سلام الله عله الضل عالجسر جسمه
سلام الله على موسى وعلى اسمه
#############
يا وسفه وحسافه نعشك الوحده
واملاك السمه خلفك تجي بسجده
اشما هارون سَوّه اشما عمل ضده
ميهزه اللذي حيدر علي جده

سلام الله على گلبه الخذاه سمّه
سلام الله على موسى وعلى اسمه
#############

كد كيدك يهارون اولا تگدر
وينك انته هسه اوين ابن جعفر
تراه الموت لا قدم ولا اخر
والگضه حياته اويّه الله ما يخسر

ضل عالجسر نعشه وهوه بالقمه
سلام الله على موسى وعلى اسمه
#############

لو سم لو قتل هل عاده بالعتره
دين المصطفى اشكد حاولو كسره
مفتاح الفرج موسى وكبر صبره
ابوسط گيد الضلم ضل منتصر امره

الكاضم نعمة الله وضلمو النعمه
سلام الله على موسى وعلى اسمه
#############

غريب الدار گالو موسى يا هضمه
امن اهل البيت هوه وقادة الامه
يعني الكون كله امسجل ابأسمه
لكن ضلم هارون ابحقد سَمّه

عين الما بچتلك ريت خل تعمى
سلام الله على موسى وعلى اسمه
#############

واسى احسين لمن بقه ابلا ناصر
والسم دوره چان ايمثل الحافر
بقه اباله الضعن لمن صبح حاير
عاش اويّه السلاسل قصة العاشر

عاش اويّه الطفوف ابروحه وبدمه
سلام الله على موسى وعلى اسمه
#############
هشام الساعدي

نعي

موش امن اهلنه ولا الي هاي الناس
امنين واشلون وأجوو عالحضرة
اني اعرف الخدام زوار احسين
من يمهم اشتم الحنين وعطرة
ذكرو اسماء ابحضرتي وصارن سوط
وجرح السبي فز وخيم مستعرة
ام عون عون اتريد منك عباس
ما بيهه حيل اعله السبي هل مرة
ليهسه ما بردت تره طبت السوگ
وشلون لو وصلو اللحدي وگبرة

اميره وديني شرع الله الي دين
بعد لشام الي ثاري و الي دين
والي منحر بقه ضامي والي دين
تسطره اللي يمد چفه عليه

تهنه ابديره ما نندل وضعنا
موش بخير لا تسئل وضعنا
احسين اعياله بالغربه ووضعنا
ابخرابه اينام وتحرسه ال اميه

لو هَل عليه الموت يحسين
منهو اليّه ويطبگ العين

وين الگه اليسدلي العين لو گرب الي موتي
وانه بالطف خلص عمري هودج صار تابوتي
زينب والعمر خمسين خلص تره بيا خوتي
يطلع جرحي من الروح وما يطلع انه صوتي

فيض الدموع ايغذي نهرين
منهو اليّه ويطبگ العين

اهواي الموت اجه وشفته من اخر ضهر للشام
چا زينب اهي شتصير حته اتعيش هل اعوام
يوم العاشر اشسوه ابد ما يشبه الايام
ذبح عالمشرعه الخوه حرگ گلبي قبل لخيام

ملح ابجرح فرگاهم البين
منهو اليّه ويطبگ العين

اصعب موته جان الشام حچيهم نبله بالمنحر
الهوه يذبح ولا ينشم تحس حته الهوه خنجر
احط بذني جذع اسمع هاي اخت اللذي اموذز
كلهه بصفحه بس اشلون ايات الستر تنجر

حرگ الخِيَم والفرگه نارين
منهو اليّه ويطبگ العين

كون ابسحكة الحافر ميته اولا اطب للسوگ
اولا وكفة هذاك الباب ضعن الله بگلب محروگ
ضعن الله بعرش ينشال موش بهزله تالي بنوگ
لو جتني المنيه اتشوف دلالي اشكثر مخنوگ

اليدفن هَلَه ايحصلهم امنين ؟
منهو اليّه ويطبگ العين

نعش روحي ونعش لجروح انه المفروض الي نعشين
ثكيله اجنازة المهموم واهله ابلا نعش ماشين
بقيت احسب انه الموتي اشكثر مشتاگه انه لحسين
هوه المثلي من يموت مَيّت بس يغمض العين

الروحي وجروحي ايصير گبرين
منهو اليّه ويطبگ العين

هشام الساعدي

بضلوعي افراگج تره باب وجذع بضلوعي
بدموعي لو ردت اغسلها انه بدموعي
وشموعي لحضة وداعج تنطفي وشموعي

يا فركة المحبوب تخنگ تره الروح
وي كل مسية اغروب تتكاثر اجروح

جرحوني بغيابچ
انهد حيلي لمصابچ
راح انتضر يم بابچ
يا زهراء. يا زهراء
——————————-
يا روحي هسه استعدي للحزن يا روحي
يا نوحي. ابچي بعد صب الدمع يا نوحي
يجروحي لزهره ما اشدهن بعد يجروحي

لعيوني ردت اعيون خل مدمعي ايسيل
الزهره وخذاهه الموت شينفع بعد حيل

غاليتي ام بيتي
وياهه عافيتي
كل حيلي هديتي

يا زهراء . يا زهراء
——————————-

لضلوعج. كون العمر يصبح دوه لضلوعج
لدموعج ونت عليهه اهل السمه لدموعج
موضوعج امنين ابدي حته ينتهي موضوعج

افراكج نعش تابوت مو شده وتزول
حزنج اوزنه اجبال شي شيل الحمول

ما تتطفى نيراني
كل عمري احزاني
ومصابج اذاني

يا زهراء . يا زهراء
——————————-

احزاني اتصدع جبال اهل الارض احزاني
عدواني. خانو ملح طه ونسوا عدواني
ذراعني مو همه چتوفوني الوعد ذرعاني

بعضامي مو بالريش افراگج ولا ايهون
امصاب العزيز يعيش يعميهه العيون

انهد حيلي بغيابج
سالفتي لترابج
دلالي لمصابج

يا زهراء. يا زهراء
——————————-

بترابي رديت انه البيتي بشكل بترابي
احبابي. جوه الترب همه اصبحوا احبابي
اصحابي. يلعنهم الله ابكل مسه اصحابي

يا حاله من رديت كلشي تهشم
چن سگف بيت وطاح فوگي تهدم

انهد حيلي بوداعي
ما تبرد اوجاعي
واحزانج بضلاعي

يا زهراء. يا زهراء
——————————-
هشام الساعدي

ردت امن الغربه لمصاب الرسول
………………………
زينب ردت الجدهه محمد
تخبره بالجره باليوم الاسود
يجد العاشر اولا خله احد

يبو القاسم داست بصدره الخيول
………………………
ردت ولون السبي فوك العبي
ردت امن الشام لمصاب النبي
ابيا وضع زينب اجت من السبي

اشلون ردت للحزن بنت البتول
………………………
رجت اركان المدينه بالحزن
يا حسين ويا محمد بس تون
الغربه التعيش الغرب وبنص وطن

كعبه فوگ الناگه شافوهه تصول
………………………
هَل عليهه امصاب طه اتجهزه
حيرت الناس التجي اتعزي العزه
فاكده بالطف عشيره ومعجزه

واليجي ايعزي يحير اشما يگول
………………………
عضم الله الآجر گالو تره
بس عله ياهو صفت متحيره
عالنبي لو عالبقه ابلا منحره

لو عله الضلو تحت حافر يجول

هشام الساعدي

شمسوي بيك الزمن. يحسين انه الحسن

امحرم خلص بالدمع ويا صفر كمل المحن

يا ابو علي الخوه تره ميهمهه موت وفرگه
انه ابوسط گبري واجه هاجس خيم محترگه
چن الضهر گلي انكسر بالنفس ما ضل شهگه
من اسمعت فوگ الرمح الضعنك گلت تتلگه

لطمت الحور وبچت. يحسين بأسمك حچت
الفاگد اخو ينفجع. ويا صفر كمل المحن

بساعة مماتي انت الي بس منهو ضل يم راسك
فاكد عشيرة انت ووطن چا ياهو ضل من ناسك
بحضنك جبت راسي يخي ونفس الامر عباسك
بس راسك انت اعله رمح ابراس الرمح انفاسك

راسك يوسده الرمح شمسوي بيك الذبح
الفاگد اخو ينوجع ويا صفر كمل المحن

چن چبدي طايح بالثره مو سم يدوسه الحافر
من صعدوج اعله الهزل ضهري انكسر مو خاطر
صح ابخرايب بالغرب ضعنج يطر ويسافر
بس شفته يا زينب اجه العرش الله ضعنج زاير

يا دنيه وضعج صعب. ضعن الله تالي بغرب
صوت الكسر ينسمع ويا صفر كمل المحن

عباس كلشي فدوه الك اعذب شخص بالخوه
چفك عصى موسى اوكع وثبت اُسس للنخوه
لكن وحگ عين السهم رغم السهم بس حلوه
من صابو الراس ابعمد سم بالچبد يتلوه

ما قصرت يا گمر. بالجنه اسمك نهر
فگدك كسرلي ضلع ويا صفر كمل المحن

رايات طلعتلك مشي وي زينبك تتشارك
عرش الله زاير ينحسب يحسين كلمن زارك
من البقيع الكربله انفاسي اجت خطارك
جن وأنس تمشي الك واهل السمه زوارك

والخوه ما تبتعد. لو يلفي ليهه اللحد
امحرم يذوب الشمع ويا صفر كمل المحن

هشام الساعدي

( فوگ الهِزل مچتوف الايدين )

فوك الهزل ما باقي بي حيل
اگياد السلاسل دم جره يسيل
وفوگ المرض شاف المچاتيل
شَيب دليله وشيبت العين
—————
صار الكفيل الذيج العيال
والحادي ما يرحم بالحبال
رغم المرض ومگيد الحال
فوگ الرمح تحچي القرائين
—————
المر ابعلي السجاد الهواي
چتال اخوته وأهله حداي
عالضعن محني صار الإفياي
من الشمس ضَلّ روس الابنين
—————

گالو خوراج نسل ابو اتراب
جدهم محمد همه اله احباب
يعني الضعن كم ايه بكتاب
من اية التطهير للحسين
————————-
بقصر العدى ودگ ثورته اوتاد
سيفه خطابه زين العباد
إحنه البقينه وأنتم ارماد
التاريخ يشهد انتم الوين

هشام الساعدي

الدافنله قُرأن باللحد يا فاتحه يقراهه
ولو مات هوه بالگبر. ياهو اليجي ينعاهه

دمعاته فوك الخد تشِع
بَـكاء من اهل الدمـِع

اليدفن اعز ناسه يضل مثل الوتد من يندفن
لا هوه ميت عن وجه ولا هوه عايش مطمئن
زين العباد اويه الجزع قصة حزن شابگ حزن
صح انحنه ابوكت اليسر من الشمس فييَّ الضعن

يا صبر عنده الي جمع. جسم الابو وعضائه
ما گادر ايلم اوعجز. لم بحصيره اشلائه

مُتعب حزيناً في وضع
بَـكاء من اهل الدمـِع

ابطيّ الارض لمن اجه يدفن جثث وسط اللحد
چا ما اجه ابطيّ الحزن ويطوي الجروح وتبتعد
معصوم ينشد بحبل وللناگه گالوله استعد
مات وبقه دمعه يهل ثورة دمع ضد الحقد

ما ينسي الطف ينذكر. بوسط الگبر احواله
مات وبقه حرك الخيم ما ممحي من كل باله

بوسط الگبر طف ينسمع
بَـكاء من اهل الدمـِع

اشيَذّكر الدافن وذر ويا ملحمه اباله اوصور
ما يكدر ايغمض الجفن امنِ يغمض يشوف النحر
بساعة مماتك يا علي شنهو الآجه ابالك حضر
حزنك لون فوك الجبل يتصدع وكله انفطر

الفاگدله بالطف النفس. ايثگل العمر انفاسه
واحسين فاگدله ضوه. وفاگد ضوه عباسه

وكل الجروح اعليه تسع
بَـكاء من اهل الدمـِع

مَر العمر شاء القدر نفس الشهر موته انفرض
بالطف وحاله الله وحي بس الوحي بهيئة مرض
گلبك تخلعه لو ردت وادي الطفوف ابلا نبض
ابقصر العدى وقام النصر بثورة حُسينيه انتفض

بالمعجزة عايش بقه. ويا ويلي من حسراته
شَيب دليله بالبچي. ومنّه اطلعت شيباته

مات ودليله المنفجع
بَـكاء من اهل الدمـِع

فوقَ التخيل بالعقل حمل المصايب مو سهل
بفكرك جبل تكدر اله بس القهر ما ينحمل
زين العباد اويه الجره يا معجزة وباقي عدل
والسم مثل سهم الذبح نفس الايادي بالقتل

التخلص حياته بالدمع. شيضل بعد بعيونه
ولو راد حماله النعش. ماتوا اللي يشيعونه

اشما يبجي محروگ الشمع
بَـكاء من اهل الدمـِع

هشام الساعدي

الشام واهل الشام فرحانه بسبينه
دگو الطبول الفرح لمن اجينه
واليقلل من قدرنه تعمى عينه

ما تغيرنه الرماح ولا سبي
منهو گال ابلا عبي خدر النبي
واحنه اجينه امحملين امن العبي

زينب انه وهذا الضعن وفوگ الرمح همه الاهل
احنان وغوالي اعله الضعن يهتز رمح وي كل طفل
المفروض انه امشي ابعرش موش بسبي وگيد وحبل

بس نحر عالرمح بس نحر
امطشر وصاير ودز. يا خوية

————————————-

احنه البسمنه تنگضي كل الحوائج
احنه الصبح بينه المثل نمشي بهوادج
والما يعرف الله يگول انتم خوارج

الما يركد اعله الهزل ايشدوه جريمة
بالحبل معصوم ينشد يا هضيمة
ارقيه من كثر الضرب گالو سقيمة

ابسوگ الجرح طب الضعن والتمت اعليه الخلگ
شافو عله راس الرمح شافو ذهب بس منسحگ
وشافو عله الهودج كَنز بس هل كَنز لايح حرگ

امن العطش باقي امن العطش
ضل ابلا نعش. ياخويه
_____________________
كلها تسئل منهو احنه من دخلنه
واحنه وجه الله صبح يمشي ابضعنه
المن احنه ننضرب ليش انشتمنه

ماي حار اعله الضعن انذب اذية
والجمر ما طافي بعدة بكل سبية
بغضاً بفـوگ الـرمح اذوّ رقيه

اعيون الشماته ابلا خجل ولا مستحه عدهم صبح
هوسوا اگبال الضعن ابراس الولي گوم الذبح
وخاف الخدر عايز حزن فوگ الجرح صاير جرح

ابلا اهل غربه وبلا اهل
ولا اخو ضل عدل. يا خويه

————————————————
كلشي بالدنيا جره منّ المصايب
بس مثلنه ما جره وصارت نوايب
تالي اهل الجنه تسكنهه الخرايب

عَيّدو اهل الذنب همه الشماته
وينه عباسج يصحيون وصفاته
يدري ما يدري انسبت هايه خواته

شتلم وسط ضجة ذبح اتلم الولي اتلم الضعن
ايعينج الله اعله الجره فوگ الذبح غربة وطن
ومصايب الناس اشكثر ومصايبج ما منها اجن

يا زمن عالهزل يا زمن
راحت ايامي انسن يا خويه

هشام الساعدي

قد جاء من اقصى الخيم عباس
شايل ابجفينه العلم عباس

قُل اعوذُ امن الناس
التجهل وتنكر عباس ****
حسب ما كالت الايه وحسب مصدرها الدليل
اشدد بعضدك بأخيك حته حملك ما يميل
شما تريد انته توصفه چن نهر وصفك قليل
الْمُؤْمِنُونَ إِخْوَةٌ ابعضهم وانته للخوه مثيل

سبحانة من خالق گمر عباس
من گصته مشتق النهر عباس
من غيرته حار الراس

من كتاب الله دليلي ومو مفسر بالمبين
الاية من طه اقتباساً ونزلت ابصدره الامين
مثل ما موسى بأخيه ازره شده اعله الحنين
وابو فاضل شدهه روحه وضهره في حب الحسين

وجهه بي لمحة غسق عباس
الخلق مثله ما خلق عباس
يسبح ابتسبيحة انفاس

والذي اسرى بعبدة ابسورة الاسراء كلام
امن المدينة الحد خيامه جن الاقصى والحرام
بالگمر سبحانه بارك باقي ضل حوله الخيام
يحرس بزينب يفكر خافن ايمرها الضلام

لابس جلابيب الشهم عباس
سُندس وأستبرق زلم. عباس
من تنضرة اتشوف احساس

الله ويّه املاكه سَلّم اقره مطلعهه الزيارة
وأنبياء الله تُسلّم شنهو معناها الاشاره
لن تبور ولا تِخلص الاويّ الإحسين التجارة
العصمه صح صُغرى امتلكها وكبرى بالخوه وقاره

يا زمزم الطف يا عذب. عباس
التطهير اخوها تنكتب. عباس
يا نعمة الله التنباس

ما حلم ليه الكواكب ولا اله ايسجدوله اخوة
بس حِلم بالخوة تعطش ومنهدها ما تروة
هو من يعطش يكابر اعله العطش ضل ايتقوة
وبالطفوف اشما تعاين تلگه كيد ابلايه نسوة

العطش مفتاحه الگمر عباس
بالجربه يمكن حط بحر. عباس
مكنون لؤلؤ والالماس