صح ما ادري منين ابدي بس راح ابدي
محد يخاف من الحياة بگدي
حاولت اوضح للبشر بس مافاد
محد فهم
بس الله يفهم قصدي
وهذا المرض لا شايفه ولا اعرفه
خنگة وصداع وذكريات ورجفة
والله اختنك والخنكة توصل للموت
بس محد يوديني للمستشفى
چان الهوا شكد عالي
بس ما يكفي
وردت ابچي
بس غطيت وجهي بچفي
والخنگة كبرت
والنفس مو مضبوط
وانكسر گلبي
وراد يكسر چتفي

ماتجين ؟
شهالگطاعة
ماتجين ؟
اني تعبان بغيابج
وانتي بالج مدري وين
كلشي بيا يصيح باسمج
وانتي مرتاحة بغيابي
واني حال الضيم حالي
انا افك ريجي بجكارة
وانتي ريجج مدري وين
ماتجين ؟
ماتجين ؟
وانتي تدرين بعشگنا
وحسب تقليد الضلوع الشبگة دين
وحيل مؤمن كلمن توضى بحبيبه
وكافر الماعنده دين
كل شبر بيناتنا يدردم حنين
ها تجين ؟
بية واهس سندباد
وذاك چتفة الماتعب من ياسمين
ماتجين ؟
شظل بعد والمن بعد تتأملين
انتحرت النجمة بسمانا
وطائر النورس حزين
ماتجين ؟
اليحب لازم يمر مرة بحبيبه
والمفارگ هم يهزه الشوك
لحبابة ويجيبه
وانتِ ماچنچ حَبيبه
ولا كسر كلبچ عذاب العاشگين
ماتجين ؟
عدنا شوك
وعدنا خاطر مشتريچ
مزاعلتنا ؟
وليش من عدنا العشك ماتشترين ؟
ها تجين ؟
ماتجين ؟
عاودوا كل النودهم
وانتي يمتى تعاودين ؟
يمتى يالفركاج سل
وينهش بريت السنين
انتي وين ؟
قلامي خلص كل حبرها
والمكاتيب شكبرها
وهو مو كل طير امين
ما تجين ؟

چان الهوا شكد عالي
بس ما يكفي
وردت ابچي
بس غطيت وجهي بچفي
والخنگة كبرت
والنفس مو مضبوط
وانكسر گلبي
وراد يكسر چتفي

اريدها انثى على هيئة عطر
امان عيناها خطر
والله اني قوي
بس يا جماعة
كدام عيونها ما ابقه ساعة
ومدري شلون كدرت تستحلني
گبال مرايتي خلتني اغني
كالوا فنك تكول انا ما اطيح
كلتلهم افا !
لا والله فني
وشيخلصها اذا حباها شاعر ؟
عليها يغار من كاظم الساهر
بصوته المو حلو يغنيلها تنام
ويشتاقلها ما يصبر لباجر
ما اغازلها مو قصة غزل
هاي الحقيقة
تفوت بشارع تگلبه حديقة
يبدي الليل من تحل شعرها
والدخان يسكت من عطرها
ومحد يدري عنها يا مواليد
هي الگمرة مانعرف عمرها
من باب الانوثة هي الاولى
ومن مشيتها اعرف هي لو لا
بكل انسان لولة هي لولة
مابيها ، اكتمال البدر هي

غبت
چا غير تشوفني شعندي ؟
ورسايل بالچذب ماتعرف تودي ؟
علمودك عايف العاف علمودي هواي
واجيت اجمع شتاتك واني متأذي
الليلة الروح هامت
والگلب بيه نار
وما چنها على خير السالفة تعدي
ادور على الهوا الغرگان هم مو هيج
واحر من كلشي حار الدمع البخدي
زيناتي بنهركم اكثر من الماي
على كل اليمرك چنت متصدي
چنت ماشي عدل
تخطيط گلب المات
وماخلاك وكتي وغيرك ضدي
وبديت اتغير اني
ومشى براسي الشيب
فترة وگمت احس شيابنا بكدي
واني ادري التجازه الزين بالموزين
ولكن سامحت من انعبر حدي
كلف واليمر ينطيه ماي عينه البير
ويشمرونه بحجر چيف انه متهدي
حنين اسگي بورد مرسوم ع الحيطان
واركض باليطيح وحالي متردي
بس منا ورايح راح اعلم الروح
ماخلي واحد يگعد بسدي

نزعل بچفة
وماتردلي بچفة !
اليوم ارد اهج
والعب لعب واتحفه
اليوم الهضيمة البية
ماخذلك شيخ گدام حاشيته
على بوگه تحلفه
وصلت روحي انطرد وارجع ؟
وسفة
جنت على هاي الضفة وتحبني الناس
شدوهن عيوني ورحت هاي الضفة
هذا اليسافر وين ما صحت گاع
من البيت صاير هسة للمستشفى
وصلت روحي انطرد وارجع ؟
وسفة
من طرف واحد صارت بليلة ويوم ؟
يالماتعرف الكلفة هاي الكلفة
خاب اني من ازعل وانت الغلطان
انطيك ظهري ورگبتي ملتفة
هاي المشاعر لا تكلي الصدفة
تلاگينا بس محد على الثاني اندار
هوسة جنازة گبال هوسة زفة
مكسر غراض البيت مو من اعصاب
شلزم بيدية يطيح من الرجفة
خشنت گلبي يابو خدود الترفة
صارتلي عبرة وتبت من امثالك
ومبرية ذمتك لا يظل ببالك
انا الخسارة البيها تطلع مديون
ماينترك خايب المثلي شمالك
مرات نعمة ربك تصير انسان
تعافيت ؟ هاي النعمة ما تبقالك
چا تنسى ذاك العاف چادر منصوب
ومن شافك مغندب اجه وغنالك
خليتني اندم وانلچم بس والله
باچر الكسرة تبين على خيالك
المهم شفتك والخدود موردات
عكس الصفار بوجهي
هيج احلالك

تريد تبچي ؟
أبچي لچن نصي صوتَك
تريد تصرَخ ؟
أصرخ ولِم الطوايف
ياهو يمّك ؟
ياهو راح يشيل حِزنك ؟
أقتنع بالقاسمة الله
مَحد لحِزنك حَزين
نام يالمتعوب وحدك

اثاريها الظنون تخيب وتخيب .

عندي جروح بس حسيت
جرحك يختلف كله
من شفته فراغك ضال
بس ردت افهم العلة
بس تالي عرفتك ليش
سوت روحتك خلة
فرزتك من اصابع ايد
الهم بالشبه قلة
يسألوني واگلهم راح
لكن ما اخذ ظله
يا اول واحد من يضيع
من ضي هيبته اندله
وراك جفوني بيها اشكال
كدرت دمعتي تحله
على شوفك حفرت العين
هلبت بيها اثر خله
صورك يدرن شكد صار
عايش بيهن اتمله ؟
من اسألهن اشوفك وين
يتنادسن شنگله ؟

كون الگلب ينعت واعته
واشلع ضلوعي وياه ستة
لو ينمرد بيدي مردته
وزتت حطب للنار ازته
الصوج بية استاهل انه
لساني ماجريت اذانه
كون الوجع اندل مچانه
اچوي ولا احمل مهانة !
ريت الهوا مگطوع ريته
ولا انطرد من باب بيته ..