Ассалому алайкум, азиз дўстижоним Sohibaxon Abdurahmonova ! Аллоҳга кўп шукур, Аллоҳимнинг азиматли уйи-Каъбаи мукаррамага томон қадамларингиз қутлуғ ва баракотли бўлсин! Мен учун қилган дуоларингиз учун шукронадаман. Менинг шу йилги беморлигим ўзгача келди. Оддий шамоллаш бўлиб келди, аммо сира кетай демади. Йўтал ва иситмадан чарчадим жуда. Шу ҳолимда сиздан келган бу гўзал дуолар муждаси қалбимга ёруғлик ва катта умидлар солди.
Мингдан минг раҳмат, дуогўйим дўстим! Аллоҳ рози бўлсин!
Қувонч ва ҳаяжон ичидаман. Йиғи ичидаман.Шодлик йиғиси...Одам доим кулфат ичра қолмайди. Сиздек дуогўйи бор дўстлар кулфат ичра эмас, асло. Ўтган йили азиз дўстим Дилдора Мардиева ва Сизнинг, кейин Озода Бекмуродова синглим ҳам Каъбайи мукаррамадан туриб дуо қилдингизлар. Раҳмат, сизларга!
Алҳамдулиллаҳ, дуоларингиз билан тетик бўлдим.
Бугунги дуоларингиз мени яна йиғлатди.
Илоҳим мен ва жумла мўъминлар ҳаққига қилган дуоларингиз, нафис тилакларингиз ижобат бўлсин. Аллоҳим Сизга ва оилангизга файзу баракот, кетмас давлат берсин. Ҳамиша фарзанду набиралар камолини кўриб юринг. Гуландом Тоғаева

ШОИРНИНГ ОНАСИ

Тушида шоир оқ кема кўради,
Уйғониб ўз бағрин қийма кўради,
Шоир кун кўрмаган қитмир замонда
Шоирнинг онаси нима кўради?

Маддоҳнинг онаси тўйиб пул кўрар,
Актёрнинг онаси гоҳи гул кўрар,
Шоир то халқини эрксиз, қул кўрар,
Шоирнинг онаси нима кўради?

Ҳар кун оёғида ғовлардан из бор,
Ҳар куни бошида юз қилич, юз дор,
Шоир «онасини кўради» юз бор,
Шоирнинг онаси нима кўради?

Шоирнинг айбими ҳақни уққани?
Онанинг айбими шоир туққани?
Ҳақ қани, ҳақиқат тиккан туғ қани?
Шоирнинг онаси нима кўради?

Ўзбекнинг зўрлари юртга сиғмайди,
Ўзбекнинг онаси раҳбар туғмайди,
Четдан чақиради!.. Шоир йиғлайди,
Шоирнинг онаси нима кўради?

Турмуш ― бир хил қўшиқ, бир хил нақорат,
Кам туғ, деб онангни айлар ҳақорат,
Шоир фарёд қилар: бу қандай ғорат?
Шоирнинг онаси нима кўради?

Эй ўтмиш замонлар, шоҳид хазонлар,
Ҳусайн Жовидлар, Чўлпон, Усмонлар,
Кесилган забонлар!.. Фолбин осмонлар,
Шоирнинг онаси нима кўради?

Тирикман, то туркий тилим бор экан,
То ўлим аталган йўлим бор экан,
Қатағон деган шум илм бор экан,
Шоирнинг онаси нима кўради?

«Сен ҳақсан, болажон, нур менга ато»,
Мен ― халқман, онажон, ғанимлик хато,
Мени газет урар, уларни Худо,
Шоирнинг онаси нима кўради?

Онажон, ҳолимга йиғлама сим-сим,
Халқин она дерлар ― бу гўзал тилсим,
Онасин сотганлар қаердан билсин ―
Шоирнинг онаси нима кўради?

1989
✍ Мирзо Кенжабек

ДАРВОҚЕ, ЁЗУВЧИ ТОҒАЙ МУРОД МЕНИНГ ҲАМҚИШЛОҒИМ БЎЛАДИ.МЕН ШУНДАЙ ЮРТДОШИМ БИЛАН ФАХРЛАНАМАН. ОХИРАТИ ОБОД БЎЛСИН, ИЛОҲИМ.
ТОҒАЙ МУРОД МУЗАФФАР БАЙРОҚ БИЛАН БУ ДУНЁДАН КЕТДИ.

Дунёда токи мен ўзбекман, дейдиган битта одам бор экан, юлдузлар мангу ёнаверади, оқшомлари отлар кишнайверади, боболар билан момолар эса шивирлашиб ойдинда юраверадилар — Тоғай Мурод бино қилган қалъа то қиёматгача завол топмайди: дийдор қиёматга қолди, тупроғинг енгил бўлсин, биродар!

Тожиддин Раззоқ,
ёзувчи

Азим СУЮН

АНДИЗ ЎСГАН ЕРЛАРДА

Андиз ўсган ерларда отлар бевақт ўлмағай,
Яхши бўлса аёллар эрлар юзи сўлмағай.

Қайси юртда чинакам ботир эрса йигитлар,
Ўша юртнинг эллари ёвларга қул бўлмағай.

От минмаган от минса, чопа-чопа ўлдирар,
Боғ кўрмаган боғ кўрса, пайҳон қилар, сўлдирар.

Ҳушёр бўлгил, жон элим, элдай сақла элингни,
Ёвларингга қўл берсанг паймонангни тўлдирар.

Бош кесилса, ёронлар, сочга мотам тутилмас,
Қон қусилса, ёронлар, ичга сувдек ютилмас.

Қай бир миллат тупроғин топтар экан маккор ёв,
Ўзлигин билганларнинг бахти асло бутунмас!

Арғумоқларга мининг, ғолиб қилич ёр бўлсин!
Бу дунёда ҳар кимнинг ўз Ватани бор бўлсин!

ТИЛАКҲар кимнинг ҳам сочларига оқ тушсин,
Ажин тушсин юзларига, доғ тушсин.
Ҳар кимнинг ҳам қувват кетиб белидан,
Қўлларига асо — бир таёқ тушсин.

Имони соф, юзга кириб ёруғ юз,
Тўйлар кўриб елкасидан тоғ тушсин.
Жисмига сўнгги сафар олдидан
Ўз боласин қўлидан тупроқ тушсин...

*©️ Муҳаммад ЮСУФ*