تبوه الحين ؟؟

البارت صار جاهز 🤧

انتظرو اليديد

احمم

أحس اني مرتاح وخفيف لأني تكلمت
آمنة تمسك ايده: فديتك انا موجودة لك بأي وقت ومستعدة أسمعك دوم ******في اليوم اللي بعده.. اتصل حميد على سارة
حميد: مساء الخير
سارة بصوت مبحوح: مساء النور والسرور
حميد يتنهد: لا حول ولا قوة الا بالله.. حتى صوت مافيج.. وايد مرضانه ؟
سارة: لااا حميد عادي.. يومين وكل شي بيكون تمام
حميد: التزمي بدواج
سارة: ان شاء الله
حميد بانفعال: المرة الياية بتحصلين كف لو عاندتي، ليمونة يابسة.. كل شي تعارضه وترفضه
سارة تضحك: يا حبيبي انته شفيك؟ ترى كلها كحة وزجام
حميد انصدم من كلمتها.. وتم ساكت
سارة: أي أوامر ثانيه السيد حميد ؟
حميد: عورت ايدج أمس يوم سحبتها ؟ اسمحيلي
سارة: الله كريم.. كل ماعصبت مني قبضت ايدي بقوة.. شكلك مابترتاح الا بعد ماتكسرها
حميد: لا بسم الله عليج
سارة: والله جد.. انته يمكن ماتحس بعمرك.. بس تراك دفش.. حتى مرة دزيتني بقوة
حميد: انتي تنرفزين والله.. تطلعين الواحد من طوره
سارة: يلا عاد لا تبالغ
حميد: وانا الصادق.. أقولج يمين تروحين يسار.. وعقب أنا أبلتش من ورا عنادج
سارة: انزين خلني أسوي اللي أباه وأتحمل النتيجة، ليش تعور راسك فيني ؟
حميد بانفعال: وعقب اذا صارلج شي ؟ تعورتي؟ تأذيتي؟ بياكلني تأنيب الضمير
سارة: لهالدرجة ؟
حميد: هيه عيل شو تتحرين
سارة بعفوية: الله لا يحرمني من هالخوف والمحاتاة
حميد:..................
سارة بارتباك لأنها حست باللي قالته: يلا عيل أنا بسكر تامر على شي ؟
حميد: سلامتج.. انتبهي على صحتج
سارة: ان شاء الله وانته بعد ******على الساعه عشر ونص بليل.. اتصلت نورة لراشد
راشد بصوت نعسان: هلا حبيبتي
نورة تشهق: رااااااشد
راشد فز: بسم الله علييييج، شو مستوي ؟ شو بلاج ؟ فيكم شي ؟ شي صاير بالبيت ؟
نورة: لا كلنا بخير وعافية
راشد بخوف: عيل ليش تصيحين ؟ عسى ماشر ؟ 
نورة خذت نفس طويل: الاسبوع الياي الملجة
راشد بحنيّه: عيوني انتي، تبين تأجلينها ؟ مب مستعدة ؟ أساعدج بشي ؟ آمريني حبيبي قولي اللي بخاطرج
نورة ردت تصيح: أنا خايفه
راشد يطمنها: قولي حبيبي ارمسي.. شو مخوفنج؟ أسمعج قولي كل اللي بخاطرج ولا تستحيين
نورة: أخاف من المستقبل رشود.. أخاف مانتوالم وتصير حياتنا مشاكل وضرايب.. خايفة من كل شي والله
راشد باقناع: ماعليه حبيبتي كل زوجين لازم تكون بينهم خلافات وأشياء بسيطة.. كل شي بيعدي لاتحاتين.. المهم الصراحة والتفاهم بين الطرفين.. ولو في طرف عصبي وشديد ماعليه الطرف الثاني يطول باله ويكلمه بوقت هادي.. أنا أحبج نورة وشاري قربج.. مستعد أسوي وايد أشياء وأغيرها عشانج.. انتي ساعديني وخلي إيدج بإيدي.. لا تتركين ايدي فيوم.. خلي حبنا يفوز وينتصر على كل شي
نورة: وانته توعدني انك تسيطر على نفسك وتكون ردات فعلك هادية.. أنا انسانه ولي طاقة رشود.. كثر المشاكل بيدمر نفسيتي وبيهدم الحب اللي بيننا
راشد: لا يا عيون راشد لا.. ان شاء الله مابيصير شي.. ولو صار شي لا سمح الله طلبتج تطولين بالج وتحافظين على حبنا.. ماودي فيوم انه قصتنا تنتهي لأي سبب من الأسباب
نورة: ان شاء الله
راشد: أحبج يا عيون راشد وقلبه، مسحي دموعج ولا تصيحين، دموعج غالية علي، مابيصير الا الخير فديتج توكلي على الله.. شي بالخاطر بعد ؟ ارمسي حبيبتي اسمعج
نورة تتنهد براحة: لا حبيبي ماعندي شي أقوله زيادة، اسمحلي لو ثقلت عليك
راشد: انتي تثقلين علي ؟ أفا عليج.. تعالي فأي وقت وكل وقت، لو حسيتي فيوم بضيقه وتبين ترمسين.. يعلها الساعه ثنتين ولا أربع الفير.. انتي بس ارفعي سماعتج ولا تحاتين شي
نورة بحيا: حاضر، تسلملي يعلني مانحرم منك
راشد بحب: ولا منج قلبي وعيني انتي

بعد مارجعو من بيت يدتهم.. على طول راحت آمنة لغرفة أخوها محمد
آمنة: قول ياخوي.. شو اللي مكدر فيك ؟
محمد يتنهد: مادري من وين ابتدي! بدل الهم الواحد صار عندي همّيين!
آمنة بتوتر: تراك مخوفني من متى، ارمس عسى ما شر ؟
محمد: تذكرين ربيعي خالد ؟
آمنة: ربيعك من أيام الروضة صح ؟
محمد: هيه نفسه.. أقرب واحد لي من يوم كنا صغار للحين.. بقول لج الموقف بالكامل وشو صار

في المستشفى.. خالد باينة عليه ملامح الهلاك.. الوهن والضعف واضح على جسمه.. كل من يشوفه يشفق عليه وعلى حالته المأساوية.. خالد مُصاب بالسرطان، فالبداية كان يتعالج وشبه مسيطرين على المرض.. ولكن فجأة تدهورت حالته وانتشر المرض بكامل جسمه و بشكل سريييع... بإختصار خالد يعيش مراحله الأخيرة!

محمد وعينه تلمع: شو استوابك يا اخووي ؟ كان حالك أحسن
خالد يبتسم بتعب: السرطان ما له أمان.. فجأة يخون فيك وينهشك.. يهد حيلك
محمد: مأجور يالغالي مأجور.. آمرني.. والله من دقيت لي هديت كل شي وييتك المستشفى ركض
خالد: ودي أطلب منك شي بس مب عارف كيف
محمد يبتسم: أفا عليك خلود، مايغلى عليك شي.. إنته بس آمر وأنا ألبي
خالد يتنهد: أنا حاس إني قريب بودّع.. حاس انه نهايتي قربت
محمد بعصبية: شهالرمسة!!!، اذكر ربك.. لك طولة العمر والله يعافيك ويشافييك
خالد بألم: أنا بمراحلي الأخيرة يا محمد.. كلنا عارفين هالشي
محمد ماقدر يتمالك نفسه ونزلت دمعته: لا تيب طاري الموت وأنا عندك دخيلك.. لا تقطع قلبي أكثر..خبرني الحين شو بخاطرك ؟ شو الشي اللي تبا تطلبه مني ؟
خالد بارتباك: يشهد الله علي اني أعزك وأغليك.. أعزك معزة ماعزيت بها حد.. إنته والنعم فيك.. عارف ربك ودينك، وأخلاقك عالية
محمد يحاول يلطف الجو: شهالغزل خلود ؟؟؟ هالمدح كله لي ؟؟؟؟ يسوى عليك.. يا ريال اطلب اللي تباه ولا تحاتي بدون كل هالمقدمات
خالد باحراج: إختي خلود
محمد باستغراب: بلاها  ؟
خالد بدون مايطالعه: بعد ما الله ياخذ أمانته، بغيتك تتزوجها.. ودي أموت وأنا متطمن عليها وعلى مستقبلها..أريد أسلمها لإيد أمينة.. ومايا فبالي غيرك يا محمد.. أكثر اثنين لهم مكانة فقلبي، اختي الوحيدة وأخوي اللي مايابته أمي، أنا أعدك حسبة أخو ورفيق عمر
محمد من الصدمة تيبّس.. حس إنه الكلام ضاع.. مب عارف شو يقول.. لأول مرة يحس انه مايقدر يتنطق.. عقله وقف... وكل شي فيه مذهول!
خالد تنهد: أدري صدمتك، وماتوقعت هالشي، لكن طلبتك ولا تردني ياخوي
محمد يطمنه: تم.. أختك أمانة بتنحفظ عندي وبحطها بعيوني بعد.. انته المهم عيّن من الله خير.. ولا تعور فوادي بهالرمسة.. لك طولة العمر يا رب
خالد بحزن: أمانة فرقبتك أختي خلود.. أمي وأبوي الله يعطيهم الصحة والعافية لكنهم مب دايمين لها.. الإنسان مايضمن شو يصيرله.. لهالسبب أنا بغيت أرتاح وأسلم أختي لشخص أثق فيه.. صح بينك وبينها فرق عمر.. لكن هالشي مايعيب ياخوي
محمد: لاتشل هم شي و وصيتك بنفذها.. اختك كم عمرها ؟؟ 
خالد: 17 سنة
محمد ابتسم: ولا يهمك يالغالي.. العمر مب مشكلة.. انته الحين ريح أعصابك وتطمن.. لاتحاتي شي ولا تفكر مولية
خالد بغبنة: حللني وسامحني ياخوي لو زعلتك فيوم ولا ضايقتك
محمد يقاطعه: مسموح بالحلّ.. خل عنك هالرمسة الخاطر صافي عليك.. يشهد ربي مافقلبي الا الخير يا خوي
خالد ابتسم: شخباره مايد ؟
محمد: بخير الحمد لله.. مثل ماعرفته قبل هادي وماله حس وللحين هالطبع فيه
خالد: انته وياه من خيرة الناس اللي عرفتهم... الله يوفقكم وييسر دربكم
محمد: وياك الغالي

نرجع لآمنة اللي مركزة مع أخوها وتسمعه
آمنة: يعني بينك وبينها عشر سنين
محمد يتنهد: هيه نعم عشر سنين.. يعني جني ماخذ وحدة أربيها.. شسويبها هذي أمون ؟ كيف بتعامل وياها أنا.. والله اني وهقت عمري وابتليت.. بس ماقدر أرده.. خالد بالذات ماقدر أرده! خبريني بتكون ثانوية عامه صح ؟
آمنة: امممم.. مب شرط ممكن تكون ثاني ثانوي او ثانوية عامة
محمد بضيق: يا ربيييه شو هالبلوة اللي عقيت عمري فيها
آمنة تحضنه: هونها وتهون حبيبي، ماتدري لعلها خيرة.. نصيبك ياك لين عندك
محمد: انا مافكر بالزواج أمون.. وحتى لو فكرت فيه عقب.. بختار وحدة تناسبني وتناسب عمري، مب وحدة أصغر عني هالكثر!!! 
آمنة: ماعليه حمود، مب يعني صغيره يعني مش عاقل.. شوف ساروه وعواش.. فرق السما والأرض.. عواش ربي يحفظها رزين وعاقل وسارروه ياهل.. طايشة وماتحسب حساب لشي.. انته وحظك عاد خلود بتطلع أي نوع.. ولكن من كلامك عن خالد ومن كثر ماتمدحه أظن أخته بتكون نفسه
محمد: من ناحية أخلاق وأدب أنا متأكد من البنت مليون بالمية، انا أعرف خالد وأعرف أهله كيف مربيينه.. معاشرنه سنين طويلة وأعرف كل التفاصيل.. من هالناحية متطمن.. ولكن التفكير والأطباع والتصرفات.. يا الله أحسني بتعب وياها
آمنة: تفاءلو بالخير تجدوه.. الحمد لله على كل شي مكتوب لنا.. كل شي يصير لحكمة احنا مانعرفها محمد.. كل موقف يصير سواء عيبنا ولا لا.. وراه سبب
محمد: الحمد لله.. مشكورة لأنج سمعتيني..

البارت | 24 .