لە دەرگانەیەکی‌تردا

من بە پرچی درێژمەوە
درەختم.
درەختێک لەو دارستانەی
لە پێگەیینی جادەکاندا
لەبیر چووەتەوە.

لەبیرچوونەوە کۆتاییە
هەموو کۆتاییەک دەسپێکێکی نوێیە و
چ دەسپێکێک لە ئێستەی مندا،
"با"یە!

لەمێژە لەو بەرزاییانەدا گورگێک دەناسم
هەرچەن ئەو دەزانێ
گشت شەڕەکانی جیهان بۆ تەنیاییە
کەچی دیسان لە بادا
ڕووەو مانگ دەلوورێنێتەوە.

بەرزاییەکان
مانگ
با
دارستانێک و
دەرەختێکی کەونارا
کەوا بەردەوام لەو بڕوایەدایە؛
ئێمە لە گەورەبوونی جادەکاندا
بە کۆتایی دەگەین.

ــــــــــــــــــــــــــــــــــــــــــــ

@baranstani1

خزم
سەید عەلی ساڵحی
و: پاشای باران

هۆ هاوڕەگەزی تەریکی من
بەم زووانە
حەوت دەریا
بۆ سەردانت دێن.

ئێمە
لە  تاریکیا
تۆ
بەتەنێ جێ ناهێڵین ئامۆزا!

هۆ ئامۆزای بەرخۆدانەکان!
بەم زووانە
زیندوو بۆ ڕەشماڵی هەنار و ئاوێنە
دەگەڕێیتەوە.

جارێ دوا سترانی حەوت دەریا
شاراوە و لە پەردەدا
بچڕە!

دوا ژوانمان
ورینگەی بێبڕانەوەی ژیانە،
تەنانەت لەسەر گڵکۆی ڕێپێنەدراوی مردووان.

ــــــــــــــــــــــــــــــ

@baranstani1

ئەو ڕۆژە ...
سەید عەلی ساڵحی
و: پاشای باران

دەیانکوت ڕووداوێکە کە کەوتووە،
کەوتووە.
لێکەوتووی بێگفتولفت
هەناسەی دەکێشا هێشتا.

چووبوون کولینگ و پێمەڕە بێنن
یەکێک هەر دەیکوت:
خوا کا باران دانەکا.

نێژراوی هەزار پەژارە
هیچ هەستێکی ئەوتۆی نەبوو،
نە یارمەتییەکی دەویست
نە ناڵەیەکی چکۆلەش تەنانەت،
هەر بەتەنیا چاوانی
زیندوو بوون هێشتا ...

بەرد،
خۆڵ،
خەڕواڵ.

هەر ئەو کەسە کوتی:
ئەوەی  پێی دەڵێن زیندەبەچاڵ ...
هەر ئەمەیە!

کرێکاری نێژراو
لێمانی دەڕوانی،
دەڵێی دەیزانی
لە کڵگۆی نان و هیوا
ڕێی دەربازبوونێ نییە.

من دڵنیام بووم
ئەویش
لە مەرگی
دڵنیا.

نە شارەوانی
نە ئامبوڵانس،
نە فریاڕەسێ لە ڕێگا.

نەوت،
ئینگلیزییەکان،
M.i.s
وە کۆمەڵێک داماو
وا لەبەرخۆوە فاتیحایان دادەدا.

*لەنێوان ڕێگای ماڵەوە هەتا قوتابخانە، سەرەتا گوێم لە دەنگی ڕمانی دیوار بوو، دواتر هاتوهاواری خەڵکی. دەیانکوت یەکێکیان بووەتە گڵکۆ. بەڵام خەڵکی دوودڵ بوون؛ سێ کەس بوون. ئەی کوا؟
هەر تەنیا کرێکارێکی نێوانساڵ هەتا شان دیلی هەرەس، زیندوو بوو هێشتا.
لە ونبوونی پەرتووک و پەڕاوم دەترسام، لەنێوان خەڵکی دەمبەهاوار، بەدانیشتنەوە، بە خزکەخزک هەتا لای ئەو کەسە چەوساوەیە خزام. چەنێک لە باوکم دەچوو بەڵام ئەو نەبوو.
پاییزی۱۳٤٦ی هەتاوی بوو مەسجد سولەیمانی نەوتاوی ...

ـــــــــــــــــــــــــــــــــــ

@baranstani1