“Биһигини маннык тэрээһиҥҥэ ыҥырбыккыт олус да үчүгэй” диэни оҕоттон истэр 2 бүк үөрүүлээх, долгутуулаах. «Сарыал» культурнай киин иһэ бу күннэргэ, эмиэ хаһыс да сырыытын, кырачаан оҕолорбут саҥаларынан, үөрүүлэринэн туолан көрөргө-истэргэ күндүтүөн. Ол курдук, «Үтүө санаа Харыйата» акция чэрчитинэн доруобуйаларынан хааччахтаах уонна төрөппүт харалтата суох хаалбыт оҕолорбутугар улуус дьаһалтата, СР үлэҕэ уонна социальнай сайдыыга Министиэристибэ Тааттатааҕы нэһилиэнньэ социальнай көмүскэлин кэлим киинэ, улуустааҕы инбэлииттэр уопсастыбалара, опека отдела уонна «Сарыал» культурнай киин кыттыһан сарсыардааҥҥы тэрээһини ыыттылар. Манна барыта 13 төрөппүт харалтата суох хаалбыт уонна 20 доруобуйаларынан хааччахтаах оҕолор араас нэһилиэктэртэн муһуннулар. Күүстээх санаалаах оҕолорбут олус интэриһинэй представлениены биир тыынынан көрдүлэр, бары оонньууларыгар көхтөөхтүк кыттан астынан, Тымныы оҕонньору кытары хаартыскаҕа түһэн, кини илиититтэн Таатта улууһун салайааччыларын, депутаттарын, коллективтарын үлэһиттэрин, спонсордар, биирдиилээн олохтоохтор бэлэхтэрин тутан тарҕастылар.

Бу дойдуга туохтааҕар да күндү оҕо. Онон кинилэр олохторо чаҕылхай, үөрүүлээх күннэринэн, түгэннэринэн туоларын туһугар маннык тэрээһиннэргэ кыттыбыт бары дьоммутугар барҕа махтал тиэрдэбит. Салгыы бу акция 28 чыыһылага диэри ыытыллан, нэһилиэктэртэн кыайан кэлбэтэх оҕолорбутугар тиэрдиллиэ диэн эрэннэрэбит.

Ахсынньы 19 күнүгэр сарсыарда Ил Дархан Айсен Сергеевич Николаев Саха Өрөспүүбүлүкэтин Судаарыстыбаннай Мунньаҕар – Ил Түмэҥҥэ Туһаайан этиитин оҥордо, онтон киэһэ Арассыыйа Президена Владимир Владимирович Путин үгэс буолбут быһа эфирыгар түмүктэрин билиһиннэрдэ, суруналыыстары уонна дойду олохтоохторун долгутар ыйытыктарыгар хоруйдаата. Бүгүн ыйыллыбыт, биһигиттэн инникитин болҕомтону эрэйэр хайысхаларга тус бэйэм санаабын үллэстиэхпин баҕарабын.

Таатта улууһугар тыа хаһаайыстыбата сүрүн дьарык буолар. Айсен Сергеевич олохтоох тыа хаһаайыстыбатын бородууксуйатын оҥорон таһаарыы кээмэйин улаатыннарыы наадатын тоһоҕолоон бэлиэтээтэ. Ону сэргэ эһиилгиттэн улуустар, муниципальнай тэриллиилэр дьаһалталара тыа хаһаайыстыбатын сайыннарыы политикатын бэйэлэрэ быһаарыахтара. Саха сирин баһылыга биһиэхэ 15 хайысханан государственнай боломуочуйалары биэрэрин, субвенция кээмэйин улаатыннарбыттарын эттэ. Бу биһиэхэ улахан эппиэтинэс буолар.

Ону таһынан Айсен Сергеевич 2030 сылга дылы туристическай сүүрүүнү 700 тыһыынча киһиэхэ диэри улаатыннарар соругун эттэ. Бу биһиги улууспутугар урбааны сайыннарарга ону тэҥэ ураты культурнай уонна айылҕа ресурсаларын харыстааһыҥҥа көмөлөһөр дьоһуннаах көҕүлээһин буолар. Биһиги улууспутугар туризмы сайыннарар усулуобуйалар бааллар, ол курдук, музейдар, культура пааматынньыктара, айылҕаҕа сынньанарга дьикти сирдэр арааһа бааллара кистэлэҥ буолбатах.

Быйылгы Ил Дархан Туһаайан этиитигэр сүрүн таарыллыбыт хайысха - анал байыаннай дьайыы буолла. Анал байыаннай дьайыы тиэмпэтэ, туруга, кыттыылаахтара кэпсэтиигэ элбэхтэ таарылыннылар. Ол курдук, Айсен Сергеевич 2025 сылы Аҕа дойду көмүскээччитин сылынан эппитин олуһун диэн долгуйа, астына иһиттим.

Итиэннэ Ил Дархан дохуоту улаатыннарыыга, элбэх оҕолоох дьиэ кэргэннэри өйөөһүҥҥэ, демографияҕа, олорор дьиэни тутууга, Улуу Кыайыы 80 сылын таһымнаахтык бэлиэтээһиҥҥэ уо.д.а. хайысхаларга болҕомтотун уурда.

Арассыыйа Президена Владимир Владимирович Путин, буоларын курдук, туох баар боппуруостарга барытыгар сиһилии, толору эппиэтээтэ. Демография, экономика, инфляция, уо.д.а. боппуруостарга, билиҥҥи буола турар политическай быһыыга-майгыга, СВО-ҕа дьон мунчаарар ыйытыктарыгар чуолкай хоруйдары биэрдэ. Владимир Владимирович тыа хаһаайыстыбата Россия экономикатын биир тутаах салааларыттан биирдэстэрэ буоларын бэлиэтээтэ, тыа сиригэр кадр тиийбэтин боппуруоһугар хоруйдаан, тыа сиригэр социальнай боппуруостар баалларын, сүрүннээн — дохуот таһымын үрдэтии наадалааҕын бэлиэтээтэ.

«Россия - сүүнэ улахан дойду. Ол эрээри бу территория эрэ буолбакка, бу история, культура уонна биһиги үгэстэрбит. Ол эрээри, саамай кылаабынайа – дьон. Мин Россияҕа бэйэм дьиэ кэргэммэр курдук сыһыаннаһабын», - диэн Владимир Владимирович ис сүрэҕиттэн билиннэ. Бу кылгас этии - биһиги президеммыт дойдуга сыһыанын көрдөрөр. Маннык лидердаах биһиги инникибитигэр бигэ эрэллэхпит.