Муносабат:
Ишонч бизга катта куч беради
Кўксарой қароргоҳида Президентимиз Шавкат Мирзиёевнинг мамлакатимиз ёшлари билан мулоқоти биз келажак авлодга эътибор йўлида яна бир қадам бўлди. Кейинги йилларда ёшлар масаласининг давлат сиёсати даражасига кўтарилгани, яратилаётган имкониятлар тенгдошларимни фаолликка, ташаббусга бошламоқда.
Давлатимиз раҳбари азму шижоатли, навқирон ёшлар билан учрашиб турганидан мамнунлигини билдириб, уларнинг тимсолида Янги Ўзбекистоннинг бугунги ва эртанги бунёдкорларини кўраётганини таъкидладилар. Бу бугунги кун ёшларига катта ишонч. Унинг замирида эса масъулият мужассам.
“Бугунги кунда биз мард ва матонатли халқимизга, серғайрат ёшларимизга ишонганимиз учун ўз олдимизга катта-катта мақсадлар қўймоқдамиз, маррани баланд олмоқдамиз. Келгусида Учинчи Ренессанс пойдеворини яратадиган янги Хоразмийлар, Берунийлар, Ибн Синолар, Мирзо Улуғбек ва Алишер Навоийлар қаердан пайдо бўлади? Бу улкан вазифаларни ким бажаради? Мен қайта-қайта такрорлашдан чарчамайман. Албатта, бу эзгу ғояларни сизлар – бугунги Янги Ўзбекистон ёшлари амалга оширасизлар», деди Президентимиз.
Мен фаол ёшларнинг вакили сифатида халқ депутатлари Андижон туман кенгаши депутатиман. “Адолат” СДП Андижон вилоят кенгаши фаолиман. Имкон қадар амалга оширилаётган ислоҳотларда қатнашишга ҳаракат қиляпман. Ўз сайлов ҳудудимда яшовчилар билан доим ҳамнафасман. уларнинг муаммоларини ечимини топишга кўмаклашиш фаолиятимнинг асосига айланди. Бироқ бу ишлардан қониқиш ҳосил қилмайман. Чунки Юртбошимиз бизга шунчалар катта ишонч билдирмоқда. Бунга муносиб бўлиш учун янада фаол, ташаббускор бўлишимиз шарт. Асосийси, ишонч бизга катта куч беради.
Абдуғоффор Каримов,
Халқ депутатлари Андижон туман кенгаши депутати.

«Адолат» СДП 30 ёшда
Менинг партиям- мен танлаган йўл
Инсон кексайгани сари ортга назар ташлаб, ҳаёт йўлини сарҳисоб қилади. Қандай ҳаёт кечиргани, нималарга эришгани кўз олдида гавдаланади. Ўзбекистон “Адолат” СДП 30 ёшга тўлган кунда беихтиёр шу тўғрида ўйладим.
Партиянинг Андижон вилоят кенгашига биринчи бўлиб раҳбарлик менинг зиммамга тушганди. Сиёсий партиялар бугунгидек шаклланмаган бир вақтда бу иш осон бўлмаган. Вилоят фаоллари, тажрибали раҳбарлар билан ишни қандай ташкил этиш борасида кенгашгандик. Меҳнат жамоаларида бўлиб. янги партиянинг мақсад ва вазифаларини жамоатчиликка тушунтирдик. Натижага эришиш осон бўлмаган. Шундай бўлса-да, чекинмадик. Ўз сафимизни кенгайтириш ҳаракатида бўлдик.
10 йил андижонлик “адолатчилар”га етакчилик қилдим. Шу вақтда бу партияни танлаб, адашмаганимга амин бўлдим.
Йиллар ўз баҳосини берди. Бугун “Адолат” сиёсий майдонда ўз ўрнига эга. Унинг мақсад ва ғоялари ривожланиш йўлидаги давлатимиз сиёсати билан уйғун. Андижоннинг ўзида 70 минг нафардан ортиқ партия аъзолари борлиги қувонарли. Олий Мажлис Қонунчилик палатаси ва маҳаллий кенгашлардаги вакилларимиз ҳам кучли, ўз ўрнига эга.
Адолат бор жойда тараққиёт бўлади, ривожланишга эришилади. Бизнинг бош мақсадимиз ҳам ана шундай. Шу сабаб сафимиз кенгаймоқда, бизни қўллаб-қувватловчилар сони ортиб боряпти. Ишонаманки, бу йўлда партиямиз кўп ишларни амалга оширади.
Ҳамиджон Нўмонов,
“Адолат” СДП Андижон вилоят кенгаши фахрийси

Диабетни биргаликда енгамиз
Бугунги кунда қандли дабет касаллиги ёшариб бораётгани барчани ташвишга солмоқда. Хўш, бу дардни олдини олиш ва ундан сақланиш мумкинми? Ўзбекистон "Адолат" СДП Избоскан туман кенгаши томонидан туман тиббиёт бирлашмасига карашли Пойтуг кўп тармоқли марказий поликлиникада ташкил этилган давра суҳбати олдига айни шу савол қўйилди.
Қандли диабет ҳафталиги доирасида ташкил этилган "Соғлом турмуш тарзи - фаровон ҳаёт асоси" мавзусидаги мазкур давра суҳбатига тиббиёт ходимлари ва жамоатчилик вакиллари таклиф этилди. Унда сўз олган шифокорлар йиғилганларга диабетнинг келиб чиқиши ва қандай даволаниш тўғрисида тушунча бердилар. Унинг асосий сабабларидан бири соғлом турмуш тарзига риоя қилмаслик ва тиббий маданиятнинг етишмаслиги эканлиги таъкидланди.
-Қандли диабетга чалинган беморлар ўз саломатлигига доим эътборли бўлиши, шифокор кўригидан вақтида ўтиб бориши шарт. Тўғри овқатланиш энг асосий омиллардан бири,-дейди партия фаоли, шифокор Зухра Комилова.- Бундай беморлар кўп сув истеъмол қилади. Агар сувни уч марта бўлиб-бўлиб ичилса ва ҳар бир ичиш олдидан нафас олинса, тана ҳаводан кислород олади, бу жисмга инсулин беради. Инсулин эса танани қандли диабетдан ҳимоя қилувчи модда ҳисобланади.
Кўрсатиб ўтилганидек, қандли диабет сурункали касаллик бўлиб, ундан тўла қутулишнинг имконияти йўқ. Шунга қарамасдан, ҳозирги замонда қондаги қанднинг миқдорини тўлақонли назорат қилиш йўллари ишлаб чиқилган. Бу эса қандли диабетга чалинган беморларнинг бошқа соғлом одамлардан ажралиб қолмасдан бахтли яшашларини таъминлайди. Бунга инсон ўзининг турмуш тарзини ва айрим одатларини ўзгартирган ҳолда эришиши мумкин.
Давра суҳбати якунида иштирокчиларга қандли диабетдан сақланишга чақирувчи буклетлар тарқатилди.
“Адолат” СДП Андижон вилоят кенгаши
Матбуот хизмати

Андижонда “Зиёлилар боғи”
Президентимиз Шавкат Мирзиёев ташаббуси билан 2025 йил мамлакатимизда “Атроф-муҳитни асраш ва яшил иқтисодиёт йили” деб эълон қилинди. Шу муносабат билан янги Андижон шаҳрида “Зиёлилар боғи” барпо этиляпти.
Ушбу хайрли ишнинг бошланишига бағишланган тадбир ўзига хос байрамга айланди. Унда сўз олганлар она табиат, атроф-муҳит мусаффолигини таъминлаш ҳар биримизнинг бурчимиз эканлиги, ота-боболаримиз боғлар ташкил этгани ва бу ҳаракат бугун кенг қулоч ёзаётгани ҳақида гапирдилар. “Яшил макон” лойиҳасининг аҳамияти ва лойиҳа доирасида амалга оширилаётган ишлар ёшларни табиатга бўлган меҳрини ошираётгани, яшил боғларнинг инсон саломатлигини мустаҳкамлашга хизмат қилишлиги кўрсатиб ўтилди.
– “Зиёлилар боғи”нинг барпо этилиши “Атроф-муҳитни асраш ва яшил иқтисодиёт йили”да бажариладиган ишларнинг бошланиши демакдир,-дейди Ўзбекистон “Адолат” СДП Андижон вилоят кенгаши раиси Мадаминжон Мадазимов.-Ушбу боғ экологик мусаффоликни таъминлаш, яшил иқтисодиётга ҳисса қўшиш билан бирга ёш авлоднинг табиатга бўлган ҳурматини, экологик маданиятини юксалтиришга хизмат қилади. Биз ҳам партиямиз номи билан кўчатлар экишга қарор қилдик.
Андижонлик “адолатчилар” томонидан янги кўчатлар экиш давом этмоқда.
Ўзбекистон “Адолат” СДП Андижон вилоят кенгаши
Матбуот хизмати.

«Адолатчилар»нинг Андижонча оши
Конституциямиз қабул қилинган кун республикамизда катта байрам. Сана муносабати билан жойларда ўтказилаётган тадбирларда фуқароларнинг Бош қонунимиз берган ҳуқуқ ва имкониятлардан мамнунлиги ўз ифодасини топмоқда.
Ўзбекистон “Адолат” СДПнинг Андижон давлат тиббиёт институтидаги бошланғич партия ташкилоти фаоллари байрам тадбирларини ўзига хос тарзда ташкил этмоқда. Олийгоҳнинг талабалар уйида ўтказилган Ош танлови ҳам Конституция байрамига бағишланди.
Бўлғуси шифокорлар миллий таомлар тайёрлашда ўз маҳоратини синовдан ўтказдилар. Тадбир талабалар уйида яшовчиларнинг қандай яшаётгани ва овқатланиш маданиятини ҳам кўрсатди.
Танловга тақдим этилган таомлар орасида “Ёш адолатчилар” томонидан тайёрланган Андижонча ош кўпчиликнинг эътиборини тортди. Дастурхонга тортиқ қилинганда иштаҳани очди.
Умида Абдуллаева, “Адолат” СДП фаоли:
-Бугунги тадбир ёшларнинг фаоллиги, ташаббускорлиги ва дарсдан бўш вақтларини қай даражада мазмунли ўтказишларини кўрсатди.Талабалик том маънода йигит-қизлар учун синов. Ўқиш билан бир вақтда мустақил ҳаётга ҳам тайёрланади. Танловда “Ёш адолатчилар” гуруҳининг Андижонча палови юқори баҳоланди.
Ўзбекистон “Адолат” СДП Андижон вилоят кенгаши
Матбуот хизмати

Бўстонлик “адолатчилар” “Яшил макон”да
Давлатимиз раҳбари томонидан ўтказилган видеоселектор йиғилишида “Яшил макон” умуммиллий лойиҳасини амалга ошириш, мазкур лойиҳа доирасида йилига 200 млн. туп дарахт ва бута кўчатларини экиш белгиланган эди. Бундай кенг кўламли ташаббуснинг амалга оширилиши натижасида юртимиздаги яшил майдонлар ҳудуди янада кенгаяди.
Ўзбекистон “Адолат” СДП Бўстон туман кенгаши сафидаги “Ёш адолатчилар” юқоридаги ҳаракатга жавобан ташаббус билан чиқдилар. Тумандаги МФЙларда бўлган сафдошларимиз жамоатчиликни кўчат экиш ва ободонлаштириш ишларига чорладилар. Уюшмаган ёшларнинг бандлигини таъминлаш ҳам айни шу мақсадга қаратилди.
-Халқимиз азалдан табиатни муқаддас деб билган,-дейди халқ депутатлари Бўстон туман кенгаши депутати Ғуломжон Рўзиев,- Ота-боболаримиз “Бирни кессанг, ўнни эк” дея бежиз айтмаганлар. Агар ҳар биримиз йилига тўрт тупдан кўчат эксак, яшаб турган жойимизни озода сақлаб, она табиатга меҳр берсак фарзандларимиз муносиб экологик шароитда яшайди. Бугунги тадбирга ёшларни жалб этишдан мақсад уларда экологик маданиятни юксалтириш.
“Яшил макон” умуммиллий лойиҳаси экологик вазиятни янада яхшилаш ҳамда иқлим ўзгаришларига миллий ечим сифатидаги ноёб лойиҳа бўлди. Шу сабаб кўча ва гузарларга кўчат эккан бўстонликлар лойиҳа доирасидаги ишларни давом эттирмоқда.
“Адолат” СДП Андижон вилоят кенгаши
Матбуот хизмати

Имконияти чекланган болалар қувончи
Ногиронлиги бўлган шахсларнинг ҳаёт тарзини яхшилашга дунё миқёсида эътибор қаратиш мақсадида БМТ томонидан 3 декабрь-Халқаро ногиронлар куни деб эълон қилинган. Мазкур сана олдидан ҳар йили имконияти чекланган болаларга меҳр кўрсатилади, кемтик дилларга қувонч улашилади.
Ўзбекистон “Адолат” СДП Андижон шаҳар кенгаши сафидаги “Ёш адолатчилар” бошчилигида бир гуруҳ ўқувчилар ана шундай эзгу мақсад билан Андижон шаҳридаги 12-сон таянч мактабида бўлдилар. Бу ерда тарбияланаётганлар бахтли болалик оламига олиб чиқилди. Улар билан биргаликда шеърлар айтилди, рақслар ижро этилди.
Миржалол Қосимов, Андижон машинасозлик институти қошидаги академик лицей ўқувчиси:
-Устозларимиз хайрли тадбир ҳақида гапирганда кўп ҳам қизиқмагандик. Бу ерга келгач адашмаганимизни сездим. Имконияти чекланган болалар ҳам биз каби бахт ва қувонч туйғусини сезишга ҳақли.Театрлаштирилган томошалардан улар кулганда ўзимиз ҳам қувондик.
Тадбир болаларга хос мусобақаларга уланди. Иштирокчиларга эсдалик совғалари топширилди.
Жанона Раҳимова,
Ўзбекистон “Адолат” СДП Андижон шаҳар кенгаши раиси

Мустақиллик бизнинг бахтимиз, ғуруримиз
Давлатимиз мустақиллигининг 33 йиллиги байрами арафасида Ўзбекистон “Адолат” СДП Андижон вилоят кенгашида ташкил этилган давра суҳбати ана шундай номланди. Тадбирда партия фаоллари, маҳаллий кенгаш депутатлари ва фаол ёшларнинг вакиллари иштирок этди.
Давра суҳбатида сўз олганлар мустақиллик энг аввало эркин яшаш ҳуқуқи экани, истиқлол берган имкониятлар, 33 йил давомида қўлга киритилган ютуқлар, мамлакатимизнинг халқаро майдон¬да¬ги обрў-эътибори ошиб борганини таъкидладилар. Ўз ўрнида халқимизнинг дунёқараши, одамларнинг сиёсий онги ва тафаккури ўзгариб, фуқа¬ро¬лик фаоллиги тобора кучайиб бораётгани эътироф этилди.
-Бугунги фаровон ҳаётга ўз-ўзи¬дан эришилгани йўқ,-дейди халқ депутатлари Андижон вилоят кенгаши депутати Насибахон Тўйчиева,-Бу халқимизнинг кўп йиллик орзуси, интилишларининг самараси. Бу йилги байрам тадбирлари «Бир бўлсак – ягона халқмиз, бирлашсак – Ватанмиз!» шиори остида ўтказилаётгани ҳам бежиз эмас. Халқимизнинг бирлиги, янги Ўзбекистоннинг келажагини янада мустаҳкамлаш ҳар бир фуқаронинг қалб амрига айлангани катта маънога эга. Бундай юртнинг эртаси ҳам порлоқ бўлиши шубҳасиз.
Тадбир якунида доимо огоҳ ва ҳушёр бўлиш, мустақиллигимизни мустаҳкамлаш барчамизнинг фуқаролик бурчимиз эканлиги кўрсатиб ўтилди. Бу борада партия фаоллари доим жамоатчилик орасида тарғибот ишларини олиб боришга қарор қилдилар.

Ўзбекистон “Адолат” СДП Андижон вилоят кенгаши
Матбуот хизмати.