أعظم نعمة ممكن أن تحصل عليها❤️
صباح الخير✨

لو في حاجة نفسي اعملها بحُب للي قدامي بس حاسس إنها مش هتتقدر مبعملهاش حتى لو كانت حاجة بسيطة..
والحمدلله إني اتعلمت ده.

ودا ببساطة وصف لفكرة متبقاش "مُسرف" في العطاء حتى لو كانت دي من صفاتك الحلوة لأن مش أي حد يستاهلها
ومتعملهاش غير للي "يقدرها".

في رواية: لا تستيقظي ⚠️

بتبدأ الرواية مع شخصية "أليكس" اللي بتلاقي نفسها مقيدة في سرير بغرفة غريبة قدامها أدوات طبية وحست بشخص بيلمسها لمسات مش طبيعية.

والغريب في الأمر إنها لما بتفوق وتلاقي نفسها فالمستشفى بتتفاجئ بكل اللي حواليها بيقولولها إنها عملت حادثة وفي غصن شجرة وقع عليها مما أدى إلى إصابتها بالارتجاج.. ومحدش مصدق قصتها لما قالت إن في شخص قيدها وتعدى عليها وإن دا تأثير اصطدامها!!

الحادثة اللي أصابتها بالتروما ولأكتر من سنة فضل خوفها مستمر من الشخص المجهول ده وهي حاسه إنه بيراقبها وممكن يظهر تاني في أي وقت، وبعد كده بتلاقي نفسها قدام سلسلة من جرائم القتل اللي هي بشكل ما بتلاقي نفسها طرف فيها،
واصبحت محط اتهام بالنسبة للجميع ومحدش مصدق قصتها وبقوا شايفين إنها بتدعي تعرضها للحادث ودا بيخلي الشرطة بتبدأ تلاحقها!

"أليكس" هتعمل ايه علشان تثبت عدم تورطها بالجرائم دي، وتثبت حقيقة إن في شخص تعدى عليها جسديًا ومتعمد يدمر حياتها؟
دا اللي هتعرفه أثناء قراءتك لواحدة من أجمل روايات القتل المتسلسل واللي مبسوط إني بدأت بيها ٢٠٢٥ 🌟

ما زلت انسى أن لحظاتنا قد مرت..
حاليًا، ليست المسألة هي العثور على من يحلّ مكانك؛
فهي حرب قد خسرتها مسبقًا
لكن المحاولة إبقاء لحظاتنا معًا حية.

مفيش شخص بتُعجب بيه بيفضل جميل زي اليوم الاول اللي أنت بتشوفه فيه، لأن دا مبيبقاش هو، إنما دي عينك اللي كانت مطلعة قلوب شويتين تلاتة اربعة

يعني حتى الاشخاص دي مضحكتش عليك، أنت اللي سوحت نفسك من البداية بدون ما تتمهل.

العصر الحالي بقى قايم على التطلع..
ريلز بتطاردك في كل حتة.. عربيات وفسح وشهوات ملهاش آخر.

مقصود إنك مهما وصلت تفضل متضايق وحاسس إن فيه حاجة ناقصاك.. تفضل تجري ورا حاجة وأول ما توصلها تنساها وتجري ورا اللي بعدها.

وبالتالي مش عارف تقدّر النعم اللي معاك وقد إيه انت ممكن تبقى سعيد بيها..
علشان كده محتاج كل فترة تقف شوية وتفكر في إن اللي معاك محتاج تحمد ربنا عليه لأن غيرك بيتمناه..

وتفتكر نصيحة ربنا سبحانه وتعالى لسيدنا محمد(ص):
"ولا تمدن عينيك إلى ما متعنا به أزواجًا منهم زهرة الحياة الدنيا لنفتنهم فيه ورزق ربك خير وأبقى".

خاطرة الفجر?

المشكلة بقى عندك الوعي الكافي اللي مخليك مش عاوز تاخد أي خطوة تجاه حاجات كتير نفسك فيها، ولأنك بقيت فاهم إن الأشياء ليست كما تبدو؛ وكلها اصبحت تتقن فن التلاعب.

اسمحلي اكلمك في سطرين كده عن كتاب حبيته من أول ما بدأت فيه لدرجة إني أخدته معايا في خروجاتي مع اصحابي..

وهو كتاب "عقل يحترق" اللي بيخص في محوره الأساسي اضطراب الوسواس القهري والتفكير المفرط والمعاناة الداخلية لأصحاب التفكير الزيادة عن اللازم والمبالغ فيه في كل حساباتهم التي تكاد تكون على أتفه الأمور..

في رحلة إعادة تشكيل الوعي حول فهم الوسواس القهري، والتعافي منه بحلول داخلية في المقام الأول ممكن تساعد نفسك بيها لو قدرت تركز مع النقاط المذكورة بالكتاب والتعامل بشكل كويس معاها..

أوقات دماغنا بترهقنا من شدة التفكير في الأمور خاصة في الزمن المضطرب اللي إحنا عايشين فيه حاليًا بقى كل شيء ليه تأثير علينا داخليًا وبياخد حيز من تفكيرنا..

في رحلة سلسة جدًا بقلم د. رانيا مؤلفة الكتاب واللي حابب أشيد بيها بصراحة لبساطة تقديم المعلومة القوية في نفس الوقت وغير معقدة في
فهمها، فدا كتاب بمثابة صاحبك..
بداخله الحلول إزاي تقدر تفهم طريقة تفكيرك وإزاي صوتك الداخلي المزيف ميبقاش ليه السلطة على الصوت الحكيم اللي عارف الصح ولكن للأسف قلما أجادنا الاستماع إليه لأننا تعودنا على الاستماع اكتر للصوت القلق، المهزوز اللي دايما بيخلينا عايشين في ضغط وتوتر وتفكير مفرط أحيانًا بدون داعي..

كتاب "عقل يحترق".
عن ما يخص أزمة التفكير الداخلية والوسواس القهري وكيفية التعامل معه بطريقة صحية سليمة.