على ياساس؟ ابنج كاعد يناغي
وحبيبج ينكطع نسله
على ياساس؟ نص دينج كمل بعدي
وحبيبج ضيع القبله
وعلى ياساس عشتي بسرعه وتربين
واني الحاسبج طفله
ولو سامع ال ماريدك من لسانج
اتخطى واضن سهله
ولو راجع جنازه لبيتنه وممدود
ولا راجع بهل فشله
ولو شالع  فصوص العين بجفوفي
ولا شايف ضحكتج ذيج بالحفله
مو تدرين اغار عليج من روحي
على ياساس بيده يلملم الكذله

علي عمآد

هنا يمن صم ذهب هديتني من ايدك
لو يستقر النفس جا كلت ماريدك

موسم خضاري بده
توه بده ونشفت مواعيدك

من تسمع تعودت عــ الفركه هز ايدك
شتريد اكلك كضت
وكلادة صغت العمر وتعلك بجيدك

اركض وانا المختنك
نسمات الم الهوى واعزل بالتفيدك

شفتك بصحرة ورد وتحزمتلك صبح
لميت كل الندة اليكسر تقاليدك

جا من شفتني طحت جا كلت مافيدك

انثر دموعي شذر
ودوسهن من تمر
واضحكلك بــ عيني
هو انة حتى الضحك بعدك يبجيني

شيطلع من ايدك هني
تكتلتني تحييني
لنارك ردتني حطب
كيفت ما صدكت

معقولة مهتم صدك وتريد تجويني

معقولة عندي جفن
هم حالي حال الدمع
لو زعل يجفيني

غيرك شتل ما شفت
يتشاهد بكل جرف ويخضر بطيني

رحال اتيه النجم وانت التدليني

وياك اضيع العمر بسكون تلكيني

يالشارد من الكلب
نبضة وخذاها العشك
فرها بشراييني

يابو اللكاط الصدك
مر خل اهزلك عمر
واكطفلك سنيني

مر يالعفت كلشي مر
بلكي الهوى من تمر ما يعثر بريتي

لفه شالك
زلفك اتبده اعله خدك
هوود وخليني احضنك
حضني تفصال اعله گدك
لاتصدلي بذيل عينك
اوگع بشهگات ظني وظني ظنك
يالرجت وچفوفي لساه ماحونك
ضملي بزلوفك مچان
تحت فَيي اذنك گمر حافي مشاك
اشتهت روحيي تچوچي حدر زلفك
تغمس ملوحة ضواگ
وتسكر بچاي الشتا ورصعة شفاك
منين ماجيت اشتهيك ووين مارحت اعتنيك
وامنيتي اعله خدك انچفي زواگه
وتماشيني عمر بس شوف
وارسم موعد بـلٓا ايد بلكت بيه نتلاگه
ونتلاگه
وضوه الفانوس مشراگه
واطفي اخر جكاره من الهوه المتعوب
واحط عمري خفت مرطوب متوضي
وافييلك شجر اذار كله وياكبر حظي

الخ،،،،،،

ههـذا النص من كدما احبه اغار عليه من النشر
استمتع

شاب معاق يصف حالته منذ ولادته لحد العشرين عام

من حضن امي.. كبل للكرسي اجيت
ما سمعت ال (فدوه لله) ويمشي كام

اتكسرن خطواتي واحساسي بصباي
الكاع صخره وجانت الخطوات جام

وسجلوني بصف الأول واستحيت
الروح احسها تفرفح من اسمع قياام

وابجي كل رفعة علم يوم الخميس
فشله اكعد..والعلم بالساحه كام

بالمرايا امنيتي اشوفن طولي يوم
سنين اباوع طولي بفراشي من انام

وأملوني..الباجر واصبر بقيت
وباجر أتأخر واجن عشرين عام

وكامت الأيام تمشي وما مشيت

وانه والكرسي عشت قصة غرام.

منو يرضه الطير مكسور الجناح
والسمه گبال ايده غصت بالحمام

ربي گعد حظي بلكي اكدر اكوم
ربي بس قطرة ضوه بحلگ الظلام

خطوة وحدة امنيتي امشي بأي طريق
حتى لو للمگبرة لوادي السلام

واحسد المشايه راحوا للحسين
وابچي عالحسين مدري اعله الجدام

الشاعر حسن الشيخ هادي

**ولو تعبان بس ايام وتعدي
الـ أمه بغُرفه الأنعاش
ماسَهران مثلي وخايف بگدي
چا ينسون ذيج ايامنه الحلوات؟
بأول زله من عندي
اوصلهم جنت لبيوتهم بليل
وارد لبيتنه لوحدي
ارجع من وكت ماجنت متعود
شسو بيه خلوني على طبت
بيتنه اتلفت ومتردد
مثل اليطب اول مره للتوقيف
حرت بروحي وين اكعد
وعكب ذيج المواقف كلها والونسه
عرکت بیت کوه اطلع کمت هسه
واحب اكعد لوحدي هواي
وليكعد لوحده هواي ما ينسه
ترا الكدامكم خاسر هواي اشياء
واخر شي خسر نفسه .

جاسم محمد**

إذا مو طن عرگ يوگع من الگصه
تحلم تعبر اعله ارياگنه الگرصه
خبزه وبالحلال وكوه مقتنعين
مومثل اليدور اعلى الذنب فرصه

الشعر شي ثانوي زلمه انا ابن فلاح
مو جفنه الشعر من يطول نكصه
وعزوبيه عدنا بكلشي مو بالزاد
اضربلك مثال وركز بنصه

سير عدنا ضيف وسال عالشط وين
صياد ويريد من السمج حصه
مشى بسنارته وصاد ورجع بالخير
وابونا اباب ديوانه القلق رصه

سأل على الضيف صاد السمج لو ما صاد
اي بويه واذا ما صاد شلقصه
گال الله رحمكم والله لو ما صاد
چان أطفالكم خليتها بشصه

الشاعر كرار الگاطع

بما إنك عظيم وتگدر لكل شي
سبحانك بعد ما بي حيل امشي
‏
ما عايش ولا لحظة
منو غيرك يرد الراح
واليخسر منو يعوضه
‏
اجيت استغفرك وأدعيك وأتوضه
واصليلك لحد ماترضى يامولاي
اذا ماترضى .. ما ارضى

نسيتك والتهيت وركزت بالناس
واحد ذبني عالثاني
منو غيرك تلكاني

لوتلتم شياطين الانس والجن
بعد مايهتز ايماني

متندم لان عفتك
هو انه من اذكرك گلبي زين يصير
يعني شلون اذا شفتك

سبحانك يرب سبحان اليوصفك
اعرفك
لو قفلت الدنيا مايفتحها بس چفك

مامرتاح
بس همزين مامرتاح
لو مرتاح ماعرفك

حسين السلطاني

مابين الدمع والخد
موضوع انفتح وانسد
واحساسين مختلفات
گلب ابيض
وحب اسود
والف نعلى على ذاك الجابلي الغربيل
من يوم اللزمته وما بقالي احد
چان الشك چبير بشبچة الصياد
بشر يومية يوصل للسما وينهد
ولان خجلان منها اكتبها
بس ماگول
عمت عين الرسالة الماتحصل رد
واتعب
والزرع گبل الحصاد يموت
سبع حبها وخطبها التحق واستشهد
وأقر واعترف واشهد
اكبر مرض عندي القلق والتفكير
واكبر امنياتي اعترض واتمرد
واقر واعترف واشهد
واذا تارس غرفتي شفادني الدخان
اذا هي المشاعر بالگلب تبرد
وبعد مابية حيل الضحك والتمثيل
صرت واصل قناعة الدنيا مو مشهد

مايكم بيمن تلهى وصار غيمة
غيمة صار سنين عطشانة بزعلها ..
واحنه ريج طيور مسجونة بحياطين الحكومة
ما مطرتوا حتى لو نص الدرب يم المناير
جان شفناكم مطرتوا
هلبت الربح البعيدة تجيب گطرة حيف منكم ..
هلبت اطويرة غريبة اطيح يمنا امبللة بزفة عطركم
خاف مو غيمة ومشيتوا برأي غيمة
خاف مريتوا بسراديب العفه وطحتوا ونسيتوا
منين تحجون لمشيكم
خاف غيمتكم بـﭼـيكم
خاف ماخليتوا عيد يراهن شموعه بنذركم
خاف لفيتوا القطارات التضل بيها الرسايل
جوه رجلين السكارى بعلك جندي
وخاف انتم هذا الصياح البقى براس القطار
ماعرفناكم عليمن در حزنكم
مره تلبسكم صناديگ الستاير
مره تحجون الهوى بشباج خايف تنكسر جامة ونلمكم
كلها منكم ..!
صرنا نتلفت رحى ونطحن عذركم
رايجة البسمة بشفايف مشتهاكم
واحنه دمعة ليل مشدوهة بنجمكم
ردنا نتسوگ عصارينا ونجيكم
مالكيناكم سكتنا
وبگنا ثوب غروبكم من طيب خاطر
حتى تنشافون عصرية أعلى فيّ
متاني رشة ماي منكم
وردنا نختل جوة هَوية انشالت اتراب بقهركم
ثاري حتى بـ أوفكم ما حَسنا دمكم
ليش بعتونا لمع دنيا لشذركم
ليش سويتونا كسرة عين سنبل
ينتجي بضيمه أعلى سدكم
اه من اعمارنا الما منها ظنّة
وانتم بهلهولة تزهي لايگة لبيبان سنكم
فرّوا بينه هواي فرتنا السنين وعايشين
ما عبرنا الگنطرة وعفناها تستاحش مشينا
راجعين ..
للشعر، للخوف، للشم، راجعين
احنه بوسة توّة صاير
تفتر الدنيا أعلى امه وتوّة صاير.. راجعين
مايمض بينا التعب لـ اخر عشگنا ..
ونضل سولة مستحين
ونضل سولة مستحين

عباس الغالبي

تهت والمستحة بروحي
أدور وين ما بيه بگايا إرماد
وأتوسد على جروحي
وأفزع چلمة التنگال
توگفلي بوجه نوحي
وأداري الآه هلبت
من عيون الناس أداريني
وألاگيني وحيدة هم
وأختل بيني وبيني
شنو ذنبي
وحرمني الضيم عشريني ؟
شنو ذنبي
وحرمني المسج والحنة
وعلى جروحي يتچيني ؟
أعيش إلمن ؟
وأموت بـ ليش !
آنه أصلاً ضمير الناس موتني ميحييني
آنه بلا ظفيرة وشوگ تشعل ظلمة سنيني
آنه بلاية غير الـ هم
يوميلي ويواسيني
وتهت ما بيني وبيني
اتوچة اعله طاري الشوگ
من أتعب واسليني
وأشهگني نفس محتاج
مامش رية تشريني
وأتخايل الجنة بعين
خنگت كل ضحك بيه
وأتوچه اعله آهي النوب
بلكي تعيني شوية...

وجدان النقيب