الحومه من طب عباس ميدانها
تحيرت وين تروح فرسانها
@@@@@@@@@
ضاكت الأرض الوسيعه بيوم حماي الشريعه
شال رايه حيدره

صاح رغما عل اليالي ما ارد والجود خالي
وانا سبع الكنطره

لزينب انطي اثنين اديه سامع امن امي وصيه
ولا تضل محيره

تشهد ارض الغاضريه راح اسوي لآل اميه
مكبره بصف مكبره

وتنترس منهم كون ودينها

الحومه من طب عباس ميدانها
تحيرت وين تروح فرسانها
@@@@@@@@
شلون واسمع عمت ابني تكول جرني وهذا سبني
وحال ما تتوقعه

وزلم مليانه المغاره وغاره اشوف تجيم غاره
والسيوف اموزعه

وينتشر بطف خبرها زيـــنــــب بعازه كمرها
وبحزنها مكبعه

وباجر امي شراح أكلها وبت علي طايح حملها
امي ام الاربعه

الا اكص ال زياد ضرعانها

الحومه من طب عباس ميدانها
اتحيرت وين تروح فرسانها
@@@@@@@@@@@
راح اكص الماي راسه واكطع هروشه امن أساسه
وافكس عيون النهر

واترس بدم السرايا العلكمي ومن الضحايا
تنتمي لسابع ضهر

وارد اكض الطف واشيله واقره عد راسه العديله
هوه وشبيه من بشر

محد اليكرب خدرها ولا عطش يوم اليمرها
لختي خل يوصل خبر

ضاكت الدنيا بعين عدوانها

الحومه من طب عباس ميدانها
تحيرت وين تروح فرسانها
@@@@@@@@@
يرجف يضل من خياله السامع بهاي الرساله
لخته كاتبها الكمر

كاتب اختي اول سوالي هذا اليدور بخيالي
اشلون بت فارس مضر

كون مره الشده بيها وكون عايل مر عليها
وكون خاطرها انكسر

يعني ما معنى كلامه راح اسوي الطف قيامه
وجنه موجوده وسقر

والسراط اخت حسين صيوانها

الحومه من طب عباس ميدانها
تحيرت وين تروح فرسانها
@@@@@@@@@@@
خادم اهل البيت (عبد الحسين كاطع الفريجي )

حي الله عون   وخال مثل العباس
**
طلعو امن الخيمه ركضه   وللحرب طبو سوه
كربله غاصت بهلها   وضاع عالجيش الهوه
عون طب بسيفه طرها   وكمر هاشم باللوه
الخال وابن اخته تعنو   والدرب كله انطوه

نزلو سوه   والحرب هزوها
وروس الزلم   للخيم جابوها
صاح الشمر   كربله تيهوها
وفوك النهر   راس ضل يردم راس
*
خله ضهره بضهر خاله   وراح صوب المشرعه
عون يقره انا فتحنا   وخاله يقره الواقعه
عون خله الجيش يوصل   للفرات امدافعه
امه جانت من تكمطه   اكماطه بيده ايكطعه

اتصيح الزلم   خل يفوت براحته
حضروله شط   لا يسوي اسوايته
خاله وكف   ضل يهوس برايته
وعالمشرعه   حبس كل الانفاس
*

هله ببن اختي ينادي   بصوت سبع الكنطره
الميمنه العباس اخذها   وعون اخذها الميسره
اثنينهم   نزلو سويه   وصار يوم الاخره
عون كله تمون خالي   النازل ابن اختك تره

والطف شرد   من اجوها اثنينهم
تشبه علي   والله خزرت عينهم
والمعركه   قسموها ابينهم
اهل الوفه    وللوفه دكو ساس

عون تدرون اعله خاله   ومثله ما يحصل ابد
اشما تتطير اركاب منهم    صاح اريد اكثر بعد
عفيه ببني تصيح زينب   حكه تفرح بالولد
همه بس هجمو عليها   الجيش من عدهم شرد

وتكابلو    عون ويعباسه
والما شرد   خل يدور راسه
وجيش العده   ابو فاضل داسه
وزلم الحرب    بالمراجل تنقاس

ذوله فرسان الطليعه    سيوفهم تخطف خطف
بعينه ابو فاضل خزرها    وخزرتها مثل العصف
موش ماي امن الشريعه    اجنود ضل يغرف غرف
وعون طب جفيته خضره   وغيرته ما تنوصف

وتحيرت   بالمعاره ارجالها
وراية علي   ابو فاضل شالها
انطم النهر   من عجاج ارمالها
اليوم الزلم   كلها اخذها الوهواس
*
تمت
#تحسين الخفاجي

(عسن فجرج يهل اليله)

صحبتهم مواقف ضيج وهنياله المشه وياهم
مو صحبت وكتنه اليوم مو بظيج تلكاهم

ها وها وها
"""""""""""""
هله بزلم الوفو الحسين وگلوله الزمط وينه
واليهمك يبو الكلفات ماطول النفس بينه
خلوها المعاره اتحير واحدهم سهم عينه
عابس بل عشك مجنون منهو اليكرب احسينه

يل انصار يل انصار
""""""""""""""
مر بيه يطيف الشوك وكعد يمهم أنشدهم
وين بهل وكت يحسين صاحب نلكه من عدهم
وسولف عل زمن ولبيه وبلهفه انتضر ردهم
سوو للمواقف صيت ياهو الي وصل حدهم

يل انصار يل انصار
"""""""""""""""
لا عطوه التفيد اهناك ولا هدنة التلفيهم
ذوله الدكو الثايات وتخوف محاجيهم
حبيب الناده عمي امعون وعيونج البجيهم
السويهه الزلم نصين حالف ان اطويهم

يل انصار يل انصار
""""""""""""""""
وگفو اهوسو الحسين وبل هوسه ترف رايه
ذوله اهل الوفه الزينين ماعدهم طمع غايه
سووهه الزلم طشار ودكو عل سمة الثايه
كون اليحچي بيهم زين ومعدل تره برايه

يل انصار يل انصار
"""""""""""""""""
اليحچي اعله صديج اليوم خلي اصويحبه ايكله
من تمشي ابطريج احسين ما تعرف شنو لذله
وتخدمله بكلب والسان ومن ربعه الوفه اندله
اذا تتبع هذني اسنين متمرك ابد عله

يل انصار يل انصار
"""""""""""""""""
حيدر الفرطوسي

على لحن قصيدة قتيل العبره

عهد يازهراء يازهراء يازهراء

عهد يالزهره.. حُسين
نضل بذكره.. حُسين
نعيش بخيره.. حُسين
لصعب تفسيره.. حُسين

عهد يازهراء يازهراء يازهراء

عهد منعوفه.. حُسين
نجي و نطوفه.. حُسين
خدم لحسينج.. حُسين
نطيب ونينج.. حُسين

عهد يازهراء يازهراء يازهراء

نضل نطيعه.. حُسين
حبيب الشيعه.. حُسين
عهد نوفي له.. حُسين
نجي ونمشيله.. حُسين
عهد يازهراء يازهراء يازهراء

عهد ياامنه.. حُسين
الحسين بدمنه.. حُسين
نقرها عيونج.. حُسين
لخدم يفدونج.. حُسين
عهد يازهراء يازهراء يازهراء

يعيش بروحي.. حُسين
دوه لجروحي.. حُسين
اريدك اني.. حُسين
بعشگ وجداني.. حُسين
عهد يازهراء يازهراء يازهراء

مشينه بدربه.. حُسين
وخذانه حبه.. حُسين
يروح الزهره.. حُسين
العشگ بالفطره.. حُسين
عهد يازهراء يازهراء يازهراء

✍باقر جبار الشويلي

قصيدة للإمام الحسين يخاطب السيدة زينب عليها السلام 

زنجيل نزله 

وين يا زينب يخويه رايحه

......  ...... ...... ......  ......

اشلون عفتيني وحيد أعلى الثره

وصحبتي والأهل كلها مجزره

والله صعبه يختي يابت حيدره

يحدي ضعنج شمر وانتي مخدره

ومنهو بعدج خويه ينصب فاتحه

...... .......  ........ ........  .....

اشلون حالج يوم رحتي لليسر

وعفتي عباس البطل جنب النهر

اليل ما تنامينه كاضيته سهر

ساعدج الله اشحملتي من قهر

وبالضعن كل ساعه طفله طايحه

...... .......  ........ ........ ......

أعلينه صعبه طبتج للكوفه

والضعن كل الشماته اتشوفه

والفواطم حايره ومجتوفه

هاي ما صارت ولا مشيوفه

يختي دمعاتج اليه جارحه

......   ....... ......  .............

اشلون حال اطفالج بنص الدرب

حاله صعبه وعايشه بين الغرب

هذا يبجي وهذا يشكي من الضرب

لا طعام وياج لا ماي الشرب

اعليج صعبه خويه واكبر نايحه

......

والأشد واصعب علي هذا اكيد

وكفتج  بالشام يم  ثله يزيد

هو يشتم حيدرة وربعه تعيد

لاكن الله شاء ويذل هالعبيد

وانتي يا زينب صبحتي الرابحه

تمت ومن الله تعالى التوفيق والقبول ببركة الصلاة على محمد وآل محمد عليهم السلام

بقلم الرادود الحسيني عباس هادي  الساعدي