ВИЛОЯТ СОҒЛИҚНИ САҚЛАШ БОШҚАРМАСИ БОШЛИҒИНИНГ ТИББИЁТ ХОДИМЛАРИГА БАЙРАМ ТАБРИГИ
Ассалому алайкум, ҳурматли тиббиёт ходимлари, азиз ҳамкасблар, муҳтарам соҳамиз фахрийлари!

Аввало барчангизни бугун нишонланаётган – "Тиббиёт ходимлари куни" билан самимий муборакбод этаман. Ўз умрини элимиз саломатлигини асрашдек шарафли ва масъулиятли касбга бағишлаган сизларга аввало мустаҳкам соғлиқ, хотиржамлик, оилангизга файзу барака, фаолиятингизда улкан муваффақият тилайман!
Қайд этиш керак, мамлакатимизда тиббиёт соҳасини ислоҳ қилиш, энг аввало одамларни тиббиётдан рози қилиш давлат сиёсати даражасига кўтарилди. Буни биргина вилоятимиз тиббиёт тизимида амалга оширилаётган ишлар мисолида ҳам кўрсак бўлади.
Вилоятимизда ҳам бирламчи тиббий-санитария, тез тиббий ёрдам ва ихтисослаштирилган хизматлар кўрсатиш йилдан-йилга такомиллаштирилмоқда. Оналар ва болалар ўлимини камайтириш, касалликларга барвақт ташхис қўйиш, оилаларда соғлом турмуш тарзини қарор топтириш, аҳолининг тиббий маданиятини юксалтириш, ўртача умр кўриш давомийлигини ошириш борасида салмоқли натижаларга эришилмоқда. Тиббиёт муассасаларимизнинг моддий техника базаси ва кадрлар салоҳияти мустаҳкамланмоқда.
Мисол учун, яқинда Республика шошилинч тиббий ёрдам илмий маркази Жиззах филиалида маҳаллий бюджет ҳисобидан 700 миллион сўмлик реконструкция қилинган, барча замонавий шароитлар яратилган ангиография бўлимининг очилиши қувончли хабар бўлди. Эндиликда бу бўлимда 550 минг долларлик энг янги замонавий тиббий асбоб-ускуналар ёрдамида коронар ангиография, юрак томирларини стентлаш ва қон қуйқаларини олиб ташлаш, юрак стимулятори ўрнатиш ва бошқа тиббий муолажаларни амалга ошириш мумкин.
Давлатимиз томонидан соҳамиз вакилларини доимий қўллаб-қувватлаш, етарли иш ҳақи, муносиб ишлаш шароити яратиш борасида муҳим ишлар амалга оширилмоқда. Ҳар йили турли байрамлар муносабати билан кўплаб вилоятимиз тиббиёт соҳаси вакиллари Давлатимизнинг турли нуфузли орден ва медаллари билан тақдирланадилар. Жумладан, ҳурматли Президентимизнинг “Тиббиёт ходимлари куни муносабати билан соҳа ходимларидан бир гуруҳини мукофотлаш тўғрисида” ги Фармонига асосан Шароф Рашидов туманидаги «Мурувват» ногиронлиги бўлган шахслар учун аёллар интернат уйи ҳамшираси Бердиева Муқаддас Хасанбоевна - II даражали «Саломатлик» ордени билан, Ғаллаорол тумани кўп тармоқли марказий поликлиникаси патронаж ҳамшираси Артиқова Ҳулкар Акрамовна «Соғлом турмуш» медали билан, Республика ихтисослаштирилган онкология ва радиология илмий-амалий тиббиёт марказининг Жиззах филиали хирургия бўлими мудири Қобилов Ботир Закирович «Шуҳрат» медали билан тақдирландилар. Шунингдек, бир гуруҳ ҳамкасбларимиз “Ўзбекистон Республикаси Соғлиқни сақлаш аълочиси” кўкрак нишони, вилоят ҳокимининг фахрий ёрлиқ ва қимматбаҳо совғалари билан мукофотландилар.
Вилоятимиздаги қариб бир ярим миллион нафар аҳолининг соғлигига жавобгар бўлган тиббиёт тизимимиз олдида улкан вазифалар турибди. Ҳаммамиз ўз қасамёдимизга содиқ қолиб, муқаддас бурчимизни сидқан ва ҳалол бажарсак, албатта халқимиз биздан рози бўлади. Халқимиз рози бўлса ишимизда унум ва барака бўлади.
Сизларни яна бир марта касб байрамингиз билан табриклаб, шарафли фаолиятингизда улкан муваффақият ва зафарлар тилайман!

Махмарасул Дусматович Умаров,
Вилоят соғлиқни сақлаш бошқармаси бошлиғи