ПОЁНИ БЎЛМАС
(“Ошиқ Ғариб ва Шоҳсанам” достонидан парча)

ДОСТОН ВА УНДАГИ ПАРЧА ҲАҚИДА ҚИСҚА БИЛГИ: Шоҳ Аббос ўз қизи Шоҳсанамни вазирининг қўшиқчи ўғли Ғарибга турмушга узатишга ваъда беради. Бироқ вазири вафот этгач, шоҳ Аббос ваъдасидан тонади: қизини бошқа одамга турмушга беради. Бу ҳам етмаганидек, шоҳ қизининг тўйида қўшиқ куйлаш учун айнан Ғарибни хизматга чақиради. Достондаги ушбу парча ошиқ Ғарибнинг ўз севгилиси Шоҳсанамнинг тўйида куйлаган қўшиқларидан биридир.

Киши энгмак (меҳнат) билан мол қозонмаса,
Галған давлатининг поёни бўлмас.
Ҳар сўзнинг мағзини билиб сўзласа,
Қутулар ўлимнан, гумони бўлмас.

Беҳуда дунёда қайғу еганнинг,
Ҳар етар-етмаса кўнгил берганнинг,
Билиб кўриб, ёлғон сўзни деганнинг,
Ор-у номуси йўқ, иймони иймони бўлмас,

Иши ғайри бўлар давлати қайтса,
Юртиннан айрилиб бир юрта кўчса,
Шоҳлиқдан айрилиб тахтиннан тушса,
Бекнинг ҳеч бир айтган-дегани бўлмас.

Ёрдан баҳра олар ошиқ пешаси,
Ошиқлар ҳаёли, ёр андишаси.
Синғандур Ғарибнинг кўнгил шишаси,
Энди тузатмакнинг имкони бўлмас.

Мардон-ошиқ ғарибларнинг пиридур,
Ошиқ бўлган ўласи йўқ, диридур.
Ман Ғариб ҳам чин ошиқнинг биридур,
Бунда галған оннинг даврони бўлмас.

@birturkyurt

Ta’n olish kerak, “musulmonman” degani bilan aksar xalqimiz Allohdan ko’ra davlatdan, SNBdan ko’proq qo’rqadi!

@Asliddinkamol

Каримберди ТЎРАМУРОД. КЎКБЎРИ

Энасойдан Ҳазаргача сузардик,
Бўлмас эди биронтанинг сўрови,
Қандаҳордан Ўролгача кезардик,
От жиловин тутмас эди бирови.
Ўтолмаймиз бугун Жайҳундан нари,
Қадам боссак нечасининг бурови –
Қайда қолдинг, кел, энам-ов, Кўкбўри!
Ҳолимизни бил, энам-ов, Кўкбўри!

Помиртовдан сел мисоли энардик,
Олтин Ўрда чодирида қўнардик,
Иссиқкўлда гулмоҳидек сузардик,
Тошҳовузда чўмилардик, тинардик.
Ҳисор ётми, Ёйиқ борсак уётми,
Қай бирига, эна, энди кўнардик –
Қайда қолдинг, кел, энам-ов, Кўкбўри!
Ҳолимизни бил, энам-ов, Кўкбўри!

Ўғилларинг мўғул билан жанг қилди,
Ботирларинг Чингиз ҳолин танг қилди.
Енгилса-да тиз чўкмаган зўр боланг
Ҳинддан сакраб, ёв оғзини ланг қилди,
Тожмаҳалдек мўъжиза яратганлар,
Жанггоҳларда фил лашкарин чанг қилди.
Қайда қолдинг, кел, энам-ов, Кўкбўри!
Ҳолимизни бил, энам-ов, Кўкбўри!

Оқ ўрисла солишди Қурманжонлар,
Қизил ўрис додин берди Полвонлар.
Ёв қонига тўлдирди-ку Жайҳунни,
Иброҳим бек отли ёвқур арслонлар.
Келинларинг бек туғмай қўйди, эна,
Қани бугун алп йигитлар, султонлар –
Қайда қолдинг, кел, энам-ов, Кўкбўри!
Ҳолимизни бил, энам-ов, Кўкбўри!

Ўрис балосидан қутулдик, девдим,
Шукурки мустақил, ҳур бўлдик, девдим,
Кўзларимиз ҳамон ўрис томонда,
Адашдимми, энди зўр бўлдик, девдим?
Ҳурлик учун берилган жон унутми,
Ўзи беклик томон бурилдик, девдим –
Қайда қолдинг, кел, энам-ов, Кўкбўри!
Ҳолимизни бил, энам-ов, Кўкбўри!

Сибирдаги ўликларни унутдик,
Кафансиз у тирикларни унутдик,
Ватан деган ватансиз қайда қолди,
Мозорсиз у чирикларни унутдик.
Турмаларни тўлдирган гуноҳсизлар,
Қодирийга шерикларни унутдик –
Қайда қолдинг, кел, энам-ов, Кўкбўри!
Ҳолимизни бил, энам-ов, Кўкбўри!

Кўкбўри, кел, боланг орини уйғот!
Эл ичра номуси борини уйғот!
Мадаминбек каби жасурларингни,
Шермуҳаммад Бекдек зўрини уйғот!
Кел, бизларга бўри сутидан эмиз,
Ичимизда ётган бўрини уйғот –
Қайда қолдинг, кел, энам-ов, Кўкбўри!
Ҳолимизни бил, энам-ов, Кўкбўри!

Каримберди Турамурод

@birturkyurt

Bobamurod og'a xaq ekanlar mana isbod