‏على أعتبار إن الحياة فرص والفرص لا تتكرر .. نصيحة اليوم يا أصدقاء على لسان سعد علوش:
‏"لاقدرت تشوف وجه اللي تحبّه شوفه
‏ كنه أوّل مرّه تشوفه .. أو آخر مرّه"

‏يستفزّ الليل من صمتي سلامه
‏وأسرقك من شرهة الأيام رِيبة

‏لا طرَقت الصبر، وأتعبني مقامه؟
‏كلّ ما يطرِي على خاطرك جيبه!

‏أعْرِفك فجرٍ.. خذا روحي حمَامه
‏وهزّت غصونه؛ عواصفك الرتيبة

‏طالبك لا ملّ صوتي من كلامه؟
‏اِترك يدينك -من يديني- قريبة.

ليا جيت ابا ازعل ردني حكيها المملوح
‏يجيني بلا حتى عيوني .. يغمّغمها

‏-محمد الخس

"أحتاج وأحتجّ بـ إنّي عايش وباقي
‏هارب من الوقت مدري هاربٍ منّي
‏بالله لا تستثير أسئلتك أعماقي
‏أنا آخر إنسان ممكن تسأله عنّي"
‏- مانع الحربي

” أخترت روحي في زحام العلاقات
وقويت مع روحي تفاصيل روحي

لا أحاتي الآتي و لا اندم على الفات
أتبع خرايط رسم ربي بـ لوحي

الوجه واحد ما اختلف بالتلفات
يشبه بصدقه و اعتباره وضوحي

ما عاد يغريني جمال البدايات
انا النهايات الجميله طموحي “

‏أرحبي يا اللي تزاحم لك أسراب القلوب
‏كنها تزاحم الناس في مشعر مِنى

‏اشكريني يوم احنّك من كبار الذنوب
‏واعذريني يوم أزيدك مع العنوة .. عنا

‏الضمير الحيّ نوعٍ من أنواع الحروب
‏" يا ضمير مدور المصلحة نوم الهنا "

‏ما قدر يكسب محبّتْك يا الظبي اللعوب
‏غير أنا وأعوذ بالله من كلمة أنا

‏ان تركتيني قتيلٍ على مفرق دروب
‏اكتبي فتّانة العصر مرّت من هنا

‏واحفري قبرك وزاني وطيحي دوب دوب
‏ودي أقابلْلك لا قمت في دار الفنا

‏والله لا وجهك بعادي ولا قلبي بطوب
‏مير ميلي لين اشوف المنايا والمُنى

‏لا تشكّلتي مع الريح وانسام الهبوب
‏ما لقيت مْن العبارات غير الله لنا

‏" أنا ما استفيد من السهر غير في ثنتين
‏صلاة الفجر ومقابل الصبح وإشعاعه "
‏-زرعان بن سعود

" كلّ كلمة .. بلعنا شرّها بـ الكلايف
‏جعلها بالصحايف عند ربي ثقيلة "
‏- بشاير المقبل

" آمر ، الله لا يجيب لسيرة الفقدان طاري
‏انت صيغة الأمر بّد الناس منّك مستساغة

‏جلّ من صوّرك يا وجهٍ له ألفاظي جواري
‏بسمتك فيها بديع ونظرتك فيها بلاغة

‏للسهر.. للغّي.. لليل الطويل.. وللمساري
‏هاك قلبي واشغل اوقاته وَله وأملا فراغه "