله
___

الشاعر الحسيني

مرتضى مكطوف الموالي

صاح عبـاس هله ابزواري
افرح اهواي انه ابخطاري
صوته ناده ابكربله
هله بالزايـــــر هله
                         ****
هله بالمشايه - الشايلين الرايه - دومكم وفايه - ماتقصرون
المهدي جاي اوياكم - يمشي وي ممشاكم - ياهله وحياكم - يلي تمشون
الدنيه طلگتوهه - والاهل عفتوهه - الكفر حاربتوهه - ماتخافون

رغم الارهاب رغــم تفجيره
شلتو رايـات وجيتو ابغيره
اوصوت ناعيكم عله
هله بالزايــــــــر هله
                       **
العنده حاجه اگظيهه - خله يبشر بيهه - التعتنيني ارضيهه - امجرب ابهاي
انه للطلبوني - انطي ماي اعيوني - كلكم اتعرفوني - انه وفاي
ريت عندي اجفوفي - بيهه ألاگي اضيوفي - وفرشلهه اطفوفي - اورايتي افياي

لچن تدرون گطيعه ازنودي
قــــــدمتهن فده المعبـودي
ولجل ابن عقد الوله
هله بالزايـــــــر هله

افرح ابطرواكم - والله ما انساكم - سجلت اسماكم - عند الحسين
من يشوف ألواكم - حسين يتلگاكم - يبچي وي مبچاكم - يا موالين
يومكم ضل خالد - رغم انف الحاقد - كل سنه تتوافد - هل ملايين
يلي تمشون علي وياكـــــــم
صرتو شوكه أبعيون اعداكم
هل جمع استقبله
هله بالزايـــر هله
**
وحق خدر اضعوني - ادري ماتنسوني - عالعهد جيتوني - يلي توفون
انتو اغلى احبابي - اولو ندبتو ابابي - تسمعون اجوابي - من تزورون
ارواحكم شيعيه - انفاسكم مهديه - الغيره عباسيه - ماتذلون

ماتردون نطيتو احچـــــايه
اشما يجورون على المشايه
بيكم الطف امتله
هله بالزايـــر هله
                     *
هذا درب الجنه - وكل محب يتمنه - أجر ياخذ منه - من يجي ايزور
وليهل دمعاته - ابگد عدد خطواته - اينول كل حاجاته - ويرد مسرور
ولي ينصب مئتم - بالطريق ويلطم - والله مايتندم - يظمن الحور

عفتو البيوت خليه اوجيتو
مثل الهــــلال علّــي هليتو
بيكم الهــم انجله
هله بالزايـــر هله
                   **
     الخادم
كامل السعيدي

ليلة العليله

من طلعتوا. طلعت الروح بجفاكم
من طلعتوا متت يابويه وراكم
قصة افراگ وعذاب
شرد اسولف يامصاب
من طلعتوا

جان فكري وياك اروحن وماخذتني يالرحت
ولوعتني من غيابك بزغر سني وشيبت
خطوه خطوه وضيعتكم كلشي ضاع وهم ضعت
وارجعت مكسورة خاطر من رجوعك ايست

ماخذتني. بويه واني بلاياوالي
ماخذتني. عذبت گلبي الليالي
دمعتي جانت جواب
شرد اسولف يامصاب
من طلعتوا
==========
جانت الدار بوجودك تزهي يا بويه وتنور
وانطفت بويه برحيلك وظلمة تشبه للقبور
طفلة واستاحش يبويه الخوف بعيوني يدور
وافتح القرأن وابجي ودمعتي بين السطور

بوية وينك. يالعفتني بلاياأهلي
بويه وينك. راح كلشي وشنهو ظَلي
بله شيفيد العتاب
شرد اسولف يامصاب
من طلعتوا
==========
جرحي شد نزفه عليه وحيل ياذيني الجرح
وغيبتك تدري اعل جرحي بويه تنزل جن ملح
اتعب واغفه وانامن واحلم بروحي رمح
وبالحلم ليليه اشوفك على الغبره ومنذبح

چني اشوفك تسحك الخيل اعل صدرك
چني اشوفك. ينگطع يابويه نحرك
شمس وانت اعل التراب
شرد اسولف يامصاب
==========
يخلص الليل بعذابه ويلفي صبح الفاجعه
والشمس ترسملي خيمه وجف كطيعه ومشرعه
گبالي رمح الهم اشوفه وجثث بويه موزعه
وحرمه محتارة وغريبه جفوف ترفع للدعه

هايه زينب. بويه محتاره العقيله
هايه زينب. دمعة الحرة ثكيله
تنظر بوجهك خضاب
شرد اسولف يامصاب
من طلعتوا
==========
والهوه لو مر عليه يجيب دخان الخيام
وعالشمس جنه يخيم وتصبح الدنيا ظلام
والهوه خايف نسيمه ادري مذبوح السلام
والكلام تصيبة سكته هناك بالطف الكلام

ماكو رحمه. إتذبحوا اهلي وعمامي
ماكو رحمه. بصدري يذبحني كلامي
مذبحه شيبه وشباب
شرد اسولف يامصاب
==========
الشاعر علي النائليhttps://t.me/zxcbnmas123