https://youtu.be/hRQWc_47kgE?si=EYoZWYk8a5o80pkQ

Assalomu alaykum va rohmatullohi va barokatuh.

Xayrli tong, azizlarim.

Zamonaviy tibbiyot tanamizdagi ko'pgina kasalliklar og'izdan kirishi, ya'ni noto'g'ri ovqatlanish tufayli bo'lishini bot-bot ta'kidlamoqda.

Bir ming to'rt yuz yil oldin payg'ambarimiz alayhissalom tanadagi bir parcha et - qalbning buzilishi butun tananing buzilishiga, uning isloh bo'lishi butun tananing isloh bo'lishiga sabab bo'lishini aytib ketganlar.

Qalb qotishining sabablaridan biri ham ko'p yeyish, xulqning buzilishi, xotiraning pastligi, ruhning kirlanishi esa og'zimizdan kirayotgan luqmaning halol yoki xaromligiga e'tibor bermasligimizdan ekan.

Umuman, barcha muvaffaqiyatlar halol luqmadan boshlanar ekan.

Avvaling xor bo'lsa ham oxiring xor bo'lmasin, deyilganidek, Alloh ta'olo barchamizni halol va xaromni farqlaydigan zakovat sohiblaridan, xarom luqmadan saqlanuvchi taqvo egalaridan qilsin.

Assalomu alaykum va rohmatullohi va barokatuh.

@tarbiyachi_blog

Assalomu alaykum va rohmatullohi va barokatuh.

Xayrli tong, azizlarim.

Yoshligimda bir radio kanalidan eshitgan hikmatim hech esimdan chiqmaydi:

''Sizga parvo qilishmayaptimi?
Parvo qilmang.''

O'shanda bu hikmat menga kulguli tuyulgandi. Ammo endi bilsam, insonlar hayotidagi ko'pgina ruhiy tushkunliklarga e'tibortalablik ham sabab bo'larkan.

- Shuncha qilgan yaxshilimni ko'rmadi, rahmat ham demadi, bir og'iz hol-ahvol ham so'ramadi, negadir e'tiborsiz bo'b qogan, tinchlikmikin...

Xayolimizda kechadigan bunday savollar shaytondan ekan va hech qachon yaxshilik keltirmas ekan.

Aslida biror yaxshilik qilib, evaziga kimdandir rahmat yoki e'tirof kutish ixlossizligimizning belgisi ekan. Ixlos - amallarimizning mag'izi, qalbi ekan. Ixlossiz, ya'ni xolis, Alloh uchun bajarilmagan har qanday ishning oxiri kesik ekan.

Mehnatga yarasha munosabat bo'lmayotganiga ahamiyat berishimizning o'zi ixlosimizda nuqson borligining belgisi ekan.

Xullas, sizga parvo qilishmayaptimi? Bu haqda o'ylanib, vaqtingizni zoye qilmang.

Yaxshilik qil, daryoga sol, baliq bilur. Baliq bilmasa, Holiq bilur, naqliga qat'iy amal qilib, oxiratingizga ixlos bilan bajarilgan go'zal amallardan zaxira to'playvering.

Boshlangan kunimiz yaxshiliklar bilan to'la bo'lsin.

Assalomu alaykum va rohmatullohi va barokatuh.

@tarbiyachi_blog

Assalomu alaykum va rohmatullohi va barokatuh.

Xayrli tong, azizlarim.

Bugungi ishni ertaga qo'yma yoki qolgan ishga qor yog'ar, degan maqolni hammamiz yaxshi bilamiz. Bunda negadir juda ko'pchiligimiz faqat biror jismoniy mehnatni tushunamiz.

To'g'ri, har kimning o'z kundalik ishlari bor. Ba'zi ishlarni bugun qilmay, ertangiga qoldirsak ham zarari yo'q. Ammo shunday ishlar bo'ladiki, uni bugun, hozir qilmasak, bu ishimiz ustiga qor yog'ib, izlar yopilib unutib qo'yamiz va katta yutqiziqda qolamiz.

Aytaylik, kimdir betob, undan hol-ahvol so'rashni kechiktirish, kimnidir hafa qilib, undan uzur so'rashni kechiktirish, kimgadir nimadir ehson qilishni niyat qilib, bu ishni ham keyinga surish, qaysidir yomon odatimizni tark etib, biror yaxshi odatni boshlashni o'ylab, buni ham ertangiga yoki dushanbaga qoldirish. Xullas, har qanday kechiktirilgan xayrli ish kutilmaganda bizga yoki o'sha yaxshilik qilmoqchi bo'lgan insonimizga o'lim yetganida afsus-nadomatimiz bo'ladi.

Dunyoda yaxshiliklarni kechiktirishimiz o'limni unutganimizdan ekan.

Alloh barchalarimizni xayrli ishlarga quvvatlilardan, shoshiluvchilardan qilsin.

Assalomu alaykum va rohmatullohi va barokatuh

@tarbiyachi_blog

#tafakkur

Tarbiyachilik payg'ambarlarning kasbi, dedik.

Avvalgi payg'ambarlar o'z qavmiga, Rosulimiz Muhammad alayhissalom bashariyatga tarbiyachi o'laroq yuborilgan.

Saodat asrida Allohning habibi Muhammad alayhissalom bilan birga yashab, xulqi Qur'on bo'lgan Zotga itoat qilmaganlar, xatto ozor yetkazganlar bo'lganidan keyin biz kim bo'libmizki, chaqiriqlarimizga itoatsizlik qilganlardan ranjisak, ularga o'zimizning kimligimizni ko'rsatib qo'ymoqchi bo'lsak.

Qalblarni isloh qiluvchi, bandalarni eng avvalo O'ziga, so'ng ularning ota-onalari, ustozlariga itoat qildiruvchi Allohdir.

O'quvchilaringizmi, farzandlaringizmi sizga itoat qilayotgan bo'lsa, mendan qo'rqqani uchun yoki meni hurmat qilgani uchun, deb, aslo g'ururga ketmang. Bu Allohning izni bilan bo'layotganini unutmay, O'ziga hamd ayting. Avvalo, itoatlarning eng yaxshisi - muhabbat tufayli bo'lganidir.

Qo'l ostingizdagilar sizga itoat qilmayaptimi, eng avvalo sabrli va istig'forda bardavom bo'ling. Kim Allohga itoat qilsa, Alloh ta'olo uning qo'l ostidagilarini izmiga bo'ysundirib qo'yadi.

Ota-ona o'zini o'nglamagunicha farzandlariga gapi o'tmaydi, mazmunidagi naqllar ham bor.

Farzandlarimizda nima nuqson ko'rsak, barchasi o'zimizning yo'l qo'ygan xatolarimiz, e'tiborsiz qoldirgan jihatlarimiz, sodir qilgan gunohlarimiz sababidandir.

@tarbiyachi_blog

Assalomu alaykum va rohmatullohi va barokatuh.

Xayrli kun, azizlarim.

Bugun qo'shni Qozog'istonda yashaydigan tog'amizning qiz nabirasi oilasi bilan Toshkentda ishi borligi zaruratidan biznikiga kelishyapti.

Eng qizig'i, biz uni ko'rmaganmiz. Yanayam ajablanarlisi, o'sha qiz nabira o'n kunlar oldin ukam bilan bog'lanib, Toshkentda ikki kunlik oilaviy ishi borligi va bu yerlarda boshqa qarindoshlari yo'qligidan biznikiga kelish uchun ruxsat so'ragani bo'ldi.

Avallari hech qanday ogohlantirishlarsiz to'g'ri qora tortib borilaverardi.

Nafaqat qarindoshlik, haddi sig'ib kimningdir uyga to'g'ri boraverish uchun mahalladoshlik maqomi ham kifoya bo'lardi. Bunday kutilmagan tashriflardan malollanish uyat hisoblanardi. Mehmon atoyi Xudo, deb, bori dasturxonga to'kilib, ketgunicha mehmonlik haqi ado etilardi.

Hozir esa mehmon kelmasidan turib, necha kunga ekan, qachon ketarkan, kabi savollarni uyalmasdan muhokama qilamiz.

Astag'firulloh, Astag'firulloh, Astag'firulloh! Fe'limiz uncha-munchamas, aaaancha torayib ketgan ekan.

Aslida, barchasi o'zimizning bu dunyoga mehmonligimizni unutib qo'yganimizdan bo'lsa kerak.

Qadimgilar keng fe'l, ketmas davlat bersin, degan duoni bejizga aytmagan ekan. Keng fe'llilik haqiqiy davlat ekan.

Assalomu alaykum va rohmatullohi va barokatuh.

@tarbiyachi_blog

#Mulohaza

SSSR davri yaxshi edi...mi?

Bolaligimizni eslasam, buvimiz hayot vaqtlarida singillari farzandlari bilan tez-tez kelib turishgani va buvimiz bilan uzoqroq tumanda yashaydigan o'sha singillarining uylariga borib turganlarimiz (u vaqtlarda shaxsiy avtomobillar yo'q, oraliq vaqti ikki soat bo'ladigan, tiqilinch avtobuslarda borardik), ikki uy narida turadigan kichik ammamizning uylariga huddi o'z uyimizdek bemalol kirib-chiqib yurganlarimiz, qo'shni davlatlarda yashaydigan (u vaqtlarda tamojniy degan narsa bo'lmasdi) katta ammamiz, xola va tog'alarimizning yiliga kamida ikki-uch marta kelib turishlari va uydagilarning borib turishlari ko'z oldimga keladi.

Biz tengi bola yoki nabiralari bilan kelishsa xursandchiligimiz ikki baravar ortib ketardi.

Birinchisi - mehmonlarning albatta tansiqroq nimadir olib kelishlari bo'lsa, ikkinchisi - tengdosh qarindoshlar bilan maza qilib o'ynashimiz.

Xullas haligacha kattalardan SSSR davri yaxshi edi, qandaydir baraka bor edi, degan gaplarni eshitib qolamiz.

Siyosati dinimizdan, o'zligimizdan ayirib, manqurt qul qilish ustiga qurilgan bu zolim tuzum davrida qanaqasiga odamlar hayotida baraka bo'ldi ekan, degan savolga, yaqinda, Abdulloh domlaning ma'ruzalarini eshitishim jarayonida javob topdim.

Baraka SSSRning siyosatida emas, odamlar orasida silayi rahmning keng yoyilganida bo'lgan ekan. Qarindosh-urug'lar bir-birlarining holidan to'y va azadan tashqari, shunchaki, xabar olib turishgani uchun Alloh O'zining haq va'dasiga muvofiq umrlariga, rizqlariga baraka berib qo'ygan ekan.

Hozir esa mehmon kutish uchun alohida xos xonalarimiz, xos idishlarimiz bor, sovutgichimiz bo'shashga ulgurmaydi. Ammo baraka yo'q. Fe'limiz torayib ketganidan qarindoshlarning shunchaki kelishi ajablanarli, xatto halaqit beradigan holga aylanib qolyapti.

Qarindoshlar ziyoratiga borish uchun deyarli barcha xonadonda kamida bitta shaxsiy avtomobil bor, ammo vaqt yo'q. Oldinlari bunday ziyoratlar uchun yo'l mashaqqatlari tufayli bir-ikki kunning bahridan bemalol kechilgan bo'lsa, hozir ikki soat vaqt ajratmaymiz.

Hayotimiz qulaylashgani sari xudbinlashib ketyapmizmi, deymanda. Hozir ko'zimizni ochib, bu xatoyimizni to'g'rilamasak, farzandlarimiz bizlar tenggi bo'lishganda, hozirgi davrimizni o'sha vaqtlarda baraka bor edi, qarindoshlar bilan har zamonda bo'lsayam telefonlashib turardik deb, eslab yurishmasa, hali.

Bu g'animat dunyoda mehr qolur, muhabbat qolur, degan jumlalar behudaga aytilmagan ekan.

@tarbiyachi_blog

Assalomu alaykum va rohmatullohi va barokatuh.

Xayrli kun, azizlarim.

Har gal uyda narsa buyumning ko'pligi meni band qilganda (aytaylik, parda yuvish, dazmollash, qayta ilish, gilam yuvish, ayniqsa, mehmon kutishdagi idishlar?‍♀...), saodat asridan bizga yetib kelgan rivoyatlardagi onalarimizning, sahobiya ayollarimizning uylarini ko'z oldimga keltiraman. Oddiy, loyshuvoq, bir xonali uylar, kiyishga yaroqli kiyimi qolmaganidan, bir muddat uylaridan chiqolmay qolgan Fotima onamiz, ustidagi yagona kiyimini kitobga alishtirib, uyidan chiqmay mutolaa qilgan muxlislar, kiyib yurgan yagona kiyimi yuviladigan kunda uyidan chiqolmay qoladigan voliylar...

Qanday ham o'lchovlarimiz o'zgarib ketdi ?. Har bir buyum uchun hisob qilinishimizni o'ylamay, ularni ko'paytirish bilan ovoramiz.

Alloh holimizni isloh qilsin.

Assalomu alaykum va rohmatullohi va barokatuh.

@tarbiyachi_blog

Assalomu alaykum va rohmatullohi va barokatuh.

Xayrli tong, azizlarim.

Vaqtinchalik dunyoda hamon tirikmiz. Tirik musulmondek yashashimizga O'zi quvvat va ilhom berib, umrimizning yakunini go'zal qilsin.

Ba'zida sokingina kechayotgan hayotimiz turli muammolar sabab, har kungi izidan chiqqandek ko'rinadi.

Alloh ta'olo bandalarini saralab olish uchun turli sinovlarni yuborib turar ekan.

Bu vaqtda isyon va noshukurlik qilish darajamizning tushishiga, Allohga taslim bo'lib, go'zal sabr qilishimiz - darajamizning oshishiga sabab bo'larkan.

Biz ko'pincha kimningdir boshiga biror ish tushsa, qandaydir gunohi bor ekanda, Alloh jazolabdi deymiz. Bu badgumon ekan. Buning o'rniga Alloh bu bandasini sevarkan, sinov berib darajasini oshiryapti deyishimiz yaxshi ekan.

Qadimda sahobiya ayollar kunlari har doimgidek, bir maromga tushib qolsa, xavotirlanishgan ekan. Alloh bizni unutib qo'ydimikin, hech qanday sinov bermayapti, deb qayg'urishgan ekan. Ular sinovlarni faqat gunohlardan poklanib, Allohning oldidagi darajalarini oshirish vositasi, deb bilishgan ekan.

Sizni ayni kunlarda qandaydir tashvishlar qiynayaptimi, Allohga hamdlar ayting. U sizni unutmabdi, O'zining nazdida darajangizni oshirishni iroda qilibdi.

O'zining huzuridan kelgan har bir ishga Alhamdulillah.

Assalomu alaykum va rohmatullohi va barokatuh.

@tarbiyachi_blog