من عالم الخدمه ردت
يحويله گلبي مصاب ..وگلولي اقرب باب
باب الخدامه..

وام البنين اسمه شفت
التقسم دموع العين..حبل الوصل لحسين
وأم الخيامه..

سلطانة الخدمة وردت منها المدد والعون
قطب الوفه والمعرفه ويفتر عليها الكون
وبچفها لو تمسح گلب يفز بالگلب حب جون

بديها كل قراري .. ولاچان اختياري
اعيشن بنكساري..على طف كربله

ندعيت الله آنه بيها..وخذاني كلبي ليها
وشفت كلشي بديها..والدمع اتوسله
___

يم البدور الاربعه
سويتي المصار..وتتناقل الاخبار
موقف وفائچ..

بعرش الكرم متربعه
قدمتي اغله الناس..وضحيتي بالعباس
اسوة عزائج..

كلشي يهون الخاطره ويبقه بسلامه حسين
وگلتي ييمه اعظم وفه امن تگطع الجفين
ولو امشي يرضى بالضعن مو عين اطفي ثنين

يريت اوياه اخدني..ييمه لو قبلني
لخيامه روحي افني..الحياة ابخدمته

لچن امر الله اناطر..اعله دربه ازرع نواضر
واتانيها البشاير..يرد ابعيلته
____

يادرة آل المصطفى
واقدس عشك موجود..جودچ بلايه احدود
وبسمچ ندبنه..

للحب مثل والعاطفه
واصل الجزع والنوح..وللوعة للمذبوبح
ونية دمعنه..

من فاضل الطينه وفضل تكونه من هل طين
كلمن تبع دينه وفخر انتبعچ اعله الدين
بديانتچ اقدس فرض تجري بدمعها العين

شفت دربچ وسيله..العبد لازم يجيله
ويطب حصنچ دخيله..ملاذ امن الهوى

اسلم كلشي بيه..ومدلچ اديه
نضرتچ رزق اليه..اعيش بنينوى
_
كسرتي اگلوب الحجر
من يسمع اتنوحين..ومو ولدچ تندبين
ولاشلتي همهم..

ولا الهم الگلب انفطر
فدوه الولد يرحون..لحسينچ ولم عون
يل صرتي امهم..

انفقتي اغله مايكون وصدقتي كلما جاء
محد ينال البر اذا ماينفق اغله اشياء
وانتي نطيتي اربع ولد واسيتي الزهراء

رضعتيهم شهاده..و وفاء ودر عباده
وتشوفين السعاده..تقديمين الولد

ولا يصبح مثيلچ..دخيل اسمچ دخيلچ
اليدگ باب ويجيلچ..تسوينه عبد
_
حسين سعد البهادلي
https://t.me/Hussein_s_b
#شهادة_مولاتنا_ام_البنبن_ع

تلم كل الخدم بنت الاجاويد
چبيره وتنطي كلشي من تمد ايد
باب الله الوسيع وخادمه حسين
كريمه ومنها نطلب شنهي النريد

بگد الدنيا تمد سفرتها
وتتجمع خدام حسين
توهب خدمه بگد النيه
الصرخه وحرگه ودمعة عين
الما يگعد مره بسفرتها
ايتيه دربه المدري لوين

ام البنين مرجع خدمه لكل الوادم
ام البنين تنَصب خدام لطف هاشم
ام البنين الشاعر والرادود وخادم
_

يا قطب الرحى للخدمه والجود
يا لصانعها حيدر تنجب حيود
بوابة الطف ودمعة حسين
الما موجود نادر بيها موجود

نسمع بالتسليم المطلق
بس لا ما نعرف معناه
من تگله امودع بالله
لحسين وتخنگها الاه
موتو يولادي اتگللهم
وبس لو رد ردو وياه

ام البنين رب الخدمه ورب الطاعه
ام البنين ماتت بعد احسين بساعه
ام البنين خلطت دمعتها اويه امتاعه
__

نديم الها الشكر اعله الخدامه
تكوين الوفه واهيه امامه
من عدها ونطب لكربله حسين
من الذر كفيله للقيامه

يا قدسيه والله اختارچ
وخله اسمچ وي اهل البيت
ومن ما خله حسين ابداره
انتي انطيتي كل البيت
سويتي الماصاير بالطف
وتگولين انه اشسويت

ام البنين بكلهن بالطف يذكرونچ
ام البنين بعين العباس يشوفونچ
ام البنين تمنيتي بناگه يركبونچ
_

ننطيها الگلوب وننطي العيون
وهيه بكيفها اتربيهن شلون
نطلبها الدمع والخدمه لحسين
سوينه ولو ذره بعشگ جون

چم چف ممدود يدكَ بابچ
يا ملجى وخيمه لهل ناس
ربينا وأدبي بمعرفتچ
يمرضعه الغيرة العباس
يا اثمر شجره بهل خدمه
يا هوه بعطفچ ينقاس

ام البنين اليگصدلچ ما يرجع خايب
ام البنين بحب المولى يرجع ذايب
ام البنين ومن تقصيره يصبح تايب
__

يا بدويه بس معصومه عالناس
گمر ونجوم عندچ ترفع الراس
غير بكبره گلچ يمه الحسين
اذاً وي ال هاشم هم الچ ساس

ابن الزهره ايگلچ يمه
حاشى واكثر ما تردين
زينب وحسين يودونچ
يالجيتچ ردتي اتخدمين
يل صلى الضعن اعله عيونچ
لمن گمتي انتي اتصلين

ام البنين ورد السانچ يلهج بسمه
ام البنين حسين الما ردالچ هدمه
ام البنين يم عباس ويم الخدمه
_

حسين سعد البهادلي
https://t.me/Hussein_s_b
#شهادة_مولاتنا_ام_البنبن_ع

اذا ضاعت علي روحي وحرت بين الاسامي
اذا نيتي حواها الشك وبعد ما الها حامي
اشد نيتي بعلگ بخته ورد اگصد امامي

امان الروحي شباچه
شما ثگلت محاملها
وريث الكاظم وعطفه
غطة دنيانه بكملها
المالها ضمان وحل
بيده القاسم يحلها

يا قاسم ايمان الناس ..ورزق الخدم من عنده
عاده الكرم بيه والجود.. من والده ومن جده
صك الخدمتي رايد ... اليمدله چف ما رده

ماخاب من توسل وجاء
ياقاسم الايمان والعطاء
_شكثر دگيت بالبيبان ولا باب انفتحلي
بسبب طبعي وعظم ذنبي وجهلت بطيني وصلي
وباب الرضا دگيت العفو طبعه وسمحلي

رؤف ورئفته تشبه
حنان ورئفة السلطان
واذا يطردني كل الكون
بحضرته الروحي الگه امچان
عدم لالي اسم لا لون
بجاها صار الي عنوان

ابابه اختم جفه روحي.. ويخلقلي عمر ثاني
وعر دربي وضعيف الحال..وخذت من سيدي ايماني
سلمته الامر مولاي .. ومثل ماراد سواني

وفي رحابه منتهى الجفاء
يا قاسم الايمان والعطاء
_اخو المعصومه يعصمني وشفت غاية خلقتي
اذا مو عصمته مولاي اضيع اني وخدمتي
واذا جدمي عثر فد يوم يجي يمسح عثرتي

بجلاله وبجماله اسرح
وسلطنتة هيامي
خسف نور الكمر حسنه
وضواه فزز غرامي
وصبح وردي حروف اسمه
بصحوتي وبمنامي

الصبح ساقي بثواب اهله ..سقاني من بحر جوده
بوكت مامش جفوف تگود..بس اجفوفه ممدوده
لزم ركن الدمع بالعين..واني اركاني مهدوده

وصرت استحيه في الخلاء
يا قاسم الايمان والعطاء
_بتاريخه الزمن عاجر شكد حاول يضمه
بشخصه شفت تتجله شكو انوار عضمه
طاهر من صلب طاهر من والده وامه

حفيد الصادق وعم ال
جواد وابن ابو محمد
الكاظم من نسل هاشم
جذر للزهره من ينمد
واخو الضامن گمر مشهد
ياهو بعظمته محد

حگي لو لذت عنده..حمامه بصحنه لويقبل
واكضي بخيمته عمري..وما استبدل اتوسل
تقبلني بحسن ذاتك.. غيرك ابد ما اندل

يانور رب الارض والسماء
يا قاسم الايمان والعطاء
_تكفل غربتي وتترس هل دنيا غربته
احسن روحي بين اهلي من ادخل حضرته
مو بعمالي اگصدله . اگصدله برحمته

حشود ابابه تتوسل
ويمد ايده السخيه
العبد بعتابه لويسجد
وطلب منه عطيه
بمصابة الي يتوسط
اليالي الفاطمية

اجيته استجدي ادموعي..بليالي الزهره ينطيني
عهد دمعاتي شديته..بشباجه وملك عيني
وجمرت كلبي اتوسل ..ما تبرد على حسيني

نستأذنُ الدموع والبكاء
يا قاسم الايمان والعطاء
_حسين سعد البهادلي
https://t.me/Hussein_s_b
#شهادة مولاي قاسم الايمان والعطاء ع

يمه زينب تعالي… الماحجيته ارد احجي
مجبوره يم حيدر اسكت..ينهضم ما اگدر اشكي
عن كلشي خليني اسولف ..والگلب خل يتصبر
البسمار لمن اجاني ..بوليدي مدري شكسر

بضلعي مافكرت لحضه
وفكرت بالما اعوضه
المحسن امن يدي فگدته…بيش اعوضه

بحشاي حسيت بعذابه
وعرفت من رفسه صابه
هذا بسمار المنيه…يمه عرضه

محتاره بين الضلع والشهيد
ايد اعله ضلعي واله انطي ايد
والنزف ماخذ حيلي ونحنيت
والدنيا جارت مدري شتريد
_____

من رفس بابي عليه..وامر عبيده بضربي
بجذوع بابي الوذن..ويايمه يرجف كلبي
فاطم يكلوله واسمع..كلهم (وإن)ماعرفني
ماهمني يمه عصرهم..بس محسن الي هضمني

من طاح يايمه عذابي
ومن دماه اتحنه بابي
طحت وي طيحت جنيني ..شكد هضمني

المارحمني من ضربني
من ضربته للگاع ذبني
وهمي چان بعيني اشوفه..همي ابني

وحيطان داري بيها اثر دمه
والعين من سطرته امورمه
لا رعوا حرمه لا رعوا حجاب
هدت علي عصابه مجرمه
_____

باخر انفاسي شصيحن..ودخان خانگ ريتي
ونيران داري شفتها.. طالت ادي وبيتي
ياعلي شكد ردت انادي..واعرف علي تعرفيني
ينكسر لمن اندبه..وهل صحت فضه اسنديني

ادري ماتقبل حميته
لو سمع تنخاه ام بيته
وعلي مجتوف بوصيته..وما صحتله

الشهم لو ما اخذ حيفه
يموت بين اچفوفه سيفه
وغيرته تذبح ابروحه….لو تكتله

حيف الزمن وي علي هيج دار
مجبور ما يلزمه ذو الفقار
ومجبوره ما اتنخه اني بيه
چا صار جرحه بطوله يمه صار
___

ياغربتي بداري احسها..اصبح غريبه بداري
يايمه باجر تشوفي..شنهي العنيه بالصحاري
سمعي يازينب وصيتي..وشوفي هل نار وحطبهم
باجر احسين وعياله..هم تجي تحرگ خيمهم

هل نار ما ترحم خواتچ
تشتعل يمه بخيامچ
وكلها غربه لو ركضتي..بالصحاري

جرح واحد آنه بيه
وبحسين الف وتسعميه
گبالچ ايطيح وتعوفي…بالبراري

خيل وزلم عالخيم من تغير
لاترحم اچبير ولا زغير
وما تعبر الطايح تدك ضلوع
وماتعرف شداست ارض؟امير!
___

حسين سعد البهادلي
https://t.me/Hussein_s_b

(هم فاطمه)

جاء في حديث الكساء.. قال الأمِينُ جبرائِيلَ: يا رَبِّ وَمَن تَحتَ الكِساءِ، فَقالَ عَزَّ وَجَلَّ: هُم أهلُ بَيتِ النُّبُوَّةِ وَمَعدِنُ الرِّسالَةِ،*هُم فاطِمَةُ وَأبُوها وَبَعلُها وَبَنُوها.

يا ربي من تحت الكساء
جبريل يسئل بالسمه
والله اختصر كل الحچي
تحت العَبا هُم فاطمه

هم فاطمه.. رايد يوضحله ويگول
هم فاطمه.. التحت الكساء كلها البتول
هم فاطمه.. لو ما هيه كلشي يزول

ما كان او ما سيكون من نور فاطم انعجن
كلشي انخلق حي وجماد لخاطر عيون ام الحسن

يا فاطمه.. يافاطمه.. لبيكِ يا أم الحسن
___

وفي الحديث القدسي(قال الله تعالى) «يا أحمد لولاك لما خلقت الأفلاك، ولولا علي لما خلقتك،*ولولا فاطمة لما خلقتكما»

كلشي انوجد نعرفله حد
بس فاطمه ابلايه حدود
طٰه وعلي خير البشر
وبفاطمه تم الوجود

هم فاطمه.. الله اليحدث بالسما
هم فاطمه.. للنبي وحيدر مُلهما
هم فاطمه.. لولاها ما خالقكُما

يا رحمة الله اعله الارض وبيها انعرف ربها الرحيم
سُبحان ما صور بها من غيرهُ يخلق عظيم

يافاطمه.. يافاطمه.. لبيكِ يا أم الحسن
____

قال الإمام الحسن العسكري ع : نحن حجج الله على خلقه وجدتنا فاطمة حجة علينا

لا تخلوا من حُجه ابد
ما تستقر هاي الارض
وهية الاميره اعله الحُجج
الها الارض طول ابعرض

هم فاطمه.. نور الامامه انمزج
هم فاطمه.. بيها وبديها أنسج
هم فاطمه.. ياحُجت الله اعله الحُجج

مستودع وسر الاله بيها يجن حتى الجنون
وكل الأئمه بالعُلا ابفاطمه يتوسلون

يافاطمه.. يافاطمه.. لبيكِ يا أم الحسن
____

ورد عن النبي محمد أنه قال: فاطمة بضعة مني، يرضى الله لرضاها، ويغضب لغضبها.
وكانت إذا دخلت عليه قام إليها فأخذ بيدها وقبلها وأجلسها في مجلسه،

چان النبي بيها يگول
امي وبضعتي اصبحت
وما يرضى الله اعله الخلق
الا اذا هيه رضت

هم فاطمه.. كل نور الها ينتسب
هم فاطمه.. المعصوم منها وينحسب
هم فاطمه.. الله يحب كلمن تحب

يا أم ابوها وعصمته وكل الفضل الها يدوم
ولمن تگصده فاطمه چان النبي بكبره يگوم

يافاطمه.. يافاطمه.. لبيكِ يا أم الحسن
____

وقالت فاطمة(عليها السلام): أنا الشجرة التي تخرج أُكلها
وتعني الحسن والحسين عليهم السلام
فالسلام عليك يا ممتحنة امتحنك الذي خلقك قبل أن يخلقك وكنت لما امتحنك صابرة".

عله وسبب واصل اي جذر
الها يعود وكل عظيم
باچر يصير ابما تشاء
هيه السراط المستقيم

هم فاطمه.. انطاها الحُسين اويه الحسن
هم فاطمه.. بضعتها اسياد الزمن
هم فاطمه.. بيها امتحن كُل مُمتحن

يا شجرة الجنه التي يؤتي اُكولها كُل حين
لو عشتي اكثر فاطمه ثمرج فقط مثل الحسين

يافاطمه.. يافاطمه.. لبيكِ يا أم الحسن
_

حسين سعد البهادلي
https://t.me/Hussein_s_b

اني صم ارماد بالي
طحت من موگد عزائج
وگابلت جف ريح عاتي

وخايف اتطشر ذنوب وانفضح
وصار حال الضيم حالي

ومالي حيله ولا وسيله
لا الي جذر اليكضني
ولاني مثل الناس هاي
كلمن تلزمه دمعته
الدنيا فرصه
خاف تخلص حصتي وتخلص ايامي
واني واحد لا يُبالي

ضايع وماعندي بالدنيا عرف
توني شميت الهوا
وطلعت من بحر اضلم
وعاينت مامش جرف
وين ذباني زماني
وليش بس اني اعاني

وفجئه مر النور عيني
وبيه صرت ألمح امل
ومدري يا ديره خذاني
وصرت احس هل نور رحمه
وصرت احسن ادباني

وبصرت خيمة عزاء
واسمعت چلمه ليالي
واسئلت.؟
شنو بيها هل ليالي

وجاوبوني ..
هل ليالي
بيها أم الحسن مسطوره بجفنها
بيها أم حسين يستشهد ابنها
بهل ليالي فاطمة شكد عذبوها
وتنمع تبچي ابوها
وتنفي لو طلع ونها

وفززاني …ذنبي نفسه الي عماني
وبعد شتفيد الندامه
المثلي شيقدم عذر لوشاف امامه
ولوينشده
ليش ما عشت المصاب اوي الخدامه

اخ ياذنبي الحرمني النعمه من هاي اليالي
واني صم ارماد بالي

كون اعوض
شكو لحظه بيها فرطت وجفيت
وشكو يازهراء اسمع
مرت اذني ومابچيت ..غمني ولله من جفيت
وجنت ادري الدمع چفچ بيه يلم
واني ادري انتي مايبچي الچ بس الزلم

وآنه جاي
ابتدي من البدايه
وانتي منج تبتدي
شكو بالدنيا نهايه
واني جاي ياعزيزة گلب ابوها
وعندي مزجات البضاعه
بشر رايد يطلع امن الدنيه بس دمعه متاعه
وجيت اسئلج ..وذله الغيرچ سؤالي

ارد اعيش امصيبتچ مولاتي دمعه
بلكي دمعي يروي صبخة بور كلبي
ولئن موكلمن يطب خيمة خدمتج
اله ابو گلب السليم

انتي يا امي الحنينه
غرگان يا اعظم سفينه
انطيني جفچ ..بلكي جفچ..يرد يخلقني بشر عاشگ ونيينه
واعرف اوداع الغوالي
والطم اعلى الضلع روحي
مثل مايلطم علي ومكسور ظهره
وشكبرها بروحه ياغربة الزهره
الكاسر الدنيا
الضلع بيه شفت كاسر
اخ لو ينظر العاشر
اخ ياغربة العاشر

وكون احدد كل مصيري
لو اعيشن عمري كله اوي الدمع
لو اصيرن باب على الزهره اندفع
وماكو بالدنيا خيار
لو اصيرن بلسم اجروح الزجيه
لو اصيرلها جذع
شكبره يا رزق الدمع

وكون اصيرن مااجامل عالزجيه
وعندي اكبر كل قضية
واعرف بهاي القضيه
ياهو مظلوم وصبح بيها ضحية
واعظم ايامي اليالي الفاطمية
وانتي يامولاتي بيدج كل قرار

اخذيني يا مولاتي خادم
عبد الكم
واحلى من حريتي هاي
ماكو اجمل من عبد وانه بكنفكم
بدونكم مولاتي اصبح
مالي اول لا لي تالي
اني صم ارماد بالي
————————

حسين سعد البهادلي

https://t.me/Hussein_s_b

ياجمعه ويحين الفرج
والكون اسمعه بأسمه ضج
رد ابسلامه المنتضر

وبيرق الساده يرد يرف
من بعد ميتين والف
عكب السنين الحق ظهر

وتتكحل اعيوني بفتح الله المبين
واسمعها منه يالثارت الحُسين
وينادي ياثار الضلع ودم الجنين

اللهم هل طلعه لا تحرمها  من  عيني
وطرفه عين لتفرق يارب بينه وبيني

اغله من كلشي نضرته..مولاي
عبد  مملوك  الحضرته..مولاي

اللهم عجل لوليك الفرج
__يتصبر المن ياجرح
والطف مشه بجرحه ملح
واكبر جروحه عمته

من يسمع تنادي تعال
ومسبيه من عز ودلال
ويموت كلما نادته

ويشوف عمته عينها تصد للفرات
ثمانين طفله امجلبه بيها امن البنات
ويفرن  امن  اخيامهن  المدللات

ويسمع زينب اتنادي ياعمه بگلب ملهوف
وتفرق صيحه اليدعي من الصيحه وكت الخوف

ويظهر ويجلي الرزيه..سيفه
يطفي  نار  الهاشميه...سيفه

اللهم عجل لوليك الفرج
_للعايش بليل اهدعش
مو يسمع ايشوف العطش
ويشوف صيوان انهدم

شيهيجه اكثر للضهور
ويشاهد بعينه الخدور
ضلت بلا حامي وعلم

وادركنا يسمع ياحُسين امن الخيام
ويريد ينهض بس تفز بيه السهام
وبگلبه تلچم كل جراحات الامام

ينضر جده من يگوم وعالغبره يرد يطيح
يضل دم عينه ايلالي ويميل شما تطگه الريح

ينادي  ياجدآه  حرامات..ويلي
وينترس صدره بالاهات..ويلي

اللهم عجل لوليك الفرج
__لابد يجي يومه ويحين
وينشر لواء الطالبين
ويصير اله كل الامر

لهل كون لابد من قرار
يامن بديه يبدي البدار
ويجدث ضلامات الكفر

والدنيا تهتز وي علامات الظهور
الطلعه البهيه تهدم احصون وقصور
وترجع تلوح الغيم عدنا شگد قبور

لابد سيفه يوصل يوم لجذور الضلامه يفوت
ولابد بيده يصلب يوم اعله شجره الجبتُ والطاغوت

وينعى الحسين ونواسيه..بدمعه
ويكسر  الكون  بنعاويه..بدمعه

اللهم عجل لوليك الفرج
___
حسين سعد البهادلي
https://t.me/Hussein_s_b

تمنيت كون اتعطلينه
ولانوصل لباب المدينه
ياهو ايتلگاها الضعينه
وجيت بضعن هايم..

خاف أنشد بخواني حيره
چا وينه سيدها العشيره
اوين الكفل ضعن الاميره
ينشدون اهل هاشم..

ما چن هل الضعن لحسين وين اخوانه واولاده
وبخت السادة بيها شصار النشد عن عمة الساده
وعاده القتله لو گالوا بس السبي مو عاده

بكل نشده بيه الجروح اكثر تزيد
معقوله مسبية بنت الاجاويد
وهل عاودت من غير اهلها

شحجي وشرد وآنه ما املك اجواب
اليسئلني عن الكفلني وعلي انصاب
چاوينه عباس الكفلها

عاودينه يهلنه واجينه..والضعينه لفت للمدينه
____

ارجع وطب ابيوت اهلنه
ولا بيها گطره امن المحنه
لا چنها هاي الدور النه
المابيها خواني..

متفطره بيها الحياطين
چن گلبي هم كاتلها الونين
عگب التركها ورحل لاوين
ومنضرها اذاني..

مابيها دفوّ امن حسين وضلمه دور اهالينه
وفارگها الامان وراح عگب عم ضعني وسكينه
وصرت ادعي الله چف اخوان لو ساعه يرد لينه

صرت ادعي الله يرد ليه الحسين
ويشوف حال البقو بفراگه ميتين
بحي الهواشم صرنه غربه

يخنگني صاير بعد عينه الدار
بكل ذكرة التمر علي انجوي بنار
نار الفراگ هواي صعبه

يله موتي يروحي الحنيه..والضعينه لفت للمدينه
_____

خلاف اخوتي تمنيت موتي
المن اعيش ابلا اخوتي
ياهو البعد يسمع نخوتي
ذاك الزمن وينه..

محمد اجه وماعرف اخته
ولمن عرف لونه خطفته
شافاني بس گلبة كسرته
وسولف دمع عينه..

ابتشر گلبي اخو عندي وهضمني أشر عليه
هاي الحرمه كال منين اخوي ويشتبه بيه
ومن گالوله زينب هاي طاح وگال مو هيه

اختك إنه وخويه نادي عليه
هل چلمه فوگ النهر حيف رميه
مشتاگه حيل اسمعها منك

من ماتت الخويه صرنه سبايه
لا ضلت اخيام ولا عدنا راية
وهل صار هذا كله بختك

لا اخو الضل بعد ويحمينه..والضعينه لفت للمدينه
____

وين اليعاوني ابمصابي
ويشارك اجروحي وعذابي
وأم البنين ايتاني بابي
تنعى مصيبتنا

حملي انچفه وبلكت تشيله
وتبچيهن ادموع الثجيله
وتتگابل اويانه العليلة
دمعه اعله دمعتنا

اول ماحچت عباس گالت وفه الخوه
ونزفت عيني دم مو ماي يمن دمعاتي اله تسوه
كلتلها يأم عباس راح الطيب النخوه

وين المثل خوته الگه بعد وين
راح وكسر كل ضهر بينه نصين
وضعنا وحبل گيد ادينه

طاح وبعد ما بقت النه اخيام
ومات الحسين وخذونه اسره للشام
ورديت هم زين بَسكينه

وانتهت يمه رحلة سبينه..والضعينه لفت للمدينه
______

حسين سعد البهادلي

📜رجوع ضعن الامام الحسين علية السلام
الى المدينة..
https://t.me/Hussein_s_b

فإن مات او قتل تنسي كل وصية
وينسي ما أمر وشوصه بالزجية

باب الزهره يگلهم بابي
وهل باب ل الله اقرب باب
ويُئذيني كلمن اذاها
فاطم وچفوفي الها حجاب

حچي النبي اخضر بعد وباب ام ابوها احترگ
ومثل الجفن عالضلع بجذوعه من انطبگ
ويرفسه برجله الزنيم حايط وجذع انشبگ

قالوا وإن ..للزهراء
محد يحن..للزهراء
وسطروا جفن..للزهراء
يازهراء

نسوا ما قال طاها رضا الباري رضاها
__

انهتك ستر النبي وبعده مُسجى بالدار
حرمته مارعوا وبالبضعة فاجعة الصار

مالحگت تدفن واليها
واصحابه هدوا بالنار
توها تريد تحامي المُحسن
وتلاگت وي البسمار

لمو احقاد وحطب ودخان غطه السمه
وبيا ذنب يحترگ دار الوحي بفاطمة
وبدم جنين ام حسن الحايط تخضب دمه

حيره ابتدت..للزهراء
ونار اوصلت..للزهراء
وگلب احرگت..للزهراء
يازهراء

يأنُّ لها لظاها رضا الباري رضاها
__

بأهل بيت النبي محد حفظ گرابه
ولا چنه نصح ولا سمعت الصحابه

أمنهم بكتاب الباري
وشگد وصه بأهل البيت
ومحد يـتئمن بس حيدر
اوصلت حدها لدوس البيت

صُمٌّ وبُكمٌ عُمْيِ الگالوا هجر مُحمد
ونفس الذي حجاها بناره اعل بضعته هد
وبس چف علي اليحامي وبوصيتة تگيد

وحيدر صبر..للزهراء
وشاف العصر..للزهراء
وطوله انكسر..للزهراء
يازهراء

فحيدرٌ حماها رضا الباري رضاها
__

قسى هواي الزمن والزهره عذبوها
امنعوها امن الدمع وما رضوا تبچي ابوها

ماقبلوا تبچي اعله مصابه
وسلبوا حگها شر الناس
مازالت من بعد الهادي
اعله فراگه متعصبه الراس

وبيها جره اعظم جرم ضلع وابن فارگت
وصارت نحيلة جسد ومثل الخيال اصبحت
واعله الهضمها اندعت والربها فاطم شكت

والله غضب..للزهراء
لو غيضه صب..للزهراء
كونه انگلب ..للزهراء

قضت تشكوا اذاها رضا الباري رضاها
__

حسين سعد البهادلي

📜شهادة النبي الاعظم والهجوم
على دار الزهراء صلوات ربي عليهم

https://t.me/Hussein_s_b

كلشي انتهه..صوت الحرب..وضاع الدرب..عن الفرات

كلشي انتهه..من حشمت..وماجاوبت..وكل صوتي مات

صحت يحسين ادركني ومارديتلي احجايه
شفت رايه ترفع ابعيد بس مو النه هل رايه
طلعت اعليك مذهوله وعبايه تلوذ بعبايه

شفنه الي ماشفناه گبل
نركض حوافي عالرمل
ومن بين ادي ضاعن قفل..حُسين

چم خيمة طلعت من خدر
والتطلع ادوس الجمر
عذبنه ياخويه العصر ...حُسين

والتل بعد عليه..واحمي ردت رقيه
_____

صار العصر..وكلبي انكسر..ومال الضهر..وطولي انهدم

صار العصر..وعيني طفت..والخيل اجت..صوب الخيم

بگفانه اعتلت خويه النار بوجهنه الخيل نمشي لوين
عامي اعيونا الدخان ويضيع الي يغمض العين
وصحنه بالعويل حسين ويرد الصوت مات حسين

وضلينه بعازة اخو
واطفالك ابعازة ابو
ولاحكنه من جينه العدو..حُسين

ياخويه يرخص كلشي الك
عدنا المهم بس نوصلك
ميت وندهت اتوسلك..حُسين

نومك ولا حلالك..انهض اجت عيالك
___

ليك اوصلت..وحالك شفت..يمك متت..من العذاب
ليك اوصلت..ياغربتك..ووسداتك..من التراب

العطش قبل الجرح كاضيك ضامي وگلبك تفطر
بعباتي الشابعه دخان افيي اعليك من الحر
أكعدت يمك اضمد بيك اشد وجروح تتطشر

حلفتك بأمي انتهض
وضل جفك ايدگ عالارض
بلكي الجمعهم تعترض...حُسين

راح امشي من ايدك غصب
ويطوي ابضعنه اشجم درب
ومو هاشم التحدي غرب..حُسين

گوه المشيّ عليه..وانت تضل رميه
_____

منك رحت..الضهر الهزل..وچفي الحبل..وچف البنات
منك رحت..بعضن انسلب..وماتن تعب..المدللات

ياهو انده واحشمنه عدل ياخواني اريدن حل
درب راح امشي ما مسحوگ وبيه الحادي مايندل
اموتن ريت وتگومون لون هل روح تتبدل

راح امشي مايل محملي
تمنيته يحضر كافلي
وچف يحضر ايردني الهلي..حُسين

نودعك من ظهور الهزل
ومايرفع ايده اي الطفل
يهضمك اذا شفت الحبل..حُسين

ولاتهم خويه بينه..راحت سبي الضعينه
______

حسين سعد البهادلي
https://t.me/Hussein_s_b