📜 القصيدة: گوم وياي
🎤 أداء: مسلم الوائلي
🖋 كلمات: عباس طالب السعيدي
~~~~~~
يحسين اگعد رد وياي
وهناك اعطش وشرب ماي

خل نرد البيتنه ونلتم سويه
مو حبل يحسين خل ايدك بديه
يا خويه .. يا خويه
~~~~~~~
جيت بطلب ليك
بي اقسم عليك
وخر التراب من الگبر ونفض عباتك

والطاحن هواي
گوملهن فياي
ركضن سوه وحتارت الگاع ابناتك

جيناك كل احنه سبايه
نبدل الحصيره بالعبايه
والباقيه من حرگ الخيام
يحسين سويناها رايه

يالمذبوح عليك انميل
كون اترد مثل اسماعيل

هاي اول مره احلفك بالخويه
مو حبل يحسين خل ايدك بديه
يا خويه .. يا خويه
~~~~~~~
خل نلتم اخوان
ما بينه عطشان
يا ميت ومايك عدل والله هظيمه

يالثوبك تراب
جبنالك اثياب
يالطشروك من الخيم لآخر يتيمه

الناگه لو بيها محنه
يحسين ودتنه لهلنه
بس هيه هم مثل الخرابه
كلساع بالبر طيحتنه

يحسين اول ما عفناك
مثل ضلوعك طحنه وياك

ونشلع گلبي وي ترجية رقيه
مو حبل يحسين خل ايدك بديه
يا خويه .. يا خويه
~~~~~~~
ما تگعد شلون
وانه اختك ام عون
مثل الشمس وجه وگفه مشتعله روحي

الما يگدر ينوح
من گلبه مذبوح
صاحتلي حته المگبره وگالتلي نوحي

يحسين والناس بغربتي
سئلوني جم مره ركضتي
بالغريه اكثر شي هظمني
من ابجي ويگلولي سكتي

يله امشينه لذاك الليل
لا بي نار ولا بي خيل

كون أردن لا غريبه ولا سبيه
مو حبل يحسين خل ايدك بديه
يا خويه .. يا خويه
~~~~~~
الخنصر لگيناه
والراس جبناه
بس الضلوع مطشره ولمتها صعبه

وين ابجي ورتاح
والوادم اصياح
ما ميته من كثر العطش ميته انه غربه

گد ما رمل بعيوني الأثنين
ما ظل مجان الدمعة العين
لو تگعد تگابلني مگبل
لو للخرابه ارجع يالحسين

راسك جبناه حته انروح
خل نعتبرك ما مذبوح

اسمي بس تگوله يرجع كلشي بيه
مو حبل يحسين خل ايدك بديه
يا خويه .. يا خويه
~~~~
انته انسه الخيام
وانسالك الشام
ونرد لهلنه بلا سبي والحادي عباس

لا هزل النوگ
لا ندخل بسوگ
ديرتنه ما بيها ركض وتباوع الناس

لو أيد ابو فاضل بدينه
جا والله ما ضحكوا علينه
لو ندري مو ترفه الحصيره
جا جبنه تابوت من اجينه

يل نص جسمك ما مدفون
ومطشر دمعات عيون

ردتك اتگابلني وتسولف عليه
مو حبل يحسين خل ايدك بديه
يا خويه .. يا خويه
°°°°°°°°°°°°°°°°°°°°°°
@MuslimAlWailli313

https://youtube.com/watch?v=gZiuDZWXKaM&feature=shared

https://youtu.be/xnYMT5gu_kI?si=QGFMnKdmo4FLU1_p

? القصيدة: وين الضعن هاليله
? أداء: مسلم الوائلي
? كلمات: ابو حميده الشويلي
~~~~~
حسين آه ... حسين آه
~~~~
يا گلب .. انعه الحسين وحاله
يا گلب .. للغربه شد ارحاله
بس غصب .. من گاعه شال

بالضعن .. عباس اخوه وولاده
بالضعن .. بيرغ يرف للساده
من الوطن .. يمشي الدلال

ونين ... ليلة ونين
طلع ... ضعن الحسين
مشه ... ضعنه جروح

نزح ... من البلاد
گصد ... لأرض السواد
وترك ... طفله تنوح

عاف العليله بظهره تناهد
تومي بديها ويعله ونين
يا بويه وين بضعنك رايد
ارجع دخيلك بويه حسين

رفعت اديها وصيحت
نيتها وين ضعونك
والناس لا حظ لا بخت
خافنهم يذبحونك
~~~~
يا حسين .. وين الضعن هاليله
يا حسين .. متوكل ارد امشيله
وأرد اصيح .. اهلاً حسين

الديره جاي .. ما بيها يتلگونك
الديره جاي .. كل همهم يذبحونك
للسلب .. متحضرين

أبد ... ما تلگه أبد
نصير ... بهالبلد
ولا ... گطرة ماي

غيور ... ماكو غيور
تدور ... دنيه تدور
عليك ... يا مولاي

محد يرحمك وانته رحمه
وياهو الخواتك من اطيح
اگبالك يركضن كلهن حشمه
وادركنه خويه كلها تصيح

بهالديره لو تعطش
ولا واحد يرف دلاله
ولمن تطيح بكربله
تركضلك الخياله
~~~
يا ضعن .. هسه شحلات اللمه
يا ضعن .. عطر الكفاله يشمه
برايته .. يحوم الكفيل

والخيام .. ماظن يظلن باجر
والخيام .. حدهن صباح العاشر
والنياگ .. يصيرن هزيل

علم ... عالي العلم
وخيم ... عدهم خيم
وأخو ... رايح راد

حرام ... والله حرام
تطيح ... هاي الخيام
تصير ... كلها رماد

عدهم كفيل وعدهم رايه
وفوگ الضعينه يرف الطير
باجر تسلبهم غزايه
وبالهيمه تگعد بت الخير

الگضت عمرها مدلله
ومن تحجي توگف كلها
باجر تميل بكربله
ومحد يجي يعدلها
~~~~
كربله .. ما تلگه ناصر بيها
كربله .. بس الهظم تاليها
والحمل .. كله عليك

اعتذر .. ما اگلك ارجع لكن
اعتذر .. هذا البلد مو آمن
لو طحت .. ياهو يجيك

حرگ ... صار الحرگ
وصرت ... جوه السحگ
وتون ... من الخيل

وبجن ... ياهن بجن
بنات ... ام الحسن
الولا ... شافن ويل

طلعهن من الخيمه افراگك
رادن يشوفن حاله شلون
تلاگن خواته شلون ملاگه
ويه الغرب والدنيه عيون

الما طلعن بهذا العمر
من طاح طلعن كلهن
ومن يمه راحن للقصر
ومحد لحگ رجعهن
°°°°°°°°°°°°°°°°°°°°°°°°
@MuslimAlWailli313

? القصيدة: طلب واحد
? أداء: مسلم الوائلي
? كلمات: علي الأكبر الغرابي
~~~~~~
سامحني بس هيه المشاعر
للطف تريد وياك اسافر

واشوفك بالعيون
حلم كون حلم كون
للطف تريد وياك اسافر اسافر
~~~~~~
علمني احبك عالفطره 
عطشني يم باب الحضره
راويني من عندك نظره
... من اضيع

سويني لو رايد غيمه
وبديني ماي اعله الخيمه
حته اشعر بذيج الهيمه
... من اضيع

خلني بظهر عاشور بعيونك اكبر
خليني اصير افياي لو جاسك الحر

ومد روحي اعله گدك وصلت افياي
واجيب من الشريعه المنحرك ماي
.. وگلك هاك اشربه

واذا شح الفرات اعصرلك العين
وبلل ثغرك اليابس يالحسين
.. وگلك هاك اشربه

وين الله وحلامي البعيده
تتحقق بهاي القصيده

وتسويني مجنون
حلم كون حلم كون
~~~~
امنيتي ما اشوفك تذبل
امنيتي زينب مو عالتل
امنيتي ما اسمع مقتل
... عليك

امنيتي لو يمك حاضر
وفزعلك بذاك العاشر
وما اخلي يسحگ كل حافر
... عليك

ما اخلي كلشي يدوس يالغالي صدرك
ويتبده يا مولاي عمري اعله عمرك

مره وياك فازع مره لأم عون
وامسح دمك الجامد بالعيون
.. وشاگف ابقه دونك

اخذني شما ردت من هاي الأحلام
ودرع سويني بيدك عن الإسهام
.. وشاگف ابقه دونك

سويني بيدك كلشي رايد
بس عندي يمك طلب واحد

اصيرن عبد جون
حلم كون حلم كون
~~~~
هيه امنيات واتمنه
تسويني للقاسم حنه
تحسبها عالعاشگ منه
... أموت

جرح العشگ كلما خضر
امنيتي بعيونك اكبر
اتمنه من دون الأكبر
... أموت

وين الله اموت وياك والدم خضابي
وفدوه العلي وجسام عمري وشبابي

سالم كون الأكبر وانه مذبوح
ولا من ذيج روحك تطلع الروح
.. يم باب المخيم

وثوب العرس كون بطول جسام
وكون اتزفه لامه مو للسهام
.. يم باب المخيم

انه التمنه وراد مره
مذبوح بالطف كون نحره

واحامي اعله الضعون
حلم كون حلم كون
~~~~~
امنيتي اصير شما بيه
حارس خيام العلويه
ومره العليلك عوجيه
... أصير

وعبد الله من يعطش مره
اتبده ماي ابفي ثغره
خليني درعك عن نحره
... أصير

بدرب السبي يحسين كون انه حاضر
ما اخلي عين تلوح طول الحراير

حلم كون انسبي ويه اليروحون
وشاگف عن بناتك ذيج العيون
.. اخذني وياك اخذني

وعله ذيج السياط افزعلك امتون
وما تعثر الناگه وتوگع ام عون
.. اخذني وياك اخذني

بدرب السبي تصير النهايه
وانطگ واطگ دون السبايه

وشاگف عن ام عون
حلم كون حلم كون
~~~~~
هو العشگ لو ما انته
لو ما دمعتك راسمته
مذبوحه بالطف سالفته
... اشوف

ولو ما هواك الأشتمه
وخوفك علي يا ابو اليمه
ما عايش بهاي الخدمه
... اشوف

انه ادري لو ما جان خوفك عليه
جا گتلي گوم وياي للغاضريه

يامه ويامه يم بابك تمنيت
وانته الخاطري جم باب سديت
.. تخاف عليه اشوفك

ما رايدني اموت وياك عطشان
تسترني بثيابك وانته عريان
.. تخاف عليه اشوفك

يم بابك بذيج امنياتي
تخلص ردت بالطف حياتي

وانه بهايه ممنون
حلم كون حلم كون
°°°°°°°°°°°°°°°°°°°

@MuslimAlWailli313

? القصيدة: جيب اليسكت عيوني الليله
? أداء: مسلم الوائلي
? كلمات: علي مالك الموسوي
~~~~
جيب اليسكت عيوني الليله
گلبي مابي حيل ذبحوا حيله
~~~~~
مره ورادت تستراح
وفوگها العباس راح
دايره الدنيه اعله اخوي
مات ولكم كافي طاح

توه زحف والخيل غارت
كلها اعله واحد غاد دارت
اذبح وروح هناك صارت

ليش شمسوين شنهو الراده
ولازم تشلعون گلب الساده

ماكو واحد عدل حته احجيله
جيب اليسكت عيوني الليله
~~~
رايحه وما گال وين
وما گدر يحجي الحسين
يا ابنادم والله موت
ولا تفارگلك حنين

صعدت الناگه تريد مني
صعدني گوه الما عرفني
خويه الهظم والله كتلني

موش نفس الناگه هزله هوايه
وراح تمشي بضعني جم ولايه

علي بويه الحگني وانه دخيله
جيب اليسكت عيوني الليله
~~~~
طفله گعدت تشتكي
وشبعوا الطفله بجي
عمه اريدن راس ابوي
عمه مو بيدي الحجي

لهناك جابوا راس متعوب
وضاعت بزينب كل الدروب
اگضي الغروب يكضني الغروب

وين ماكو اركاض تلگه جدامي
ونسحگ فوگ الشريعه حزامي

يگضي من الذبح ويهد خيله
جيب اليسكت عيوني الليله
~~~
مالت الله امنيتي اموت
ولا بنص ديوان افوت
صاحوا عليه ومشيت
وما طلع العباس صوت

شافاهم يصيحون بينه
گام وتبدت يمه عينه
الحگ يبعد اختك علينه

راح نمشي بكيفهم مو كيفنه
كلها صاحت راح ناخذ حيفنه

كلها تبجي الما بجه يا ويله
جيب اليسكت عيوني الليله
~~~~
هاي آخر ليله هاي
ماكو اخوي وماكو ماي
متت وبروحي استحيت
شفت بعيوني الهواي

كلساع واحد جار سيفه
يذبح بالحسين اعله كيفه
ظل يصعد اعله التل نزيفه

خلصت ما خلصت حاجوني
كلها ماتت بيش وطلبوني

گلبي مابي حيل ذبحوا حيله
جيب اليسكت عيوني الليله
°°°°°°°°°°°°°°°°°°°°°°°°°
@MuslimAlWailli313

كل عام وانتم على حب علي وعلى دين علي .. جعلكم الله من السائرين على نهج علي والمشمولين بشفاعته

? القصيدة: بايعنه حيدر
? أداء: مسلم الوائلي
? كلمات: علي الأكبر الغرابي
~~~
بايعنه حيدر .. بايعنه حيدر
من كل گلب ولسان بايعنه حيدر 

الله وأكبر .. الله وأكبر
أذن صدى الوجدان الله وأكبر
~~
لو هو لو ما اريد يهتف ضميري
يوم الغدير يصير حيدر أميري
بجنح الفرح والشوگ يا روحي طيري
كل شيعي كون اليوم يصبح غديري

بعيد الله الأكبر .. حيدر
الما بايع حيدر .. حيدر
من حوض الكوثر .. حيدر
يحلم باجر يتهنه

فاز وتصدر .. فاز وتصدر
كل عاشگ و ولهان فاز وتصدر
~~
شال ايده طه وصاح كلمن يريده
حيدر خليفه يصير خل يرفع ايده
واحنه اعله ذاك الصوت صحنه بعقيده
كل عاشگ المفروض حيدر نشيده

الما راده الأول .. حيدر
من دينه شحصل .. حيدر
يقبل ما يقبل .. حيدر
ما يوصل باب الجنة

عالأمه نفخر .. عالأمه نفخر
جي عدنه هيجي انسان عالأمه نفخر
~~
خلو عليها اشكال شرعي النواصب
هالبيعه للكرار مو إلا واجب
واحنه اعله نفس الراي واحدنه كاتب
ما تعله هاي العين فوگ الحواجب

الما سامع هايه .. حيدر
خل يقره هوايه .. حيدر
مضمون الآيه .. حيدر
حيدر أول مو غيره

هالآيه مصدر .. هالآيه مصدر
مذكوره بالقرآن هالآيه مصدر
~
للأمه مصدر نور شمس الولايه
وللبيعه هذا اليوم مرفوعه رايه
حبينه والحب جان رمز الهدايه
حبنه العلي الكرار مابي نهايه

مكتوب بعينه .. حيدر
بس حيدر دينه .. حيدر
كل عاشگ بينه .. حيدر
بس حيدر تاج براسه

يوميه يكبر .. يوميه يكبر
حبنه العلي شما جان يوميه يكبر
°°°°°°°°°°°°°°°°°°°°°°°°°°°°°
@MuslimAlWailli313

? القصيدة: غضب حيدر
? أداء: مسلم الوائلي
~~~~~~~~
الموت من مايك شرب
انته عباس الغضب
يبو فاضل يبو فاضل
~~~~~~~~
كلشي يختل من تهد
الحره تفرح من تشد .. بالغاره
اهدم جروف الشريعه
وزف يكافل للوديعه .. ابشاره
من تطب بالحومه فرع
صيح حرگ الباب اطلع .. ثاره
غضب حيدر بي صبه
الموت الاحمر انته ربه .. وناره

بأمرك يصير الهوه بجفك يلوگ اللوه
يبو فاضل يبو فاضل
~~~~~~~~
ضاگت الگاع بأهلها
مالت الحومه وعدلها .. بطاسه
عليك جبرائيل صله
ببو فاضل يفزع الله .. الناسه
توسط الحومه وتربع
جيش حدر اجدامه يركع .. راسه
الدنيه تخضع يم اخوك
الكون كله بكيف ابوك .. انفاسه

بكيفك وكلشي بديك محد اليامر عليك
يبو فاضل يبو فاضل
~~~~~~~~
صولتك بيها الملوحه
اليدنه يمك ينسه روحه .. بسيفك
خزرة عيونك طعان
جفوفك اتدير الزمان .. بكيفك
خيلهم ذبت زلمها
گطعت حته رشمها .. بحيفك
بسدك العياله تختل
الموت مرات انته يدخل .. ضيفك

رايتك راية هلك الفكر بذاتك هلك
يبو فاضل يبو فاضل
~~~~~~~~
ويجيب صينيه وشمع لام جاسم
ويسوي حنه وبيها تحضر هاشم
تعله هلهولة عرس للقاسم
يحضر العباس بيده الصارم
يهوس ويتلاگه ويه القائم
~~~~~~~~
يروح لزهره بعلم عباسه
يگلها يا يمه ويفيض احساسه
الكسر ضلعج إلا اكسر راسه
الحرگ بابج إلا احرگ ساسه
~~~~~~~~
يرجع العبد الله جايب مايه
وفوگ گاع الطف يمد افيايه
يوگف بنص كربله يدگ ثايه
وتلتم العيله ويسوي اقرايه
يطبر الهامه ويطيب الدايه
°°°°°°°°°°°°°°°°°°°°°°°°°°°°°°°°°°°
@MuslimAlWailli313

? القصيدة: راح العطر
? أداء: مسلم الوائلي
~~~~~~~~
حسين آه حسين آه
~~~~~~~~
هام گلبي وخذاني صوبه
وندور اعله ثوبه .. بس ما لگينه عطره
وين راح العطر يهيبه
بس گلي خل نجيبه .. ويظل بدينه ذكره
ليش مالك أثر يغالي
يا گمرة الليالي .. يا وسفه وذره وذره

ضاع الربه وطاريه
بالغربه جم علويه
والساحگ اعله ضلوعك
باگوني منك ريه
~~~~~~~~
خيل تركض علي وجيتك
بس خويه ما لگيتك .. محد يگلي وينك
آخ شفته وهظمني جرحك
متونس اليذبحك .. وانته شثگل ونينك
باگ خويه السحگ حلاتك
وطشرن بناتك .. ضاع الربه من ادينه

والناگه شربت لوني
يدفعوها ويطيحوني
نفس السياط الطاحت
بمتونك وبمتوني
~~~~~~~~
ضيم درب السبي شيشيله
وانه مره وثگيله .. متحيره وي عيالك
نار هاي الشمس رزيه
لمن تهل عليه .. اتمنه في دلالك
گوم شوف العبي الجبيره
شافتها جم عشيره .. معتازه بس خيالك

شيصيرن الما بيهن
گطرة هوه تمشيهن
درب الصحاري وشوجه
مايرهم الرجليهن
~~~~~~~~
خوف طر الفجر علينه
صوتك مشه من ادينه .. وصوت الذبح نسمعه
ليل ما يرهم العباتي
اركض ولم بناتي .. وبجفي ماكو شمعه
مات ذاك الضوه العليه
من ضيعت رقيه .. مات الضوه شيرجعه

مو بس رقيه الضاعت
جم طفله منك راحت
مو بس خدر صيوانك
حته التراجي انباعت
~~~~~~~~
باد حيل اختك وسبوها
وبجفها گيدوها .. بالسلسله الثگيله
شاب هد الضلع نحيبه
والوادم الغريبه .. تضحك عله الهزيله
شيب لمتهم اعله راسي
ما بيهم اليواسي .. حرمه بظهر عليله

وادم غريبه علينه
ولون الشرف ناسينه
خيرهم الشافانه
هز ايده يابو سكينه
°°°°°°°°°°°°°°°°°°°°°°°°°°°°°°°°°°°°
@MuslimAlWailli313