✍ «قارا قیش دولانیر، دامارلاریمدا»

یوللارین سونوندا، کیمسه دورماییب!
بیلمیرم بو یوللار، هایانا گئدیر!
ایچیمده بیر دلی، دومان ایچینده
دایانمادان اویان بویانا گئدیر!

جاناوار جالانیر، گؤز ببه‌ییمه
ایچیم چالخالانیر، بایقوش سسیندن!
قارا قیش دولانیر، دامارلاریمدا
توتولور قولاغیم، قارقیش سسیندن!

شهرین هاواسی، سیخیر جانیمی
باشیمی گؤتوروب، قاچماق ایستیرم
گؤزلردن کیر یاغیر، یئر کیفیرله‌شیر
قوش اولوب گؤیلره، اوچماق ایستیرم

بو حیات قان اولوب، دولوب آغزیما
توپوروم یا اودوم؟، بیلنمیرم اوف!
یاپیشیب اوزومه، اوز قاراسی تک
نه قدر سیلیرم، سیلنمیرم اوف!

هر یئره باخیرام، بوشلوق ال وئریر
بیر آغی دریندن، آغلاییر منی
گئتمک چاغی دئییل، قال قوناغیم اول!
آلدادیب دونیایا، باغلاییر منی...

#میرحسین_دلداربناب
۱۴۰۳/۱۱/۲۶
@eldilimiz

✍ «سون گئجه»

آیریلیق تؤکولور، ثانییه‌لردن
حسرت‌له باخیرام، کئچن گون‌لره
سن‌سیزلیک جالانیر، گؤز ببه‌ییمه
قاییتماق اولار می، بیرده دون‌لره؟!

یالنیز بیر بوش خیال، بیر بوش دوشونجه!
کئچن ثانییه‌لر، دؤنمه‌یه‌جک‌دیر
بو بیر یانار اوددور، جان اوداسیندا
قییامت قوپونجا، سؤنمه‌یه‌جک‌دیر

دهشتلی گئجه‌ده، هارا سیغینیم؟
درین یوخودادیر، قارانلیق گئجه!
گئجه‌نین نه دردی، کیمه نه کئچیر!
کیم دردلی یاشاییر، کیم اؤلور نئجه!

سون گئجه، سون نفس، سون ساغ اول دئمک!
آیریلیق، یالقیزلیق، قارانلیق آن‌لار
کیم بیلیر نه کئچیر، اینسانا او آن
باشینا گلمه‌ین، بونو نه آنلار؟!...

#میرحسین_دلداربناب
۱۴۰۳/۱۱/۱۲
@eldilimiz

✍ «قارا یئل‌لر اسیر، آغ ساچلاریما!»

من قوزئیده قالدیم، سن کؤچوب گئتدین
من قفسده قالدیم، سن اوچوب گئتدین
سنی گؤرمه‌ییمه، گومان قالمادی!
کئچیلمز یوللاردان، سن کئچیب گئتدین!

داها یاز دا‌ گلسه، گلمه‌یه‌جکسن
دورنا دئییلسن کی، یازدا گله‌سن!
یانیق اوره‌ییمده، یاشایاجاقسان
نه قدر یاشاسام، بونو بیله‌سن!

قارا یئل‌لر اسیر، آغ ساچلاریما
دوداغیمدا اسن کولک‌لر کیمی
من ده کولک اولوب، یوخ اولاجاغام
یئل قارشیندا دوران، یئلک‌لر کیمی

بیر گئجه یول آزیب، یوخوما گلسن
آیاغین آلتیندا، توپراق اولارام
پاییز تابلوسونون، آغاجلاریندا
بوداغا ساریلان، یاپراق اولارام

داریخیرام سنه، هر آخشام چاغی
قابارجیق الینی، اوره‌ییمه قوی
آرخاسیز قالمیشام، سن گئدن گوندن
الینی بیر داها، کوره‌ییمه قوی...

#میرحسین_دلداربناب
۱۴۰۳/۱۰/۲۹
@eldilimiz

✍ «بیتمه‌ین یوللار»

بو یوللار بیتن دئییل
چوخ دا اؤزونو یورما
گلن اولمایاجاقدیر
بوشونا یولدا دورما

ایزلر گئدیر اوزاغا
گئدنلر چوخ، گلن یوخ
سونو هایانا چاتیر
اونو آنجاق بیلن یوخ!

چوخ اوزاقدا قالمیشیق
هاوادان سازاق‌ یاغیر
قارا قیش آغ گئیینیب
گؤزلردن دوزاق یاغیر!

یوللار بیزی داریخیر
بیز یوللاری اؤزلوروک
ایتمیشیک گیروه‌لرده
اؤزوموزو گؤزلوروک!

کؤهنه یارالاریما
بیر آز دومان باغلایین
بولودلاری چاغیرین
بیر آغی‌لیق آغلایین!

اوزاق یولدان گلیرم
یول وئرین یورولموشام
گؤزه‌لردن آخمیشام
دوم دورو دورولموشام!

#میرحسین_دلداربناب
۱۴۰۳/۰۹/۱۵
@eldilimiz

✍«دلی‌لر»

یئرسیز آغلاییرسیز، یئرسیز گولورسوز
دونیانین داشینی، آتان دلی‌لر
آجی‌لاری اودوب، اودوزماییرسیز
آجلیغی دینجلیغا ساتان دلی‌لر

گولوشدن یونولوب، دوروشوق‌لاریز
آجی‌یا شیرینه، گولن دلی‌لر
سیزی قیسقانیرام اورک ائویندن
پایینی پایلاشیب، بؤلن دلی‌لر

هر کیمی سئومیرسیز یامان دئییرسیز
یامان یاشاییرسیز، یامان دلی‌لر
موتلوسوز واللاهی، دلی دئییل‌سیز
بیز قانمایانلاری، قانان دلی‌لر

دونیانی بوراخیب، دونیا اولانلار
دونیا سئورلری، یوران دلی‌لر
بوش بوش قوراللارا، آلدانمایانلار
قوراللاری یئره، ووران دلی‌لر

گؤرکمیز کیرلی‌دیر، ایچیز دوم دورو
اوزونوزدن یاغیر، دومان دلی‌لر
نه ایمیش سیزلرین، آلین یازیسی؟!
اؤزوندن اؤزونه، جومان دلی‌لر

نه سویوق بیلیرسیز، نه قار نه یاغیش!
آلوو ایچره گزن، یالین دلی‌لر
ساتیرام عاغلیمی، سویو پولونا
دایانمایین گلین، آلین دلی‌لر

سونوندا سؤزوم یوخ، سوسماق ایستیرم
هر گون سؤیوش سؤیوش، سوسان دلی‌لر
یامسیلادیق هر گون، یالان حیاتی
حیاتین اوزونه، قوسان دلی‌لر...

#میرحسین_دلداربناب
۱۴۰۳/۰۹/۶
@eldilimiz

✍ «بو شهر»

سیخیر بو شهر منی
یورور بو شهر منی
بوغور بو شهر منی
قارانلیقدی بو شهر
پنجره‌سیزدی بو شهر
داریسقالدی بو شهر
توستو دوغور بو شهر
توستو ایچیرم
ایچیرم خاراب آرابالارین ساغلیغینا
ایچیرم اوغرو قارقالارین ساغلیغینا
ایچیرم چاشیت ساغساغانلارین ساغلیغینا
ایچیرم بئتون آغاجلارین ساغلیغینا
سئرچه‌لر منی آغلاییر
کپنک‌لر منی آغلاییر
قاریشقالار منی آغلاییر
دیلنچی‌لر اوغرولارا ال آچیر
ساعات‌لار ثانیه‌لری گؤتوروب قاچیر
آداملار گلیرلر، گئدیرلر سو باشینا
بو شهر آیاق یولو اولوب، راحات خانا اولوب
بو شهر قوخویور
بو شهر اینتیحار اییی وئریر
بو شهر تؤکولور یاپراق یاپراق
بو شهر مزارلیغا گئدیر
بو شهر مزارلیغا دؤنور
هر یئره باخیرسان جانلی جنازه‌دیر
بوردا جنازه‌لر یاللی گئدیر...

#میرحسین_دلداربناب
۱۴۰۳/۰۸/۳۰
@eldilimiz

✍ «سیغیناق»

اؤلومون
قوجاغینا سیغینماق ایسته‌ییرم
یالنیز
او
منی
بیتمز- توکنمز
دهشت‌لردن
قورتارا بیلر...

#میرحسین_دلداربناب
۱۴۰۳/۰۶/۱۸
@eldilimiz

✍ «کروانلار یولو!»

بو یول اوزون بیر یول، دؤنگه‌لی بیر یول
چوخ آداملار گئدیب، ایزی قالماییب!
بوردا گئجه گوندوز، کروان یورویوب
سای‌سیز کروانلارین، توزو قالماییب!

قارانلیق گئجه‌لر، ایشیق گوندوزلر
سایسان سایا گلمز، مین‌بیردن چوخدور
سانکی «مین‌بیر گئجه»، ناغیللاری‌دیر
نه قدر سؤیله‌سن، بیتمه‌سی یوخدور

سحرلری نیسگیل، آخشامی غوربت
قیشلاری سورکلی، یازی تئز کئچن
پاییزی اوخشاما، یایی مرثییه
گونلری گونلرین، قانینی ایچن

اوشاقلار قوجالیر، قوجالار اؤلور
ماراقلار دؤنوشور، آرزولار سؤنور
یازیق اینسان گزیر، حیات دالینجا
پیرتلاشیق، دولاشیق، دؤنگه‌لر دؤنور

نه کوسمه‌سی بللی، نه باریشماسی
حیکایه ایچینده، مین حیکایه‌سی
یالاواج آردیندان، یالاواج دوغور
بیر سؤز ایچینده وار، مین کینایه‌سی

گؤی یئره گلردی، خوش یاشاسایدیق؟
یاراتمیشدین بیزی، آجی چکمه‌یه؟
ایستیردین درد اکیب، موصیبت بیچک؟
گلمیشدیک باش اییب، دیزه چؤکمه‌یه؟

دردلریم اوستونه، بیر اؤرتوک سالین
یوخسا اولو تانری، گؤرر اوتانار
ایچیمین آلووون، سؤندوره بیلمز
احوالی پوزولار، اوره‌یی یانار!...

#میرحسین_دلداربناب
۱۴۰۳/۰۶/۱۴
@eldilimiz

✍ «دونیا، بیر آز دایان، دینجیمی آلیم!»

یاشاماق دئییل بو، اؤلومدور اؤلوم
گؤیلره باخماقدان، یورولوب گؤزوم
نه قدر گونلری، ساییم دایانیم
بئله بیر یاشاما، منده یوخ دؤزوم!

داریخیر اوره‌ییم، غریب قوش کیمی
چیرپینیر کؤکسومده، اوچا بیلمه‌ییر
بوشونا چالیشیر، بوشلوق ایچینده
دلی‌تک زنجیرین، آچا بیلمه‌ییر

بئینیمی گمیریر، بوش دوشونجه‌لر
باشیما تؤکولور دونیانین داشی
یورولموش گئجه‌نی، یولا سالیرام
یاخامدان ال چکمیر، گؤزومون یاشی

تکی بیر قوش اولوب اوچا بیلئیدیم
بوتون سرحدلری، کئچه بیلئیدیم
کؤچری دورنالار، کؤچ ائدن کیمی
من ده منلیییمدن، کؤچه بیلئیدیم

بیلمیرم یولومو، هایاندان سالیم!
هایانلارا گئدیم، هایاندا قالیم!
یامان یورولموشام، نفسیم گلمیر
دونیا، بیر آز دایان، دینجیمی آلیم!

#میرحسین_دلداربناب
۱۴۰۳/۰۵/۲۷
@eldilimiz

✍ «دونیانین دادی قالماییب»

یئنه هر یئر قارانلیقدی
گونشین چیراغی سؤنوب
ندن آیدین گوندوزوموز
قارانلیق گئجه‌یه دؤنوب؟!

گؤیده نه اولدوز وار نه آی
یئرده قاپی‌لار تای با تای
کوچه‌لرده ایت اولاییر
نه سارایچی وار نه سارای

چای‌لارین دوداغی قورو
دنیزلردن توز قاوزانیر
کور شیطانین اوزون الی
یئردن گؤیلره اوزانیر

داغلارین بئلی بوکولوب
اورمانلار یئره تؤکولوب
اولو بابالاردان قالان
ایزلر، قالیق‌لار سؤکولوب!

یئرده هر زاد ترسه گئدیر
یوللار اؤزونو ایتیریر
بؤرک گتیرمه‌یه گئدنلر
بؤرک یئرینه باش گتیریر!

ایچیم بولود، ایچیم دومان
من ده یاغیشا دؤنورم
قیشدا بیر قار آدامینا
یازدا بیر قوشا دؤنورم

گؤی قانادلی قارتاللارین
سینیب، قانادی قالماییب
یئرده سیزین، گؤیده سیزین
دونیانین دادی قالماییب!

#میرحسین_دلداربناب
۱۴۰۳/۰۳/۲۴
@eldilimiz