السلام عليكم ورحمة الله وبركاته

أمّسي عليكم بوصفة حلويات صحية سهلة ومفيدة جدا

الوصفه هي زي السمسمية والفولية والحاجات الي بتتباع من النوعية ديه بس صحية
تقدروا تضيفوا فيهم اي حبوب او مكسرات او فواكه مجففه انتوا عايزينها بالإضافة فقط للعسل الإسود
مكونات الوصفه في الصورة
كوب سمسم كامل الحبة محمص
كوب جوز الهند محمص
كوب لوز مقشر محمص
كوب إلا ربع عسل اسود او كوب كامل حسب رغبتكم أنا ضفت كوب إلا ربع معاه قليل من الملح مع عصرة ليمون
تكونوا محمصين مكوناتكم لمذاق أفضل وترفعوا العسل الأسود على النار اول مايبدأ يغلي تحسبونه 10 دقايق وبعدين تحطوا على مكوناتكم الجافه وحبذا تكونوا مسخنينها هي كمان قبل وضع العسل وتقلبوا العسل مع المكونات وعلى طول تفردوا المكونات بين ورقتين زبده بالشوبك بشكل مستطيل وتقطعوه بالشكل الي انتوا عايزينه قبل مايبرد وبس يبرد هتلاقوه مسك نفسه وبقى مقرمش وجميل
كلوا منه انتوا وأولادكم قد مانتوا عايزين لأنه مغذي وغيروا وشكلوا في المكونات الجافه حسب المتوفر عندكم بس نصيحة تخلوا السمسم كامل الحبة أساسي في الوصفه لأهميته الغذائية وعلى فكره طعمها حلو جدا تعجب الأطفال الي بيتنمروا عالحاجات الصحية كمان

وأطعمكم الله وسقاكم من طعام وشراب أهل الجنه اللهم امين

بين المقاطعه والتطعيمات وبدائلها وهذا وذاك!
الحقيقة من أبرز المشاهد الي تستحق التأمل في موضوع المقاطعة ان في فئة من الناس مموته نفسها على البحث عن بدايل أشياء هي أصلا مهلكة لصحتهم زي مثلا مقاطعة شركات المياه الغازية الداعمة للصهاينة_عليهم لعنة الله في الدنيا والآخرة ومن عاونهم_ فبدل ما الناس تقاطع المياه الغازية أصلا لضررها الشديد على صحتهم لا يبحثوا عن شركات تانيه غير داعمة برضو لإهلاك صحتهم!
سبحان الله نفس منطق بعض الي بيناقشوني في موضوع تط عيمات الأطفال
بعد مابيعرفوا ضررها الشديد على أبنائهم يقولولي وفين البديل!!
بديل أيه يا حضرات؟! هي أصلا مش شيء أساسي اتولدت بيه ماينفعش تعيش من غيره عشان تقولي فين البديل
البديل انك ترفض وتقاطع منظومة التطيمات الشيطانية بالكامل وتتجنب قدر استطاعتك علاج أبنائك من اي مرض بالأدوية الكيميائية وتتقي الله قدر استطاعتك في تزكية طعامهم وشرابهم عشان يبقى عندهم مناعة كويسه وده النظام الي يقي من المرض مش تديهم أخبث ما اخترع عباد الشيطان وهي التطعيمات متخيل انها تحميهم من الأمراض ووالله هي المرض بذاته بتحقنه في جسم أبنائك لأنك مش مكلف نفسك تبحث عن شركات الصهاينه الي بيعملوا التطعيمات وحاطين فيهم محرمات من خلايا أجنة بشرية مجهضة وخلايا حيوانات قرود وغيرها ومن المواد الفتاكة بمخ الانسان زي الالومنيوم وغيره الكثير وتقول بحميهم من المرض!
قاطعتوا شركات كتير خاصة بالأكل والشرب واللبس ماجاش الأوان انكم تدخّلوا معاكم المقاطعة بند غافل عنه الكثير ألا وهو شركات التطعيمات الي لو بحثتوا عن أصلها وفصلها هتلاقوها شركات صهيونية أصلان مجرد شركات داعمة!
بيقولولكم احنا بنحمي أبنائكم من المرض وهما بيزرعوا فيهم المرض من أول يوم في عمرهم!
قاطعوا شركات التطعيمات وافضحوا مسلسلاتهم الي بيعملوها عالناس وما مسلسلات تطعيمات كورونا عنكم ببعيد!

السلام عليكم ورحمة الله وبركاته
المنشور ده يعتبر مهم جدا لإنه بيتكلم عن أكلة رئيسية عندنا احنا كمصريين وهو الفول
في ناس بتقول إن الفول أكل للحيوانات وليس بني ادم وطبعا أنا أعارض دا الفول ده حبيبنا يعني

الكارثة ان مصدر أكل الناس للفول غالبا هو الشارع إما مطعم أو عربية والي طريقة تدميسهم للفول غالبا فيها كوارث صحية على البشر خلينا نعدهم واحدة واحدة
أولا: تدميس الفول في دماسات ألومنيوم
وكنا اتكلمنا قبل كدا عن ملف أواني الطعام والي يخصنا هنا تدميس الفول في الألمنيوم بيخلي الألمنيوم يتفاعل مع الفول وبيتسرب للفول والي يدخل جسمنا بجزيئات صغيرة قادرة حتى على اختراق المخ والتأثير عليه وتسببه في أمراض زي الزهايمر وغيره من المشاكل العصبية زي النسيان وتشتت الانتباه وغيره من الأضرار الي الأبحاث أثبتتها حاليا والي نشرناه في المنشور المخصص للأواني
ده غير ان الألومنيوم بيعمل ككابح لامتصاص الحديد في الجسم
وديه مشكلة عامة حاليا نقص الحديد والي سببه مش نقص مصادر الحديد في الأغذية لإنه بالفعل موجود في غالب الأغذية ولكن السبب الفعلي هو كبح امتصاص الحديد في الجسم الي بيسببه الألومنيوم

ثانيا: الفول معروف انه بياخد ساعات طويلة للتسوية وطبعا بسبب غلاء الغاز وتكلفته بقى معظم المطاعم والعربيات بيضيفوا حاجة اسمها إيديتا او اسمها العامي بودرة السيراميك لتسريع تسوية الفول ومعروف مدى سمية المادة ديه بالذات اذا زادت عن حدها

ثالثا: وضع ألوان صناعية للفول!
يمكن مشكلة أي ست بتحاول تدمس الفول في البيت هي مشكلة اسوداد الفول وتبقى هتجنن عشان تعرف ايه سر لون فول العربيات وليه مابيسودش مع ان ديه حاجة طبيعية جدا ان الفول لونه يغمق بعد التسوية بسبب عملية الأكسدة الي بتحصل لكن الي مش طبيعي عدم تغير لون فول الشارع وانه يبقى ليه لون موحد طول الوقت وسره بسيط جدا وهو انهم بيضعوا لون صناعي بالتحديد بودرة الزعفران المغشوشة والي بتدي للفول لونه المعروف والإثبات التجربة الي عملتها
لو لاحظتوا صورتين الفول الي حاطاهم والي بالمناسبه هي هي صورة تدميس فول واحدة لكن الفرق هو لون الفول الي على اليسار هو لون الفول بعد التسوية عادي بينما صورة الفول الي على اليمين والي زي فول الشارع هو بعد مانا ضفت زعفران عليه وطبعا زعفران طبيعي مش مغشوش
ديه أهم الحاجات تعالوا بقى اقولكم عن تجاربي في موضوع تدميس الفول وتطبقوا الطريقة الي هقولكم عليها بإذن الله يطلع أحلى من الشارع بألف مرة

مبدأيا أحب أقولكم إني من زمان بدمس فول والحمد لله فعلا أحسن من برا والطريقة كالآتي
بتجيبوا مثلا كيلو فول بلدي الي حبته صغيره وغامقة ده الي طعمه حلو مش المستورد الكبير ويتم نقعه من 12:24 ساعة والنقع هيتخلص من كمية من اللاكتينات الموجودة في الفول والي صعبة الهضم والامتصاص على الجسم بالإضافة لتطرية الفول ان الفول يستوي بسرعه بعد كدا ويكون طري فعلا
بعدين تجيبوا حاجة فخار ومتاح دماسات فول فخار في مصر انا بدمس حاليا في حلة فخار ده المتاح عندي
بتملوا الي هتدمسوا فيه مية تغلي وبعدين تحطوا الفول وتحاولوا تشيلوا كل الريم الي هيطلع على الوش لانه هو الي بيخلي طعم الفول وحش واما يتشال كله تضيفوا ليمونتين كاملين زي ما هما وتحطوا على وجه القدرة حاجة فيها ميه بحيث اما المي تقل تزودوا مية سخنه مش باردة وتخلوا النار وسط لتقريبا 3 ساعات بعدين تضيفوا على الفول تقريبا ملئ كف إيد فول مجروش وكف عدس لان دول الي بيتقلوا الفول في الاخر ويخلوا اللون كويس وتوطوا النار بقى على الآخر 3 او 4ساعات تانيين أو زي ما ياخد لحد ما كله يستوي وتلاقوا الفول تقل معاكم زي مابتشتروه تطفوا عليه
وهنا عشان اسوداد الفول مايسببش ليكم ضيق قدامكم حلين الأول انكم تخلوا المية من الاول زيادة بحيث اما الفول يستوي ويتقل من تحت يكون في ماء كتير على الوجه وتسيبوه يبرد ع كدا هتلاقوا طبقة المية الي فوق هي الي اسودت فقط تشيلوا الطبقة السودا وتخزنوا باقي الفول في الفريزر عادي هيبقى جميل
والحل التاني انكم اول ماتطفوا على الفول تحطوا زيت على الوجه يغطيه وطبعا احنا متفقين ع زيت زيتون فقط فتحطوه بحيث يعمل عازل بين الهوا والفول ولو مش هيتوفر زيت يبقى الطريقة الأولى أفضل شيء
وبس كدا
وملحوظة أخيرة عشان ماحدش يتمنى ان يكون معاه زعفران طبيعي عشان يخلي لون الفول زي الصورة أحب أقولكم ان طعم الزعفران مش لطيف شوية مع الفول لان الزعفران مش بس بيدي لون لا ده ليه طعم وريحة وده يعرفه الي بيستخدموا الزعفران مع القهوة العربي فماتحسوش ان في حاجة ناقصاكوا أنا عن نفسي جربت المرة ديه فقط بوضع الزعفران عشان اشوف فعلا هل هيدي نفس لون فول الشارع ولا لا وقد كان اداني نفس اللون فعلا ولونه ماغيرش حتى بعد تخزينه في الفريزر واستخدامه بعد كدا بس طبعا مش منطقي عشان ندمس فول نحط أضعاف سعره زعفران الموضوع مش مستاهل خالص

يلا ودمتم بخير

السلام عليكم ورحمة الله وبركاته
إحنا كنا متكلمين قبل كدا عن أضرار السكر الأبيض وقلنا بدايله والي كان أهمها على الإطلاق عسل النحل
يمكن وقتها الناس الي سألت عن السكر البني قلتلهم انه زيه زي السكر الأبيض معرض لكل التعاملات الكيميائية الخاصة بالسكر والفرق فقط إنه أقل تكرير بنسبة لا تذكر لا أكثر ولا أقل
النهاردة بقدملكم بديل اخر من السكر بجانب العسل للي مايقدرش على تكلفة عسل النحل
يمكن إحنا كعرب ماعندناش فكرة عنه ولكن له شهرة كبيرة جدا في الهند لإن بيتم تصنيعه هناك
البديل إسمه سكر جاغري Jaggery suger وشكله زي الي في الصورة فوق طيب أيه الفرق بينه وبين السكر العادي والبني؟
هو فرق السما والأرض حقيقة لإن طريقة التصنيع مختلفة كليا وطريقته أقرب لصناعة العسل الإسود بالصعيد
احنا اتكلمنا قبل كدا عن صناعة السكر العادية فهتكلم هنا عن صناعة سكر الجاغري
هو ببساطة عجينة مركز عصير القصب
بمعنى انهم بيجيبوا عصير القصب بكميات مهولة ويوضع للغلي لفترات معينة مع كشط الرغاوي الي أن يتقل المركز ويتم تبريده ووضعه بقوالب خاصة ثم تغليفه وهو بيكون سكر رطب طري مش جاف
والسكر الجاغري فيه منه ألوان كتير على حسب تركيز عصير القصب في سكر جاغري اسود طعمه هو هو العسل الاسود وفي بني مختلف الدرجات وفي الذهبي زي الي في الصورة وده أنا بفضله لإن وان كانت نكهة عصير قصب باينة فيه الا انها مابتغيرش من طعم الحاجات الي بحليه بيها بجيبه بيبقى قوالب بقطعه بسكينه وابشره واخزنه في علب استخدمه وقت مانا محتاجاه بيبقى ممتاز
اكتبوا في يوتيوب Jaggery sugar وشوفوا طريقة عمله
وطبعا هتسألوا بيبقى موجود فين فهو عامة بيبقى موجود في المحلات الهندية في مصر الأكيد هتلاقوه في لولو هايبر ماركت والسعودية موجود برضو في لولو ونستو والماركات الهندية بشكل عام ومتوفر برضو اون لاين فحاولوا تشوفوه والي مش هيعرف يلاقيه فيه بديل ليه في مصر ممتاز
في صناعة سكر في مصر يعتبر مشابهة جدا للغاجري وهو صناعة الجلاب او اسمه كوز العسل وهو الصورة الي تحت يمكن معظمكم شافه على عربيات بتبيعه بالواحدة وهو نفس صناعة الجاغيري باختلاف الطريقة بيصنع من العسل الإسود في الصعيد وبرضو بيوضع في قوالب ثم يباع
عن نفسي صراحة كنت باكله كدا بكميات مهولة من وانا صغيره فهو طعمه يعني جميل جدا وسعرات حرارية أجمل يعني

عامة انتو لو هتشتروا ماتشتروش من العربيات لان يعتبر غالي شوفوا حد يبيعه جمله واشتروا واطحنوه واستخدموه كمحلى عادي
يبقى كدا عندكم سكر الجاري والجلاب تقدروا تستخدموهم لوحدهم او الي يقدر على تمن عسل نحل ممكن يستخدم الاتنين جنب بعض توفيرا للنفقات يعني هو السكر أقل توفيرا من العسل وفعلا بيبقى محتفظ بكمية كويسة جدا من الفيتامينات الي فيه وطبعا مش كله مواد كيماوية زي السكر الأبيض
هو ملحوظة أخيرة من باب الأمانة العيب الوحيد الي لقيته في صناعة الجاغري شوفت في بعض الفيديوهات انهم بيضيفوا بيكربونات الصودا غالبا للمساعدة على التبلور لكن بكميات قليله جدا جرامات على كم هائل من مركز القصب فوجب إعلامكم عشان تكونوا على نور برضو
ويسّر الله لنا ولكم

تحذير مهم جدا بمناسبة موسم الزيتون
طبعا احنا حاليا في موسم الزيتون والزيتون المخلل بينتشر في كل مكان
والسؤال ازاي مش بيعدي أيام على الزيتون وتلاقيه انتشر كمخلل بعدها مباشرة في حين ان أقل مدة لتخليل الزيتون طبيعيا هي شهر؟!
الإجابة للأسف ان 99% من الزيتون المنتشر في الأسوق والمحلات بيتم نقعه في الصودا الكاوية لنزع مرارته وتسويته وبعدين وضعه في محلول ملحي مباشرة ووضع صبغة سودا لتسويد الزيتون لما يكون عاوز زيتون إسود وبالهنا والشفا على المستهلك!
طبعا الموضوع ده كارثة صحية بكل المقاييس أولا بسبب دخول الصودا الكاوية لجسم الإنسان وما أدراكم بأضرار الصودا الكاوية من تقرحات وسرطانات
ثانيا انكم هتكونوا بتاكلوا غذاء ميت لا حياة فيه
الأصل ان تخليل الزيتون أو أي خضار لمدة طويلة ده بينتج عنه في الآخر منتج غني بالبروبايوتيك الي جسم الإنسان محتاجها بشدة
بينما أخذ الزيتون المنقوع في الصودا الكاوية لا ينتج عنه إلا طعام ميت مشبع بالصودا الكاوية، منتج مناسب لسياسة السوق العالمية الحالية عمل كل الغذاء في أقل وقت وارمي للمستهلك الي بيدخل كل حاجة لجوفه كإنه مقلب قمامة بيدخله اي حاجة بدون الاهتمام بمصدرها وتكوينها
فتجنبوا الخبائث ديه واشتروا الزيتون الأخضر او الاسود الني_والي منتشرين في الأسواق دلوقتي برضو_ وخللوه بنفسكم واعملوا كمية تقضيكوا سنة للموسم القادم
وطريقة التخليل سهلة جدا وهي طريقة واحدة قد تختلف فقط في الخطوات وهي إنكم بتغسلوه وفي ناس بتنقعه أكتر من مرة في المياه وتغير المياة لمدة 3 ايام لنزع المرارة وبعدين تخلله
لكن الأفضل طبعا تخليل الزيتون مباشرة بوضعه في محلول من الماء والملح والليمون وممكن تضيفوا أي إضافات تحبوها زي الجزر والعصفر وحبة البركة
والتخليل يكون في علب زجاجية ممنوع البلاستيك بيتفاعل مع الطعام خاصة المخلل منه مع وضع زيت زيتون على فوهة العلبة وغلقها بإحكام على الأقل لمدة شهر وكل ماتطول المدة يكون أفضل
وبعدين يتاكل صحة وعافية ان شاء الله

طريقة عمل نشا طبيعية غير معدلة جينيا!

كنا اتكلمنا قبل كدا ان كل النشا الي موجودة في السوق هي نشا الذرة المعدلة جينيا لإن تقريبا 95% من محصول الذرة في مصر والعالم هو ناتج عن بذور معدلة جينيا والبذور الطبيعية قلما تُزرع لإن محصولها أقل من البذور المهندسة وراثيا وبالتالي النشا الي بيتم استخراجها من الذرة هي مهندسة وراثيا مش نشا طبيعية
وقلنا قبل كدا اننا نتجنبها ونشوف نشا بديل زي نشا الأرز وخلافه
وطبعا كلنا دورنا وانا واحدة منكوا مالقيناش في السوق أسكت انا بقى ؟! لا طبعا لازم أعمل نشا طبيعية بنفسي

ها جاهزين تعملوها معايا ولا ايه الأخبار يا مكسلين؟!

نبدأ ببسم الله
النشا نقدر نستخرجا من مصادر غذائية مختلفة تكون بتحتوي على النشا
أنا جربت من مكونين أولا استخرجتها من البطاطا الحلوة وثانيا استخرجتها من التابيوكا أو اسمها الكاسافا
والنشا الي في الصورة من التابيوكا والنشا الي بتحتويها التابيوكا أكتر من اي مصدر غذائي آخر وأكثر كمان من البطاطا
وهقولكوا طريقة استخراج النشا منها ان شاء الله
بتجيبوا التابيوكا وتضربوها في الخلاط بمية كتيرة وتجيبوا حلة كبيرة وواسعة وصفاية تحطوا الي خلطوه في الصفاية تنزلوا مية كلها لحد ما يتبقى التفل تحطوا عليه مية تاني وتعصروا برضو وتشيلوا التفل على جنب وتكرروا لحد ما تخلصوا الكمية كلها
هتلاقوا المية الي في الحلة متعكرة ده لإن النشا لسه دايبة في المياه
هتسيبوا المية ديه مثلا طول الليل هتلاقوها صفيت خالص تدلقوا المية لحد ما توصلوا للطبقة البيضا الي تحت وتوقفوا وتاخدوا الحلة تحطوها في الشمس كام ساعة لحد ما المية تنشف خالص وتبقى معاكوا النشا تحت جافة خالص تفتفتوها بمعلقة وممكن تحطوها في المطحنة زي مانا عملت هيطلعلكوا النشا الي في الصورة ديه نفس ملمس النشا العادي وتقدروا تستخدموها في أي حاجة بعد كدا
التفل بقى الي اتبقى معاكوا ممكن تجففوه في الشمس وتطحنوه وتعملوه دقيق عادي
والتابيوكا صورتها الي على اليسار تقدروا تدوروا عليها لحد ماتلاقوها ان شاء الله وفي حالة عدم توفرها نستبدلها بالبطاطا الحلوة
ودمتم بعيدين عن كل ما تم تغييره في خلق الله اللهم آمين