Апхуэдэу, фIыщIэ хуэсщIыну сыхуейщ «Акрополь–Центр» рестораным и унафэщI Къардэн Хьэсэн мыпхуэдэ пшыхь гуимыхужхэр щедгъэкIуэкIыну сытым щыгъуи и пэшышхуэр хуит къытхуещIри. Ди лэжьыгъэр къыддаIыгъ радиоми телевидениеми. ФIыщIэ яхудощI.
Ди лъэпкъым и лъэр быдэ зыщIын Iуэхугъуэ куэд къехъулIэну Тхьэм жиIэ!

Езауэ Мадинэрэ Пэщол Сакимэрэ я студентхэм щыщ гъусэ зыхуащIати, ар нэхъ лейуэ ди гуапэ хъуащ. Ахэращ пIалъэ тIэкIу дэкIмэ лъэпкъ зезыхьэнур, я гупсысэмрэ къэухьымрэ зиубгъун хуейщ, къызыхэкIа лъэпкъым гуащIэ къикIыпIэ хуэхъур къагурыIуэн хуейщ. Iуэхум жыджэру хэтахэм сахуэгуэпэнут, жиIэри, цIыхубз пыIэ дахэхэр къыздихьат Бырхьэм Мухьэмэд, зыхуэфащэхэми яIэрыхьащ. Тхьэр арэзы къыхухъу. Ди гуапэ дыдэт хьэрычэтыщI Псыгъусэ Симэ Iуэхум къыхыхьэу Црымым и тхылъым щыщ пычыгъуэ къызэреджар. Адыгэбзэ Хасэр дыщIыщыIэр аращ, адыгэбзэр нэхъыбэм къаIурыIэфIэн тхуэщIарэт жытIэуи, абы телэжьэну хэкIыпIэхэм ящыщ зыщ Црым Руслан и бзэр къацIыхуныр, зыхащIэныр. ЕджапIэхэм щылажьэ егъэджакIуэхэм, я унафэщIхэм чэнджэщ естынт я гъэсэнхэр а цIыху гъэщIэгъуэным хуагъэзэну, ирагъэпсэлъылIэну. Тхылъыр еджапIэ къэс яIэн хуейщ, адыгэбзэм и пэшхэм щIэлъын хуейщ, унагъуэ къэс илъыну фIы дыдэт.