إلا نا
مازلت عالق كل يوم ابكاء
الناس كلهم نسيوك الا نا
انكنهم صابرين
ونسيوا غلاق وفي الحياه لاهيين
نا الصبر مايقدر علي اسنين
معاي الحزن ماتشيله وطا
وكوني حزين يعلم الله حزين
ومازلت داير عالفراق عزا
وطيفك رفيقي كل وقت وحين
ومازلت ننظر فيك مالاحياء
ياروح ما اختلفوا عليك اثنين
ياوجه في يوم الرحيل ضوا
وياصيت بين الناس ديما زين
وياقلب طيب مايدير خطا

من قال اطيحي ياجيده
في فارس بلهون لهيده .

كونه عك عك وكونه امعاي خبل ماسلك ماسلمت راهو انفك فك .

كونه ضاع ضاع جريت وراه حد المستطاع وما لايمت .

جيل مالكواين صايفات اسبلنا
وراح عمرنا هانت ويانا الليلة .

طرطش عش اللي كداكن
حوسكن في عز زهاكن .

مبيت نجداهم
اعزاز برمو برمت منيلاهم
شريت قيمتي .

ضاقت بي من كل الجلاوي
غير الله يا مقرب أرحامه

ساع ايبان ضي الصبح ضاوي
عمر الليل ما طول ظلامه .

يا التاعبة كنه اطاول ليلك
ويالغافله كنه ربيعك صاف

ويالساكته عندي ابْما نحكيلك
ليش سامعه كل الكلام اقطاف .

طول الليل ماينفع سموره
ونومه خير من جبد القهاير
عندي عقل كي يسهر ايفور
يجبد غير فلي قبل صاير
ونا من قبل لاماني صبور
وديما النوم مني زايد طاير
نص الليل نسبح في ابحور
وباقي الليل ناخذ فيه حاير .