​Qo'ngiroq qilaman yuragingizga…

Tutqun tuyg'ularni ozod etar tun,
Mot qilib hayotning hakamlarini.
O'tlik nafasingiz eshitmoq uchun,
Izlayman qalbingiz raqamlarini.

Ismingiz chiqadi yurak qatidan,
Ijobat istayman tilagingizga.
Ko'ksimga ilingan go'shak-g'am bilan,
Qo'ngiroq qilaman yurangizga.

Tun-bedor, men betin, tuyg'u toliqqan,
Axir o'chgani yoq tunchirog'ingiz
Bo'g'zimga savollar keladi shoshqin,
Nega band bo'ladi qo'ng'irog'ingiz?

Doim band bo'ladi qo'ng'irogingiz,
Kiprikka qo'nadi achchiq shabnamlar.
Yana kimni ado qildi dog'ingiz,
Yana kimga ayon o‘sha raqamlar?

Tunning bag'rin yorib yonaman endi,
Hajringiz yoritsin tunni bir lahza.
Ayting, men bezovta qilurman kimni,
Axir menda boshqa raqam bo'lmasa…              

© Shodmonqul Salom

@sherxon_uz

Siz uchun faqat yaxshilarini loyiq ko'ramiz?????

@badiiy_tafakkur

@sherxon_uz

Мен ўша,
Ёшликнинг ён дафтарида,
Ярими кесилган суратдаги қиз.
Мен ўша бир қадам сиздан нарида,
Бахтга етолмайин яшайман ёлғиз.

Сиз ўша,
Бир бора йўлимни пойлаб,
Ё қўшни боладан йўлламаган хат.
Сиз ўша ёр-ёрни тинглаган йиғлаб,
Севги деганига ўқилган лаънат!

Мен ўша,
Қисматга жим эгилган бош,
Ва ота измига кўнган палаҳмон.
Мен ўша,
темирдан ясалган бардош,
Ва қирқта бўлакка майдаланган жон!

Сиз ўша,
Суймаган ёрини қучиб,
ишқнинг оловида эримаган муз.
Сиз ўша ёлғондан қасамлар ичиб,
Кимнинг кўз ёшига аралашган туз!

Мен ўша,
Ҳаттоки ҳаёлларида,
Сизни ўйламоқни ҳиёнат билган,
Мен ўша ҳар тонгда қурисин дея,
Ётган ёстуғини қуёшга илган!

Сиз ўша,
заҳ ерга бағрини бериб,
Тўрдаги балиқдек тўлғанаётган,
Сиз ўша
ҳар кеча бир ҳил туш кўриб,
Исмимни шивирлаб уйғонаётган.

Мен ўша,
Исмингиз қўйиб ўғлига,
Бешикни қучоқлаб аллалар айтган.
Мен ўша баҳорга етмасдан туриб,
Кузнинг хазонидек тўкилиб кетган!

Сиз ўша,
Бир бора севдим, демаган...
Мен ўша,
суймасдан тегдим, демаган...

Малика Салимова

@sherxon_uz

Бугун илк бор,биринчи марта,
Юзларинга қўяман оёқ!
Бизга қолган севги шўрликнинг,
Ўлганлари минг бор яхшироқ!

Сенсиз бир кун яшамам деган,
Сўзларингдан уялсанг керак.
Балки нафсга,ҳирсга,гуноҳга,
Хизматини топширган юрак!

Кўп курашдим, жар ёқасида,
Қилдек ҳисга илиниб қолдим,
Ёлғонларинг ниҳоясида,
Шеърларимдан аламим олдим.

Йўқ, ўйлама, бир лаҳзага ҳам,
Кўксимдан жой топмас аламлар.
Баҳор келар сен бўлмасанг ҳам,
Гуллашини қўймас бодомлар!

Яна ишқнинг ифоридан маст,
Шивирлайди кимдир исмимни.
Жонига ҳам жойлар эҳтимол,
Руҳ қолдириб кетган жисмимни.

Ҳали қанча ёзлар куйдириб,
Қанча қорлар ёғар,билмасман.
Юбординку жондан тўйдириб,
МЕН ҚАЙТМАЙМАН!
БАҲОР ЭМАСМАН...

Малика Салимова

@sherxon_uz

ЁЛҒОН ЗАРУР

Қорнинг оч-у кўркам шаҳарда
Сим қоққанда онанг ногаҳон.
Шунда бироз ёлғон зарурдир:
Демоқ учун: «Тўқман, онажон!»

Қарар экан умидбахш кўз-ла,
Севгилингдан сен кетар чоғда.
Шунда ёлғон нақадар зарур
Қайтиб келаман деб айтмоққа.

Ишонмасанг дўстларингга ҳам
Манфаатин қўйсалар устун.
Бирор ёлғон ўйлаб топ, тамом,
Дўст мақомин сақламоқ учун.

Бизни ахир қандай чўчитар
Бор виждоннинг элас излари.
Ҳадик солар шоир айтгандай,
Ҳақиқатнинг мудҳиш кўзлари.

Кун кўрамиз шу ёлғон билан
Ҳақиқатни ямламай ютиб.
Ватанни ҳам алдаб севамиз,
Алдовларга мукофот кутиб.

Мен ҳам гоҳо тонсам рост сўздан,
Ёлғончи деб босмангиз муҳр.
Алданиб ҳам бахтлидир инсон,
Бахтга ёлғон нақадар зарур...

21.11.2017

Xurshid Abdurashid

@sherxon_uz

#sevilgan_satrlar

Hayot – tushunmagan falsafam mening,
Umr – kundalikka oʻxshagan daftar,
Dunyo – kiprigimda qotib qolgan mung,
Ajal – ruh koʻkida yovvoyi kaptar.

Osmon – olamlarga sigʻmas vujudim,
Quyosh – yonib tugran yuragim mening,
Iymon – olam aro mening bor-budim,
Bardosh – yerga tegmas kuragim mening.

Sheʼrim – nafasimning tirgagi – havo,
Qalam – oq qogʻozda titragan koʻnglim,
Adolat – suvlari qurimas daryo,
Haqiqat – yuragi qonagan singlim.

Orzu – osmonlarga sigʻmagan oqqush,
Armon – orzularning singan qanoti,
Baxt – men koʻrolmagan goʻzal-goʻzal tush,
Dard – shoir odamning yana bir oti.

Shodlik – tor kulbamning erka mehmoni,
Alam – yuragimni zabt etgan mezbon,
Poklik – umrimning goh ojiz tomoni,
Shuhrat – tomirimda oqolmagan qon.

Hijron – oramizni buzgan yosuman,
Sevgi – men rangini anglolmagan gul,
Rashk – ishqim koʻkini qoplagan tuman,
Visol – men boshini topolmagan yoʻl.

Behzod Fazliddin

@ishqiolisim

Shunday yor topsang
hech kim qo'lidan ushlamagan...
faqat,ko'zlarida dardi bor!

Shunday she'r yozsang
boso olishmasa na gazeta,na kitobga.
faqat,yuraklarga bosiladigan!

Shunday yashasangki,
xuddi avval ham yashagandek...
faqat,mangu qoladigan inson misoli !
2018

© Rahmat BOBOJON

@sherxon_uz

Koʻylaklar

Xayol sarhadlarin kezinasan sen,
Ruhingni egallar cheksizlik sukun.
Shu dam...koʻylak soʻrab kelar dugonang,
Ilk bor uchrashuvga chiqmoqlik uchun.

Men ham doimgidek yashayveraman,
Qalam-qogʻozlarim ichra koʻmilib.
Shu dam...yaqin doʻstim kirib keladi,
Va koʻylak soʻraydi quvonchga toʻlib...

Soʻlim bogʻ qoʻynida ikki sevishgan,
Visol ogʻushida oʻtkazishar vaqt.
Ayt-chi, nechun bizga nasib etmaydi,
Koʻylaklarimizga nasib etgan baxt?

Shohrux Usmonov

@sherxon_uz

Менинг тириклигим ёлғон аслида,
Мен ўлиб бўлганман бермасдан ҳисоб.
Ишқдан уруғ қадаб кўклам фаслида,
Кузги ҳосилларда терганман сароб.

Менинг кимлигим ҳам аллақандай сир,
Баҳорга кўнмайман,қишдан безорман.
Юзимга тарсаки туширар тақдир,
Ким учун рўшнолик,кимга озорман.

Менинг ишқдан бўлак ҳеч вақойим йўқ,
Кундан-кун ундан ҳам бўляпман жудо.
Ишқсиз яшай десам кўнмайди юрак,
Ишқсиз яшамоққа қўймайди Худо.

Менинг на ўтмишим,на бугуним бор,
Ғижим бир қоғоздай эзғилайди дард.
Кўзларим оқини қонга тўлдириб,
Ҳаётнинг юзига тупиришим шарт.

Қисмат лой чаплаган умрим бор менинг,
Оҳлари осмоннинг кўксига туташ.
Ёки минг йил қилган гуноҳларимнинг,
Бадалими ёлғон дунёда яшаш?!

Хушнудбек Ҳодиев

@sherxon_uz