زيادة أسعار كروت الشحن؛ وزيادة سعر باقات الانترنت

باقة 140 جيجا بقت ب 240 جنية شامل الضريبة

*️⃣بكرهه لما بكون صح في الخوازيق؛ قولت لصديق هتشوف E-SIM لما الأسعار تزيد 😞😞😞

*️⃣ كده أقدر اقولكم انتظروا Wifi Calling قريب وقفل الهواتف الدولي ب IMEI يعني 😞😞

⬅️⬅️ واحتماااال بالليل او الفجر تسمعوا شوية حاجات تانية تزيد؛ ايه هنشوف الصبح 😞😞

تصبحون على خير

هحط صور الباقات في التعليقات

زيادة أسعار كروت الشحن؛ وزيادة سعر باقات الانترنت

باقة 140 جيجا بقت ب 240 جنية شامل الضريبة

صباح الخير

*️⃣ النهاردة ال E-SIM اشتغلت من كل الشبكات والكل عمال يكتب فمجاتش على بن سامي بقى ميكتبش؛ ولا مكتبش يعني ... شوية نصايح كده.

*️⃣ أول شيء لازم تعرفه إن مصر لأسباب أمنية واقتصادية وسبوبة ومصلحة قررنا نحط التاتش المصري على تقنيات الكوكب شغال بيها من زمن والتاتش هو إن شريحة E-SIM لا يمكن نقلها من جهاز لآخر وإنها بفلوس كل مرة... يعني ايه بقى وهيفرق ايه ركز معايا.

*️⃣ مثلاً فكرت تغير تليفونك؟ هتضطر تروح الفرع تشتري تاني شريحتك وتدفع 300 جنية؛ طيب فرمت الموبايل؟ هتدفع 300 جنية تاني وتروح الفرع... فخد بالك يا برنس هتدفع كل شوية فلوس.

*️⃣ مشكلة تروح الفرع دي كارثية في نقطة إنك كده لو بتفكر تفرمت الموبايل فدا مينفعش يتم غير وإنتا قصاد الفرع؛ لإنك هتبقى بدون اتصال لغاية تروح الفرع؛ بلاس نفرمت عشان في اوبشن متروحش الشريحة ممكن يطلع لك ؛ موبايلك باظ وهتوديه الصيانة؛ هتروح تشتري شريحة للتليفون البديل ثم هتروح تشتري تاني عشان ترجع لموبايلك.

*️⃣ هتقولي طيب والكوكب بيعملوا ايه هقولك بينزلوا الشريحة من ابلكيشن شركة الاتصالات... مهي مش شريحة؛ الشريحة في موبايلك مدمجة يا برنس دا مجرد "كود وشوية سطور" بتقول للشريحة اللي جوا دي تتصل إزاي بالشبكة وبياناتك. فأكنك بتعمل تحميل لملف Txt باختصار... لا انتا مش بس هتروح الفرع وتاخدها ببلاش؛ لااا هتدفع تاني فلوووس اكنها أول مرة.

⬅️⬅️ طيب بن سامي بينصح بإيه بقى؟

1️⃣ شريحتك الأساسية تسيبها شريحة عادية... انتا مثلاً اتصالات تسيب الشريحة زي ما هي وتروح الفرع تشتري الشرايح الإضافية ليكن هتجيب وي وفودافون و أورانج بحيث ال 3 يبقوا في موبايلك E-SIM وتتنقل بينهم ب لمسة؛ دا مفيدة لسببين الأول إن شريحتك الأساسية موجودة دائماً وثانياً لو روحت مكان التغطية فيه وحشة تتنقل للشبكات الثلاثة الآخرين بدون ما تفصل شريحتك الأساسية؛ لإنك لو حولت شريحتك الأساسية ل E-SIM هتقفلها عشان تنقل للشبكات الأخرى.

⬅️ طبعاً كل ما سبق لا يسري على الهواتف اللي تقدر تشغل 2 شريحة E-SIM زي الآي فون الأمريكي.

2️⃣ ثانياً بما إنك تحويل الشريحة أرخص من عمل رقم جديد... فنزل برنامج My NTRA وخش برقم موبايلك وأدخل الخدمات وشوف أرقامك اللي باسمك في شركات الاتصالات؛ ممكن تلاقي رقم انتا ناسيه ولا حد بيلبسك مصيبة وشاري رقم على اسمك؛ حول يا باشا واسحب الأرقام دي لموبايلك E-SIM بدل ما تشتري جديد.

*️⃣ الخلاصة هي سيب شريحتك الأساسية عادية وافتح My NTRA وشوف خطوطك الثانية واقلب دول ل E-SIM

*️⃣ وآخر شيء نبارك لكل الناس اللي معاهم آي-فون؛ الناس دي (وأنا جزئياً منهم عشان معايا آي فون وسامسونج)؛ لقد هرمنا؛ الآي فون بقى أخيراً 2 شريحة... بعد انتظار 7 سنين من ساعة الآي فون X واحنا منتظرين E-SIM يا جدعان؛ لقد هرمنا وورمنا؛ خلاص مش محتاجين نشيل موبايل بزاير مع الآي فون عشان نضيف رقم فيه إضافي؛ ياااااه يا عبد الصمد.

بس يا سيدي وأديني رغيت في نفس الموضوع مهي مجاتش عليا 😁😁 وصحيح حد اخد باله ان الدولار في البنم بقي 49.97 😁 فاضل عالحلو 3 قروش؛ مكنتش اعرف إن E-SIM ممكن تشتغل غادة عبد الرازق وشيرين وحسام حبيب

تحديث

1️⃣ اورانج ضافت تحويل الشريحة من الابلكيشن

2️⃣ لو بتروح الصين كثير فالافضل في حالتك انتا بس حول شريحتك الاساسية ل E-SIM عشان هتحط شريحة الصين لان هناك مفيش شريحة الكترونية... لكن باقي العالم خلي E-SIM شريحتك ثانوية اسهل لك

تخيل معايا؛ تخيل 2 معاهم ثروة كويسة ليكن 100 مليون جنية؛ الإثنين الصحاب دول قرر كل واحد فيهم يمشي في طريق؛ الأول استثمار عقاري والثاني قال لا هصنع وأفيد البلد والمجتمع.

*️⃣ الشهور الأولي كان الأول بيبحث عن عدد من الشقق أو الشاليهات في أماكن كويسة عليها طلب... والشهور الأولى للثاني قاعد فيها في قوايم الانتظار بتاعة تخصيص أراضي للمصانع.

*️⃣ الشهووور اللي بعدها الأول لقى اللي بيدور عليه اشتراهم وبدأ يأجرهم؛ الثاني بيلف علي الاوراق والتراخيص واستيراد الماكينات ووو.

*️⃣ الشهووور التالية الأول بيصحى الصبح يقعد عالفيسبوك وينزل النادي والجيم والايجارات بتتحوله على حسابه في البنك... والثاني بيصحي كل يوم عنده شغل المصنع والعمال والمشاكل الخامات اللي واقفة في الميناء.

*️⃣ الشهوور اللي بعدها الأول مكمل نفس حياته؛ أما الثاني فقاعد مع المحاسب الضريبي بيشوف مشاكل الفحص واتهامات التهرب الضريبي اللي عنده والاتاوات اللي بيدفعوها للجهات المختلفة.

*️⃣ الشهور اللي بعدها الأول قرر ينقل حياته لبره مصر فبدأ يفسخ عقود الإيجار ويعرض الحاجات للبيع؛ والثاني معندوش أوبشن؛ مكمل كل يوم شغل.

*️⃣ الشهور التالية الأول قدر يبيع ممتلكاته لانه اختار لهم مكان كويس عليه طلب؛ باعهم ب 200 مليون راح دفع 5 مليون ضريبة تصرفات عقارية وبقي معاه 195 مليون... والثاني معندوش الرفاهية دي ومقدرش اصلا يكسب 10-15 مليون بعد المصاريف والضرايب؛ وعشان يكسب 100% زي الأول محتاج عمر... وحتى ال 10 مليون اللي كسبهم هيدفع ضرايب 22.5% عليهم...

*️⃣ وييجي حد يقولك ليه مش بنصنع؛ تصنع ليه معلش؟ العقارات بتنمو أسرع؛ بتأجرها ومش بتسدد ضرايب (رسمي مفروض تدفع لكن هتنفض عادي ومحدش هيدور وراك)... ولو بعت العقار بضعف سعره هو 2.5% ضريبة اللي هتدفعها..

*️⃣ مقابل الصناعة هيشتغل كل يوم ومشاكل عمالة وضرايب وتأمينات وتعقيدات حكومية واستيراد وو... وفي النهاية مش هتقدر تحقق أي ربح يوازي نمو ايراد العقارات؛ وهتتحاسب 22.5% ضريبة...

*️⃣ في الدول الغربية عندهم ضرايب عالارباح الرأسمالية (يعني فارق الشرا والبيع) بحيث يقللوا ربح المجال العقاري لإنه ربح مريح بدون مجهود زي التجارة والصناعة... فاشمعني لما تكسب من حاجة بمجهود كبير زي الصناعة والتجارة فتدفع ضرايب 10 أضعاف لو كسبت من عقارات 🤔🤔..

*️⃣ أتمني كده فهمنا ليه أثرياء مصر مركزين عالعقارات والاستثمار العقاري والمضاربة فيهم ومش بيروحوا يقرفوا نفسهم في بيزنس صناعي وتجاري..

*️⃣ طول ما العقارات بتكسب وبعيدة عن الضرايب؛ انسي تشوف صناعة

⬅️ البوست دا كان محور دردشة مع صديقي شريف لإنه في المجال الصناعي. وطبعا دا مثال خيالي علي احداث واقعية من ناس راحت اشترت عقارات وناس عملت مصانع

السعودية أعلنت إطلاق نظام استرداد ضريبة القيمة المضافة للسياح في 2025 ودي خطوة قوية جداً هتساهم في تحسين الاقتصاد السعودي.

*️⃣ للي مش فاهم فالدول اللي فيها ضريبة قيمة مضافة زي الإمارات 5% ومصر 14% و السعودية 15% فالدول دي بتقول إن الضريبة عالسلع والخدمات المباعة جوا الدولة.

*️⃣ طيب أنا سائح دخلت محل اشتريت هدوم وموبايل وو بدفع القيمة المضافة وأنا هستخدمها بره البلد؛ هنا بتيجي قوانين ود الضريبة... في الإمارات كل مكان تلاقي يفط خضراء تقولك المحل دا مشترك في رد الضريبة Tax Free Planet فتشتري وتدي الكاشير الباسبور بتاعك يسجل المشتريات عليه؛ وإنتا في المطار (وممكن بره المطار من ماكينات بالمول) تعمل الإجراءات وتسترد الضريبة وتنزل في حسابك بعد مغادرتك للدولة لو اخترت ماكينات؛ أو تاخدهم كاش في إيدك بالمطار.

*️⃣ السعودية بقي مكانش عندها دا؛ فالأسعار بتاعة منتجات كثير في السعودية بعد ال 15% بقت مش مشجعة للسياح؛ والتوجهه الحكومي حالياً هناك هو تشجيع القطاع الغير نفطي فقالك خلاص هتشتري وتسترد الضريبة برضك.

*️⃣ طيب هي الدول بتستفيد ايه من موضوع رد الضريبة دا؟ هو في حد بإيده يرجع ضرائب اخدها؟ الإجابة الدول بتستفيد عشان هي بتبص لقدام.

*️⃣ أولاً مش 100% من المحلات بتقدر تشترك في منظومة رد الضريبة دي؛ بيشترك بس المحلات الكبيرة والمتوسطة؛ محلات شغالة رسمي. اللي شغال رسمي مفيد للدولة وبيدخل لها ضرائب مختلفة عكس اللي شغال شمال... دلوقتي انتا روحت السعودية تشتري من جرير ولا أكسترا ولا لولو مثلاً موبايل ولا لاب توب ب 5175 ريال في حين بتدور تلاقيه في محلات صغيرة مش هتديك فاتورة ب 4700 ريال. فتقول يا عم دول 475 ولا 500 ريال أنا أولى بيهم... فتشتري من اللي شغال غير رسمي.

*️⃣ لكن لو في رد ضريبة؛ هتشتري ب 5175 ريال وفي المطار تسترد الضريبة اللي هي كانت 675 ريال فيقف عليك ب 4500 ريال فكده شجع السياح يشتروا من المحلات الرسمية وبالتالي ضخ في المنظومة الرسمية فلوس (هتعود ليهم أرباح وبالتالي ضرائب أو زكاة في حالة السعودية).

*️⃣ حاجة ثانية إن الأسعار في السعودية بالضريبة مرتفعة فمثلاً تلاقي لاب توب ولا موبايل في السعودية سعره 3000 ريال وفي دبي 2650 درهم (الدرهم يساوي 1.02 ريال فممكن تعتبرهم زي بعض)... فالناس "السياح" يقولك لا يا عم اشتري من دبي أحسن... لكن لو بقى في رد ضريبة فهنا ممكن تلاقي الفارق بقى 100 ريال لصالح دبي فممكن تقول خلاص اشتري من هنا وخلاص بدل ما أدور على حد رايح دبي... فهنا شجع الناس تشتري من السعودية يعني ضخ فلوس في الاقتصاد السعودي. فهنا الدولة تستفيد. فهي هنا في مثالنا دا بتاع جهاز ب 3000 ريال رجعت لك 390 ريال ضريبة؛ بس هي شجعتك ضخيت 2610 ريال في الاقتصاد مكنتش هتشتري المنتج دا بدون التخفيض. كده وضحت.

*️⃣طبعاً حد هيقول عقبال مصر... هقول على سر متقولوش لحد... مصر عندها نظام رد الضريبة للسياح بشرط فاتورة فوق 1500 جنية وانه قعد أقل من 3 شهور في مصر... هسسسس متقولش لحد عشان دا سر مش بنتكلم عنه ولا هتلاقي يفط في المطار تقولك مكان رد الضريبة هنا ولا شيء فدا سر بيني وبينكم ...هو عندنا بس سر؛ السر في بير محدش يعرفه عشان الحكومة محافظة على السرية بتاعة الموضوع دا أحسن الناس يعرفوه. القانون موجود في الورق. رسمي عندنا قبل السعودية أهوووو 😜😜😜

صباح الخير

دا مش بوست دا مجرد توضيح متكرر

في تليجرام في إعلانات؛ أنا مش يتظهر ليا ولا ليا صلاحية أرفض ولا أعدل حاجة

دا توضيح عشان كل شوية حد يقولي في اعلان ظهر بيقول كذا او يعلن عن كذا؛ مش أنا ولا اعرف ولا بشوف ولا مسئول عن حاجة ولا برشح حاجة غير اللي بكتبها بنفسي..

بس كده

وصباح الفل

زمان الكهرباء كانت رخيصة؛ فلا الناس محتاجة تسرق كهرباء ولو حتى ناس سرقت فالعدد قليل والفلوس قليلة؛ فتلاقي مثلا 50 الف واحد ودول لو مسرقوش فبيكون قيمة فواتيرهم متوسطها ليكن 100 او 200 جنية يعني المسروق كله مليون جنية؛ فالدولة عاملة مش من هنا وبلاش وجع قلب ودا تصرف حقيقي منطقي وصح حسابياً لانك هتصرف عشان تقبض عليهم أضعاف المهدر منهم. ونبقي قلدنا عويجة افندي وفؤاد المهندس في قصة الشنكل في فيلم أرض النفاق.

*️⃣ مع ارتفاع الفواتير بقى عدد سارقي التيار يزيد؛ وقيمة متوسط الفاتورة زاد... تقديرات الحكومة بتقول أكثر من مليون مشترك (في 41 مليون مشترك في الكهرباء) فلو تخيلنا ان اللي بيسرق غالبا عشان استهلاكه عادي يعني تكيفات وكده مهو مش هيسرق عشان يشغل مروحة. يعني نقول 1000 الي 1500 جنية الفاتورة فدا معناه 12 مليار جنية سنويا ودا بقي رقم ضخم.

*️⃣ خطة الحكومة عنيفة؛ اللي هنلاقيه بيسرق هنشيله من التموين والدعم لو عنده؛ وهنحاسبه ب شريحة ثابته بعد كده ب 214.5 قرش وهناك اقتراح بغرامة 100 ألف جنية.

*️⃣ كلام جميل بس ييجي سؤال؛ منين تضمن النزاهة؟ يعني لو لقيت معمولك محضر سرقة تيار اقدر إزاي أقول محصلش؟ ايه دليلهم إني سرقت؟ مهي الأوامر جت لكل موظفي الكهرباء وكل واحد عنده تارجت؛ لازم يكون في دليل؛ يصوروا فيديو مثلا ويرفقوه في المحضر ل سلك الكهرباء اللي من ورا العداد أو اي طريقة لإما ناس هتقعد في المكاتب تملئ ورق وتلبس ناس تانية؛ او ييجي عندك ويقولك احنا لقينا تلاعب في العداد خد محضر؛ طيب فين وازاي ووو... لا مفيش احنا أنبياء معصومين من الكذب وطالما قولنا خلاص هتلبس قضية سرقة وتتغرم 100 الف وتتشال من التموين وهتدفع تجاري والدليل لكل دا (قالوا له؛ الدليل قالوله علي رأي مسرحية شاهد مشافش حاجة).

*️⃣ فلازم يكون في طريقة إثبات تلاعب وإلا هتبقي الخطة جني أرباح وليس تحقيق العدل؛ طبعاً أنا عايش في عالم ثالث وفاهم لكننا مش بنتكلم عن تظبيطات سياسية لكن عن إن يقدر أي موظف في الكهرباء يأذي أي حد بدون حساب.

⬅️⬅️ علي سيرة الكهرباء اسمحوا لي انقل لكم فقرة من بوست من 2020 وقت ما محدش كان يعرفني قولت فيها
--------

*️⃣ لو مدفعتش الفاتورة هيحصل ايه؟

سبق وأعلنت وزارة الكهرباء قبل سنة تطبيق الفائدة البنكية؛ يعني الوزارة قالت لو مدفعتش فاتورة هيعتبر إنك واخد قرض من الوزارة بسعر الفاتورة دا وقالوا إن القرض "الفائدة" هتكون الفائدة الخاصة بالبنك المركزي + 1% رسوم إدارية... يعني مش هيتحسب غرامة تأخير بل هيحسب إنك واخد قرض من وزارة الكهرباء بيعد عليك فائدة... على حد علمي لسه متطبقش دا بالرغم من إنهم قالوا عليه أبريل 2019.
------

⬅️ أحب أبلغكم إن الدولة قررت تحط فايدة 7% كل 30 يوم؛ يعني إنتا لو مدفعتش الفاتورة هتزيد 7% شهرياً... فلو إنتا عدادك قديم وبيجي لك فواتير متقولش المحصل مجاش الشهر دا بركة وفرت؛ لإنه ممكن ميجيش عشان تدفع ال 7%... روح شوف شركة الكهرباء بنفسك أو فوري وادفع الفاتورة... لإن بعد كده هيبقي عدم حضور المحصل = انتا هتلبس 7% شهرياً وكل عام وانتم بخير.

⬅️ كل سنة وانتم طيبين شهر سبتمبر بدأ؛ ودا شهر جميل فيه نهاية الصيف يوم ما ابني اتولد... ومفيش فيه زيادات جديدة متوقعه عدا شوية أدوية... عكس شهر أكتوبر القادم فيه زيادة بنزين 1.5 جنية ? توقعي ليها 22-25 أكتوبر. يلا نستمتع بشهر سبتمبر وكفاية المدارس علينا ??.

الحمد لله نجحت في الأسبوع الثاني على التوالي في إني انزل فيديو... أيوا الأسبوع الماضي نزلت فيديو عن اتصال الواي فاي اللي كنت كتبت عنه مقال بس عشان كنت كاتبه فمقولتش لحد إني نزلته بس ربنا كرم في 500 واحد شافوه ??

*️⃣ المرة دي فيديو جديد مكتوب نصه بقالي قرب الشهر ومتصور من كذا يوم بس قولت أجرب اعمل حركات كده لإني لا ليا في المونتاج ولا تصوير وتقطيع والحركات دي بس أهو قولت أجرب

*️⃣ بالمناسبة هو مش طويل قوي هو 12 دقيقة بس آخر 4 دقايق دول فيديو تاني دمجته فيه عشان نفس الموضوع... بس ممكن ابقى أنزله في فيديو مستقل برضك والحركات دي ?

*️⃣ الفيديو بيتكلم عن مؤشر بيج ماك اللي بداية الشهر اشار إن الدولار في مصر قيمته 21 جنية... فبحكي ايه الموضوع دا ومحولات القوة الشرائية وشوية رغي كثير كده

*️⃣ إن شاء الله ناوي أحوله لمقال خلال يومين ثلاثة

*️⃣ وممكن أجرب افصل الصوت عن الفيديو وانزله بودكاست ??

بحيث أبقى أرضيت جميع الأذواق بقى.

https://youtu.be/uy5P78XLHSk

من المشاكل عندنا ك شعب إن نظرتنا عن العالم مش بتتغير.. يعني حتى الآن نظرتنا عن الخليج زي ما كانت نظرة آباءنا من 30 سنة... أبسط مثال قول لحد السعودية بتصدر؟ هيقولك هما عندهم شيء غير البترول.

*️⃣ طيب هل تعلم صديقي العزيز إن صادرات السعودية غير البترولية الشهر الماضي 5.76 مليار دولار في حين صادرات مصر غير البترولية 3.15 مليار دولار... يعني السعودية فيها صناعة/زراعة بتصدر قرابة ضعف مصر...

*️⃣ طبعاً لسه الأساس عندهم البترول اللي صدروا منه الشهر الماضي 17.68 مليار دولار... لكن الخلاصة إن بقى 25% من صادراتهم غير نفطية... وبقى عندهم قطاع صناعي وزراعي وخدمي بيصدر ضعف مصر ???.

*️⃣ وعشان محدش يفتكر البوست عن السعودية ويخش اللي يقولي مجبتش سيرة التغيرات السياسية والدينية وو هناك... عارفين الإمارات حجم التجارة الغير نفطية عندهم كام في 2023؟ وصلت 3500 مليار درهم أي 953 مليار دولار دي سلع وخدمات تم استيرادها وتصديرها في الإمارات... طبعاً الإمارات للي عارف هي وجهة استيراد وإعادة تصدير لكن التجارة عندهم بالموجب يعني الميزان التجاري عندهم موجب؛ يعني إجمالي الواردات عندهم أقل من الصادرات.

*️⃣ العالم بيجري والخليج كمان بيجري وإحنا لازم نقوم نجري... والأهم نجري معاهم في نفس الاتجاه عشان ممكن نقوم نجري برضك بس بالعكس

بمناسبة خبر في بلومبيرج الشرق على إن المطوريين العقارييين بيواصلوا رفع الأسعار رغم ثبات الوضع الاقتصادي عندي تعليق صغير.

*️⃣ القطاع العقاري دلوقتي هو ملاذ عدة جهات؛ الموظفين الفاسدين بياخدوا الرشاوي فيه ويغسلوا فلوسهم فيه... المصريين برضك العاديين بيستثمروا فلوسهم فيه... طيب الفئة الأولى مضمون استمرارها طيب الفئة الثانية ازاي نضمن انهم يستمروا؟ ببساطة نزود الأسعار.

*️⃣ في يناير الماضي وصل سعر الدولار في السوق الي ما بين 60 الي 72 جنية؛ وارتفع سعر الحديد والاسمنت والخامات لأرقام قياسية؛ المطوريين العقاريين رفعوا الأسعار ضمن حلقة رفع متواصل بحجة زيادة المدخلات.

*️⃣ بعدين حصلت صفقة رأس الحكمة ثم التعويم واستقر الدولار ونزل سعر الحديد وكل الخامات عن مستويات يناير؛ المنطقي التسعير ينزل بس مينفعش دا يحصل ليه؟ عشان الكونسبت العقلي في مصر إن العقار مش بينزل سعره... طيب ايه اللي مفروض يحصل.. الاجابة يزيد.

*️⃣ انتا ك مطور عقاري كنت في يناير بتبيع في مثلا المرحلة 2 من مشروعك بسعر 50 ألف جنية للمتر؛ المرحلة خلصت فلاااازم مرحلة 3 تبيع أغلي حتي لو هتكلفك زي 2 او اقل ليييه؟ عشان اللي اشتري في المرحلة 2 يلاقي ان سعر الشقة/الفيلا بتاعته زادت في المرحلة الجديدة.

*️⃣ فهنا يقول لدايرة معارفه عارفين كنت شاري ب 50 الف من 6 شهور ودلوقتط المتر بقي ب 70 ألف... فهنا ابن خالته وابن عمته شريكه جيرانه يروحوا يشتروا في المرحلة 3... بعد شوية تخلص 3 ونبدأ في المرحلة 4 مفروض نعمل ايه؟ نزود برضك السعر وهكذا.

*️⃣ فدا يخلق طلب مهول عالعقارات؛ كله بيشتري عشان بتزيد بشكل سريع وعنيف؛ مقتنع بقي ان العقار دا يساوي السعر المدفوع ولا مش مقتنع مبقاش دا المعيار؛ الشقة بكره هتزيد ليه مش مهم ومش عاوز اعرف ليه اشتري اشتري يلا بسرعة قبل ما المرحلة دي تخلص.

*️⃣ وهكذا ف ارتفاع السعر يؤدي الي ارتفاع السعر؛ دي قاعدة معروفة في الاقتصاد؛ طول ما العميل عارف ان سعر السلعة هيزيد بكره هيروح جري يشري النهاردة... لكن لو العميل عارف ان بكره سعرها زي النهارة او اقل فمش هيشتري النهاردة..

*️⃣ فلازم العقارات تفضل تزيد اسعارها لان كل ما يزيد السعر هيزيد الطلب وكله هيجري عليها اكثر عكس ما الناس متخيله... مفيش وسيلة استثمار تانية.

*️⃣ وقبل ما حد يقول كده فقاعة وهتفرقع... مش هتفرقع لمليون سبب منهم قناعات الناس؛ ومنهم استثمار الدولة ومنهم ان مفيش بنوك يعني الناس بتشتري بفلوسها فمفيش سيف بنك وراهم لو مدفعوش القسط يحجز عالشقة.

*️⃣ امتي ممكن تفرقع؟ لو الدولة شدت في الضريبة العقارية؛ مش مصر اللي فيها عقارات بالترليونات ضريبتها العقارية 2.7 مليار جنية ?... ولو حصل تشديد عنيف في غسيل الاموال ومكافحة الفساد مقارنة دخل كل شخص يمتلك عقار (يعني بتدفع قسط 100 الف شهري شقة بينما دخلك المسجل بالضرايب كله 40 الف سبحان الله ?)... المهم تخرج فئة من المشتريين من السوق فالطلب يقل المطور ميعرفش يخلص المعروض ويبقي العرض اكبر من الطلب.

*️⃣ وبما إن النقاط السابقة مستحيل تحصل في مصر فالفقاعة مستمر ومحصنة ولن تنفجر.

دا مجرد رأي شخصي مهواش ملزم لحد؛ شايفه منطقي تمام شايفه هبد عادي حقك انجوي. سلام